#الحضن_الدافي
الحلقة :: 11 ::
تلفتت لقيت ايناس جنبي .. بس شكلها مش عاجبني بكل :o
جواد: ايناس خيرك !!
ايناس: خلينا نروحو جواد .. احجز حتي غدوا نبي نروح :(
قمت السجادة وجيت جنبها ..
جواد: شن صاير معاك !!.. كنتي تبكي !!
ايناس: كنت ننهان من الحصلة يللي برا .. جيت بنحطلك نسكافي وكيكة يللي درتها نا العشية .. قالتلي شن تحسابي المعيشة رخيصة هنا والا شني .. تشرتعي في الماكلة يمين يسار .. مش تغديتو والا لازم ادلعي راجلك ع حسابنا .. والله والله ياجواد مليييت فدييت .. خلينا نروحو ولا حياة الذل هادي .. معقولة حتي الحليب دساته علينا .. تي شن الفايدة راجلها كويس وديما البرا مايقعدش في الحوش بكل .. وهيا هنا تسحن فينا .. استغفر الله ياربي والله ماكنت نبيك تسكنا معاهم .. والله عديمة الاخلاق المرا هادي :(
جواد: ههههههه استاكيتي .. خلاص هي وتي روحك ونمشو ناكلو البرا ونتمشو والله مانخليها في خاطرك النسكافي والكيكة :)
معاها حق .. حياة الذل ماأصعبها ... طلعنا وادهورنا وشريتلها كيكة ونسكافي .. تمشينا ع الشط وقدام الملاهي .. وكانت الرحلة عفوية وأحلا مايكون <3
>>>>>>>>>>>>>
كنت مقعمزة ع كرسي في الجنان وزين وديمة يلعبو قدامي .. نضت مشيت لقفص العصافير .. وقعدت نتفرج عليهم ..
( بخخخ )
ورد: هييي خلعتني :(
قصي: ديما مخلوعة تقول عايشة في تل ابيب -_-
ورد: قصي .. شن نسميهم !!
قصي: سميهم انتي :\
ورد: آممممممم .. شن رايك هادي نسميها نوسة .. وهدا نسميه جواد <3 ..
أشرتله عليهم .. وتلفتله لقيته مستغرب فيا ويشبحلهم
ورد: شن رايك !!
قصي: هناك وحدة بعقلها .. تسمي عصافير ع أمها وبوها !!
ورد: اصلا ماما وبابا احلا عصافير ياقصي .. كانك عايش معانا راك حبيتهم
قصي: أما غباااء -_-
تلفتت للعصافير .. هوا مشي يلعب في زين وديمة ..
ورد: عصفوراتي امتى ماما وبابا بيروحو !.. استاحشتهم هلبااا انا :(
قصي ناداني من بعيد .. ( ورد تعالي العبي معانا )
تلفتت لقيتهم يبنو في حوش بالرملة .. وانا نحب نلعب بيها .. مشيت نجري معاهم
ورد: قصي تعرف تبنيلنا حوش عالي !!
قصي: ايه غير قعمزي
قعدنا نلعبو .. قريب ربع ساعة باب الحوش طق .. مشي بيفتح زين
ميس: زينو حبيب خالتو <3
ورد: حي خالتي ميس :)
نضت نجري وتغمرتها .. قصي وقف ينفض في حوايجه ...
ورد: خالتو شوفي قصي بنالنا حوش
ميس: ايه حلو :)
قصي قدملنا ( مساء الخير :) )
ميس: مساء النور ..ءء خالتي فاطمة هنا !!
قصي: ايه ايه تفضلي .. ءءء ورد دخليها
ورد: حاااضر
دخلتها خالتو الداخل .. وليت لقصي بنلعب .. لقيته قايم زين من رجليه .. جيته نجري وقعدت نضرب فيه..
ورد: سيب خوووي حرام عليك
قصي: حولي غادي رجال في بعضنا
ورد: سيبه سيبه
حطه لوطة .. تغمرته زين .. لكن دفني وطيحني في مية وتراب يللي كنا نلعبو فيها .. وتلبز قفطاني الوردي يللي نحبه .. نجرحت رجلي شويا وقعدت نبكي ..زين مشي وسيبني
قصي: تعالا ياولد راضي اختك طيحتها -_-
مشي وماردش عليه .. خشيت نكر في رجلي بالشويا .. بدت تصب في دم ..
