#الحضن_الدافي
الحلقة :: 43 ::
ابتسمنا مع بعض وصورنا سيلفي .. وكملنا دربنا للحوش :)
وصلنا لحوشنا .. خشينا برجلنا اليمين وكلنا شوق ولهفة عليه .. غيابنا طوّل عليه .. الدنيا ظلمت .. أول ماخشينا بدينا بصلاة المغرب <3 .. بابا جاب المكنسة ومية وصابون .. وزين حول الشراشيف يللي ع الاثاث وكلها غبرة .. أما انا خشيت للكوجينا نظفت اللافيندينو .. وغسلت الاماعيين كانت عليه غبرة .. نفضت المخدات والصالونات .. وبابا وزين سيقو الديار والحمام وممرات الحوش .. وانا حكيت الحيوط .. واذن العشاء .. صلينا العشاء لقيت زين متكي ع الارض وراقد ز. جيت طبست عليه ومسحت ع شعره خش عليا بابا
بابا: رقد هههه
بهمس: ايه بابا قيمه ع فراش نظيف خللي نجيبله غطاء
بابا: آوكي
قامه بابا ع الفراش وانا غطيته .. طلعنا وغسلنا البساطات مع الساعة 12 .. طحنا متحتكين .. بابا رقد جنب زين وانا ع طرف الدار خديت فراش ورقدت ......
الصبح شمينا ريحة الشاهي بالنعناع .. فزعت لقيت روحي راقدة بحوايجي متاع امبارح .. ولقيت زين مش في فراشه .. طلعت من الدار بخطوات تعب .. لقيت بابا في المطبخ موتيلنا الفطور ع الطاولة .. كان الحوش شبه فااضي لان اثاثنا قاعد مادخلناشي لانه الحوش كان غبرة ووسخ هلباااا ..
ورد: صباح الخير بابا
جبدت كرسي من الطاولة ونتثاوب ..
بابا: صباح الورد ياورد .
ورد: وين زين امالا !!
بابا: ههههه قاللي بنسقي الوردات يللي برا وقلتله في طريقك اسقي حتي الغرسات ههههه
ورد: ههههه .. تعبت هلبااا ماحسيتش بروحي راقدة بحوايجي هادم
بابا: ايه حتى انا والله معاد نندري ع الدنيا .. نضت بكري دوشت وبدلت ومازال ورانا خدمة ممكن نرتاحو بعد يومين هههههههه مابعدهم النساوين والله
ورد: ههههههه ايه حسيت بماما فاطمة لما تقلب الحوش كله فوقي لوطي .. مابعدها
بابا: هيا امالا بري دوشي وتعالي افطري
ورد: حاااضر
دوشت .. وخشيت لداري لبست بيجاما لونها وردي .. ومشطت شعري وقمته فوق ذيل حصان .. وجيت بنطلع البارفان لقيت الايفون <3 .. طلعته ابتسمت .. ورديته في الشنطة تو لما نفضى بنسجل ارقام صحباتي وبنتصل بيهم .. طلعت نجري للمطبخ لقيت زين وبابا يضحكو وياكلو .. صبحت مرة تانية وقعمزت فطرت معاهم
بابا: بنكلم قصي يجي يعاوني في رفع الاثاث
شرقت بالشاهي يللي نشرب فيه وبديت نكح .. زين جابلي امية
بابا: خيرك يابنتي ؟؟
ورد: لالا مافيش شي جيت بنتكلم شرقت .. قصدي علاش بتنادي قصي آهو مع بعض انديرو كل شي :)
بابا: ماهو يابنتي .....
