#الحضن_الدافي
الحلقة :: 3 ::
طلعت من الدار .. فطرت وخليت بابا مع ماما في الدار .. بعدين وليت بنقول لبابا هي نمشو .. وقفت ع الباب ونسمع بابا يقول
بابا: غير اصبري شوي وتحملي باذن الله نحصل سلفة من واحد من الجماعة ونسفرك تعالجي برا :(
ماما: لا حبيبي ماتكلفش ع نفسك .. اصلا انا حاسة الموت قريبة مني ياجواد :(
بابا: اسسسس بالله عليك معاش تعاوديه الكلام اهوا اوكي !!
ماما: باهي توعدني انت قبل ؟؟
بابا: آمري .. اللي تبيه باذن الله يصير :)
ماما: ترد بالك ع صغاري .. ورد وزين والله صغيرين وخايفة عليهم :(
بابا: آوووووف مش ناوية تسكري سيرة النكد اهيا .. نوسة حبيبتي انتي ح تعيشي وتربي صغاري معاي .. تعرفيني انا مانقدرش نتحمل المسؤولية هادي بروحي .. نوستي وراس ورد وزين يللي تحبيهم .. كلامك هدا معاش نبيك تقوليه اوكي !!
ماما: حاضر .. جواد وقت ع ورد :(
بابا: ايه هي بنمشيلها .. تبي شي !!
انا كنت نسمع ومصدومة .. ماما بتموت !!.. شن معناها الموت باه !!.. بتمشي زي جدو ؟؟.. بتركب لربي فووق ؟؟.. بتمشي للجنة ؟؟.. باهي وانا وزين !!.. بابا بيقعد بروحه ؟؟.. بابا بيولي ماماوبابا في نفس الوقت ؟؟.. قمت ايديا فوق وقعدت ندعي ( ياااارب ماما تعيش معانا مانبيهاش تمشي بروحها ليك .. يارب كان تبيها تجيك حتي انا بنمشي معاك ) :(
طلع بابا من الدار لقاني رافعة ايديا .. قعدت يشبحلي ومستغرب !!
بابا: ورد حبيبتي خيرك ؟؟
ورد: شي :(
بابا: باهي علاش دموعك ياحلوة ع خدودك الحلوات ؟؟
ورد: عطلت ع المدرسة يابابا :( .. تو جنى تسبقني في الطابور :(
بابا: اوكي اركبي السيارة تو نشوف زين ونجيك
>>>>>>>>>>>>>
جواد يتحدث ::
ان شا الله يللي في بالي مش صح وورد ماسمعت شي .. قاعدة صغيرة ونخاف تقعد تحلم في الليل بأمها وتسيبها .. يااارب كون معاي ..
تلفتت لقيتها متكية ع المرش .. آآخ يابنتي غير في شني تفكري بس !!
جواد: ورد !!
ورد: نعم بابا
جواد: آه شن رايك نعطيك فلوس تشري من المقصف شكلاتة ؟؟
ورد: لا ماخاطريش في شكلاطة .. نبي ماما تبرا وتنوض اديرلي كيكة :)
جواد: ان شا الله :)
وصلت قدام باب المدرسة ..
جواد: هي هاتي بوسة البابا وانزلي :)
باستني ورد بس كنت حاس انها تفكر في شي ومضايقة .. :(
نزلت وسكرت الباب . فتحت الروشن
جواد: ورد !!
ورد: نعم بابا
جواد: تعالي شوي :)
ورد جتني وقفت ع الباب بالزبط
جواد: نجي نروح بيك ونرفعك للملاهي اوكي !!
