#الحضن_الدافي
الحلقة :: 37 ::
قمت تليفوني ورديت ( آلو خالتو )
ميس: وتي روحك ورد جاية بناخدك لحوشنا الليلة
ورد: بس انا في حوش صاحبتي
ميس: آووووف خلاص كلمي قصي يروح بيك .. خلال نص ساعة نلقاك قدام حوش عمك واتية اوكي !!
ورد: انتي روحتي خالتو ؟؟
ميس: امالا بنجي من ايطاليا لحوش عمك خلال نص ساعة !!
ورد: اوكي
سكرت منها وع طول شفت ندى تشبحلي ومستغربة
ندى: شن في !!
ورد: خالتي شكلها متعصبة .. اسلوبها مش حلو معاي بكل
شديت النقال وقعدت اندور في رقم قصي
ندى: بمني بتتصلي !!
ورد: بقصي يجي يروح بيا
ندى: آووووف خليك زيدي شويا
ورد: خالتي قالتلي نص ساعة ونلقاك قدام الحوش
ندى: شن يللي صاير زعما ؟؟
ورد: انا وين نعرف !! .. آهو ينادي .. آلو قصي كيف حالك !!
قصي: شني بتروحي ؟؟!
ورد: ايه ان شا الله
قصي: خلاص نص ساعة تانية ونجيك
ورد: لالالالا توا نبي نروح
قصي: خيرك ؟!!
ورد: انا لازم نكون في الحوش بعد نص ساعة
قصي: ههههههه شني امالا سحر سندريلا بيزول ؟؟
ورد: بالله عليك :(
قصي: اوكي جاي جاي
سكرت من قصي .. قربت ندى جنبي ولفت ايدها ورا ظهري .. وابتسمت ابتسامة اطمئنان <3 .. ابتسمت بس قلبي مش مطمن بكل :(
رن التليفون رنة قصي .. لميت الهدايا وودعت ندى بعد ماشكرتها ع المفاجآة الحلوة .. ونزلت نجري لقصي وكان معاه زين .. لما شاف ايديا محملات نزل فتحلي الباب الخلفي وخدي مني الحاجات وحطهم
قصي: صحة ليهم هادي الصحبة والا بلاش
ورد: :)
ركبت وكان جزء مني فرحان والجزء التاني ميت بلا مشاعر .. كان الخوف مسيطر ع ملامح وجهي .. مرة مرة قصي يشبحلي في المراية
قصي: خيرك ورد متوترة ؟؟
حولت عيوني من ع الروشن وشبحتله في المراية ( خالتي ميس اتصلت بيا )
شد ع المكابح لين زين جي القدام .. تلفتلي ( ميس اتصلت بيك ؟؟ )
ورد: ايه وقالتلي خلال نص ساعة تلقيني قدام حوش عمك :(
قرن حواجبه وتلفت القدام وكمل سواقته
زين: شن تبي بعد هالمدة الطويلة يللي غابتها ؟؟
ورد: تبيني نروح معاها
زين: شن تبي منا هادي !!
ورد: عيب زين مهما دارت ومهما كان هادي بتكون خالتنا ولازم نحترموها
زين: هئ
ضحكت ع جنب .. ضحكة هزوة .. مقدرة ظرفك زينو .. نعرف ان خالتو هملاتك وجدو واميما فاتونا ومعاش سألو علينا .. بس ممكن حتى هما بظروفهم
زين: فوتيها
نبهتني الكلمة الصارمة يللي قالها زين .. تنهدت وتكيت راسي ع الكرسي .. وصلنا قدام حوش عمي .. لقيت سيارة بيضا مدرسة مقابل حوش عمي .. اول ماسكرت باب السيارة .. نزلت خالتو من سيارتها وأشرتلي بايدها بمعنى ( تعالي ) .. تلفتت لقصي وزين يللي كانت ملامح وجههم تقوللي ( خشي معانا وماتمشيلها ) .. تنهدت وغمضت عيوني شويا وكملت طريقي لخالتو .. حضنتها .. حضني كان حار بس حضنها بارد .. حسيت بنفسي غريبة عليها ..
ميس: وين كنتي في هالليل ؟؟
ورد: قلتلك عازمتني صاحبتي
ميس: أوكي .. اركبي
ورد: وزين ؟؟!!
ميس: نبيك انتي الليلة تروحي معاي .. زين خليه مع قصي
ورد: شن في ؟؟!!
ميس: ماتكتريش اسئلة .. اركبي
ورد: وحوايجي !!
ميس: لميتلك حوايجك
ورد: كيف ؟؟!!
ميس: خشيت لشقتك امبكري وخديتلك حوايج هي اركبي ليل مانبيش نتأخر اكتر ع الحوش
ورد: ماتبيش تسلمي ع قصي خطيبك !!
طبست لين وصلت لطولي .. وشدت في وشاحي وتساويلي فيه بكل برود
ميس: هادي مواضيع كبيرة عليك مالكش علاقة بيها تمام !!
