أحببتُ فيكِ بريق عينيكِ فسحرُ عينيكِ ليس له مثيل وقعتُ أسير حبهما من نظرةٍ من لفتةٍ للطرف الكحيل
_________________
حور :كلام سامر كان صدمه كبيره بالنسبه الى عمري متوقعت ولا حتى اجى على بالي انو راح اسمع هذا الكلام من سامر
معقوله سامر يحبني ؟
من صدمتي ضليت ساكته وصافنه بوجها انتبهت على هند واگفه يمي هزتني من كتفي وگالت
هند :حور حبيبتي معليچ بالكلام السمعتي روحي روحي واني هسه اجي وراچ وافهمچ
باوعت السامر مدنگ مخلي ايد على خصره وايد على گصته يفرك بيها كأنو واحد عنده صداع
درت وجهي ومشيت خطوات سمعت هند تگله
هند :انت تخبلت شلون تعترف الها بحبك من كل عقلك تحچي سامر ؟
اني بقيت واگفه يم المدخل مال ممر همه ميشوفوني
رد هوه
سامر:اي من كل عقلي هند والله بعد مااتحمل اضم اكثر اريدها تعرف وتبادلني شعوري
هند:لك انت شدتگول بابا الابنيه بعدها طفله عمر مراهقه هذا ميصير تخربط عقلها بهاي السوالف خليها ملتهيه بدراستها لتشتت عقلها
بعديت تعال اگلك انت مفكرت اذا هيه عرفت بحبك الها وبادلتك يجوز يكون حب مراهقه وينتهي من تكبر زين مفكرت شلون راح تواجه اهلها وتخطبها وهمه خلصو عمرهم كله يعتبروك اخوها وحتى يخلوها تبوسك وتگعد يمك وتتصرف بعفويتها گدامك من دون ولد عمها هذا مو دليل على انو معتبرتك اخوها
سامر :بس اني مو اخوها اني ابن عمها واذا حبيتها لا عيب ولا حرام واذا على فارق العمر تره مو هوايه كله ١٢سنه ابويه مو اكبر من امي ب١٠سنوات وعايشين طبيعي ليش محسستني اني مسوي جريمه
هند فهميني اني مااگدر اطلعها من گلبي فأرجوچ ساعدييني فهميها وضعي وقنعيها تنطيني فرصه صدگيني متأكد راح اخليها تحبني مثل ما اني احبها بعدهم يحچون وشفت علي اجه بأتجاهنه رأسا صعدت الدرج قبل ليشوفني بس بقيت خايفه ليسمع كلامهم ويعرف اني المقصوده
بقيت متوتره وقلقه وافتر بالغرفه ود كانت نايمه بالغرفه طبعا احنه ما عدنه چرابي يعني غرفتنا بيها بس كنتور وميز احذيه وداگين فوكا مرايه ود وودق هاي السنه كليه فمن يجن تعبانات يخلصنها نوم
المهم شويه وانفتح الباب دخلت هند
هند :حور حبيبتي انت تعرفين اني شگد احبچ وحتى حاسبتچ بنتي الله شاهد والله عندي انت وفرح نفس المعزه
حور :اعرف والله بس هنوده كلام سامر فاجئني معقوله صحيح يحبني وانتي تعرفين من سنتين
هند :اي والله صحيح يحبچ من كنتي بالاول متوسط هوه حچالي تتذكرين من گلتي يتهرب مني وبس ادخل البيتكم يطلع اني بوكتها رحت سألته وكان جوابه انو بده يحس مشاعره تتغير تجاهچ وكان يطلع لان يخاف عليچ من نفسه
