#الحضن_الدافي
الحلقة :: 14 ::
زين مايعرفش شن الجنة لانه صغيرون .. بس كان فرحان ببابا وتغمره هوا يضحك .. ماما في الحلم قالتلي ردي بالك ع زين .. ح نحطه في عيوني ياماما وانتي ارتاحي .. خشيت نجري للحوش .. لقيت النساوين قاعدين يبكو .. خشيت لدار ماما .. لقيت خالتي متكية ع سرير ماما وتبكي .. فتحت القجر متاع الكامدينو .. لقيت صورتها .. خديتها وطلعت نجري .. قعمزت في الجنان .. وقعدت نتفرج ع الصورة .. نتمنى ياماما تكوني مرتاحة في الجنة .. انا نحبك هلباااا <3
>>>>>>>>>>>>
قصي يتحدث ::
كنت نتمشى في جنان حوش عمي الواسع .. وانا ندخن .. شريط حياة عمي مع مرته كل مر قدامي .. من عرسهم لحد هاللحظة .. اكتر زوجين ممكن يكونو ع وجه الارض حياتهم مثالية .. وعاشو مع بعض ع الحلوة والمرة .. تربيتهم لصغارهم .. مافي حد ذمها .. عمري ماريت عمي مضايق منها .. عمي كان يدخن بشكل مش طبيعي لما هوا شاب .. اول ماتزوج ايناس كانت عندها حساسية من الدخان .. وع خاطرها سيب الدخان ومايجي منه .. رغم انه يللي يدخن مرة بس صعب يتخلا عليه .. تولي حالة ادمان زي حالتي انا توا .. كل مانفرح .. كل مانضايق .. كل مانزعل .. كل مانتسلا .. شريكي يكون دخاني .. عمري مافكرت في يوم آني نسيبه .. زعما تجي من تكرهني فيه !! .. ياودي أشك :\
تلفت يساري كانت في شجرة ليمون .. شفت حاجة وردية .. وين طبست لقيتها ورد مقعمزة وكانت لابسة قفطان وردي.. كانت شادة صورة .. قربت منها ..
قصي: ورد .. شن اديري تحت الليمة ؟؟
شبحتلي دست الصورة ورا ظهرها
ورد: شي
قصي: آممممم شن دسيتي ورا ظهرك ياقنينة !!
ورد: قصي نسألك عادي !!
قصي: عادي
ورد: ماما عندها مذكرة في حوش جدو تكتب فيها كل شي يصير معاها .. انا خاطري ندير زيها .. لكن مانعرفش نكتب :(
قصي: آها .. تكبري تو تتعلمي الكتابة :)
ورد: حتي قصتي ماكملتهاليش ماما :(
قصي: عادي .. اول ماتتعلمي الكتابة كمليها بروحك
ورد: اسمع قصي .. شن رايك انا وياك نحفرو وندسو الكنز ؟؟
قصي: ههههههه كنز !!
ورد: ايه .. تفرجت ع رسوم يحفرو تحت الشجر .. ويردمو صندوق فيه الكنز
قصي: باهي كنزشنو يللي احني بندفنوه !!
ورد: مانعرفش :(
قصي: آهو نقولك فكرة .. الكنز معناها اغلا حاجة عندك انتي .. ادسيها ولما تستحقيها تحفري اطلعي الصندوق وتاخديها :)
ورد: باهي شن اغلا حاجة عندك انت !!
قصي: آممممم تليفوني ههههه
طلعتلها تليفوني ..
ورد: بس !!
قصي: ايه وانتي شن اغلا حاجة عندك !!
ورد: آمممم .. صورة ماما اهيا انا نحبها :(
قداش حسيت روحي صغير قدامها .. انا اهم شي عندي الماديات .. واغلا شي ممكن يكون عندي .. بس هيا صورة امها فضلتها ع كل حاجاتها
قصي: باهي شن رايك ناخدو صورة الماما وآي حاجة تحبيها .. نحفرو ونردموها وين تكبري طلعيها .. والا نقولك شن رايك نكتبلك رسالة تردميها .. والا اكتبي شن درتي اليوم وتقعدلك ذكرى !!
