الرجاء وضع تعليق لطيف او إنتقاد بناء عند الانتهاء من القراءة
~ متابعة ممتعة♡~
__________
سندس : طيب انا جاية معاك
= خليني امشي انا لو في شي ضروري بضرب ليك
سندس بحزم : قولت ليكي جاية معاكي
سكتا منها ما حبيت اشادد معاها في الكلام ، باين إنها زعلانه وواضح إنها سمعت ليها شيء من هنا ولا هناك .. لبسنا عبايتنا بسرعة و جرينا لنور .. وصلنا دقينا الباب مسافة قبل ما تجي نور تفتح لينا الباب .. شكلها تعبان، عيونها مورمة .. سندس مسكتها بلهفة : بسم الله مالك في شنو يا بتي ؟
نور عاينت لي و مسكت بطنها : عندي مغص شديد
= الف سلامة ، اسي اعمل ليكي حرجل يخفف ليك
نور بصوت تعبان : لامافي داعي تتعبي انا كويسة
سندس قاطعتها : ما طلبتا رايك
عاينت لي : دخليها الغرفة فوق شوية والحقكم
مسكتا نور من ديها ، فكتني : بقدر امش
دخلنا الغرفة كنت حاسه إن في شي تاني والموضوع ما موضوع مغص ، البيت كان فاضي ، امي جات شايلة كباية الحرجل مسكته لنور في يدها ..
سندس : وين اهلك ؟
نور : ابوي سافر و طلال برا البيت
سندس : لمي هدومك تعالي اقعدي معانا لغاية ما تتحسني
نور : لا ما بقدر اسيب طلال براهو وانا زاتي ما قادرة اقوم واقعد
سندس : لو بطنك واجعاك شديد انزل اجيب ليك مسكن
نور : لالا حابقى كويسة ، معليش اعفو لي خلعتكم بس بطني كانت واجعاني شديد لدرجة حسيت امعائي حا تطلع
سندس : دا شنو البتقولي ده يابت ؟ ازعل منك والله !!
نور سكتت و فضلنا ساكتين فترة طويلة
سندس : طيب انا امشي ، طلعنا بسرعة ما كلمنا ناس البيت
نور : تسلمي يا سوسو
_ العفو يابتي مكانتك من مكانة ريما
نور : معليش تخلي معاي ريما لغاية طلال يجي ، و حاخلي طلال يوصله
سندس ارتبكت لمن سمعت الاسم : طيب
عاينت لي : ريما تعالي شوية ..
طلعتا معاها لغاية الباب ، قالت لي بنبرة حازمة : اول ما اخوها يجي تضرب لي اوعك ثم اوعك تجي معاه فاهمه ؟
= سوسو انتِ سامعه حاجة اليله كده ولا كده ؟
_ كلامي دا واضح ؟
هزيت راسي : واضح
قفلت الباب و رجعتا لنور ..
= في شنو مالك ؟ حكاية المغص دي ما مشت علي