قطع كلام بابا تليفونه يللي يرن .. وكانت المتصلة ميس خالتو
بابا: آلو كيف حالك ميس ؟؟ .. ايه الحمد لله .. روحنا من امبارح بس لتوا مازال ماكملنا حوسته ... ههههه سلميلي عليهم قوليلهم والله مافضيت باش نمشي نسلم عليهم .. تمام .. براحتك .. اوكي سلمي ع العيلة كلها .. سلامات
سكر الاتصال وحطه جنبه ع الطاولة وانا نشبحله نراجي فيه يفهمني شن كانت تقوله خالتو .. بس كمل اكله وهوا يضحك مع زين
ورد: بابا خيرها خالتو ؟؟
بابا: اه .. قالت بنكمل شغلي ونجي نساعدكم
ورد: قلتلك يابابا مش لازم آهو نتعاونو مع بعض
بابا: وشن فيها كان جت عاونتنا في حاجة .. هي كملو فطوركم وخشو يللي تقدرو عليه ديروه مابين ماجت ميس
ناض بابا من ع الفطور وطلع للجنان .. آووووف يابابا ليش خليتها تجينا ؟؟ .. حاسة روحي بنكرهها .. في داخلي شي يقوللي اكرهيها وزيدي كره .. شبحت لزين لقيت منسجم في الفطور .. غسلت ايديا ونضت خشيت لداري فتحت التليفون ومذكرتي يللي كاتبة فيها ارقام صحباتي .. اتصلت بيهم كلهم وخبرتهم بان هدا رقمي وباركتلهم لنجاحهم .. وانا كيف بنحط التليفون في الشنطة خطرتلي نتصل بقصي .. بس ليش نتصل بيه ؟؟ .. شديت التليفون بين ايديا ونهز فيه .. نتصل او لا .. نتصل او لا .. نتصل او لا .. رديت التليفون في الشنطة وطلعت
الساعة 3 الظهرية جتنا خالتو .. جابتلنا غداء جاهز .. وجي وليد صاحب بابا عاونه في الاثاث كان مار بالصدفة وخطم علينا .. قعدت انا وخالتو في الدار .. فجاءة !!
خالتو: علاش ماتبيشي غسان ؟؟
سكتت معاش عرفت شن نرد .. القصة ليها ايام شن ذكرها بيها توا ؟؟
خالتو: آوكي فهمنا ماتبيش تتزوجي وانك صغيرة .. بس يللي درتيه اكبر غلط .. حبيتيها اللقطة لما الناس يقولو لا امها عرفت تربي ولا حتى بوها صح ولاه !!
تنهدت .. وكنت مقعمزة ع كرسي تلفتت للروشن لقيت بابا واقف مع عمو وليد ويمسحو في عرقهم من التعب .. بس فرحانين ويهدرزو والهدرزة ممكن هونت عليهم :) ..
خالتو: ماتبيش تردي عليا ؟؟
تلفتلها وابتسمت: الموضوع فات سوا تكلمت ياخالتو والا لا مستحيل نقدر نغير من القدر شي
خالتو: بس هدا مش القدر ياحلوة .. هدا انتي طفشتيه
ورد: لاني مانبيش نتزوج ماتغصبينيش .. حتي بابا تأسفلي لما حس بالموضوع كبير عليا
خالتو: اصلا شن سبب دلع البنات غير بوهم
ورد: ربي يحفظه .. انتي اكيد ماتبيشي زي جدو لما غصبك تتزوجي بابا ولاه !!
