كذبة حولتني لسفــاح[بالدارجة]

021

وقف طومبيلتو قدام دار باه و بدا كيستناها تنزل...اما هي شافت في ملامح وجهو لي كان باين فيه متعمق في تفكير نطقات بنبرتها الهادئة: واش ماهتنزلش؟

-دوز يدو على لحيتو و نطق بنفس هدوء صوتها: لاء غير دخلي نتي ...علياء و الواليدة هيكونو كيساينو فيك قبايل مشاو للسوق يجيبو ليك شي حوايج ناقصينك .

محركاتش عينيها من عينيه كتافات تهز راسها بلي فهمات و عاودات نطقات بنفس نظرتها الدافية: ونتا فين هتبقى؟

حذيفة تنهد بضيق صدر ونطق:من الاحسن ماندخلوش بجوج دقة وحدة لدار سيري نتي رتاحي

ريم بتساؤول: واذا قالو ليا فين كنتي؟ زعما مايكونوش عارفيني كنت معاك؟

حذيفة مركز مع ملامح وجهها الناعمة ونطق: هيكونو عارفين ولمهم نتي اذا سولوك قولي ليهم بلي تخنقتي و طلبتيني ناخذك تشمي شوية د لهوا على البحر

ريم بعدات عيونها و جاوبتو: واخا 

رما ليها ابتسامة باهتة و رجع ديمارا طومبيل كيساينها تهبط حتى شافها مقربة بجذعها العلوي ليه و ضماتو في حضن دافي بادلها فيه بصدق
ريم: شكراا ليك على كلشي ...وسمحليا على كلشي
هروبي منك مكانش لخاطري ولكن ماكنتش بيخير باش نبقى معاك
زير عليها في صدرو ضام ضلوعها مع ضلوعو ...في حين هي بعدات شوية من وجهو و طابقات شفايفها مع شفايفو في قبلة دافية خلات حناكها يتلونو بالوردي...مكانش متوقع منها حركتها وقبل مايستوعب الموضوع و يبادلها كانت فصلات شفايفها على شفايفو و فتحات باب الطومبيل هاربة من المواجهة بين عيونهم مخلياه من وراها مبتاسم وهو شاد شفايفو فحال اي عاشق ابله عاميه الحب على الحقائق...

____
●فتح عينيه بعد مدة مقتدرة ...شاف في سقف البيض ديال البيت لي هو فيه وكان خاصو ثواني باش يستوعب بلي هو في سبيطار غير بديك ريحة المعقمات ... و من ابسط تفاصيل العناية لي في الغرفة عرف راسو هيكون في كلينيك ... هبط عينيه ل يديه لي كانو بجوجهم ملوين بضمادات .
تنهد بضيق صدر وهو كيتفكر الحالة الهسترية لي دخل فيها بلا مايحس بالحريق ...واش تأثير شراب لي خلاه في ديك الحالة ولا يمكن خيالها لي تشكل قدامو زائد كلام باباه المسموم هوما لي رفعوه على العالم وخلاوه يفقد اتصالو بالواقع فحال ثور اسباني شاف اللون الحمر .
كان كيحس بالحريق لي في يديه لي ماكيقدرش يحركهم بلا مايحس بوخز مؤلم فيهم ...كانو نفس اليدين لي سرقو منها الصاك ...ونفس اليدين لي حط بيهم الموس على وريدها و هددها بالقتل ...وفنفس الوقت نفس اليدين لي عاونها بيهم ملي كان كيهز ثقلها حتى يشد ليها طاكسي...واش كانت دعوتها دعوة مظلوم و استجابت وخذا منو الله الحق لي سلبو منها؟ ولا كان هو ضمير مجهول في حكايتها السوداء والله كيبعدو منها ...واش كانت هي المظلومة لي نصفها الله ...ولا هو العبد لي كيبعد منو الله آذاها ؟

بين تخبطات حارقة كتعصف بمشاعر كل واحد فيهم ...كان هو جالس في قنت شاد في يدو قرعة كحولية كيرتاشف منها كل شوية و قلبو مزال شاعل بعافية زاندة كيبان انعكاسها في البؤبؤ ديالو .
جلس حداه ايوب لي كان عاري الصدر بسباب الحرارة لي طلعات معاه بسباب الشراب...كان ملاحظ حالتو الغريبة ولي زاد آكد بلي ماشي في حالتو الطبيعية هي قرعة الشراب لي في يدو...هو لي كان ديما كيجي غير ينشط معاهم و يرجع لدارهم مع طناش د ليل ...  دابا الوحدة وهو مزال شاد الخلوة مرافق ب قريعات الكحول المسكرة لي قدرات ترفعو على الواقع الحقيقي ولكن مقدراتش تنسيه .

-فين سارح؟ وسط الغابة ولا بين الجبال؟

-حذيفة وجه انظارو ليه ونقط بلهجة إزدراء ساخرة: كنسرح الغنم مع الواد

ضرب على كتفو وهو مبتاسم ليه: مالك العشير؟ آش دخلك للهم ؟

أيوب يمكن ماشي مجرد شخص كيجمع دراري و يحط ليهم شراب مستورد فاخر بثمن بخس ...كان حتى صندوق أسود مكتوم بأسرار بزاف ديال الناس...كل واحد عارف حكايتو وكل واحد عارف ما بيه...
مكانش شي حد كيعرف يواسي ولكن كان انسان لي كيسمع لمشاكلك بكاع جوارحو وملي تسالي المعاودة يقدر يقوليك كلمة مواساة مبعثرة ولكن في عينيه نظرة جبل صامد كتمد ليك القوة .

تنهد بعمق ونطق بنبرة ساخرة: ضيعني الحب

أيوب : الحب خليه للنسا نتا راجل

حذيفة كان مرخي و لسانو ثقيل فحال قلبو لي هز الهم: وحيث انا من الرجال وهي من النسا انا هاز الهم .

أيوب حك نيفو بحركة كانت لاارادية منو موالفها بسباب تعاطيه للكوكاين: الهم عمرو ماكيتهز ...الهم اما كنجلسو و نحلوه و نفكو مافيه ولا كنرميوه مور ظهرنا و كنكملو حياتنا بلا مانتسوقو ليه

سكت لثواني و عينيه على قرعة الشراب لي بين يديه:مانقدرش نرميها مور ظهري و نكمل حياتي بلا مانتسوق ليها

-أيوب: اذا جلس مع راسك و حل المشكل لي عندك ...خلي كل شعرة فيك يكون منها راجل مايهزوش الهم و الغم باش يبكي

حذيفة بدا كيطرق رجليه مع الارض و الافكار كتجيبو و تاخذو حتى نطق بنبرة متساءلة: كيفاش نقدر نقتل بنادم؟

أيوب شاف فيه بإستغراب: ؟ ياك قلتي هاز الحب في قلبك اش جابك للدم و القتيلة؟

يتبع ...