طلال نزلني و قفل باب البرندة علي و مشى .. حركتو غاظني شديد طفلة انا بعد يشيلني بالطريقة دي ! طفلة عشان يعاملني كدة ؟ لكن بربي عشان تاني يفكر انو عادي يجبرني على شي انا ما عايزة .. فتشتا لشباك اطلع منو ما لقيت ده شنو البيت المقفل ده ! دخلتا المطبخ في شباك تهوية من قزاز و ما فيهو نملي بس دي فرصتي طلعتا بيهو و مشيت تلبتا بالحيطة .. اثناء ما بنفض في هدومي في نور عربية جهر في وشي غطيت عيوني عشان أحد من شدة الاضاءة .. ساب النور فاتح و جا علي دخل يدينو في جيبو : إنتِ مشكلتك شنو بالضبط ؟
= فاكرني شافعة تشيلني دخليني جوة و تقفل عليها الباب ! شنو طولي ده كلو ما عاجبك ؟
عاين لي من فوق لتحت و اشر بيدو فوق راسي : ده ! 160 إنتِ و لا كم !؟
زحيت يدو : شوف طلال لاخر مرة بقول ليك انا ما طفلة
= لو عايزه اعمالك كراشدة فتصرفي كراشدة ! و اتفضلي خشي البيت من غير حركات شفع
_ شوفتا ، شوفتا انك ما بتحترمني المشكلة فيك
= طيب المشكلة فيني انا ، و عارفة شنو مشكلتي ؟ اني خايف عليكي من اولاد الحرام الكان السرقو تلفونك المرة الفاتت ولو عرفو انك بت ما كان حايكتفو بالتلفون بس ..مافي بت بتتحاوم في وقت زي ده الا لو كانت شمال و قبل ما تردحي لي .. دي قاعدة عامة و انا بوريك القواعد اللي ما بتهمك بشي اذا بتمشي في الشارع في وقت زي ده اولاد الحرام ما يحسبوك في حالك ده المجتمع كده و دي قواعدو و هسي ياريت تتفضلي جوة اذا اتكرمتي يا الكبيرة و الواعية
عاينتا ليهو مسافة قبل اقول : انا بعمل الانا عايزه في اي ساعة بتناسبني لا مهتمة لا باولاد الحرام و لا قواعد المجتمع
وقف قدامي : وانا بقول ليكي لاخر مرة بالذوق و الادب ما عندنا بنات بتتحاوم في الوقت ده
= بتكم نور و ديك ليها جوة نايمة زي البنات الشاطرات انا ما بتكم
_ لا بتنا و مسؤوليتي الشخصية و اي شي بحصل ليك برقبتي " وضرب على رقبتو " يلا خشي
= ما خاشة
شال نفس ووزعو في المكان : طيب قولي انتِ عايزة تمشي وين و انا اوديك
_ عايزه امشي برجليني و ما عندي مكان محدد
= تشمي هوا يعني ؟
_ اي
= يعني انتِ مضايقة
_ لا زهجانة
= و مافي شي تفكي بيهو زهجك جوة البيت ؟
_ طلال ، ما برتاح غير لما امشي
= طيب اذا زاعجك شي معين او حابة تحكي شي ممكن تحكي لي !
_ ما عايزة احكي شي
= رايك شنو نقعد جوة في الحوش
_ عاين انت امشي نوم و انا حاعمل جولتي و ارجع فورًا و صدقني بهيئتي دي مافي زول حايعرف اني بت .. حامشي سالمة و حاجي سالمة و اذا لاااا قدر الله حصل شي اخلي مسؤليتك و قول بتكم بتطلع ساي انا لا شوفتا و لا عرفتا غير معاكم ، طيب !
