#الحضن_الدافي
الحلقة :: 16 ::
>>>>>>>>>>>>
قصي يتحدث ::
طلعت من حوش عمي حسيت بنفسيته تغيرت .. وبدي يتأقلم مع حياتك من غير ايناس .. كيف سكرت باب السيارة .. ولعتها .. تلفت جنبي لقيت ميس .. بعد غياب شهرين شفتها من جديد .. كانت حاملة ومحملة .. شادة اكياس .. مادققتش شن فيهم !! .. لان شخصيتها وطلتها تمنعك من تركيز في آي شي تاني .. عيوني تمركزو عليها .. بادرت بالتحية .. بادلتها بهزت راس عفوية .. وين ركزت شويا حسيتها بايخة .. نزلتلها .. سكرت الكوفينو .. لقتني جايها .. وقفت مبتسمة ابتسامتها زي النسمة الباردة
قصي: ءء كيف حالك ؟؟
ميس: الحمد لله كيف حالك انت ؟؟.. وكيف حال خالتي فاطمة :)
قصي: تمام .. شنو هادي المرواحة من الشغل امالا !!
ميس: ههههه والله مازال مابديت الحق .. وانت شن جو قرايتك ؟؟
قصي: قرايتي هههههه .. لياا حوالي سنتين متخرج
ميس: آها .. باهي ربي يوفقك في شغلك تبان صغيرون هههههه
قصي: -_-
ميس: يلا نستاذن :)
قصي: اذنك معاك :)
رجعت لسيارتي وكملت طريقي مالي ومال دوة النساوين في الاخير طلعت صغير .. مشيت لمصطفى .قعمزنا في قهوة المعتادة .. خديت قهوتي المرة زي اياماتي .. وبدينا في المواضيع يللي ماتتسكر
مصطفى: اسمع يامان مالاخير نبي نتزوج راني انا
قصي: تزوج من شادك !!
مصطفى: مصح وجهك من كنا صغار اتفقنا نتزوجو مع بعض
قصي: وانا مش واتي توا الصراحة
مصطفى: ايييح .. ياودي خطبة بس شن رايك !!
قصي: واخطب من شادك
مصطفى: مش اتفقنا .......
قصي: ايييح اكدب عليا توا .. اتفقنا نتزوجو مع بعض مش نخطبو مع بعض .. بالله قولي بوصطيف مااتفقناش نموتو مع بعض !!
مصطفى: كخخخخ باردة -_-
فتحت نقالي بالصدفة فتحت الفايبر لقيت رقم ميس يللي مسجله ( خالة ورد ) .. كانت ورد تتصل منه لما تقعد عند خالتها .. لقيت عندها فايبر ومدايرة صورة حزينة ع الموت والفراق .. تقريبا تقصد اختها ..
مصطفى: هييي يامدهوب الشيرة
قصي: هآآآ شن تبي !!
مصطفى: ليا ساعة نلكلك في موضوعي
قصي: موضوع شني ؟؟
مصطفى: تي بنتزوج
قصي: لولولووووولي .. تبي نزغرطلك اقوا من هكي !!
مصطفى: وحق ربي مبردك .. تعرف البنت لما صاحبتها تقول بنتزوج تنوض تتغمرها وتقوللها ( الف مبروووك حبيبتي وربي يعطيك ايام حلوة معاه ) .. أما الولاد برووود مش طبيعي
قصي: خسارة جينا ولاد -_-
مصطفى: غير بجديات يافرخ ماعندكش وحدة هكي والا هكي !!
قصي: شن بتخطب بمعرفتي انا امالا !!
مصطفى: لا يادماااغ .. انت الايام هادي كلها سارح وعبيط نوعا ما ههههه
قصي: وشن دخل هدا في هدا !!
مصطفى: قصدي ماعندكش وحدة في بالك وادورلك في طريق توصلك ليها !!
قصي: لا
مصطفى: تعرف من ربكتك هادي زبطت النعتة .. قول وخيك انا مادسش عليا
قصي: نفكر اندور ع شغل الصراحة ياسرمنه التمعيد معاك -_-
مصطفى: ههههههههههه معناها ناوي نبي حوش وتتزوج هههههههههه
قصي: انت مالاحظتش روحك بديت ادخل المواضيع في بعضها !!
مصطفى: ولا يهمك راس موضوع شغلك خليه عليا
قصي: ان شا الله تبرا -_-
مصطفى: ههههههه
ممكن نكون انا غبي ماقدرتش نخفي عواطفي .. والا ممكن يكون مصطفى صديقي الصدوق فاهمني من غير مانحكي .. بس طريق لقلبك ياميس وينها !! .. وكيف بنوصلها ؟؟.. باهي علاش ميس ؟؟.. ممكن يكونو مشاعري لغيرها متلا !! .. لا شن غيرها .. اصلا منين بنلقاها غيرها .. لا .. ممكن تكون الوحيدة يللي كسرت الحواجز معاها وتكلمت .. انا نوعي خجول هلباا قدام البنات .. يعني لساني طويل لو تعدت حدودها معاي .. بس غير هكي مستحيل نتكلم مع أنثى .. غير أمي .. والصغيرة ورد .. ميس بنت محترمة .. وبنت عيلة وناس .. كافي ان اختها كانت مرت عمي وعمرها ماسمعنا منها كلمة غلط .. والا دارت سية في العيلة .. ممكن هادي اكتر حاجة تعطيني أمل في ان اختياري يكون صح .. ومستحيل أمي تعارضني .. بس بنات توا معاد يرضو بواحد لا حوش ولا معاش ؟؟.. يعني وسامة وشخصية ع الفاضي .. لازم نسعى باش نوصلك ياميس .. ومايقدرش بوك وقتها يرفضني .. وهادي أول خطوة لمشواري .. خديت مفاتيح سيارتي وطلعت من القهوة .. لحقني مصطفى
مصطفى: وين هاد ومخليني !!