ورد: هيييي شكرا بابا حبيبي <3
جواد: ههههه هي مع السلامة
ورد: مع السلامة :)
>>>>>>>>>>>>>>>
كانت حصة رسم .. طلعت كراستي وقعدت نرسم فيها .. ابلة مها ادور علينا بالوحدة وتشوف في كراساتنا .. جنى رسمت حوش وشجرة وفي جبنها درجيحة والعاب .. وبنية في الوسط تلعب .. أما انا رسمت ماما وبابا وزين وانا
مها: حبيبتي ورد شن الرسمة هادي ؟؟
ورد: هادي مش رسمة .. هادي صورتنا كلنا مع بعض :)
مها: هههههه وبابا هكي شكله ؟؟
ورد: ايه بابا عنده لحية ديما تجرح فيا لما نبوسه .. وماما تحب تلبس قفطانها الابيض في الحوش .. وانا وزين معاهم فرحانين :)
مها: ههههههه .. باهي شن رايك نعلقهالك في الفصل ؟؟
ورد: حقاااا !!
مها: ايه والله .. انتي تعرفي ترسمي احسن وحدة في الفصل :)
تلفتت لجنى يللي مقعمزة جنبي .. شبحت للأبلة وزعلت
مها: هههههه جنوو ماتبكيش حتي انتي تكبري تولي احسن رسامة :)
جنى: مانبيش نولي رسامة .. انا نبي نسوق الطيارة زي بابا :)
مها: ان شا الله تولي تكبري وتولي كابتن طيارة حلوة <3 .. وانتي ورد لما تكبري شن تبي تكوني !!
ورد: آممممم .. انا نحب نكتب قصص نبي نكبر نولي مشهورة <3
مها: هههههه ان شا الله تولي احسن كاتبة في العالم كله <3
ورد: :)
>>>>>>>>>>>>>>>>>
طلعت من المدرسة قعدت نراجي في بابا هلباااا .. وجنى جاها بوها وروحت .. عطل عليا بابا مانعرفش شن صار معاه ؟؟.. قعدت معاي ابلة مها ..
مها: خيرك زعلانة ؟؟
ورد: بابا عطل .. مايحبش قبل يعطل عليا :(
مها: آممممم تو يجي ماتخافيش .. شن رايك تخشي معاي الداخل ونهدرزو
ورد: مرات بابا يجي ومانشوفاش :(
مها: اوكي خلاص نقعمزو هنا .. احكيلي عندك خوات وخوت ؟؟
ورد: عندي خو واحد واسمه زين <3
مها: آها .. قداش عمره ؟؟
ورد: 4 سنوات :)
مها: ربي يحفظهولك .. تحبيه انتي !!
ورد: ايه نحبه هلبااااا .. ححححي ابلة مها بابا جي
خش بابا ولقاني مع ابلة مها وجيته نجري تغمرني ..
ورد: بابا علاش عطلت عليا ؟؟
بابا: والله الطريق زحمة .. مشكورة ياابلة لانك قعدتي معاها :)
مها: لا شكر ع واجب :)
بابا: ءءء اركبي خللي نوصلوك حق التعطيلة :)
مها: لا صحيت .. حوشنا خطوتين ونوصله :)
بابا: اوكي هي سلامات :)
مها: سلامات
>>>>>>>>>>>>>>>>>
في العشية .. زين يلعب بألعابه .. وانا مقعمزة ع الطاولة نكتب في واجبي .. خش علينا بابا وجايبلنا كاكاو وبسكويت <3
زين: هيييي :)
بابا: شن رايكم في المفاجآة !!
ورد: انت درته الكاكاو قصدك ؟؟
بابا: ايه ذوقي واحكمي :)
ورد: بابا امتي ماما بتنوض .. استاحشت كيكاتها واكلاتها :(
بابا: هئ معناها ماكلتي ماتعجبش فيك -_-
ورد: لا لا .. انا نبي ماما تنوض وتهدرز علينا .. كل يوم نروح من المدرسة نلقاها راقدة .. باهي ارفعها بابا عاينها وخودلها دوا تو تبرا :(
بابا: ان شا الله ان شا الله .. خليك مع زين شويا تو نجيك
طلع بابا من دارنا .. وزين يشرب في الكاكاو .. مانعرفش كيف تبزع عليه وهوا سخون .. قعد يبكي .. جيت نجري وقعدت نسكت فيه .. وين قمت عيوني لقيت ماما واقفة
زين: ماما ددي :(
ماما: حبيبي زينوو .. تعالا ترا نشوفه الددي :(
ورد: ماما نوضك عياط زين ؟؟
ماما: لا حبيبتي .. بابا قال بنمشو للملاهي :)
ورد: بتمشي معانا قصدك ؟
ماما: ايه حبيباتي بنخليكم بروحكم ماتجيش ولاه !!