قصي: وقفي ورد رجلك دم
ورد: حول حول .. كله منك انا نكرهك نكرهك :(
>>>>>>>>>
قصي يتحدث ::
ورد من هيا صغيرة وتقولي نكرهك .. يعني مش جديدة عليا الكلمة .. الله ع طيبة يللي عندك خافت ع خوها .. في الاخير دفها وطيحها وجرحت رجلها .. رغم هدا قالت نكرهك ليا انا مش لخوها .. يللي طيحها .. طلعت دخاني وبديت اندخن .. وزين وديمة يلعبو جنبي .. دورا نتلفت نلقى ورد تكركر في صاكو .. هادي خيرها زيا لمرا الحرجانة شنطتها واتية .. مشيتلها
قصي: ورد وين ماشية !!
ورد: بنبات عند خالتو
قصي: وزين !!
ورد: بنخليه معاك انت .. مش تحبو بعض وتلعبو مع بعض خلاااص
قصي: بلا جو اقعدي .. ياحرااجة
ورد: مانحرجش انا .. بس انتم رجالة تلعبو مع بعض -_-
قصي: هههههههههه
طبست ع مستواها
قصي: اقعدي ياحلوة يانقناقة ههههه
وين قمت راسي لقيت خالتها مقابلتني .. وهدا تاني موقف عبيط انديره قدامها
ميس: ءءء هي ورد حبيبتي نطلعو
ورد: هي بااااي سوسو
قصي : :o
عليا انا ( سوسو ) نهارك احرف غير تروحي بس .. طلعت هيا وخالتها وانا عيوني لوطة .. تلفتت لقيت أمي وراي
قصي: وين ماشية الهبلة هاديكا !!
أمي: روحت بيها خالتها .. قالت عندي حفل تخرج بنرفعها معاي
قصي: كان خلتها راني رفعتها حتي انا عادي
أمي: ع كيفها .. بعدين شاورت اختها وقالتلها عادي
قصي: ايه بالله كيف حالهم !!
أمي: الله ياوليدي حاسة ايناس داسة عليا حاجة كبيرة وان شا الله احساسي يطلع غلط
قصي: ان شا الله ربي يشفيها ويرجعو سالمين <3
أمي: هي خش اشرب معاي قهيوة
قصي: تمام
>>>>>>>>>>>>
وصلنا لحوش جدو .. سلمت عليه وع اميمة .. طبعا خالتي وماما بس ماعنديش خوال ولا خالات تانيات .. جابتلي خالتي كاكاو
ميس: حبيبتي اشربي كاكاو
جدو: خيره ماجبتيش زين !!
ميس: قلتها خالتي فاطمة ماتبيش تخليه قالت الولاد محصلين عليه جو
اميمة: خيرك ورد زعلانة !!
ورد: نسيت عصفوراتي
ميس: ههههههههه قصي شاريلها عصافير
جدو: ايه ماشا الله عليه الوليد قصي اهوا .. كان يجي نسيبنا والله مازينا واحد
اميمة: نهار حرش عليك آي كلام تقوله وخلاص ههههههه
ميس: وردتي .. نوضي بدلي توتك المغرب اذن
ورد: حاضر :)
نضت بدلت حوايجي .. وصليت المغرب .. وبعد كل صلاة ندعي لماما .. بعدين وليت لقيت خالتي شادة اللاب توب .. وجدو واميمة يشربو في شاهي .. قعمزت جنبها \
ورد: خالتو ميسو عادي نستعمل تليفونك !!
ميس: آممم من بتكلمي ياسمحة !!
ورد: قصي
ميس: ههههههه علاش تكلمي فيه استاحشتيه !!
ورد: لا لا .. بنسأل ع زين خوي رقد والا لا !!
ميس: ياروحي يللي بتسال ع خوها هاتي بوسة
تغمرتني وبعدين شبحتلي
ميس: نكلمو خالتي فاطمة خير ولاه !!
ورد: عندك رقمها !
ميس: لا والله انتي مش عندك !
