#الحضن_الدافي
الحلقة :: 38 ::
.. شن ذنبي لو قصي عاملها بطريقة ماحبتهاااش !!
مسحت دموعي بكفوف ايديا بالقوة ونضت ع اللافنيدنو وشبحت وجهي ع المراية .. كيف عيوني حمر وأثار الدموع قاعد ع خدودي .. فمي كيف ملتم في بعضه ويرجف من شهقات البكي .. تنفست بعمق .. وتنهدت .. غسلت وجهي وخليت المية تضرب وجهي باش نفيق ومعاش نوجع روحي زيادة .. قمت راسي ع المراية لقيت قطرات المية تنزل من ع وجهي وياريت ينزل وجعي معاها .. ابتسمت بوجع .. طلعت من الحمام ( أكرمكم الله ) .. لقيت خالتو تلبس في كندرتها .. سألتها برجفات فمي
ورد: بتطلعي !!
ميس: ايه اكيد مش ح نقعد اليوم كله معاك -_-
سكتت .. وقعدت نراقب فيها لين طلعت .. مشيت نجري جيهة الباب سكرته بالقفل وخشيت نلف في حوش جدو وكأني أول مرة نشوفه .. حوش نحس فيه موحش ومخوفني وجودي فيه بروحي .. خشيت لدار خالتو وماما .. قعمزت ع سرير ماما وقعدت نتلمس فيه ونشم في ريحته .. نحس في ماما كيف ناضت من عليه .. ريحتها الحنونة ممزوجة معاه .. تنهدت .. كل ذكرياتي مع ماما طلعت مع التنهيدة .. استغفرت ربي ونضت من ع السرير .. وكيف بنطلع من الدار تلمحت لاب توب خالتي مجطوط فوق المكتبة .. جتني فكرة نفتحه ونكلم قصي ع الفيس ونطمن ع زين .. مسحت ع شعري نحاول نتشجع وننفي الخوف من كل انحاء جسدي .. ومن كتر خوفي لدرجة لفيت ع الحوش قريب 3 مرات نتأكد ان خالتو طلعت .. رجعت للدار فتحته وكنت نفهم كيف نفتح بحكم خبرتي مع كمبيوتر قصي .. بس !! .. مافيش انترنت كيف الحل !!؟؟ .. فركست رفوف المكتبة كلهم اندور ع جهاز الواي ماكس .. وطلعت لوسط الحوش في مكتبة كبيرة لكتابات جدو وخالتو .. فتحت الدولاب يللي موجود في الزاوية لقيت واي ماكس تغمرته مع كلمة ( الحمد لله ) .. نابعة من أعماق قلبي .. وصلته بالكهرباء وخشيت للدار من جديد .. راجيت دقائق وتوصل الانترنت بالكمبيوتر .. فتحت الفيس لقيت ايميل خالتو مفتوح .. ركبني شويا فضول نشوف مسجاتها مع قصي .. بس هذا يعتبر تجسس .. وربي حرّم التجسس .. ( ولاَ تَجَسَسُوا وّ لاَ يَغْتَب بَعْضَكُمْ بَعْضاً ) .. غمضت عيوني واستغفرت ربي وسكرت ايميلها .. وفتحت ايميلي ودورت ع اسم قصي لقيته متصل .. بعتله مسج
ورد>> قصي كيف حالك ؟؟!
قصي>> ورد ؟؟ .. من وين تكلمي فيا !!
ورد>> من حوش جدو .. نبيك اطمني ع زين !!
قصي>> شن صاير معاك فهميني ؟؟
ورد>> ماصاير شي خالتو حبت تغيرلي جوي بقعدتي عندها
قصي>> باهي علاش ماكلمتينيش من تليفونها ؟؟
ورد>> ماهو طلعت لشغلها
قصي>> انا متأكد انه في شي .. احكيلي مادسي شي
فكرت بيني وبين نفسي نحكيله او لا !! .. نخاف لو حكيتله بتكبر المشكلة بينه وبين خالتو وتزيد تتعقد .. ولو ماحكيتلاش انا مشكلتي بتكبر معاها ومايقدر حد يحلها غير ربي سبحانه وتعالى .. آووووف .. نفضّل نتحمل العذاب بروحي المهم قصي مايوصل فيه شي .. مش ناقص هم بنزيده هم ع همه !! ..