انصدمت خالتو ووقفت مقابلتني : انتي شن عرفك بيه الموضوع ؟؟
ورد: انا اصلا يللي قلت لبابا مايتزوجكش وانقذتك من قرار جدو يللي خداه بروحه
تنهدت .. ورجعت قعمزت جنبي : كنت نفكر فيكم ماكنتش انانية
ورد: بس توا مافكرتيش فيا .. فكري في روحك وكنتي انانية
تلفتتلي بنظرة حادة: شن قصدك ؟؟
ورد: تبيني نتزوج او حتى ننخطب من آي حد المهم تتخلصي مني ويحلالك الجو مع قصي
ضحكت خالتو ع جنب .. ضحكة هزوة: انا مش ساذجة
رديت عليها بنفس الضحكة: ولما ضربتيني وهزبتيني وحبستيني في حوش جدو ع خاطر توهمتي بقصي يحبني انا مش انتي .. شن تفسيره هدا كله ؟؟
تلفتت للجيهة التانية ومسحت ع وجهها : وقتها كنت غبية .. وقتلتني الغيرة .. بس لما تكبري تو تعرفي شن معنى حركاتي يللي درتها معاك
ورد: ايه بنكبر .. بس مش رح نعيد يللي درتيه فيا في آي حد .. ح نحاول نتصرف بعقلانية اكثر
سمعت صوت بابا ينادي البرا (( ورد .. وينك !! ))
وقفت وابتسمت : عن اذنك بابا ينادي فيا
طلعت من غير مانراجي ردة فعلها .. وانا قاعدة نكلم في بابا وين يحط كرسي الصالون .. طلعت خالتو من الدار تلفتلها انا وبابا وكان واضح ع وجهها علامات الخيبة .. ممكن حتى كانت تبكي الله اعلم .. قامت عيونها في بابا وقالت : معليشي جواد لازم نروح أمي اتصلت وتبيني ضروري
بابا بكل استغراب: اوكي تفضلي
طلعت خالتو .. بابا شبحلي وقاللي: صايرة حاجة مع خالتك ؟؟
رديت بكل بلاهة: لا
بابا: خيرها وجهها هكي امالا ؟؟
ورد: ممكن مريضة .. او تاعبة الله اعلم
بابا: اوكي خلينا منها وقوليلي وين الكرسي نحطه بالزبط ؟؟
ورد: آمممم في التركينا المقابلة حلوة يطلع منظره ولاه !!
بابا: ههههه طلعتي ذووق لامك ههههههه
ورد: :)
>>>>>>>>>>>>>>>
جواد يتحدث ::
كان اليوم متعب بالنسبة ليا ولصغاري وحتى رفيق عمري وليد .. بعد مارتبنا الاثاث والبساطات .. قعمزنا ع كراسي في الجنان وقلت (( زين خش قول لاختك اديرللنا شاهي ))
زين: حاضر
خش زين واختليت بوليد يللي كان واضح من وجهه في فمه كلامه وداسه
جواد: طلعها الجوهرة يللي عندك
وليد: هههههه شاغللي بالي غسان خوي
جواد: خيره؟؟
وليد: قاعد مصّر عليها بنتك
جواد: قوله يراجيها تكبر شويا وتعقل وتو ان شا الله تكون ليه :)
وليد: ان شا الله
جاب زين صفرة الشاهي ومعاها بسكويت .. حطه قدامنا ومشي للغرسات .. شربت شويا من الشاهي رن نقالي قمته لقيته (( الابلة مها )) .. درته صامت وحذفته ع جنب
وليد: مني المتصل ؟؟
جواد: هادي ياسيدي .. ابلة ورد زمان وين كانت صف رابع تقريبا .. شادتها في جرتي الايام هادي كلها .. لا تبي ترحمني لا تبي ترحم روحها .. آآآآه الصبر
وليد: تزوجها
جواد: بدينا في سيرة النكد .. انت آي شي تقوله من غير ماتركز -_-
وليد: لا وحق ربي نكلم فيك بجد .. خودها تحبك وتعيشك أمير ولا تاخد تحبها وتكرهك في عيشتك
جواد: القواعد هادي تمشي مع العزابية مش معاي انا .. غير ايناس مش قادر نتقبل وحدة فهمت عليا ؟؟ .. واصلا من قالك ح نحب انا هههههه
وليد: ماتندريش ع النصيب .. ع كلا انا نصحتك ونبي مصلحتك شوف حالة بنتك كيف متبهدلة .. كان معاها مرآ كبيرة راهو ريحتها شويا من شقاء الحوش وحوسته والمطبخ وتطييبه وخلتها دابها داب قرايتها
