لما تحس انك طاير لفوگ وگلبك ملك مخلوق ودگاته تهز شعوب وسعادة ماليه الكون واحاسيس لا توصف بحروف معناها هذا اللى يسمو الحب
___________________
دهاليز الهوى
للكاتبه نورس الركابي
حور :شو هذا گلتله هيچ انطاني ضهره وخله ايده على عيونه ويضحك بدون صوت
هذا شبي والله ياربي عود شنو اليضحك بالموضوع
انوب علي ضاربها ميانه ويا راح ماادري شهمس بأذنه وهذا بعده ضهره علينه وبعدين اجه گال يالله هسه اوصلچن بس خلي اخذ المفتاح من خالي انتضرني هنا مو تطلعن تره البره مليان زلم
طلع علي يدور خالو وهذا ابوعگال بقه يمنه بس تغير ميه وثمانين درجه من راح علي وگف وكتف اديه بوره ضهره ويسبح بسبحته وثگيل كلش شكله شخصيه والعگال لايگله بس اني مااگعد راحه همست الودق
حور :اگلچ هوه عود ليش لابس عگال وهوه بعده شاب
ودق :اششس صوتچ ليسمع
بس هوه الضاهر سمع لانو باوعلي بطرف عينه ورفع تك حاجب
اني رأسا غلست اجه علي ورحنه البيت خالو رجعنه
________________
انفال :اليوم انه ملتهيه ويه البنوات اشتغل واجتي الزفه جابو العروس وهيه بنت عمهم واجت وياهم انسام بنت عمهم واخت العروس هاي فد وحده متعجرفه ومغروره وخشمها مايگصو السيف اليدحگها يگول بنت وزير الداخليه
كانت بالمطبخ وطايحه للبنوات اوامر وانت گومي من هين وانت سوي هيچ وهيه تگول قائد عليهن
من جني البنوات الوي حرمت الفلاح هيه مدري شصابها انصگعت ضلت تزاگط بالوادم
انوب زينب حطت حطب على النار من گالت يمكن هذن البغداديات التحچه عنهن اسحاق
هيه انسام سمعت وهيه راحت تا تدور حرشه عليهن بس عجبتني هاي البيضه ام رصعات طبعا البنت بياضها يلج بس شفت بكف ايدها اكو اثر طگعه سمره معناها البنت بيها بهاگ وگالب لونها بس والله حلوه عجل انه مايصيبني البهاگ ويسويني مثلها
وهيه قويه عجبتني وگفت مثل السيف بوجه انسام خلتها فشلت وراحت هيبتها جدام البنوات وطلعت وخذت صاحباتها ضلت عيني وراها دحگتهن وگفن عند اخويه جراح وزلمه ثاني واگف بسده ضلت تتحچه بحرگه وهمه يردون عليها
ادحگ جراح يتحچه وياها ويضحك بس هذا مو من طبعو اخويه ثگيل ومايجامل جدي زياده وكلها الناس تگول عنو مغرور وخشمو مايگصو السيف زلمه بكل المواقف وصاحب فزعه بس من دحگت وگفتو يمها احسو كنو ناسي حالو وماخذ راحتو مو متقيد
تذكرت كلامو البارحه عن الطيره صار عندي فضول اعرف هيه هاي الطيره لو غيرها
نطرت تايصير الليل وتخلص هوست العرس واسألو
راحن البنوات ودحگت جراح راح عند اسحاق ضل يتحچه ويا ويأشر بصبعو وكلامو كان مبين بعصبيه دحگت اسحاق تگلط علينه وعيونو ناار وگف بباب المطبخ وصاح بعلو صوتو
