كذبة حولتني لسفــاح[بالدارجة]

تتمة

رجع راسو لي كان ثقيل عليه مع الحيط و غمض عينو وهو كيقهقه بسخرية و هو في حالة سكر واضحة: بغتيها ...وعليها هنقتل
كمش ايوب ملامحو بإستغراب و وقف وهو حاط يدو في جياب الشورط لي لابس: دغيا كيهرب ليكم ا لخوت ...توكض توكض اذا فيك مايتوكض ونتوما غير لي شداتو شي زملة يجي يفتي عليا فيها .
مكانش مسوق بزاف ل كلمات المبعثرة لي قال حذيفة...حيث شحال من واحد كيجيبو لغرام لهنا باش يسكر و كيبدى يحلف بلي هيقتل راسو اذا مرجعاتش ليه حبيبة قلبو ...ولا كيحلف كاع يقتل حبيبة قلبو لي خلاتو ...ولكن في اللخر؟ حب السكرة و التقمار كينسيهم في حب النسا .

نفس الشيئ لي وقع ل "يعقوب" فاش أول نهار دخل لشقتو ب قلب محطم و عيون دامعة ...كان فحال شي جبل تهز بقوة حتى تشق على جوج .
كان هذاك النهار هو لي وقع فيه التنازل على جميع الممتلكات ديالو ل "قمر" مقابل تسحب محضر "العنف" لي رفعاتو ضدو . فاش دخل عندو في ديك دقيقة كان راجل مشموت ...مغذور ...تسرق منو جهد سنين لي بنى فيهم الديور و الكاراجات و المشاريع حتى جات وخذات منو كلشي ب برودة باش تشفع ليه سنين الحبس الطويلة لي هيدوز بسباب جريمة العنف و الإعتداء و محاولة القتل .

كان في ديك الساعة باغي يشرب ... يشم ...يكمي ... يجرب جميع المهدئات الممنوعة باش يترفع و ينسى الواقع مور ما المهدئات الطبية فشلات باش تنسيه.
كان محتاج ل حاجة كثر...حيث مضادات الإكتاب و الليثيوم و حتى Risperidone و Olanzapine مكانوش كافين باش يسيطرو على حالتو الهايجة لي كانت محتاجة حلول مؤقتة حيث بلا الكوكاين و الشراب كان هيكون الحل الوحيد هو يقتلها باش ينسى .
"القتل" الرغبة نفسها لي تشعلات مرة أخرى في قلبو مور هاد نهار لي فهم بلي 3سنين د الشراب و الممنوعات و الدوايات مكافياش باش يفتح صفحة جديدة مور شيى لي دارتو فيه بنت عمو و ينسى فيهم الخضوع و الإذلال لي طيحاتو فيه .
كانت نفس الرغبة لي كتشعل في "حذيفة"لي خذاه الحب في نفس المنعطف ديال الجنون باش ينتاقم من كل شعرة تآذات في حبيبة قلبو .

حبيبة قلبو لي كانت جالسة في بيت علياء وهي كتقاد حوايجها في الماريو و كتدندن مع الموسيقى لي حاطها في وذنيها و كتشطح معاها بطريقة كتخلينا نطرحو  سؤال إستنكار:  واش هادي نفسها البنت لي في صباح هاد نهار كانت كتترعد بالخوف من خوها؟ واش الخوف كيتبعثر بهاد السهولة؟ واش الأمان كان مخليها تخرج من حالة الصدمة الحادة لي هي فيها دغيا دغيا؟ هادو هوما الأسئلة لي كانو كيضورو في بال علياء وهي كتشوف فيها من مور لباب

يتبع ...