قصي>> آلوووو .. وين رحتي ؟؟
ورد>> فصل النت .. انا بس حبيت نطمن ع زين
قصي>> هوا الحمد لله .. بس تغير من لما مشيتي جوه اخخخي ويراجي فيك .. زي ماتعرفي اول مرة تغيبي عليه
ورد>> حتى انا فقداته هلبا مانعرفش امتى خالتو بترخيني !!
خبطت ع جبهتي بالخفيف واستوعبت شن كتبتله .. تو هكي لو ماحكيتلاش ح يكلم خالتو ويعاركها لين تحكيله .. ولوحكيتله بيصير نفس الشي بطريقة ابشع .. آووووف شن درتي ياورد !!
قصي>> شن في ورد ؟؟.. شن صاير معاك فهميني ؟؟
ورد>> شي مافي شي .. المهم سلملي ع زين وح نكلمه اول ماتروح خالتو
قصي>> رغم اني مش مصدق .. لكن حاضر
ورد>> سلامات
قصي>> راجي ورد .. ميس ماحكتلك ع شي !!
ورد>> ع شنو بالزبط ؟؟
قصي>> ماهو امبارح كلمتني باسلوب بايخ شوي وتعصبت هلبا عليا لما قلت نبي نكلم ورد
ورد>> ممكن غارت الله اعلم هههههه
ضحكة ع الشات وملامح الخوف ع وجهي
قصي>> متأكدة !!
ورد>> ايه متأكدة
قصي>> انتي في شي داستيه عليا .. ورد انا قصي ره
ورد>> هي قصي انا بنسكر الظهر يأذن .. سلامات
سكرت ع طول ايميلي .. وحطيت ايديا ع قلبي ارتحت لما هربت من لب الموضوع .. وارتحت ان خالتو مازال ماروحتش .. سكرت الكمبيوتر ورديت الواي ماكس في مكانه .. وخشيت للمطبخ درت سندويتش بالجبنة وطاسة عصير برتقال .. وقعمزت قدام التلفزيون نتفرج ....
>>>>>>>>>>>>>>>>>
قصي يتحدث ::
انا متأكد ان في شي .. مش طبيعي كلامه ومش منطقي .. واسلوب ميس امبارح مستحيل يكون مجرد غيرة .. آووووف شن الحل معاهم ؟؟.. باهي خيرك ياقصي معقولة تعلق بين زوز نساوين ؟؟ .. لالا .. مش زوز نساوين .. الزوز غاليات عليا .. والزوز نحبهم .. والزوز مهتم بيهم فوق اللازم .. فتحت قفل تليفوني ع آلبوم الصور .. لقيت صورتي انا وميس وورد في تاني سنة خطبتنا في عيد ميلاد ميس .. ابتسمت لما شفت ابتسامتهم الصادقة .. ابتسامة حب .. ابتسامة ود .. ابتسامة محبة .. ابتسامة عشق بالنسبة لميس .. وبالنسبة لورد ابتسامة أخوة ولا اعذب منها .. سكرت ع الصورة وكملت شغلي ع المكتب .. لين انتهى دوامي .. خديت تليفوني وكيف طالع من المكتب تلقتني ميس واقفة ع الريسبشن .. استغربت .. قدمت خطواتي لين وصلتلها ..
قصي: ميس !!
ميس: ممكن نتكلم معاك !!
شبحت للبنت في الريسبشن كيف نظراتها لينا كلها استغراب .. ابتسمتلها وتلفتت لميس
قصي: ايه اكيد
ميس تلفتت للبنت : شكرا ليك
البنت: العفو :)
خشيت انا وياها للمكتب .. قعمزت ع كرسي الصالون وانا قعمزت مقابلها
قصي: كلمتيني لاش تسألي ع الريسبشن ؟؟
ميس: حبيت نتأكد من وجودك في هالشركة
قصي: آها .. احكي ميس شن في!!
