كذبة حولتني لسفــاح[بالدارجة]

016

فتحات عيونها الناعسة على لمسات يد سخونة كتمر على شعرها الناعم لي كان منسدل على المخدة و مغطي بعض ملامح من وجهها ...تفوهات بتعب و مددات يدها وهي حاسة ب عضامها عاطينها الحريق...شافت اتجاه شرجم لقات الظلام طاح ضورات وجهها في اتجاه هذاك لي كان منحني في اتجهها و قريب منها ... مدات يدها و بعدات يديه لي كانو متسللين ل شعرها ونطقات بصووت ناعس ممزوج مع ملامح مقتضبة: بعد يديك .

حذيفة وقف على رجليه مبعد يديه على خصلاتها ونطق وعينيه مزال موجهين ليها: مالك؟

ريم قادات جلستها فوق السداري و ضورات عينيها لقات الصالون الخاوي رجعات شافت فيه: نتا لي مالك؟

حذيفة مد يدو اتجاه شعرها مرة اخرى ونطق و عيونو العسلية مقابلين مع عيونها البنية: شنو واقع ليك باش تبدلتي عليا؟!وعلاش كنتي مخبية عليا هاد شيى لي واقع ليك واش مثايقاش فيا؟

ريم بعدات يدو للمرة ثانية و فصلات خط النظرات بيناتهم : لي كان بيناتنا ساليتو ماتبقاش تجبد هاد شيى ولا تبقى تطول يدك انا مباغاش نخسر صاحبتي .

حذيفة بإستغراب: شنو واقع ليك؟ واش ساليتي علاقتنا حيث خوفانة من خوك؟ واش كتشوفيني مقادرش نحميك باش تجي و تسالي لي بيناتنا بلا كلمة بلا جوج؟ غير جيتي وقلبتي عليا وجهك مخلياني معلق ماعارف واش انا لي غلطت في حقك ولا انا نيت لي غلطت في حق راسي باش نرضيك و نرضي لي كيقول ليك راسك

ريم جمعات شعرها بيدها وهي حاسة بالصهدة طالعة معاها بسباب داك البكي و الغوات خدات نفس عميق و شافت فيه: ماكنتش ناوية نخليك معلق ولا نخليك ماعارفش راسك كان خاصني غير لوقت لي نجلس فيه مع راسي و نفكر وديك ساعة كنت هنجي عندك برجلي
كان هيدوي ولكن قاطعاتو: انا فكرت مزيان في العلاقة لي دخلنا فيها بلا مانديرو اعتبار لي محيطنا ...و خصوصا علياء ماهتقبلش انني درت صحبة معاها باش نتقرب لخوها .

حذيفة قاطعها مور ماحس بلي تبريرها واهي مغلف بأكاذيب نسجاتهم من عقلها: نتي كنتي دايرة صحبة مع ختي قبل ماحتى نحط عليك العين...ماتكذبيش اريم ...
ريم زفرات بضيق: انا عارفة ا حذيفة عارفة ولكن لي خاصك تعرف انه علياء هاد شيى لي هيقوليها عقلها...هتقول انا كنت كنقرب منها غير باش نبني بلاصة في هاد دار ...هتحسبني نويت على الغذر معاها و جيت باش نستغلها باش (اشارت بصبعها نحو)باش نوصل ليك نتا .

حذيفة بإستهزاء: هذا سبب باش قالبة عليا وجهك؟ ريم واش كضحكي عليا ولا كيسحابليك انا مومو صغير؟ خمسطاش يوم ونتي ماكتجاوبنيش كتشوفيني كيديري راسك ماكتعرفنيش مخبية عليا كاع الاسرار ديال حياتك و عاطياني غير وجه بنت جاية باش تكافح و تبني حياتها! علاش ماقلتيش ليا هاربة من خوك؟ علاش دابا حاطة عيني في عينيك و كتكذبي؟ كتشوفيني ميخي مقادرش يحميك؟ ولا ماشي راجل باش نهز اسرارك و نلقى حل ل مشاكلك؟

دوزات يدها على وجهها ماكانتش واجدة لهاد المواجهة مكانتش موجدة الخطاب لي هتلقيه فاش تصارحو بلي هي ختارت الفراق و مبقاتش باغا تربطها شي علاقة معاه...كانت علاقتهم بدايتها متسرعة وحتى نهايتها نفس الشيى طال صمتها حتى عاود نطق
حذيفة: علاش سكتي؟

ريم حاوطات راسها بين يديها و هزات عيونها لي برقو فيهم دموعها:شنو هدير باش تحميني؟

تنهد وتحنى مرة اخرى على ركابيه موازي ل مستواها: يعني كتبعدي مني بسباب خوك؟

ريم بنفس نبرة لي قبل مكررة سؤالها: شنو هدير باش تحميني؟

تفحصها بعيونو و لسانو باقي مربوط في عقلو بزاف د الاساليب القذرة باش يحميها ولكن نطق عكس مجرى افكارو السوادية: هنزوج بيك (سكت كيتفحص ملامحها و كمل)هنجري ليل و نهار حتى ندخل خوك للحبس باش عمرو يوصلك .

ريم ناضت من السداري لي جالسة عليه و حتى هو وقف باغي يشوف ردة فعلها اما هي مسحات دموعها و شافت فيه: علاقتنا سالات من اليوم نتا خو صاحبتي وانا صاحبة ختك .

شدها من ذراعها و شاف فيها و الغضب بدا كيتملكو واخا علاقتهم مكانتش طويلة بزاف يلاه ثلت شهور باش بداو مع بعضهم واش بدا كيبغيها ؟ معارفش ولا هذا مجرد مرحلة عليا من الاعجاب؟ حتى هي معارفش ... ولكن لي عارفو هو انه رجولتو كتجرح بأفعالها لي ماعندهمش تفسير زاد زير على يدها و ونطق و وجهو مقرب لوجهها: ماشي لخاطرك بدينا بجوج هنساليو بجوج
حسات بالألم في ذراعها ولكن محاولتش تغوت ولا تصدر صوت قوي يخلي لي في دار يجيو حطات يدها الثاني فوق يدو وهي كتحاول تفك صباعو المغروسين في دراعها: طلقني ا حذيفة طلقني لي فيا كافيني ماتزيدنيش بهمك
حذيفة: شنو كتحسبني في حياتك؟ شماتة ياك؟ كنت داير ليك خاطرك حتى وليتي حاسباني لعبة بين يديك؟ باغا تعطيني بظهر و تمشي؟ هاد"سالينا"ديالك هي الحل ياك؟

ريم غمضات عيونها و ألم متملك منها: اه هو الحل ...
حذيفة نطق وهو مشدد على كل حرف من سميتها: ريم...

ريم: هنقوليك كلشي غير طلقني دابا ...

حرر قبضتو من ذراعها لي كانو تطراساو فيها صبعانو شافت فيه و تنهدات: باغي تسمع مني القاصح ياك؟
حذيفة: سيري لبسي عليك و زيدي ندويو برا
ريم ضورات عينيها في صالون و مشات تلبس شي حاجة عوض بيجامتها البيتية لي جات بيها ...

يتبع ...