جواد: تو ناخدها شغالة -_- .. مش المرآ حتى هيا انسانة تبي اهتمام وكلام حلو معاها .. وتبي مني يونسها ويهدرزلها والا غير اطييب واضم -_-
وليد قام سيجارة وولعها : انا قلتلك والباقي عليك تفكر
جواد: دخن وانت ساكت -_-
ربع ساعة تقريبا من الهدرزة والمشاجرات احيانا وروح وليد .. قمت تليفوني وخشيت للحوش .. دورت ورد لقيتها في دارها شادة مذكرتي تقرا فيها .. ابتسمت وربعت ايديا اتكيت ع الباب
ورد قامت عيونها فيا وابتسمت : بابا تفضل :)
خشيت وقعمزت ع طرف سريرها : وين وصلتي ؟؟
ورد: هههه من امبكري نقرا فيها .. تصدق واصلة في يوم اعدام صاحبك راشد الله يرحمه
تلاشت ابتسامتي لأني اذكرت كل لحظة في السجن معاي راشد .. لحظة قبل اعدامه بساعات قاللي (( ح تطلع برائتك .. وتشوف الشمس .. وتشم الحرية .. وتعيش انت وصغارك مرفوع الراس .. وصيتي ليك ياجواد مرة مرة بس طل ع صغاري .. قاعدين صغار وماشبعوش مني :( .. نتمنى بس نشم ريحتهم ونحضنهم .. بس هيهآآآت .. موتي قرب وامنياتي تبعد عن الواقع اكثر واكثر .. خوفي الكبير ع بنتي تصدق .. لانها حساسة وانطوائية وماعشتش معاها الا سنين معدودة .. ياريت ياجواد تحاول تعوضها غيابي :) ))
رجعتلي الابتسامة من جديد .. شديت ايد ورد وقلتلها : الله يرحمه .. كان نعم الصديق والرفيق في السجن .. صح ماكانتش ظروف حلوة يللي جمعتنا بس وقف معاي وقفة رجال <3
ورد: احكيلي عليه شويا :)
جواد: وصاني قبل ليعدوه ع صغاره .. تقريبا عنده تلاتة ولاد وبنت .. وقال خوفه الكبير ع بنته لانه انطوائية .. تو نديرو يوم نزورهم :)
ورد: ان شا الله .. قريت كلامك ليه يوجع هلبااا .. بابا اكيد تعذبت من غيره صح !!
جواد: ايه صح ** خديت نفس عميق ** نحمد في ربي ديما اني ماطولتش هلبااا بعده :(
ورد: ربي يحفظك يابابا <3 ** شدت ايدي وباستها وخشت في صدري ** .. انا مانقدرش نعيش من غيرك .. مابعدهم صغاره عمو راشد الله يرحمه ويعاونهم :(
تمسكت في ورد اكثر .. فعلا فراق الوالدين واااعر .. مسحت ع شعرها ابتسمت: وانا مانقدرش نعيش من غيرهم .. كل يوم كنت نموت ألف موتة لاني بعيد عليكم .. والحمد لله ربي فرحني بيكم <3
ورد: الحمد لله ** قالتها بهمس **
>>>>>>>>>>>>>>>>>>>>>>>>>
قصي يتحدث ::
ايه صح ورد بنت عمي الصغيرة .. وانا كنت السبب في رجعتها لحوشهم .. بس والله فقدتها هيا وشطانتها ودوشتها .. كنت شاد تليفوني وفاتح صورتي انا وياها وين كانت صغيرة .. كبرت الصورة بصوابعي مع ابتسامة أخوية .. بس اذكرت أخر موقف بيني وبينها حسيت الدنيا كلها اظلمت .. كبرت وافعالها جريئة فوق برائتها .. لازم ماترجعي لأصلك البرئي الطاهر ياوردتي <3
سكرت ع الصورة وبعت مسج لميس (( وينك اليوم ؟؟ .. انشغلت عليك )) .. ونضت لقيت أمي في المطبخ تحط في العشي .. بوست ع راسها وجبدت كرسي وقعمزت
قصي: حاسك زيي للي مضايقة !!
أمي مسحت ايديها في الفوطة : ايه والله .. خلت مكانها ورد اشبح توا شن ادير !!
قصي: اكيد فرحانة لانها مع بوها في وسط حوشهم هدا يللي كانت تحلم بيه طول فترة غيابه
أمي: ربي يحفظهم ويحميهم .. ايه قصيوة شن فكرت في موضوعك والا مازال ؟؟
قصي: موضوع شنو !!