تنهدت .. وغمضت عيونها شوي وبعدين فتحتهم وقالتلي بصوت مبحوح : نبي ننهي كل شي معاك
انصدمت .. وجمدت في مكاني : انتي شن قاعدة تقولي ؟؟ .. مستوعبة لكلامك ؟؟
ميس: ايه نكلم فيك بجد .. مانقدرش نفرق بين تنين يحبو بعض
قصي: من التنين يللي تحكي عليهم ؟؟
ميس: انت وورد
قصي: لحظة بس
وقفت .. ونضت من ع الكرسي وفتحت قجر المكتب وطلعت جواز سفر ورد كان محفوظ عندي .. وجبته قدام وجهها
قصي: شوفي قداش مواليدها واحسبي قداش بيني وبينها .. ارجوووك ميس بلا استعباط
غمضت عيونها وفكت مني الجواز ولوحاته ع المكتب .. وقفت وبكل هدوء: انت حتى جوازها محتفظ بيه عندك .. ماتعرفش تحافظ ع حاجاتها بروحها ؟؟
ملامح الاستغراب ع وجهي زادت بانت .. : الغيرة بتعميك ياميس .. ركزي معاي .. ورد اختي الصغيرة .. ا خ ت ي ال ص غ ي ر ة .. فهمتي !!
ميس: بس هيا مش اختك ياقصي مش اختك .. ورد معاش صغيرة .. ورد كبرت وعمرها 16 السنة .. قاعدة حلوة وبريئة ونظيفة من خبت الدنيا كله .. هكي انت تحب .. هادي النوعية يللي تبيها .. اكيد معاش تحب وحدة فاتت العشرين ب 7 سنين .. اكيد مش ح تحب وحدة سافرت مع شباب وبنات .. اكيد معاش بتحب وحدة كل خبت الدنيا متجمع فيها .. ويكون حرام وستين حرام عليا لو فرقت بينكم
حطيت ايديا ع كتافها وكلمتها بهدوء وحاولت نمسك اعصابي : ميس انتي عندي بالدنيا كلها .. ممكن اهتمامي بورد لانها فقدت بوها وامها في ظرف 3 سنين بس .. صعب عليا نخليها بروحها في هالدنيا .. لكن مستحيل نفكر فيها كـ زوجة .. البنت صغيرة ومن حقها تتزوج واحد شاب زيها وتكوّن معاه قصة حب يللي تحلم بيها .. يعني مستحيل تفكر فيا انا زي بوها
سحبتلي ايديا من ع كتافها وقالتلي صوت معاه رشفة خشم والدموع معبيات العيون: انا فشلت في كل شي .. حتى معاك فشلت .. آآآآآه ..
وخدت شنطتها وعطتني بظهرها وقالت ( آسفة عطلتك ).. بس وقفتها بكلماتي
قصي: انا اصلا كنت نسأل في ورد عليك وحق الله مشغول بالي عليك
تلفتت وقامت صبعها السبابة وقعدت ادور فيه جيهة راسها : عاود شن قلتلي !!
قصي: ءء قلتلك كلمتني ورد توا ماليهاش هلبا وسألتها عليك بس دست عليا مانبيكش حتى انتي ادسي عليا .. احكيلي شن فيك ؟؟.. شن صاير معاك ؟؟
شدت شنطتها بغل وقالت: وين كلماتك ؟؟
استغربت من سؤالها : انتي يللي يهمك كله وين كلمتني ؟؟.. ماهمكش انشغالي عليك يعني ؟؟
ميس: رد عليا قصي .. ** علت صوتها شويا مع ضغطة سنونها ** وين كلماتك ؟؟
قصي: في الفيس يعني وين ؟؟
ميس: صار قلتلي في الفيس !!
