**
قاعدة في نص السرير و تركيزه مع ميساء البتتحرك من مكان للتاني و بتجهز : يعني حاتخلوني براي و تمشوا ؟
ميساء : ساعة زمن و بنجيك تاني
= طول اليوم اقعد براي انا زي المجنونة ؟
عاينت ليها مسافة و بزهج : عايني شوفي ليكي اي شغلة اعمليها اقول ليك حاجة ؟ البيت ده وسخان قومي نضفي اشغلي نفسك عليك الله ما فاضية ليك انا
وقفت في نص السرير و نزلت منو : غياظة ..
طلعت زهجانة و ميساء وراها ، طلال لسه ما نزل ، ميساء قعدت في الكرسي و جرت التربيزه الفيها صنينة كبابي و بسكويت و ترمسة شاي .. شوية طلال جا نازل صبح عليهم ميساء ردت ليه وريما فضلت مكشرة و بتعاين لميساء ببؤس
ميساء : وشك مني قولت ليك ، اسطبحي و قولي يا صبح
ريما : اصطبح بين 4 حيطان !
ميساء ختت كباية الشاي من يدها ووقف نزلت النقاب على وشها
ريما : شوفي من اسي بكلمك الساعة 4 تكوني جوة البيت و حركاتك البتعمليها هناك في بيتنا تبطليها .. انتِ جاية هنا تحرسيني رجوع لانصاص اليالي مافي ها !
ميساء قربت منها : والله لو ما امك حالتها صعبانة علي ارجعك ليها بلا لسان " عاينت لطلال " انا ماشة
طلال هز راسو من سكات و هو ماسك كباية الشاي ، ميساء مشت و سابت ريما وراها تفرفر من الزعل .. قعدت جنبو و عاينت ليهو : و حاتجي متين انت التاني ؟
طلال اتلفت عليها ببرود : انا !!
ريما : في زول غيرك هنا ؟
_ انت مالك من الصباح ؟
بعصيية : سايبني كلكم بين 4حيطان و تقول لي مالك !! " قربت منو بهدوء : طلال ، الله يخليك سوقني معاك الشغل حاسكت والله العظيم
= اذا مسموح اسوقك الشغل تفتكري ليه مانعنك تمشي شغلك ! ريما ممنوع تعتبي خطوة برا البيت
_ بس انا زهجت
= حاجي بدري وعد
_ وانا حاقعد طول اليوم براي !
اشر ناحية الtv : في الدرج التاني تلقي سيدهات فيها افلام حلوة شغليها بتمرر ليك اليوم لغاية ما نجي " قام و قامت وراه "
= طلال انا ما بحب التلفزيون طلال
اتلفت عليها و شال نفس : شنو برضيك اعملو ؟
= سوقني معاك الله يخليك
_ لا طلعه برا البيت لا
= بلبس نقاب و بتخبا زي ميساء
شال نفس : ريما ، لو بيدي ما بخليك ثانية هنا ، استحملي .. شوية و يصل جدك و تحرري
= انا حاسة انو حايموت قبل يفكر يجي اصلا
