كذبة حولتني لسفــاح[بالدارجة]

011

بقا جارو في طريق وهو حاكمو بين يديه باش مايهرب...داير ليه شدة الحولي قبل ماتديه يتذبح في العيد الكبير...كانو الناس كيشوفو فيهم هاد شيى لي خلا سعد مايكونش راضي وكل ماكيحاول يفك قبضة خوه من دراعو كان يعقوب كيزيد يزير عليه،حتى فقد الأمل و دار عين ميكة على شوفة بنادم لي فيها ريحة الفضول.

يعقوب كيعاود هضرتو وهو مزال شاد في خوه:الواليدة شافتك فاش ماكنتيش بايت في الدار و راني كذبت عليها و قلت ليها سيفطتك لطنجة...سمعتيني؟ ملي تدخل لدار قول ليها شي كذبة

سعد بدا كيبعد يديه: رخفلي يدك اصاحبي راه قطعتي ليا الدم في عروقي .

يعقوب رخف شوية من شدة لي داير ليه و نطق ب تشديد :سمعتيني شنو قلت ليك ولا لا؟

سعد:سمعتك سمعتك

يعقوب وقف حيث شاف راسو قرب لدرب و حرر خوه من قبضتو ولكن في نفس الوقت كان في وضع هجومي ناوي غير اذا خوه نوا يهرب هينقز عليه و يطيحو للارض حيث اذا حتى طلق رجليه و هرب ليه ثاني ماهيشدوش وهاد مرة شوف تشوف واش هيلقاه ولا لاء ...نطق بنبرة هادئة :سير لدار دوش و رتاح حتى لغدا عاد هندوي معاك على هاد الهروب و النعاس في زنقة اما الموضوع المهم حتى نقول للواليد شنو كاين عاد هنشوفو الحل لي هنديرو ليك

سعد شاف في خوه مستغرب وايلي صف عفى عليه من السلخة الربانية؟ ولا غير كيثبتو باش مايهرب ليه؟ في كلتا الحالتين مكانش هيعاود يهرب تجربة ديال البارح كانت كافية تخليه يعرف الحزقة في الشارع شحال صعيبة عليها نطق: ماهربتش غير كنت باغي نخلي ليك الوقت فاش تبرد

يعقوب حط يديه على عينيه لي واضح عليهم التعب: سير دابا لدار وماتقولش للواليدة راك شفتيني .

سعد:صف راك قلتيها و عاودتيها كون هاني
يعقوب: اذا جيت لدار و مالقيتكش تما هتزيد تثقل عليك الخلاص .

سعد شاف في خوه و كمل طريقو لدار بلا مايجاوبو ...
____

كانت جالسة فوق كرسي صغير ديال الحمام و حداها جوج سطولة كبار ديال لما كدوش و هي مغمضة عيونها باش مايعميها الشامبو ...
كانت كل ماكتفكر القمعة لي كلاتها كتعض في لسانها و تحلف ماتعاود تهضر معاه و بعض مرات شيطان كينقز فوق راسها و كيقول ليها تديكلاري بيه و تجرجر بوه في الكومسارية باش توريه الخلاص ديال جوج وجوه كان معاها مزيان فاش كان خوفان على راسو من الحبس غير ضمن راسو و شافها حيط قصير قلب عليها وجهو .
كانت حالتها فحال حالة شي مراهقة في الكوليج فاش كيبيعوها صحابتها للعجل و يسيفطوها تعتارف بالحب للكراش ديالها حتى كيصدق قامعها .
نفضات الافكار وشلالات شعرها و ذاتها من الصابون وهي حاسة بلي سخونية الدوش صهداتها و دوخاتها. لوات عليها الفوطة و لبسات صندالة اخرى ناشفة في رجليها باش ماتزلق و تجيب الربحة و مشات لبيتها تلبس حوايجها .