قعدت نشبحلها كيف تلف في عيونها ع ارضية المكتب وبعدين قامت ايديها بمعنى ( سلام ) .. وطلعت بسرعة من المكتب .. لحقتها .. وكانت تمشي بكل تعصب لين وصلت لسيارتها .. شديتها من ذراعها
قصي: تي شن فيك ؟؟.. علاش تتهربي منك راني خطيبك انا ومن حقي نعرف كل شي يصير معاك
ميس فكتلي ايدي : لا غالط مش من حقك .. يللي من حقك ** وقامت صبعها السبابة ع صدري ** تعرف كل شي ع ورد حبيبتك وبس .. يللي مش قادرين تعيشو من غير بعض
ركبت السيارة ولعتها .. ولبست نظارتها الشمسية وانا قاعد واقف نشبحلها وفتحت روشنها
ميس: ح نفذ كل يللي تبوه باش توصلو لبعض وياريت تخلي امك تكلم أمي وتفسخ خطبتنا .. مانبيهاش مني باش ماتصيرش مشاكل بيني وبين اهلي
خبطت ايديا الزوز ع حافة روشنها بقوة لين انتفضت مع بعضها
قصي: لما نكلمك احترميني فاهمة ولاه !! .. انا لما سكتت وخليتك تتكلمي براحتك رأفت بحالتك وبس .. مش معناها تستحقريني للدرجة هادي وتتمادي في تصرفاتك التافهة معاي .. انا كنت ساكت ومتحمل نغزاتك ومن حقك تسمعي كل كلمة نقولهالك .. حركاتك هادي معاش تمشي معاي .. 6 شهور تصرفاتك معاي تغيرت وبديتي تغيبي وتحضري امتى ماتحبي .. وكنت صابر ومتحمل .. روحتي لايطاليا وماكلمتيني ونفس الشي سكتت وتحملت .. جيتي للمكتب وقلتي كلام مافيش منه في الواقع سكتت وقلت تو تهدا ترجع لعقلها .. وتوا جاية بكل صحة وجه تبيني نفسخ الخطبة ** ضميت ايديا لصدري ورفعت كتفي بتعجب ** وهكي من غير سبب .. اقسم بالله ياميس كان مانزلتي توا من السيارة وتكلمتي زي الناس الواعية والله لما نقلب الدنيا كلها فوق راسك ونفسخها الخطبة بس بطريقة مش ح تعجبك .. فانزلي خللي الموضوع يعدي ع خير خيرلك ره ** مع قرنت حواجبي واسلوب تهديد قوي **
طول مانا نتكلم كانت تشبحلي وترعش من الخوف .. نزلت النظارة من ع وجهها وتنهدت
ميس: أوكي اركب معاي
شبحتلها وبعدين حولت عيوني ع جنب : ورا الشركة في جردينة انزلي نقعمزو فيها
ميس: أوكي لحظة بس
نزلت مراية كرسيها وعدلت وشاحها وحطت نظاراتها ع عيونها .. وخدت شنطتها من الكرسي يللي جبنها وكانت ترعش من الخوف .. سكرت الروشن ونزلت من السيارة .. سكرتها وانا كملت خطواتي وتبعتني لين وصلنا للجردينة .. قعمزنا ع أول طاولة قابلتنا .. قعمزت مقابلتني وايديها يرعشو مع بعض
قصي: خيرك !!