ورد: هييييييي .. فكرة حلوة .. آمممم شن نكتب باه !!
قصي: خشي جيبيلي بيرو قبل وتعالي
ورد: وورقة !!
قصي: لا تو نكتبها ع الصورة من التالي احسن
مشت خطوات سريعة بعدين ولتلي
ورد: باهي ماعندناش صندوق !!
قصي: ساهلة .. تو نجيبو صندوق الياس ههههههه
ورد: ههههههه باه
تلفتت القدام بتمشي بعدين ولت .. باستني ع خدي
ورد: شكرا قصي
قصي: العفو :)
واخيرا .. مشت تجري جابتلي بيرو .. وحطت صورة امها ع ركبتي ..
قصي: شن تبيني نكتب ؟؟
ورد: اكتب آمممم .. نحبك ياماما
قصي: وشن تاني !!
ورد: ونحب بابا .. ونحب زين .. وقصي والياس وعمي وماما فاطمة
قصي: ياوالله موضوع وقصة .. تي هادي رسالة ليك للمستقبل .. تي تقول قلتلك قدمي تحياتك -_-
ورد: باهي اكتب انت اللي تبيه
قصي: آمممم جيبيلي ورقة بسرعة
ورد: لما قلتلك قلتلي مش لازم .. وتوا بتعبني من جديد -_-
قصي: باهي مش لازم ورقة .. خلاص مش لازم اصلا نردمو الكنز .. بري قولي لماما فاطمة اديرلي نص جعان
ورد: لالالالا خلاص والله وعد هآآ معاش نتكلم تو انوض نجيبلك ورقة
مشت تجري وانا قعدت نضحك ع عفويتها .. وكيف نقزت وحاطة ايدها ع فمها ورغم هدا تتكلم ومدايرة دوشة .. جتني تجري جابتلي ورقة
قصي: اسمعي انا بنكتبلك رسالة .. ليك انتي .. لكن اوعديني ماتحفريش عليها بكل .. يعني لين يولي عمرك 16 سنة والا حتي 20 اوكي !!!
ورد: هآآآآ .. نولي كبيرة هلبااااااا !!
قصي: هههههههه امالا انا شن نقول عمري 26 سنة توا
ورد: حي عليك
قصي: ماتعيطيش عليا قوليلي بطول عمرك ان شا الله هكي الادب -_-
ورد: ههههههههه باه
قصي: ترا قوليها ؟؟
ورد: بطول عمرك ياقصي ان شا الله
قصي: ايوااا منورة .. هي اقلبي وجهك غادي خللي نكتبلك
لفتت وجهها للجيهة التانية وانا قعدت نكتب ع الورقة .. المهم عبرت وماقصرتش .. كلمات مانعرفش كيف طلعو مني بس كتبتهم .. وكل موقف درناه مع بعض كتبته .. وكل شغب داراته كتبته .. وكل كلمة كانت تقلب فيها كتبتها .. وكل فترة قعادها عندنا كتبت تفاصيلها .. لساعتنا هادي .. وبعدين كتبت أمنياتي ليها لما تكبر .. وشن توقعاتي ح تكون في المستقبل .. الورقة تعبت بس مازال في قلبي كلام ..
قصي: كملت خلاص
طبقت الورقة ع اربعة .. وحطيتها في جيبي
ورد: وين بتمشي بيها ؟؟
قصي: للحوش بنحطها في صندوق وغدوا نجيبها ونردموها تمام
ورد: باهي انا شن نكتب ع الصورة
مدتيلها الصورة والبيرو ..
قصي: اكتبي بالشويا عليك .. حرف حرف .. اكتبي رسالة لآي حد تبيه
ورد: نكتب رسالة لماما
قصي: ءءء ورد شن رايك تكتبي رسالة لزين خوك !!
ورد: هههههههه صغير مايعرفش يقرا
قصي: ماهو بيكبر حتى هوا .. بعدين اعطيهاله يقراها
ورد: باهي تساعدني !!