عبيت طاسة امية وعيوني معلقات فيها .. شربت جغمة ولقيتها قاعدة تشبحلي ومبتسمة : ع العرس انتي !!
أمي: ايه ياوليدي نبي نفرح بيك :(
قصي: آمممم انا موافق حددي اليوم يللي تبيه :)
استغربت أمي وقالت : حسيتك مش فرحان !!
قصي: لالا ابدااا .. غير مضايق لان زين مش معاي توا ههههه
أمي: ان شا الله غير هكي :( .. هي نوض ارفع الصفرة بوك من امبكري يستنى
قصي: تمام :)
بعد ماتعشيت .. خشيت لداري وسكرت الباب وراي ماكانش عندي خلوق نطلع مع مصطفى الليلة .. حبيت نستفرد بروحي .. قمت عيوني في الطاولة لقيت اللاب توب ساكن ... شن جابه هنا !! .. أأأه ممكن ورد ردتهولي .. ابتسمت .. وفتحته وأول مافتحت النت طلعولي اشعارات لبروفايل ورد .. ركبني فضول .. نعرف في شن تفكر هالطفلة <3 .. خشيت لقيت صديقاتها المعروفات بس ضايفة .. لفيت عليهم بعيوني .. خشت ندى صاحبتها ع الشات (( ورد حبيبتي وينك معاش فتحتي ؟؟ .. صار شي جديد بينك وبين قصي ؟؟ .. طمنيني عليك ياورد .. آلوووو ردي عليا ماتشغلنيش ))
استغربت في كلامها (( صار شي جديد بينك وبين قصي ؟؟ )) يعني حاكية لصحباتها عليا مثلا !! .. مابيتش نرد عليها .. بس دفعني الفضول نقرا الشات من الاول وفعلا ركبت لين وصلت في البداية
في هلبا مواضيع ماتهمنيش .. زي ع اللبس .. والاكل .. والقراية .. لين وصلت في ,,
ورد>> روحت مع خالتو واليوم روحت بيا :(
ندى>> علاش روحت بيك ؟؟؟
ورد>> ضربتني ع خاطر قصي .. متوهمة اني نحبه
ندى>> هههههه
ورد>> ماتضحكيش نكلم فيك بجد
ندى>> يعني في خالة ادير في بنت اختها هكي ع خاطر واحد ؟؟
ورد>> لا مش واحد هدا قصي
ندى>> حتى لو كان قصي عيب عليها
ورد>> ضربتني وهانتني .. تعرفي منعت عليا حتى الطلوع تقول شغالة خلتني :(
ندى>> باهي كيف خلاتك تروحي اليوم ؟؟
ورد>> لان جاييني خطابة
ندى>> خطابة ؟؟!!! ... كلميني فيديو بسرعة :(
بعدين لقيت اتصال فيديو .. ميس ضربت ورد ليلة يللي روحت معاها !! .. وعلاش ؟؟ .. ع خاطري انا !! .. شن هالمجنونة .. وانا نقول ليش ورد تغيرت معاملتها معاي .. بسببك انتي ياميس >_< .. صاحبتها استمرت في المسجات .. رديت عليها بكلمة وحدة (( انا قصي ))
ندى>> ااااه قصي !!
قصي>> ايه ناسية ايميلها مفتوح
ندى>> اوكي انا اسفة سلامات
قصي>> عفواندى ممكن نطلب منك طلب وماترديني !!
ندى>> تفضل :\
قصي>> شن الموضوع يللي صار بين ورد وخالتها هداكا اليوم !!
ندى>> ماصار شي
قصي>> قلتلك ماتردينيش .. انا قريت المسجات بينك وبينها ياريت تحكيلي من غير لف ودوران
حكتلي ندى كل شي بالتفصيل وفي نهاية المشوار قالتلي ( ورد تحبك انت وماتبيش غيرك )
طفلة زيك زيها ومش ح نرد ع خرافاتكم .. ودعتها وسكرت الايميل .. وقمت تليفوني اتصلت بميس
ميس: آهلين قصي
قصي: وينك اليوم ؟؟
ميس: كنت عند جواد ومافضيتش نكلمك
قصي: شن القصة !!