ميس: لا شي
قصي: آووووووف .. تاني مرة بنسالك خيرك !! .. والا ح نفذ يللي في راسي
ميس: آوكي .. انا ياقصي .. قصدي انت ياقصي ** تتلعثم حتى في كلامها وفمها يرجف ** .. اول انسان نحبه ووثقت فيه .. ولما جيت خطبتني كنت اسعد انسانة ع الكرة الارضية و,,,
قطعت عليها مع نفخة ملل : هدا كله نعرفه .. وين الجديد ؟؟
ميس: تبي تعرف الجديد ؟؟.. انا كرهت ورد وبوها وخوها وحتى امها لو حية لما نكرهها .. كل شخص قريب عليك انا نكرهه وخاصة ورد لانها قريبة هلبااااا عليك وع قلبك وعقلك وكل حواسك ياقصي .. ورد خداتك مني ع البارد المستريح .. مجرد ماكبرت كل كلامك وغزلك ع ورد .. بدت ورد كتلة اهتماماتك .. ورد كل حياتك .. تحولت من اخت الى بنت عمرك ماشفت زيها وح تحبها وتعشقها مع الوقت .. قصي انا تعبت من كتر تفكيري فيك .. بس انت ولا في بالك اصلا ** كانت تتكلم منفعلة بكل حواسها وانا مستغرب في كل كلمة تقولها **
قصي: ميس.. كل يللي قلتيه مجرد وهم مافيش منه ع الواقع .. ايه ورد عاجبتني ومهتم بموضوعها أخت ليس إلا !! .. يعني انا باش نفكر في ورد تكون زوجتي في المستقبل مستحيل .. غيرتك عمت ع قلبك وبديتي معاش تشوفي الا في ورد الشيطانة واللي بتخطفني منك .. ورد أطهر من ان تخطف من خالتها خطيبها
ميس: هآآآ ريت قاعد تشكر فيها .. وبعظمة لسانك قلت ورد اطهر من الفعل هدا صح والا لا !!
قصي: شوفي حبيبتي انا حبيتك انتي .. ومانشوفش في غيرك .. ويللي يهمني في كل شي هوا انتي .. ويللي بنتزوجها هيا انتي .. معاش تخللي الاوهام تسيطر عليك .. والشيطان يضحك عليك بالله عليك ساعديني باش نوصلو لبعض .. نبيك بس تهوني عليا وتهنيني وانا نكمل عليك الباقي والله
حطيت ايدي ع ايدها مع ابتسامة : كوني واثقة فيا :)
ابتسمت ومسحت الدمعات يللي نزلت من عينها .. بعدين سحبت ايدها بالشويا مني وقالت: شني مش ح تشربني شي ؟؟
ضحكت .. وارتاح قلبي وتهنى .. نضت من ع الطاولة مشيت للكافيه .. خديت عصير وشكلاطة ورجعت قعمزت ..
قصي: ايه احكيلي شن صار معاك في ايطاليا ؟؟
ميس: ولا حاجة .. من الكورس للشقة ومن الشقة للكورس والحمد لله
قصي: آها .. المهم خديتي الشهادة بتفوق ؟؟
ميس: ههههه ايه اكيد .. امتياز والحمد لله
قصي: مليح بكل .. ءءء ميس ممكن نصارحك بشي
ميس: اكيد قصي
شربت شويا من العصير وشبحتلها بعيون تلمع حب : الموقف هدا وضحلي قداش تحبيني وقداش مهتمة بتفاصيل حياتي .. والله ارتحت ميسووو
ضحكت بخجل .. وشربت عصيرها كله
قصي: تي غير بالشويا كملتي الطاسة شن مازال بتشفطي ؟؟؟
حطت الطاسة لوطة وتحشمت بعدين ضحكت
ميس: مبردك عاااد
قصي: غير قوليلي قوليلي لما تتحشمي هكي اديري ديما ؟؟؟ ههههههههه
ميس: قصي بلا برادة
قصي: هههههه وحق ربي البرادة ماتحلا الا معاك
رن تليفوني والمتصل مصطفى .. سكرت عليه
ميس: رد مني يللي اتصل ؟؟
قصي: هذا مصطفى مانبيش نرد ونضيع دقيقة معاك ع خاطره
ميس: ههههههه كان يسمع بيك بس
وفاتت مقابلتي معاها عسل ع عسل .. وصلتها لسيارتها ودعتها بابتسامة حلوة .. رجعت ركبت سيارتي وطلعت ع الحوش طول .. وكنت معبي طاقة ايجابية ونبي نفرغها .. بس مع المحروس ولد عمي زينووو اكيد مضايق خللي نغيرله جوه ..
