كذبة حولتني لسفــاح[بالدارجة]

014

واخا مكانتش باغا تخلي الابيل دايزة بيناتهم باش ماتبرزطهاش و تجي عندها دغيا ولكن مطاوعهاش قلبها تقطع في وجه البنت وهي كتشوف النفس كتتقطع فيها و شوية و تموت ليها بالخلعة بقات كتواسيها شوية و في نفس الوقت كتدوي مع خوها لي عطاتو اختصار"ريم وقعات ليها شي مشكل كبير و خاصها تدوز عندها و ضروري يمشي معاها"

و حتى هو حدو لبس سبردينتو وخرج راكب هو و ختو في طومبيل...واخا مسافة بين ديورهم كانت قل من سبعة دقايق ولكن كانت باغا يوصلو دغيا قبل ماتسخف ليهم البنت و مايلقاوش كيفاش يحلو لباب وزيد عليها بناءً على الحالة الهسترية لي كدوي بيها ريم ف راه سيدة موحال واش تقدر توقف على رجليها .

علياء غير خفف خوها سرع نزلات من طومبيل قبل مايفراني و بدات كتدق في الباب و في نفس الوقت كدوي معاها من تيلفون:ريم حلي حلي هادي انا جيت .

وحتى ريم كانت من مور الباب كتستناها تجي باش تهزها من ديك الغار لي بلاصتو رجعات معلومة لشخص لي هربات منو وهي هازة معاها اسرار ثقيلة.

تقابل وجههم مع بعضهم ...و العين مع العين بلا مايدوي اللسان فتحات علياء يدها و ضمات ريم لي رجليها كانو بزز باش هازينها ويمكن كون ماديك خمسة دقايق لي دوات معاها صاحبتها و واساتها بشوية د هضرة موحال واش تقدر توقف ...
لحق عليهم خو علياء مور ما بلاصا الطومبيل و شاف حالة ريم لي كانت كتشفي العدو ...

حذيفة حط يدو على ظهر ختو: دخلو لدار ماتبقاوش في لباب ماتخليش بنادم يشوفها بهاد الحالة

علياء شافت في خوها و دوزات يدها على شعر صاحبتها لي كانت منهارة و واخا شهقاتها خفو ولكن دموعها كانو مزال كيهبطو ب سخونية كتحرق خدها
علياء: ماعندها فين تدخل واش ماكتشوفش حالتها؟ شنو مزال هدير في هاد دار؟

حذيفة دفع ختو لداخل و شد لباب وراه : دخلي لداخل جمعي للبنت حوايجها المهمين و شدي الغاز باش نمشيو .

شافت فيه علياء و هبطات عينيها لصاحبتها: واخا بلاتي نديها تجلس في الصالون راها دابا و تطيح في الارض غير انا لي مكاليها .

قرب حذيفة و شد ريم من دراعها متكيها عليه:سيري جمعي حوايجها راني معاها دابا .

مكانش عارف مالها ولا شنو ضارها ولكن مكانتش هيتردد باش يعاونها بقا غادي معاها خطوة ب خطوة  باش يجلسها في الصالون اما علياء مشات للبيت و بدات كتجمع ليها حوايجها لي ضروري تاخذهم فحال تيلفون و البيسي و ملابسها داخلية كانت في اول مكتافية بهاد شيى لي هتاخذ و تخرج ولكن رجعات ل لماريو وفتحاتو و جبدات الفاليزة من تحت ناموسية و بدات كتجمع ليها حوايجها وهي مافي بالهاش تخلي صاحبتها في هاد المحنة بوحدها .
وحتى هو كان عندو نفس نظرة ختو بدا كيدوز يدو على شعرها بحنان و نطق ب نبرة خافتة: واش دابا مزيانة؟

حركات راسها بالايجاب ودموع مزال يابسين فوق خذها فاقت شوية من صدمتها و ولات واعية بلي كيضور في محيطها ...تنهد وناض يمشي يجيب ليها لما وهي تبعاتو بعينها فين غادي...واخا اول مرة يدخل لدار ولكن كان باين من فصالتها الصغير بلاصة كل حاجة فين . مشا جاب ليها قرعة ديال لما وحيد لبريز من كاع الاجهزة الكهربائية لي عندها في الكوزينة وهو داير في بالو غدا يسيفط ختو باش تجمع الماكلة الخاسرة و الشايطة من هنا .

رجع عندها و مد ليها قرعة لما الباردة ...كانو يديها كيترعدو عليها عاونها باش تشرب حتى سالات القرعة كلها .
حذيفة حط القرعة فوق طبيلة الصغيرة: واش نزيدك؟
حركات راسها بنفي و يديها مزال كيترعدو

حذيفة شد يدها وهو منرفز: ماتديريش في راسك هاد الحالة كلشي كيتحل بالعقل معارفش مالك ولكن شنو ماكان همك راه ماكيتحلش بهاد الطريقة اريم

حيدات يدها لي كانت تحت يدو وضورات وجهها فاش سمعات صوت الروايض ديال الفاليزة كيتجرو وحتى هو شاف فين كتشوف ومشا عند ختو هاز منها الثقل
حذيفة : كون هزيتي ليها غير المهم الحوايج راه تقدر تضيباني بديالك

علياء شدات في ظهرها: وانا معاولاش نخليها تضيباني و نرجعها فحالها لدارها انا هنخليها معاايا حتى تلقى حل لمشكلتها .

حذيفة سبقها ونطق بلا مايشوف فيها: نيتك ديما حولة قصدت ليك ماعندهاش علاش تثقل تقدر تضيباني بحوايجك على ماتمشي تشري حوايجها .
مجاوباتوش مشات عند صاحبتها و تكاتها عليها و خرجو من ديك دار مور ما شداتها علياء ب ساروت
و ركبو في طومبيل متاجهين لدار .

يتبع ...