كذبة حولتني لسفــاح[بالدارجة]

017

دخلات لبيت علياء لقات تما فين كاينين حوايجها لي مزالين في الفاليزة لبسات عليها لي لقات حداها و رجعات هبطات عندو ...و على حسب سكات لي طاغي على دار توضح ليها بلي ماكاين حد ...وهادي حاجة اجابية حيث هتسهل عليهم مأمورية يخرجو بجوج بلا مايكونو محط شكوك .
مع الخرجة لي هتخرج من الباب لسعها الهوا البارد خدات نفس عميق مغمضة فيه عيونها ...زفرات الهوا السخون لي داخل رئتها و فتحات عيونها لقاتو فاتح ليها باب الطومبيل وهو مراقبها بعسليتيه... ركبات حداه وحتى هو ركب و ملامحو مزال مرسومين عليه الغضب
نطقات بنبرة هادئة:ماتبعدش بزاف ...هضرتي طويلة وخاصها الوقت ...وانا خاصني نرجع بكري باش مايشك فينا حد

تنهد كيحاول يبرد اعصابو و يطفي نار قلبو لي كيحس بيها كتخلي الدم يغلي في عروقو: واخا ا ريم واخا مع العشا هنكون رجعتك لدار

ريم رمشات بعيونها و ابتسامة صغيرة ترسمات على شفايفها: هنرجعو لدار بجوج ياك؟

شاف فيها بنص عين مركز مع طريق : اه

مكانش مستغرب من انفصامها معاه كان عارفها ديما حال و احوال ...كل مرة كتعاملو بشكل ...كل مرة كتبادلو بطريقة مختالفة على الاخرى ...
كان كيحس فحالا داخل في علاقة مع بزاف ديال البنات وكل مرة كيجلس معاها كيكون كيستنى شمن شخصية هتتصرف معاه بيها...لي شعل نيران غضبو هو نطقها بالفراق وهادي هي الحاجة لي كانت جديدة عليه اما تقلباتها كان معتاد عليهم ...
بلاصا الطومبيل في واحد الخلا فتح الباب و خرج تكى على طومبيل بظهرو مخليها هي كتتفحص البلاصة مور جاج حتى تخرج على خاطرها ...

خرجات مور دقيقة د التردد و مشات تكات حداه
هزات عينيها لسما و نطقات بصوت هادئ: لي هتسمعو مني ليوم يقدر يخليك تكرهني و تمقتني لأقصى حد .

حذيفة بلا مايشوف فيها: ماكرهتش نكرهك ونعطيك و تعطيني بالثيقار... بعد على الطومبيل و وقف مقابل معاها مخلي بيناتهم مسافة بقدر ماهي قصيرة بقدر ماهي بعيدة ...مسافة كانت قل من مسافة الامان بين الغرباء و كبر من مسافة الحب بين العشاق ...

كانو في علاقتهم المرضية واقفين في النص بين جوج غراب على بعضهم عارفين تفاصيل قليلة على حياة كل واحد فيهم وبين جوج عندهم مشاعر كتكبر مع الوقت في قلبهم بطريقة متسرعة ... من نهار تعجب بيها صارحها وهو مامهتمش انها صاحبة ختو قصدها نيشان بلا دوران ...شافها ديك البنت الخجولة لي ماتصلاحش تتلطخ ب لمسات و القبلات كان كيشوفها ك زوجة ...
الصمت طال بيناتهم لخمسة دقايق وهوما غير كيشوفو في بعضهم حتى نطقات هي
ريم: مباغاش نخسرك وفي نفس الوقت مباغاش نكسبك .
حذيفة تنهد وهو كيبرد ديك الغضب لي كيسيطر عليه: وشنو باغا؟ حيث مابقيتش قادر نصبر على هاد شيى لي كديريه...
ريم تنفسات بعمق و نطقات وهي حالة صندوقها الأسود باش تخوي اسرارها و تفصح على بطاقاتها:  انا ماشي ديك بنت الناس لي قلبها بيض ...انا ماشي ديك الحشومية لي ماكتهزش العين...وانا ماشي مولات ديك القلب لبيض لي ماكيحقد ماكيحسد

حذيفة قاطع كلامها بقلة صبر: ريم ماشي حتى دوزت معاك ثلت شهور على قدهم عاد هتجي تعرفيني على راسك! انا مابغيتش ديك شيى لي مافيكش انا بغيت ديك شيى لي فيك

ريم : قادر تبقى تبغيني واخا تعرف كاع لي في قلبي؟
حذيفة شاف في عيونها و قرب بخطوة للأمام:اه قادر
ريم : انا كنت باغا غير نستغلك في الاول ...مكنتش صافية من ناحيتك و كان في قلبي بزاف ديال الدغّل .