>>>>>>>>>>>>>>>>>>>
سمعت صوت باب الحوش انفتح .. جمدت في مكاني .. خشت خالتو تغني وادور وانا مستغربة فيها .. جت حضنتني بالقوة لين قريب ضلوعي طلعو .. وباستني بوسة في جرت بوسة وانا مستغربة مازال.. وخشت لدراها بدلت حوايجها .. وطلعتلي
ميس: شن رايك نتغدو برا ؟؟
ورد: براحتك :(
ميس: خلاص بدلي حوايجك بسرعة خللي نحط الحوايج في الغسالة ونطلعو
ورد: اوكي :\
>>>>>>>>>>>>>>>>>
قصي يتحدث ::
خشيت للحوش لقيته هدوء .. اول ماحطيت رجلي ع الصالة سمعت بوي يقول ( هوا موافق والبنت بنته ماعندي مانديرله )
قصي: السلام عليكم
الياس وأمي وبوي : وعليكم السلام
أمي: روحت؟؟ .. نحطلك غداك ؟؟
قصي: ايه قريب نموووت جوووع
أمي: حاضر
ناضت أمي طلعت من الصالة .. وانا قعدت نحاول نفهم الموضوع من ملامح بوي .. بس واضحة ماتبشرش .. سكتت وماحبيتش نعرف .. بس هوا نطق
بوي: مشيت لعمك اليوم
قصي: آه كيف حاله ؟؟
بوي: الحمد لله .. طلب يشوفني و قاللي ع موضوع قاعد مش خاش راسي
قصي: شن هوا !! .. ان شا الله خير
بوي: صاحبه وليد عرفته !!
قصي: ايه وشن دخله بينكم ؟؟
بوي: هدا يللي جاب الموضوع .. خطب ورد لخوه الصغير غسان
قصي: كيف يعني خطبها ؟؟
بوي عدل تقعميزته مع شبحات عميقة ليا: خطبها يعني بيزوجها لغسان خو صاحبه
قصي: ومن غسان هذا ؟ .. ** نتكلم بكل استغراب ونحاول نفهم ** .. وبنت عمرها 16 شن بيزوجها هادي ؟؟
الياس: ماعطاش لبوي التفاصيل .. بس عمي حدد موعد زيارة اهل غسان الخميس الجاي وحابين يتعرفو علينا ويشوفو ورد هادي خلاصة الموضوع
أمي حطت الصفرة ع طاولة صغيرة قدامي .. وقعمزت جنبي
أمي: هدا عمك بيهبل خلاص عليه
قصي: غسان هدا قداش عمره ؟؟
أمي: قال في العشرينات .. هوا مناسب وحتى عمرها ورد لا باس بيه باش تفتح حوش وادير عيلة !!
واطيت راسي لوطة ومسحت ع شعري بتعصب .. كل مانفرح يجي موضوع يعصبني .. نضت وقفت وطلعت من الصالة نسمع في همسات امي لبوي تقول ( بيني وبينك خللي يعطيها كان نصيب كويس ووليد حلال خللي تمشي )
طلعت للجنان وطلعت دخاني .. خيره عمي !! .. بنته صغيرة ؟؟ .. شن بيعطيها لراجل ؟؟ .. بالك خطبة بس ياقصي ماتهبلش .. آوووووف .. حسيت بايد ع كتفي تلفتت لقيته الياس
الياس: ماتفكرش هلبا عمك موافق يعني اكيد رايك وراينا مايهمااااش كان هدا راهو طلبه
قصي: يعني انت مقتنع بالموضوع بحد ذاته !!