ميس: ضميت معاهم الحوش
قصي: مانحكيش ع مشيتك اليوم .. نحكي ع يوم روحتي بورد معاك وقت بوك وامك في الجبل
ميس: مافهمتكش
قصي: ماتلفيش عليا ودوري .. قوليلي كلام واضح شن درتيلها !!
ميس: كلماتك وحكتلك ولاه !!
قصي: تبي تفهميني والا نسكر توا !!
بنبرة صوت عصبية .. حسيت صوتها انبح وسمعت صوت شهقاتها
قصي: تبكي ميس !!
ميس: ........
قصي: ميس ردي عليا .. شن في !!
ميس: .......
مازالت تبكي وانا زادت خوفتني وحسيت في وراها موضوع كبير
قصي: اوكي ميس خلاص انا اسف .. انسي ان قلتلك حاجة اوكي !!
>>>>>>>>>>>>>>>>>
ورد: كيف يعني قلتيله !!
ندى: انا ماكانش عندي رصيد نكلمك ورنيت عليك مرتين ماعاودتيش انشغلت عليك
ورد: خليني من موضوعك هدا واحكيلي شن معناها حكيتي لقصي يللي صار بيني وبين خالتو؟؟
ندى: كان لازم يعرف بحبك ياغبية
ورد: ومن قالك مايعرفش ؟؟ ** وبديت نعلي في صوتي بالشويا **
ندى: نقصي صوتك يسمعك بوك
ورد: بتهبليني انتي !! .. انا مش قلتلك صارحته بللي نحس بيه !! .. علاش قلتيله ؟؟
ندى: هوا ترجاني نحكيله :(
ورد: ترجااااك ؟؟ .. هئ ع اساس يهمه أمري يعني !!
ندى: ايه لو كان مايهمااش راهو ماقراش المسجات بيني وبينك
ورد: آوووووف انا غبية خليت ايميلي مفتوح :(
ندى: المهم اعطيه اسبوع بالكتير ح يجي يصارحك بمشاعره انا متأكدة
ورد: قصي يحبها خالتو هلبااا مستحيل في يوم وليلة ح يغير ويحبني انا :(
ندى: ماتيأسيش ياقلبي .. اعطيه وقته بس وح يصير يللي تبيه
ورد: آوكي ندو بنسكر .. حاسة روحي تعبانة وبنرقد
ندى: اوكي تصبحي ع خير <3
سكرت من ندى وتنهدت .. حبي لقصي هل سيستمر بطريقة ايجابية والا بيكون سلبي عليا انا وعيلتي ؟؟ .. حطيت تليفوني ع كامدينو .. وخداني النوم لأحلامه السعيدة :)
الصبح نضت بكري .. لقيت بابا مقعمز في الجنان يشرب في قهوته .. طلعتله بخطوات خفيفة .. حس بيا تلفت
بابا: صباح الخير يابنتي
ورد: صباح النور بابا
طفى دخانه وشد ايدي قعمزني جنبه ..
بابا: امبكري خديت ملفك ورفعته للمدرسة الثانوية فتحو التسجيل :)
ورد: شكرا بابا :)
بابا: خيرك يابنتي في حاجة ؟؟
ورد: لالا بس قاعدة تعبانة من امس
بابا: خلاص صلي الصبح وولي ارقدي :)
ورد: ان شا الله .. خلي نويتلكم الفطور قبل
بابا: لالا انا فطرت وزين لما ينوض تو نفطره
ابتسمت ونضت وقفت .. مشيت تلات خطوات تلفتت لبابا لقيته سارح فيا !! ,, وليت قعمزت جنبه
ورد: بابا في حاجة تبي تقولها ؟؟
هز راسه بمعنى ايه .. وكان شويا مضايق
ورد: شن في !!
بابا: عارفك يابنتي تعبانة .. بس انا مارقدتش طول الليل نفكر فيك
ورد: علاش ؟؟
بابا: يعني صعب تقيمي الحوش وانتي مدرستك بتبدا الشهر الجاي ولاه !!
