يا إما ضابط يا اما بلاش

الفصل العاشر

#لـِ مريم نصر "ظلال خفية"

#رواية يا اما ضابط يا اما بلاش

#الفصل العاشر

وبالفعل تم الهجوم واستطاعوا امساك عدد كبير منهم ولكن كان يقف شخص خلف رحيق ويوجه سلاحه لها.

سراج:رحيييييييييق، حااااسبييي

فألتفتت رحيق للخلف ولكن قبل أن ترفع سلاحها كان الرجل سقط على الأرض صريعًا وعندما نظرت لكي تعلم من الذي اطلق عليه وجدت ظل يركض سريعًا فعندما حاولت اللحاق به لم تستطيع الوصول له أو معرفة من هو، ولكن قطع تفكيرها في هذا الشخص سراج القلق.

سراج بقلق:رحيق انتي كويسه؟ حصلك حاجه؟
رحيق بشرود:اه اه كويسه.
سراج:مالك؟
رحيق:متعرفش مين اللي ضربه؟
سراج:لا.
رحيق:طب يلا اتحرك مريم في القسم مع المتهمين.
سراج:يلا.

وذهبوا إلى القسم ووجدوا مريم في انتظارهم ووضعوا الأشخاص في غرفه لكي يتم التحقيق معهم وانصرفوا جميعًا إلى اسكندرية وهم في السياره كانت رحيق تجلس بجانب سراج كالعادة ومريم في الخلف.

رحيق:سراج ابقى قولي ايه اللي هيحصل مع المتهمين؟
سراج:يا بنتي بقى فكك من حوار القضيه والمجرمين، انتي عروسه وفرحك كمان يومين.
رحيق:اهدي على نفسك انت.
سراج:والله انتي خساره في الولا نادر.
رحيق:وحيات امك نقطنا بسكاتك.
مريم:سوسو حبيبي.
رحيق بضحك:سوسوو؟! سراج باشا بقى اسمه سوسو؟
سراج بحنق:اسكتي خالص يا زفته وقولتلك متقوليش سوسو ده قبل كده.
مريم:خلاص يا حبيبي اهدي، شغلنا الكاست او اي حاجه، متعرفش فين الطبله؟
سراج:اه اصل بعد الحادثه وانا بصلح العربيه شلتها في الشنطه.
مريم:طب أقف وانزل هاتها.
سراج:ده انا جبت معاها حاجه تانيه ايه قنبله.
مريم بإبتسامه:اوعي يكون اللي في دماغي.
سراج:لو اللي في دماغك هو اللي في دماغي يبقى ايوه.
مريم:طب أركن يلا.
سراج:حاضر.

ثم قام سراج بصف السيارة على جانب الطريق وهبط منها وقام بفتح الحقيبه واخذ الطبله وشيء اخر.

وقام بفتح الباب الخلفي الذي تجلس مريم بجانبه وناولها الطبله ثم صعد امام المقود مره اخرى وبدأ في القياده

مريم:فين يا سراج؟
سراج:يلا يا روما ابدئي بس.
رحيق:ماتبطلوا هبل، يعني اتجوزتوا ولسه هُبل.
سراج:استمعي بصمت لو سمحتي ولو مش عايزه تستمعي بصمت يبقى ترقصي يلا يا يوووما.
مريم:يلااا.

وبدأت مريم في التطبيل.

مريم وهي تطبل:بيبي شااارك دودو دووودوو بيبي شااارك.
سراج وهو يخرج صاجات من جيبه ويبدأ في العزف بها:مامي شارك دودو دووودوو مامي شااارك.
مريم:ايوووه يااا سرااج يا جااامد، ايوه ايوه هو ده جوووزي يااا ناااس.
سراج:حراااااامي.
مريم:روووح هاااته.
سراج:حرااامي.
مريم:ماتروووح هاته.
سراج:حرااااااااااامي.
مريم:يخربيت ام الحرامي انت علقت يا ابني ولا ايه؟
سراج بغناء:كل ما اشوووفك اقول.
مريم وهي تطبل:لا مش معقووول.
سراج وهو يعزف بالصاجات:انا قلبي ازااااي بقى بيك مشغول وبسرعه كده؟
رحيق بسخريه:لا بسم الله ماشاء الله فعلا الطيور على أشكالها تقع، هو انتوا متأكدين انكم ضباط؟
سراج برفعه حاجب:اومال احنا ايه؟
رحيق:اصل واحد ماسك صاجاااات، صااااجات يا سراااج؟ والتانيه ماسكه طبله منكم لله اشوف فيكم يوم.
سراج:اهدي يا حبيبتي انتي لسه صغيره على السكر.
رحيق:سكر لما يلهفك يا بعيد.
مريم:خلاااص يا رحيق اهدي وانا وسراج هنسكت، هات يا سراج البتاعه اللي في ايدك دي وبطل لعب عيال.
سراج بحنق:خدي يا اختي.