ورد: هييييييي .. آممممموآآآآآه <3
زين تغمراته ماما ودمعاته قاعدات معلقات في عيونه .. وفهم نوعا ما ان ماما حالها باهي .. حتي هوا استاحشها لانها كانت تلعب معاه وقت انا في المدرسة ..
>>>>>>>>>>>>
واخيرا مشينا للملاهي وماما معانا .. كلنا فرحانين بيها .. بابا حطنا في لعبة الخيول يللي يدورو ومشي قعمز مقابلنا مع ماما يهدرزو ..
ورد: زين
زين: نعم
ورد: شن رايك معاش نلعبو بالالعاب ؟؟
زين: لا :(
كيف جي بيبكي ..
ورد: ماتبكيش .. ماما مريضة واحني لازم نساعدوها ولاه !!
شبحلي زين ومش فاهم شي .. عارفاته خوي صغير ومايعرفش المرض .. ولا يعرف معنى الفلوس .. وانا كبيرة قدامه وسمعت بابا شن قال لماما .. قاللها ماعنداش فلوس باش يعاينها ..
ورد: قصدي نلعبو بالالعاب يللي بالبلاش شن رايك ؟؟
ونفس الشبحة زين وعيونه زعلانات ... مانعرفش كيف نفهمه .. خطرتلي فكرة .. وقفت اللعبة .. شديته من ايده ونزلنا لماما وبابا يللي كانو يشربو في الشاهي جايبنه معانا من الحوش .. ويهدرزو :)
ورد: ماما .. بابا بنمشي انا وزين للدرجيحة :)
ماما: ردي بالك عليه خوك دودي <3
ورد: حاضر
ماما: جواد نوض سايرهم وبعدين ولي نكملو هدرزتنا :)
بابا: اوكي :)
بابا شد في ايد زين ع اليمين وانا ع اليسار .. وفجآة تلاقينا مع قصي .. استغربنا
بابا: شن ادير هنا ؟؟
قصي: هههههه والله ياعمي صاحبي هنا يشتغل جيت بندير عليه دورة :)
شبح لوطة لقاني نشبحله ..
قصي: ريت المشفشفة هادي جيت :)
ورد: انا مش مشفشفة :(
قصي: لا مشفشفة -_-
ورد: انت مشفشف اصلا
قصي: لا انتي مشفشفة وشينة اععععي
بابا: هههههههه
ورد: :(
قصي: حي حي طرمت شواربها .. كيف الحل ياعمي ؟؟
بابا طلق ايدي وقام زين في غمره .. وقدم خطوتين
بابا: دبر راسك معاها .. بنمشي نلعب زين :)
ورد: بنمشي مع بابا :(
مشي بابا وخلاني معاه
قصي: تعالي بلا عنترة توا .. اسمعي نعرفك ع صاحبي وكل ماتجي هنا يلعبك بالبلاش شن رايك ؟؟
ورد: نبيش :(
قصي: تو هناك وحدة يقوللها تلعب بالبلاش وتقول لا غيرك ياهبلة -_-
ورد: بنمشي نقعمز مع ماما بروحها
قصي شد ايدي بالقوة ومشي بيا للالعاب ..
قصي: حساااااام .. تعالا شوي
واقف قدام لعبة السيارات يللي خاطري نلعب فيها <3
ورد: صاحبك هنا !!