ورد: تبي تتزوج ؟؟
فتح عيونه ع وسعهم .. وشد ايدي بالقوة .. كانت دموعي ع الجفن .. تماسكت شويا وابتسمت
بابا: انا مافكرتش في روحي .. بالعكس انا فكرت فيك .. نبيك تعيشي زي باقي البنات دابك داب قرايتك وحاجاتك الخاصة مانبيش نحملك مسؤولية اكبر منك :)
ورد: بس انا تحملت مسؤولية من عمري 9 سنين
بابا: مش زي .. توا اختلف الوضع وبدينا في حوش بروحنا .. وبعدين انا ,,,,,,,,,,,
قطعت ع كلامه .. مع ابتسامة محصورة : انا موافقة يابابا .. وربي يهنيك
سحبت ايدي من ايده وخشيت لداري نجري .. سكرت الباب .. شديت روحي ومابكيتش .. مسحت ع راسي وتعوذت من الشيطان الرجيم .. هذا من حقه ومش من حقي ابدا نمنعه .. خشيت تحت ورغاني ورقدت ....
>>>>>>>>>>>>>>>>>>>
جواد يتحدث ::
رجعت ولعت دخاني .. استمريت في التفكير بيني وبين نفسي .. فاتت ساعة وتنين وتلاتة وجت الساعة 11 ونص .. ناض زين وطلعلي للجنان .. تغمرني وقعمز جنبي
زين: بنمشي انوض ورد :)
جواد: لا خليها راقدة تاعبة شوي .. زين انت ولدي وكبرت وعندي ليك موضوع ياريت تفهمني اوكي !
زين: ان شا الله خير !!
جواد: انا نبي نتزوج شن رايك ؟؟
زين: ايه احسن .. الناس كلهم عندهم أم تنوضهم ع صنة الشاهي بالنعناع والفطور الفايح الا احني .. زمان لما كنا عند ماما فاطمة مدلعتنا هلبااا بس لما حولنا ع الشقة بروحنا .. مرات انوض نلقى ورد تبكي ومرات نلقاها مستعجلة بتمشي للمدرسة .. قصدي نقعد انا بروحي في الحوش مانعرف اندير شي .. لين ننزل لماما فاطمة .. وتوا لما جينا هنا .. ورد ماتعرفش غير المكرونة صالصة هههههه .. وانت راجل ماتجيش اطييب عيب طبعا
ضحكت ع كلامه هالصغير .. تفكيره نساني في الموضوع بحد ذاته .. يعتبر في الام بالنسبة ليه هيا أداة طبخ وتنظيف هههه
جواد: اوكي بالشويا عليك معاش فهمت شي ههههههه
زين: مني هيا يللي بتتزوجها ؟؟
جواد: ابلة ورد .. كان تتفكر الابلة مها
زين: ايه مليييحة تطييبها قاعد نتفكرله ههههههههه
جواد: هههههههه جعان ؟؟
زين: تي من امبكري ندوي ع الماكلة واااضحة يعني جعااان بنموووت
جواد: هي نخشو ناكلو هههههه .. ايه حق قوللي مني قالك التطييب عيب للرجالة ؟؟
زين: قصي طبعا
جواد: هههههه بخيل زيك زيه .. هيا يابطل الي العمل <3
فاتت أيام ::
ناقشت خوي وصغار خوي ع موضوع زواجي وشجعوني عليه .. اتصلت بمها وعطيتها علم بللي نفكر فيه .. وخديت نعتة الحوش وخطبتها ..
كنت في المكتبة مع ورد وزين يشرو في بضاعة المدرسة .. شناطي .. كراسات .. ادوات .. وغيره .. رن تليفوني والمتصل رقم غريب .. رديت وكلي استغراب !!
جواد: آلووو
جاني صوت مرآ ,, قداش ليا معاش سمعته .. أيوااا من وفاة ايناس تقريبا ..
جواد: خير يالمية شن في؟؟
لمية: سمعت بيك بتتزوج !!
جواد: ايه حتى خطبت
لمية: ومن هيا تعيسة الحظ !!