ورد: لا عندي رقم قصي بس مسجلهولي في كراستي لما يتأخر نتصل بيه من المدرسة
ميس: اوكي .. هاتيه نتصلك بيه
جبت كراستي وسجلت خالتي الرقم .. ومدتهولي
ورد: آلو
قصي: من معاي !!
ورد: نا ورد :)
قصي: شن تبي مش معاش تبينا وروحتي مع خالتك ؟
ورد: نبي زين !!
قصي: حسيت بيك مش متصلة ع خاطري .. تعالي جاي رقم منو هدا !!
ورد: رقم خالتو ميس
قصي: والله ؟؟.. شويا نشوفلك زين وين !!
( زين .. زين .. تعالا تبيك دودي )
ورد: آلو زين ؟
زين: دوودي .. انتي وين
ورد: حبيبي تو نروح .. انت ماديرش شطانة لعمو وماما فاطمة زينو باهي !!
زين بدي يبكي معاش سكت ومعاش حتي سمعني وانا نتكلم .. رد عليا قصي
قصي: ارتحتي توا اهو بدي يعيط .. وقته توا حنان الاخت .. تصبحي ع خير
سكر عليا .. وانا قعدت نبكي .. خالتي تطبطب عليا وتسكت فيا ..
ورد: استاحشتها ماما ياخالتو نبيها انا :(
ميس: تو تروح خلاااص عاد ماتبكيش .. غدوا حفل تخرجي نبيك تطلعي أميرة
ورد: ان شا الله :(
خشيت رقدت .. كنت مش مرتاحة في نومتي قريت حتي اذكاري .. بس في حاجة مضايقتني .. ممكن استغربت المكان .. وبعدها غصت في أحلامي
( كنت لابسة فيلو ابيض طويل .. وحاطة التاج متاع ماما يللي لبساته في عرسها .. وشعري كان طويل وناعم .. قعدت اندور فرحانة بيه .. وين وقفت دورتي وانا نضحك شفت قدامي لقيتها ماما .. ماما حبيبتي كانت واقفة بعيد عليا .. لابسة زيني .. فيلو ابيض وتاج .. مبتسمتلي .. قعدت نجري نبي نتغمرها .. بس كل مانقدم نحسها تبعد اكتر .. بعدين سمعتها قالتلي: ردي بالك ع زين حبيبتي .. قعدت نجري ونبكي .. نقوللها: ماما نبيك ماتخلينيش ... ماما انا نحبك .. حتي زين يراجي فيك .. بس ماسمعتنيش .. قعدت نجري بعدين طحت .. وين قمت عيوني اختفت ماما .. معاش نشوف فيها .. كان نجري في كل تركينا مالقيتهاش .. ماما وين مشيتي وخليتيني .. ماااااااماااااا )
فزعت من نومي وقعدت نعيط وانادي في ماما .. جتني خالتي يللي كانت راقدة في السرير يللي جنبي .. وقعمزت جنبي
ميس: بسم الله الرحمان الرحيم .. خيرك حبيبتي ؟؟
ورد: نبي ماما انا .. ياخالتو حسي بيا ماما بتمووووووت
ميس: اسسسس معاش تقولي هكي
تغمرتني خالتي وانا قعدت نبكي .. مانبيش ماما تفارقني .. نخاف انا من الدنيا من غيرها .. حبيبتي ياماما مانبيش نكون يتيمة زي بنت فصلي .. مانبيش الناس يسخفو عليا ويقولو ياناري ماعندهاش ام .. وزين ياماما بيكبر ومايعرفش شن معنى #الحضن_الدافي .. حرام عليك ياماما ماتخليناااش نتعذبو ..
ميس: حبيبتي هديتي !!
انا وجهي متورم .. وقاعدة أحداث الحلم بين عيوني .. كيف ماما كانت حلوة وطالعة زي العروسة وبعدين خلتني .. آآآه ياربي مانبيهاش تخليني زي في الحلم
ميس: خلاص ورد حلم هدا ماتعدليش عليه
ورد: خالتي .. عادي تقري عليا سورة الملك مش حافظتها انا :(
ميس: حاضر :)
قرت عليا خالتي سورة الملك خداني النوم .. يارب يكون غدوا احلا من اليوم :(
#Dudu