قصي: ايه واسمه حسام اهو جي :)
حسام: تي مسرع تزوجت ياراجل وجبت حتي بنت هههههههه
قصي: هادي بنت عمي عنايدية وراس مسكر .. لعبها هنا
حسام: حااااضر .. تعالي ياحلوة هي
قامني في غمره وحطني في السيارة .. وركبلي السبتة
حسام: تخافي بروحك ؟؟
ورد: :\
حسام: قصدي نقول لقصي يركب معاك بالك ماتعرفيش تسوقي ؟؟
ورد: به :(
حسام: قصي تعالا هنا
خش قصي بين السيارات وكأنه مش عاجبه الجو
حسام: البنت صغيرة وماتعرفش تسوق اركب سايرها
قصي: تي من كادب عليك وقالك نحب المفرخ انا ؟؟
حسام: تبيني نركب معاها انا ونسيب اللعبة اديرها انت ؟؟
قصي: لا .. حتى فاضي غير شن جايبني فيها بس
حسام: هههههههه .. هي ياحلوة شدي باهي واهو معاك السواق هههههههه
قصي: تي برا يامعفن غير ننزل بس
حسام شغل اللعبة وبدي قصي يسوق بيا وانا فرحانة .. لاني نحبها اللعبة هادي .. وكان بابا ديما يركب معاي فيها .. خش فينا واحد صيحت انا وغمضت عيوني
قصي: معاش تعيطي يامختشة .. لعبة هادي مش ح تموتي
ورد: نخاف
قصي: ياوالله نهار مغبر .. باهي قلتي من الاول كان هدا ماركبتكش
ورد: لالا .. نخاف من حاجة تانية :(
قصي كيف بيتكلم وقفت اللعبة .. نزل وفكلي السبتة وطلعني من اللعبة .. لقيت حسام جايبلي حلوة صوف .. مدهولي : هي ياعسولة خودي الحلوة وديما تعالي نلعبك باهي !!
ورد: باه .. صحيت عمو :)
حسام: سلمك ياعمو
قصي: منور يابروو
حسام: بوجودك يامعفن ههههه
قعمزت ع الكرسي وانا ناكل في حلوة الصوف .. وقصي يتفرج يمين يسااار ..
ورد: قصي
قصي: نعم
ورد: انا نخاف :(
قصي: من شني تخافي ياحصلة ؟؟.. تي انتي تخوفي مش تخافي -_-
ورد: نخاف منه الموت انا
قصي: ههههههه ومنين تعرفيه الموت انتي ؟؟
ورد: مانبيش ماما تموت انا :(
قصي: اعوذ بالله .. فال الله ولا فالك .. هناك وحدة تدعي ع امها ؟؟
ورد: شن معناها الموت ؟؟
قصي: نعرفش
ورد: زي جدو بتمشي للجنة ولاه !!
قصي: ايه جدي في الجنة :)
ورد: حتي ماما بتسيبنا .. وانا خايفة تخليني بروحي :(
وبديت نبكي حتي الحلوة طاحت مني .. قصي قعد يشوفلي مستغرب
قصي: ورد .. ورد
ورد: مانبيهاش تخليني مانبيهاش الجنة انا :(
قصي: خلاااص ماتبكيش ورد .. علاش تفاولي ع ماما ؟
ورد: بابا هكي يقول :(
قصي: بابا قالك ماما بتموت ؟؟
ورد: سمعتهم هكي يقولو :(
قصي: لا مش ح تموت .. اصلا الناس الكبار في العمر بس يموتو وماما قاعدة صغيرة ولاه !!
ورد مسحت دموعي وشفتله: يعني ماما مش ح تموت ؟؟
قصي: ايه مش ح تموت .. ماما قاعدة صغيرة
ورد: ايه صح عمرها 26 سنة :)
قصي: هآآ ريتي .. معاش تقولي ع ماما بتموت اوكي !!