هزيت راسي بمعنى ( ايه ) .. فتحت الباب وركبت .. طول الطريق كانت ساكتة وتجري في السواقة مافهمتش السبب .. لين وصلنا لحوش جدو .. نزلتلي شناطيا وفتحت باب الحوش وخشينا .. لقيت الحوش هادي ومظلم سألتها ( مافي حد في الحوش ؟؟ )
ميس: ايه بوي وأمي مشو للجبل وقاعدين غادي اسبوع
ورد: ان شا الله خير!!
ميس: عرس قريبنا
ورد: آها .. هاتي عليك الشناطي اندخلهم
خشت لدارها بتبدل حوايجها اما انا خشيت للمطبخ شربت مية .. في حاجة مخوفتني في رجعة خالتي من السفر بالشكل هدا .. واهمالها الكبير لقصي .. زعما كلام ندى بيصير .. وقصي بيفسخ الخطبة !! .. قعمزت ع كرسي الصالون .. قريب ربع ساعة وجت قعمزت جنبي خالتو .. وفتحت التلفزيون ع قناة اجنبية
ورد: امتى رجعتي من السفر ؟؟؟
ميس: اليوم مع المغرب
ورد: وجدو واميما مايندروش عليك !!
ميس: كلمتهم .. كيف عرفت انهم في الجبل امالا !!
ورد: خالتو شن في !! .. وجهك مش مطمني ؟
ميس: انتي شن تبي في قصي ؟؟
ورد: كيف يعني !!
ميس: ماديريش روحك غبية
ورد: والله مافهمت
ميس: قصي علاش مهتم بيك هكي ؟؟!!
ورد: شن يللي خلاك تقوليلي هكي ؟
ميس: هوا .. طول فترة علاقتنا ورد دارت ورد قالت .. ورد وورد وورد انتي شن تبي منه بالزبط ؟؟ .. ليش اهتمامك بيه كبير ؟؟ .. فهميني علااااااش !! .. انتي استغليتي غياب بوك وغيابي انا باش تلفي براحتك ع قصي
ورد: قصي ماعنداش علم بأنك روحتي من السفر اصلا
ميس: وانتي شن علاقتك !!
وقفت خالتي وانفعلت ..
ميس: تي انتي مني باش تقوليلي عنده علم والا لا !! .. افهمي لااااازم تفهمي انه قصي لياااا انا مش ليك فهمتي والا لا !! .. قصي يحبني انا .. وبيتزوجني انا .. وليه 4 سنين يجري ع خاطري انا .. علاااش تبي تاخديه مني علااااش !!
قعدت نبكي ومعاش عرفت نرد عليها .. اهتمامي بقصي لانه زي خوي الكبير مش اكتر ولا اقل
ورد: ياخالتو والله مانبي ناخده منك .. اصلا قصي زي خوي
قعدت ادور في مكانها وحاطة ايديها ع راسها ودموعها ع خدها
ميس: ايه طبعا انتي تعتبري فيه هكي .. بس هوا تعرفي كيف يعتبر فيك !! .. مفضلك انتي عليا انا .. يقارن في تصرفاتي بتصرفاتك انتي .. تعرفي شن قاللي مرة !! .. ورد صح صغيرة بس عقلها اكبر منك .. تحبني اكتر منك .. تهتم بيا ومدلعتني ومش مخليتني مستحق حد .. وجهها يخلي فيا نتفائل .. قلبها صافي .. ابيض زي الحليب .. لسانها رطب معاي .. تعامل فيا تقول راجلها
وقفت وقعدت نحرك في ايديا بمعنى ( لالالا )
ورد: لالالا مش هكي انا والله .. قصي زي ,,,,,,,,,,,,
ميس: من اليوم .. تسمعي فيا ولاه !! .. من اليوم هدا حوشك بتقعدي هنا .. لين نوصل لقصي .. مش فرخة زيك تاخده مني بعد يللي درته كله ع خاطره !!
ورد: بس انتي اهملتيه لما سافرتي :(
ميس: ما اهملتااااااش .. نبيه يغاااااار .. نبيه يحس بالنار يللي تركب فيا لما يحكيلي ع ورد .. بس تعرفي كيف كانت ردة فعله !!
قطعت عليها وبديت نعلي في صوتي شوي
ورد: ايه نعرف .. يروح في عقاب الليل يبكي ويعيط وكسر تليفونه .. والليل كله مايرقدااااش .. والسبب هوا انتي ياخالتوووو .. انا كنت نحاول نهديه ونسيه شويا همومه .. انتي مادرتيش فيه طيب باش هوا يرتاح معاك .. خالتو حسي بيه حرام عليك .. تي انا في الطريق قلتله عليك قريب دار بينا حادث .. اسمعيني خالتو
قامت عيونها فيا وفتحتهم ع وسعهم
ورد: قصي خوي الكبير يللي لما توفت ماما كان هوا أمي .. ولما حبسو بابا هوا كان بوي .. ولما نبكي هوا الكتف يللي يهديني .. ولما نكتب حروفي بس ليه .. ولما نضحك نلقاه يضحك معاي .. قصي سندي وظهري في هالدنيا .. خالتو قصي علمني كل شي في الدنيا بس عمره ماحسسني بأني ملكه .. أو حسسني بشعور يخليني نفكر بللي انتي فكرتي فيه .. قصي مستحيل يكون غير خوي الكبير وعمري ماح نفكر فيه تفكير تاني .. قصي يحبك انتي بس حاولي تحبيه زي مايحبك وهدا الشي يللي ناقصك
مشيت وخليتها في الصالون .. خشيت لدارها هيا وماما .. خديت مخدة ماما وورغانها وطلعت بيهم لدار المعيشة فرشت ورقدت ودمعاتي ع خدي .. عمري ماتوقعت خالتي بهالوحشية .. نسمع في صوتها في الصالون تأن وتبكي .. بس عارفة مش ع خاطري .. ع خاطر ممكن يضيع منها قصي ..