قصي: ياعيني ^_^
ورد: آآممم .. أ .. ن .. ا .. ن.. ح .. ب .. ك .. يازين .. آممم قصي كيف نكتب بنكونو احسن خوت في العالم كله !!
مليت عليها جملتها كلمة كلمة .. وخليتها تكتب وتتهجى وساعدتها شويا في بعض الكلمات .. في نهاية الصورة كتبتلها اسمها وتاريخ اليوم ..
ورد: غدوا وين تجيب الصندوق تو نعطيك الصورة .. مع السلااااامة
ومشت تجري .. وضاع عليا العشي .. طلعت بسيارتي ع حوشنا طووول نبي نرتاح وخليت الياس وولاد عمتي يعولو في العزا .. وصلت الحوش درت سندويتش .. وخديت قسط من الراحة ولأول مرة نبات في الحوش بروحي .. حسيت بيه مظلم .. وموحش .. الحوش بلا أهل مافيشي طعم .. خداني النوم لأحلامه .. من كتر التعب حتي الحلم جاني مشوش ..
>>>>>>>>>>>
جواد يتحدث ::
فاتو تلات ايام .. وشويا شويا بدي الحوش يفضا .. ممكن الصغار ماحسوش بفراق امهم لتوا .. لانهم لهو يلعبو مع الصغار .. والزحمة والدوشة ماحسوش بالوحدة .. قعدت نتمشى في جنان الحوش مع الظهرية .. الدنيا سودا ومظلمة بلا ايناس .. الدنيا موحشة .. مش قادر نتخايل روحي بنعيش مع صغاري بروحي .. شويا ورن نقالي .. في هادي اللحظة تمنيت ايناس يللي تتصل باش تقولي ع الحاجات الناقصة يللي تبيها .. تمنيت بس ماصارش يللي نتمناه .. وكان صاحبي وليد .. لينا سنين ماتلاقيناش .. كل واحد لهي بحياته ومستقبله .. سافر وحضر الماجستير وعاش الغربة .. بينما انا كونت أسرة وصغار .. ممكن هوا يشوف في عمره صغير .. بس انا شفته المناسب للزواج من 10 سنين فاتو ..
جواد: آلو .. كيف حالك وليد !!
وليد: الحمد لله كيف حالك انت ؟؟.. سامحني هدا وين اتصلت باش نعزيك .. هدا وين سمعت :(
جواد: ولايهمك .. عاذرك وعارفك
وليد: باهي عظم الله اجرك .. بالله خوي جواد قوللي وين حوشك بالزبط !!.. ناسي النعتة وخيك
وصفتله النعتة .. وماهيا الا نص ساعة وكان قدام حوشنا .. دخلته للمربوعة لان الخيمة بعد 3 ايام نحيتها ..
وليد: كيف صار احكيلي ؟؟
جواد: آآآآآه .. كل يللي صار في لحظات .. تعبت رفعتها للمستشفى وتوفت .. انا بروحي ماصدقتش في البداية والله تحس حالها عن الاول
وليد: هدا ماكتبته ربي .. ماتعذبش روحك ياراجل .. وكّل أمرك لله
جواد: ونعم بالله ..
شويا وخشت ورد للمربوعة ماكانتش تعرف بوجود صاحبي معاي
جواد: تعالي بابا تعالي .. سلمي ع عمو وليد
طبست عليه وسلمت
ورد: كيف حالك عمو !!
وليد: الحمد لله .. هادي بنتك جواد !!
جواد: ايه هادي بنتي الكبيرة
وليد: قصدك مازال عندك اصغر منها ؟
جواد: زين وبس
وليد انصدم .. بينما ورد قالتلي كلمتين في وذني ( بابا جعان ) . هزيت راسي بالنفي وطلعت ..