ورد: باه .. يعني لما نكبر انا بتموت ؟؟
قصي: بعيد السو عليها .. تو تكبري وتتزوجي واديري صغار وتعرفي شن معنى الأم <3
ورد: كيف نتزوج ؟؟
قصي: تلبسي فيلو واديري تسريحة وطرحة :)
ورد: ايه لبستهم اصلا :)
قصي: شن الغباء هدا ؟.. قصدي يبدا جنبك راجلك :)
ورد: :\
قصي: ياوالله عليك فروخ .. انا متأكد انها تستغبى
نخصته ع كتفه بالشويا .. لانه تلفت للجيهة التانية
قصي: همممم
ورد: امتى بتتزوج انت ؟؟
قصي: ههههههههههه شن دخلك فيا ؟؟
ورد: باش نلبس فيلو ونصور معاك :)
قصي: هههههههههههه وانتي اي واحد يتزوج تصوري معاه يعني ؟؟
ورد: ايه .. تعرف مرة مشيت لعرس صاحبة ماما وصورت معاها هيا والعريس :)
قصي: آمممم صار نفاخة انتي -_-
ورد: حتي انت شين .. الياس احلا منك اصلا
قصي: هههههههههه .. اسمعي تعالي نمشو لماما
ورد: قصي
قصي: يرزيك فيه قصي قولي آمين -_-
ورد: غير قول نعم :(
قصي: نعم هي ياحصلة
ورد: تعطيني تليفونك بنلعب بالقطوس
قصي: اتميلي الشحن فكيني
ورد: لا والله شويا ونردهولك :(
قصي: معاش تشبحي الشبحات هادي انا قلبي رهيف هههههه .. هاك شويا ورديه
ورد: شكرا شكرا قصي <3
قصي: باهي خللي نشوف بوك وين
ورد: اوكي :)
قصي: ماتحليش فمك ع الفون وتنسي روحك -_-
ورد: هاك هاك بنمشي لماما :)
عطيته تليفونه ومشيت نجري لماما ..
>>>>>>>>>>>>>>>>>>>
قصي يتحدث ::
استغربت فيها .. عطتني تليفوني ومشت تجري .. هيا البنت صغيرة بس عاقلة ورزينة .. تخاف ع امها تقول وحدة كبيرة .. شن قصة امها وموتها ؟؟.. ربي يخليهالهم .. واعر فراق الام .. فراق #حضن_دافي .. فراق كل شي حلو .. آآآآخ .. احلا شي في الاطفال .. انهم يعتقدو الموت يرفع للجنة طووول .. بس البنت هادي غيرهم .. تي حتي الجنة ماتبيهاش .. تبي امها تقعد معاها وبس .. وقف عليا عمي وقطع حبل افكاري
جواد: خيرك مسبوه هههههههه
قصي: هههههه لا شي .. شنو زين كملت الالعاب كلها ؟؟
جواد: بيهبلني هههههههه ماخلانيش نرتاح
زين: بابا هيا
جواد: اوكي برا لماما تو نجي :)
زين: باه :)
مشي زين وقعدت مع عمي .. كان عنده كلام ويبي يقوله وبما اني انا اقرب واحد ليه فأكيد بيحكيلي كل مافي قلبه .. قعمز جنبي وحط ايده ع راسه .. قعمزت جنبه ..
جواد: قصي عندك مادير توا ؟؟
قصي: لا .. نسمعلك ادوي :)
جواد: ايناس مرت عمك تاعبة الايام هادي .. وهيا قاطعة الامل في علاجها مافهمتش علاش ؟؟.. وانا ماعنديش حتي 100 دينار توا تحتي
قصي: تبي نساعدك انا مستعد والله ياجواد وكان نبيع يللي فوقي وتحتي :(
جواد: المشكلة كل مانشوف الصغار قلبي يتقطع طرف طرف .. صغار حرام والله حرام .. والله ماقادر حتي نشوفلهم كيف بنقعد انا معاهم بعد امهم :(
قصي: استهدي بالله ياعمي .. سيورها تفراج ..وباذن الله الليلة يكونو عندك الفلوس .. وبرا سافر حتي للأردن كان تبي :)
جواد: بارك الله فيك .. وعارف والله مافي واحد ح يسندني غيركم انتم :)
قصي: هههههه تي نعجبك ع خاطر المشفشفة هديكا انديرو المستحيل
جواد: تتعقد منها الكلمة عندك علم ولاه هههههههههه
قصي: ايه نحب انعصبها ونخليها تزعل منظرها يضحك هههههه
جواد: :)
>>>>>>>>>>>>>>>>
أما انا قعدت مع ماما .. زين يلعب بالتراب قدامنا ..