جواد: مالكش علاقة
لمية: ووافقوا ماليها عليك ؟؟
جواد: امالا شني بناخدها بالغصب متلا ؟؟
لمية: باهي الصغار موافقين ؟؟
جواد: ايه .. شن تبي انتي ؟؟
لمية: خيره مافكرتش في بنت خالتك يللي تراجي فيك ؟؟
جواد: تي شن تراجي فيك هادي ؟؟ .. عاطيها موعد وناسيه انا متلا ؟؟
لمية: بلا تسهويك .. انا توقعتك تتزوج .. بس توقعتك تاخدها المسكينة
جواد: لمية .. مالاخير شن تبي ؟؟
لمية: تفسخ خطبتك وتجي تخطب بنت خالتك شن رايك ؟؟
جواد: تقريبا الموضوع هدا انا ماشاورتكش فيه .. قولي لبنتك رزان قالك خالك جواد منووورة يابنت الاصل وبالله قوليلها تقول حتى لسلوى ضروري يوصل الخبر لاخر الدنيا .. باي
سكرت عليها .. يغيبو ومعاد يسألو بس يسمعو بيك فرحان يجو ينكدو عليك .. روحت بالصغار للحوش
>>>>>>>>>>>>>>
جمعت ادواتي كلهم ع السرير وصوورتهم صورة جماعية وبعتها لندى .. وهيا كدلك بعتتلي صورة لادواتها .. بعدين بديت نرتب فيهم .. وكيف فتحت دولابي طاحت صورة ليا انا وماما .. قلبت الصورة مكتوب عليها ذكرى بخطي الطفولي .. اذكرت اول ليلة بتها في حوش عمي من غير ماما كتبت ع هالصورة ذكرتي .. ابتسمت ورديت الصورة في مكانها .. مرت ع طول كل الاحدات والمواقف يللي بيني وبين قصي ..
**
ورد: باهي انت شن اغلا حاجة عندك ؟؟
طلعلي تليفونه وقال: تليفوني طبعا هههههه .. وانتي شن اغلا شي عندك ؟؟
ورد شبحت للصورة وقمت عيوني فيه : صورة ماما <3
**
ابتسمت .. واذكرت موقفه الثاني
**
قصي: شن رايك توا نكتبو رسايل وندفنوهم تحت الشجرة اهيا ؟؟
ورد: باهي نجيب ورقة ونجيك
جبت ورقة وبيرو وجيته .. خدي كتب رسالة ..وانا كدلك كتبت رسالة .. وكتبت كلمات لزين ع صورة ماما من الخلف .. جمعناهم في صندوق
قصي: توا بندفنوهم هنا
ورد: غدوا نقروهم ولاه !!
قصي: لا اوعديني لما تكبري ويبدا عمرك 16 السنة تقريهم :)
**
وعدته ووفيت بوعدي .. مرت الظروف سنة وراها سنة .. ماقربت الشجرة ولا الكنز المدفون تحتها .. ابتسمت من جديد .. فتحت باب داري وع طول للجنان .. تحت شجرة الليمون هنا دفنا حكايتنا .. قعمزت ع ركابي وبديت نحفر .. واخيرا لقيته الصندوق .. نفضت التراب من عليه وانا فرحااانة .. حطيته ع جنب .. وفتحته طلعت أول ورقة وكنت انا صاحبة الخط والرسالة هيا
(( يارب احفظ قصي ولد عمي ونحبه .. توا بندفنو كنز وبنقروه لما نكبرو احني الزوز ))
لاني كنت صغيرة فكانت نص الاملاء غلط .. ضحكت طبقتها ورديتها .. طلعت صورة ماما وقريت رسالتي لزين
(( يازين انا نحبك ياخوي الصغير .. وانا بنكون مامتك .. لان ماما مشت للجنة .. ان شا الله تو نكبرو ونمشولها ونتلاقو معاها ياربي .. ديما ادعيلها في سرك وفي صلاتك ))
ضحكت ع كلماتي .. نحساب الموت يجي للكبار بس .. وصلت لرسالة قصي نفضت التراب عليها وفتحتها .. وهنا كانت الفاصلة في حياتي :(
#Dudu