وليد: بجديات تتكلم ؟؟.. قصدك عندك زوز صغار ؟
جواد: ايه .. ورد 9 سنوات .. وزين 4 سنوات
وليد: وكيف بدير معاهم توا ؟؟.. بتسلمهم لجدهم بو أمهم ؟؟
جواد: لا بيقعدو معاي .. صغاري هادم كيف بنخليهم بعاد عليا .. ريحة المرحومة :(
وليد: قصدي كيف بتقدرهم ؟؟
جواد: ليا ربي .. مايخلي حد :(
وليد: تزوج
جواد: انا ويين وانت ويين ؟؟
وليد: هدا يللي لازم يصير .. خودلك بنت حلال تزوجها .. تهتم بيك وبصغارك .. ومنها انت ماتقعدش وحيد في هالدنيا .. وصغارك يلاقو أم
جواد: سكره الموضوع .. تفضل اشرب طاستك
وليد: لا حول ولا قوة الا بالله .. لأمتى بتقعد هكي ؟؟
جواد: لين نموووت .. هيا قعدت معاي لين مااتت كيف انا تبيني طوول اول ماتغمض عيونها نتزوج عليها ؟؟.. كيف ترا قوللي كيف ؟؟
انفعلت ووقفت .. حطيت ايديا ع راسي وبلا رادة الدموع نزلو
وليد: في فرق ياجواد .. هيا قعدت معاك لانك انت معاها وبين صغارها .. وربي كتبلها بالموت بين يديك .. أما توا انت ماتقدرش تقعد بروحك لان وراك صغار .. ومش ح تتزوج عليها .. لانها توفت الله يرحمها .. انت ح تتزوج ع خاطرها .. باش يكبرو صغارك قدام عينك .. وكلنا نعرفو الراجل صعب يتصرف مع صغاره .. صعب يتعامل معاهم .. صعب تكون الأم والأب مع بعض .. صعب تاخد دور الأم انت .. وبعدين عندك بنت وبتكبر .. صعب عليك تفهمها الحياة كيف بالنسبة لأنثى .. خود مني الكلام ياصاحبي .. مستقبل صغارك حاليا بين يديك .. يايتشردو ويقعدو من حوش لحوش .. يإما يكون تحت عيونك وبين يديك .. وتوفي بعهدك لمرتك الله يرحمها ..
شبحتلها ومش قادر نرد عليه بكلمة .. وقف وحط يديه ع كتافي طبطب عليا .. وطلع من المربوعة .. وانا قاعد مش فاهم شي .. صغاري يتشردو مستحيل تسمح لهالشي يصير .. ممكن وليد ماجربش شعور الحب .. وقال كلامه الهامشي .. انهديت ع الصالون .. وكان خاطري نكسر الدنيا كلها .. مانبيش نكون انا في الموقف هدا .. مانبيهم يخيروني بين صغاري وحبي لمرتي .. صعب .. صعب .. علاش ياايناس مشيتي وصعبتي عليا الحياة ؟؟.. صعبتي عليا الصغار ؟.. صعبتي عليا كل شي في هالدنيا ؟؟.. حطيت ايدي ع عيوني وحكيتهم بقوة قوتي .. في هديكا اللحظة ضعفت نفسي .. ونضت نجري للسيارة .. فتحت قجرها لقيت قرطاس دخان خديته .. ولعت الاول وتم .. ولعت التاني والتالت .. وبعدها معاش عديت .. بس لقيت القرطاس تام .. دموعي بدو يصبو وصوتي المبحوح بدي يعلا شوي شوي .. مسؤولية كبيرة في انتظاري .. حمل كبير مانقدراش .. قلبي غم عليا .. فقت من نوبات عياطي .. شفت جنبي لقيت بقايا الدخان .. اذكرت وين سيبته ع خاطر ايناس .. وخرت الكرسي .. وحطيت راسي .. غمضت عيوني .. شريط حياتك ياايناس يمر قدام عيوني .. كلماتك وحروفك يللي تنطقي بيها كل يوم وكل لحظة كنت مذكرها .. وقاعدة في وذني كلماتك المشهورة ( صغاري ياجواد .. يارب نموت بين صغاري .. مانبيش نسافر .. عارفة مافيش أمل من علاجي .. اهم شي في حياتي انت وصغاري ويللي انا عايشة ع خاطرهم .. ) .. في اللحظة هادي طق مرش السيارة .. فتحت الروشن لقيتها اختي لمية
لمية: العفو خيرك راقد في السيارة ؟؟
جواد: شي
لمية: حي جواااد رجعت للدخان ؟؟
سكتت ومش لازم اصلا نرد عليها ..