ماما: بوك وين عطل ؟؟
ورد: مع قصي :)
ماما: شن جابه هنا ؟؟
ورد: جي لحسام :)
ماما: من حسام ياغبارتك ؟؟
ورد: صاحبه .. ماما جعانة :)
قلتها الكلمة وبعدين تفكرت بابا محتاج فلوس ويبي يعاين ماما .. حطيت ايدي ع فمي
ماما: هههههه خيرك ؟؟
ورد: شي .. بنلعب مع زين :)
ونقزت من الكرسي ونزلت لزين نجري وقعدت نلعب معاه ..
>>>>>>>>>>>>>>>>>
في الليل كنا مقعمزين نتفرجو ع التلفزيون .. فاتحين ع براعم .. وزين ينعس ومتكي ع ماما .. وبابا شاد اللاب توب يخدم فيه .. شوي والباب طق .. نضت نجري .. وقف بابا لحقني
بابا: وقفي تو نفتح انا :)
ماما: تراجي في حد انت ؟؟
بابا: ايه قصي جايني :)
ماما: :\
طلع بابا بيفتح الباب .. وانا وليت قعمزت جنب ماما ..
ماما: ترا شوي حبيبتي خللي نرفع خوك لفراشه :)
ورد: باه :)
قامت ماما زين في غمرها ورفعاته .. وانا طلعت بالشويا للصالون .. وطلع قصي صح يللي جي ..
قصي: تفضل ياعمي .. هادم الفلوس يللي قدرت نجيبها من بوي وخوي الياس :)
جواد: قلتلهم ؟؟
قصي: ماتخافش الموضوع عندنا مازال ماوصلش للنساوين هههههه
جواد: تمام :)
قصي: هي تصبح ع خير
مشيت نجري لجيهة بار المطبخ .. وكانت في سيارة زين ع البار قعدت نلعب بيها .. طلع قصي ولقاني واقفة
قصي: تلعبي بالسيارة يامسترجلة هههههههه
بابا: هههههههههههه
ورد: -_-
قصي: خليك خليك تو نطلع بروحي
ماما جت وقفت ع باب المطبخ ولابسة بدلة الصلاة
ماما: خليك ياقصي اشرب معانا قهوة :)
قصي: صحيتي .. والله امي تراجي فيا ع العشي :)
بابا: ايه حق نتونسو بيك
قصي: شوف بنتك كيف شكلها .. قريب تلزني :\
ورد: لا عيب مانلزش انا
بابا: ههههههه ها ريت متأدبة ههههههه
قصي: منورين .. مرة تانية ان شا الله تصبحو ع خير
بابا وماما: وانت من اهل الخير :)
طلع قصي وسكر وراه الباب ..
ماما: حبيبتي ورد بري اغسلي سنونك وارقدي :)
ورد: نشرب طاستي حليب ونرقد :)
ماما: اوكي .. وتيتهالك .. خيره قصي شن يبي ؟؟
بابا قام ظرف لونه قهوي وراهولها .. وقعد يحرك فيه يمين يسار
ماما: علاش مقايلهم ؟؟
بابا: شن تبيني نخليك هكي ونقعد نتفرج .. اسمعي ايناس الموضوع اهوا مش مطروح للنقاش
وكيف قدم بابا خطوات وقفاته ماما
ماما: انا قلتلك حاسة بروحي علاش تورط في روحك .. وتقعد حاصل ديون وغيره
بابا: سكري ع الموضوع -_-
ماما: اسمعني هنا .. غدوا تردله الفلوس فاهم ولاه !!
بابا مشي خش لداره وسكر الباب وانا نسمع فيهم في المطبخ .. ماما طارتلها وخبطت ايدها ع الحيط وخشت .. علاش زعلت وبابا يبي مصلحتها ؟؟
#Dudu