شاف فيها وملامح الاستغراب مرسومين على وجهو ...واش كانو وجودها معاه على الفلوس؟ ولكن كيفاش هتكون معاه على فلوسو وهي عمرها قبلات الهدايا المادية ديالو؟
حذيفة: شمن استغلال ا ريم بغيت نفهم منك شنو كتقصدي ! دوي دقة وحدة راه ماعنديش صبر ...

هزات راسها لسما مرة اخرى كابتة دموعها ...عضات شفتها السفلية و ونطقات بنبرة متزعزعة: حياتي كانت مهرسة لدرجة لي دخل ليها هيتجرح ... ونتا من ناس لي دخلتي لحياتي ا حذيفة ...انا ماهربتش من راس الجبل مخبية من زواج باش نجي نعيش الحب و الغرام انا جيت باش نرمم بقايا حياتي

حذيفة دوز يدو على وجهو و نطق بنبرة هادئة: ريم راه بالله و بديني ماكنفهم منك شيى كلمة

ريم مواصلة كلامها بنفس نبرتها الاولى: خويا هرس حياتي وخلا فيها حفرة كبيرة ...واخا نبغي نعاود ليك اش عشت ماهنقدرش نوفي بكمية الهم لي كنت هازاه فوق كتافي ...(بلعات ريقها و واصلات كلامها بنبرة مرتجفة)كنت كل ليلة كنطلب الله يقتلني كل ليلة كندعي الله يسلط عليا مرض ماعندو دوا باش نموت ...

حذيفة بإنفعال: شنو المطلوب مني ا ريم؟ عرضت عليك نتزوجو و ننسيك لي عشتيه مع خوك و رفضتي!

هزات فيه عيونها البنية و نطقات: رفضتك حيث مابغيتش ننسى ...و واخا نحاول ماهنقدرش ننساه ا حذيفة هيبقى كل شوية يقلب عليا حتى يلقاني و يبدى يهدد فيا ...انا ماهندخلش في علاقة حب قبل مانطوي ورقة خويا وماهنزوجش قبل مانطوي ورقة خويا وماهنرتاحش قبل مانطوي ورقة خويا ...قلتي باغي وحارب بالقانون؟ القانون ماهيأخذش حقي ا حذيفة حيث هو مريض نفسي...معتل عقليا...ماشي في اتزانو الكامل باش القانون ينصفني

بقا ساكت كيشوف فيها ونطق: اذا حمق و مقطع لوراق هنسيفطوه عند خوتو لسبيطار الحماق فين يربيوه ...

ريم محركة راسها بنفي و دموع واقفين بين رموشها الكثاف: مابغيتش يمشي ل بلاصتو ا حذيفة مابغيتش يمشي لسبيطار د لحماق حيث حياتي لي لعب بيها ماشي رخيصة عليا ... حتى لو خذى جزاءو في ديك البلاصة قلبي ماهيبردش...

دوز يديه على وجهو ونطق وهو مثبت عيونو مع عيونها: ريم قولي شنو عندك
ريم خذات نفس عميق و جبدات على اول ورقة من اوراق اسرارها: انا جيت لهاد المدينة ماشي باش نهرب انا جيت لهاد مدينة باش نرد حقي من خويا
(بعدات نظرها من عيونو)كنت باغا نستغلك باش تاخذ ليا حقي

حذيفة بنبرة هادئة: كيفاش هنأخذ ليك حقك ا ريم و نتي مخبية عليا هاد شيى كامل؟
ريم مدات يدها اتجاه يدو و نطقات بنبرة خافتة فحالا خوفانة كلماتها يتسللو لشي اذن خفية وسط هاد الخلا و الظلام: بغيت نقتل خويا

يتبع ...