لمية: هدا كله ع خاطر مرتك توفت ؟؟.. تي تو تفوت الايام وتتزوج وتنساها
جواد: انتي شن تبي توا ؟؟
لمية: خش الداخل تعشى معانا
جواد: مانبيش نتعشى .. ولو سمحتي بري ومعاش تجيني بكل
لمية: علاش ؟؟
جواد: لاني اساسا مش طايق نشوفك لا انتي ولا سلوى .. ياما درتو في ايناس آهي ماتت وخلتهالكم واسعة وعريضة الدنيا . كان درتو فيها الخير بس .. ع الاقل كانت ماتت وراضية عليكم
لمية: ومن قالك هيا مش راضية علينا ؟؟
جواد: انا نعرف
لمية: شن درنالها احني ؟؟
جواد: كرهتوها في عيشتها .. واخرتها نطلب منكم فلوس لعلاجها ماتعطووش وشديتوهم عليا
لمية: كان عندنا رانا عطيناك
جواد: ع من تكذبي انتي ؟؟
لمية: استغفر الله العظيم .. هدا بدل ماتعاملنا كويس تلقانا بعدين
جواد: لا نبيكم توا ولا بعدين .. وكان تبدا روحي عندكم والله مانبيها
سكرت عليها الروشن .. ورجعت اتكيت .. هيا مشت .. وعارفها بتلم حوايجها وبتطلع وهكي اريحلي .. انانيات .. مافهمتش علاش حاقدين عليها وكارهينها لهالدرجة .. ايناس قلبها طيب .. وعاملتهم كويس ماعمرها وجعتهم لين ماتت .. عمرها ماقالت كلمة سو عليهم .. حسبي الله ونعم الوكيل فيهم
شويا وجتني سلوى وطقت عليا المرش من جديد
جواد: نعم !!
سلوى: خيرك وخيي ماديرش في روحك هكي .. كلنا ليها ياجواد .. انت راجل خليك قوي ماتبكيش
جواد: ومن مفهمك ان الراجل خلق بلا احساس ولا قلب ؟؟
سلوى: هي انزل انزل .. بنت خالك مازالت تراجي فيك :)
فتحت باب السيارة بقوة .. ونزلتلها ..
جواد: تي انتم شنووو ؟؟.. فهموني شنوووو ؟؟.. شن القلب يللي عندكم ؟؟.. شن الحقد هدا ؟؟.. لوين تبو توصلو بالكره هدا ؟.. تي قوليلي .. ردي ماتسكتيش .. تي المرا ليها 3 ايام بس متوفية .. تقوليلي بنت خالك تراجي فيك ؟؟
سلوى: ايه ماهو كانك خديتها راهو توا عايش انت وصغارك بخير ونعمة الحمد لله
شدتها من مرفقها بقوة .. غلي كله حطيته في الشدة هديكا .. أشرت ع قلبي بايدي التانية
جواد: لما يكون القلب هدا قلبك الاسود .. هذا قضاء وقدر استغفري ربك يامرا .. جايتكم مصيبة وحق ربي ماتلقو من يطلعكم منها
حذفتلها ايدها بقوة لوطة .. ومشيت .. كان خاطري نقتلها .. كان خاطري نريشها بسنوني .. كان خاطري غل الدنيا كلها نحطه فيها .. بس في النهاية هادي أختي .. بالنسبة ليا كانت مجرد كلمة لان عمري ماحسيتهم يحبوني بجديات .. عمري ماحسيت بحنان الاخت فيهم .. عمري ماحسيت قلبهم عليا .. ولا عمرهم حسسوني بقيمتي وقدري بيناتهم .. كانو متسلطات .. انانيات .. بالاضافة الى قلبهم الاسود ..
#Dudu