>>>>>>>>>>>>>>>>>>>>
قصي يتحدث ::
تصرفات ميس ماخلتنيش نرقد .. سمعت صوت خطوات البرا .. فتحت باب داري لقيته زين يدور في وسط الحوش ..
قصي: زين !!
تلفتلي وكان واضح ع وجهها الكآبة
قصي: خيرك ادور ؟؟
زين: نفكر في ورد
قصي: ههههههه ياراجل
زين: تي شن تحساب ماعنديش قلب ؟؟
قصي: والله .. يابوقلب انت شن رايك تلعب معاي شوط بلايستيشن ونشوفو مني قلبه قوي !!
زين: ماعنديش نية
قصي: ماجاكش النوم ؟؟
زين: ايه طالع للجنان شويا
قصي: ريح روحك الساعة 2 في الليل اما جنان هدا !!
زين: نبي نكلم ورد .. نطمن عليها بس :(
قصي: آووووف شن الحل !!
فكرت .. فكرت .. فكرت .. قمت تليفوني واتصلت بميس مافيش حل تاني !!!
رن التيلفون بس سمعت صوت حزين .. قداش ليا معاش سمعته
ميس: آلو
قصي: ميس خيره صوتك هكي !! .. بعدين امتى روحتي !! .. وعلاش ماقلتليش ؟؟ .. وهكي جيتي وخديتي ورد من خوها ؟؟.. شن في !!
ميس: مافي شي .. بنت اختي وحبيت ندردش معاها الليلة
قصي: في نبرة صوتك حاجة مش مطمنتني!!
ميس: قصي انت متصل تبي ورد ولاه !!
قصي: ايه ..لان ,,,,,,
ماخلتنيش انكمل كلامي قطعت عليا
ميس: عارفة اصلا في شن نهمك انا ؟؟ .. ورد .. ورد .. حياتك كلها ورد .. تو نعطيهالك مانبيش نعطل عليك .. ماتحملتش ساعتين ع فراقها ولاه !!
قصي: انتي شن تخرطي ؟
ميس: نخرط صار ؟؟ .. لازم تعرف ان ورد بنت صغيرة لو تزوجت راهي بنتك بعمرها
قصي: ميس اسكتي خير مانقول كلام نندم عليه واعطيني ورد يبيها زين
ميس: قول قول شن مازال ماقلتاش انت !!
قصي: اعطيني ورد
معاش سمعت صوت .. شويا وبعدين سمعت صوت ورد
ورد: آلو قصي
قصي: يبيك زين ياورد
ورد: آوكي
عطيت زين كلمها .. وانا خشيت لداري متعصب مسحت ع راسي فوق لوطة من كتر الاعصاب مش حاس بضغطة ايدي القوية ع راسي .. خش زين مدلي التليفون
زين: هيا تلعب بلايستيشن ؟؟!
قصي: لا .. حاس روحي تاعب وبنرقد
زين: :\
>>>>>>>>>>>>>>>
نضت الصبح ضميت فراشي .. دوشت وغسلت اسناني وتوضيت باش نصلي الصبح .. صليت وقعدت ندعي ربي يفرجها عليا .. حاسة روحي أسيرة .. مسجونة اسوء من سجن بابا .. طبقت الصلاية وكيف بنحطها ع الكرسي لقيت خالتي واقفة وضامة ايديها لصدرها .. خفت .. ورعشت مع بعضي .. وقعدت نشبحلها بملامح خوف .. ومستقبلتني بملامح مرعبة ..
ميس: شن تبي تفطري !!
ورد: ءءء حاسة روحي شبعانة مانبي شي صحيتي
ميس: شن هدرزتو انتي وقصي امبارح !!؟
ورد: كلمت زين مش قصي انا
ميس: ماسمعتيش صوته بكل ؟ .. نعطيك تكلميه !!
ورد: استغفر الله العظيم
كيف بنطلع من الدار تشدني من شعري وتشحني ليها ..
ميس: انتي كيف تكلميني هكي !!
ورد: آسفة والله آسفة بس ارخيلي شعري خلاااص
ميس: حقيرة >_<
بعدت من عليها وخشيت للحمام ( أكرمكم الله ) .. وقعمزت ع حافة البانيو وبديت نبكي ونبكي ونبكي .. علاش قلبها قسي عليا هكي !! .. شن ذنبي لو قصي عاملها بطريقة ماحبتهاااش !!
#Dudu