الياس: قلتلك مايهمش انكان اقتنعنا او لا ؟؟ .. عمك عطاه الكلمة خلاص
قصي: استغفر الله العظيم
الياس: خش تغدا وماتشغلش بالك ان شا الله كل شي يمشي ع خير
قصي: البنت عمرها 16 راهي 16 صغيرة .. مراهقة .. ياودي قاصر كيف بيزوجها ؟؟
الياس: وشن تقوللي انا !! .. ع اساس بوها مايعرفش هدا كله ؟؟.. يصطفل منه لبنته لولده معاش دخلنا في شي
قصي: المشكلة حتى امي مقتنعة وعاجبها الموضوع
الياس: تعرفها أمي .. كان عندها بنات راهي زوجتهم من 12 السنة تعتبر في ورد انضمت لفئة العوانس .. نساوين الكبار هكي تفكيرهم ديما
قصي: لا حول ولا قوة الا بالله
الياس: خش تغدا ومايصير الا يللي ربي كاتبه
قصي: تمام :)
معاش فكرت في الموضوع .. بعد يومين وورد بعيدة ع زين .. وعلاقتي مع ميس بدت تتحسن شوي شوي ..وجتني فرصة نطلع من دوامي بكري شوي .. مشيت زيارة لعمي وسألته ع موضوع بنته وغسان خو صاحبه :\
جواد: الموضوع هدا مانبي حد يناقشني فيه .. انا واثق في وليد وخوه ومانلقى حد زي اخلاقه وانسانيته مجرد ماعجباته بنته مااهتمش لبوها وشني تهمته !! .. فلهذا قصي رجاءا ماتعبيش براس ورد ع الموضوع وتخليها ترفض .. خليها براحتها وانا عطيته لو ربي عطاه
قصي: بس ياعمي صغيرة البنت
جواد: مادامها صغيرة ليش مسكنينها في شقة بروحها ؟؟
ارتبكت وواطيت راسي
جواد: عندك الحق تواطي راسك لان الفعل هذا مايرفعش الراس
تنهدت .. تنهيدة صبر
جواد: ياسرها بنتي عذاب .. نبيها ترتاح مع الشخص يللي يناسبها
قصي: انت تتوقع ان غسان ممكن يناسبها ؟؟ . ممكن ترتاح معاه ؟؟ .. انت مش جاي تخيرها انت فرضته عليها فرض .. مافيش مجال للتفاهم .. عمي زيد فكر ومازال ع الخميس يوم بطوله وعرضه زيد فكر خلينا نردوهم ولما تكبر ورد تختار مني يشاركها حياتها
جواد: لا مافيش نقاش في هالموضوع اصلا .. الصغير يكبر غدوا .. نستاذن انا
ناض عمي وخلاني في غرفة الزيارة بروحي .. خبطت الطاولة بالقوة ونضت .. ع طول رفعت تليفوني واتصلت بميس
ميس: اهلين قصي كيف حالك ؟؟
قصي: الحمد لله .. انتي وين !!
ميس: كيف طلعت من شغلي .. خيره صوتك هكي شن في !!
قصي: كنت عند عمي
ميس: آها
قصي: في واحد بيجيب اهله بيخطبو ورد
ميس: بيخطبو ورد !!!
قصي: ايه ورد مني يعني !!
ميس: من هوا ؟؟
قصي: خو صاحبه وليد كان تعرفيه
ميس: ايه تقريبا ماعنداش صاحب غيره
قصي: المهم .. كيف يصير باه !!
ميس: وانت خيرك مضايق من الموضوع ؟؟.. مش مافي شي بينك وبين ورد ؟؟
قصي: ميس ماتخلينيش نعيط ونسمع الناس
ميس: باهي باهي خلاااص
قصي: البنت صغيرة وهدا يللي شاغللي بالي وعمي مصّر :(
ميس: وشن فيها ؟؟ .. تتزوج صغيرة خيرللها من هالعذاب يللي عايشاته .. طيف امها كل يوم يزورها وخلينا عاد من تفكيرها العميق في بوها وحبسه :(
قصي: تتكلمي بجديات انتي ؟؟
ميس: والجد الجديات زيادة
قصي: اوكي سلام
ميس: شنـــ......
سكرت عليها .. وركبت سيارتي .. ليش الكل عاجبه الموضوع الا أنا ؟؟ .. هيا ورد بالنسبة ليا شنو باه ؟؟.. بوها يللي هوا بوها والموضوع موافق وعاجبه !!! .. أنا مني باش نرفضه ؟؟ .. بصفة شني ؟؟.. باهي لو رفضته عمي ح يفهم غلط .. وتكبر المشكلة ومش لصالح ورد نهائيا .. بوها وعارف مصلحتها .. لازم مانتقبل الواقع ونعيش فيه ..
#Dudu