ركبت سيارتي وسكرت الباب .. وقف ع الروشن .. ولعت سيارتي وفتحت الروشن للنص .. لبست نظارتي الشمسية
مصطفى: ياعبيط نكلم فيك
قصي: نتلاقو بعدين بوصطيف
مصطفى: خيرك انت اليوم !!
قصي: بعدين بعدين
طلعت طووول .. وخليته واقف .. ومن اليوم ومن هالساعة .. حنبدا في مشواري الجدي ^_^
خشيت للحوش نجري .. حتى أمي انخلعت وع طول حطت في راسها عمي والا الصغار صايرتلهم حاجة
أمي: خيرك شن في؟؟
قصي: ههههههه خيرك مخلوعة ؟؟
أمي: آوووف نحسابه عمك صارتله حاجة !!
قصي: لالا .. يمة .. بنقولك .. انا بندور ع خدمة
أمي: لولوولووووولي هالنهار عليه اندور :)
قصي: هههههه
بوستها ع جبينها .. وكملت طلعت جوازي وشويا وراقي تعريف وملفي <3
أمي: العفو .. من توا !!
قصي: لالا غدوا الصبح بنطلع بنشوف كم شركة تقبلني بال CV متاعي
أمي: آآه باه ..كيف حاله عمك والصغار ؟؟
قصي: عال العاااال .. ماشية اموره الحمد لله .. ءءء وانا طالع مروح لقيت خالتهم جاية
أمي: ايه ماشا الله عليها ربي يحفظها زي وخيتها الله يرحمها
قصي: ايه ايه شن اسمها هيا !!
أمي: ميس :)
قصي:آآآه باه .. هي يمة ماتبي شي انا طالع !!
أمي: تي خيرك اسم لله مرعوش .. اصبرشويا واشرب معاي قهيوة والله مشتافة حد يشربها معاي
قصي: يوم تاني ان شا الله
أمي: :(
طلعت من داري .. وين وصلت لعتبة حوشنا .. اذكرت .. نرضي أمي قبل وربي ح يفتح في وجهي كل ابوابه .. وليت لقيتها مقعمزة ع حاشية سريري .. وشادة صورتي وين كنت صغير
قعمزت جنبها ( بشن تفكري !! )
أمي: وقت كنتو صغار .. كان الحوش مريح رغم دوشتكم وحوستكم .. الله لو ترجع الايام .. كنتو ماتفارقونيش بكل .. واليوم كل واحد لاهي بحياته وانا مش لاقية من يشرب معاي قهوة .. آآآخ لو عندي بنية بس
قصي: هم البنات للممات يايمة :)
أمي: بالعكس ياولدي .. البنية ونسة للحوش .. ضي الحوش .. والله الحوش يللي فيه بنات عمره مايظلم .. البنات ياولدي روح الحوش .. بلا بنات مافيشي روح
قصي: والبنات مش بيتزوجو وبيخلوك بروحك .. نفس الشي
أمي: البنت حتى تتزوج تحن ع اماليها .. حتي وهيا بعيدة ماتخليهمش بروحهم .. صدقني .. هدا مش يعني ان الولاد قلوبهم حجر .. بس الولد أول مايكبر يبعد ع اماليه .. سفراته طلعاته جياته زرداته .. بس البنت لا ياولدي عكس والله .. الام يللي عندها بنات حاسدتها انا .. تمنيت لو عمك يعطيني ورد نكبرها انا ونديرها بنيتي بس صعب :(
قصي: طلعنا ماننفعوش احني يايمة ههههه
أمي: لا مش قصة ماتنفعوش .. بس ماتقعدوش في الحوش .. انتم سند العيلة .. وعمودها .. ورافع اسم العيلة .. بس لين تجيبلي بنية الحلال باش نحس بوجودك ^_^
قصي: تلمحي تبيني نتزوج !!
أمي: وليش لا ياولدي .. ربي يهنيك ويبعتلك ايام حلوة <3
حطت الصورة في القجر .. وحطت ايديها ع خدودي .. شديت ايديها وبوستهم .. كانت في دمعة في عيونها بتهرب منها وبتنزل .. مسحتها ع طول
قصي: طول ماراسي يشم الهوى مستحيل نخلي دمعة من دموعك تنزل ياغالية .. اعتبريني من اليوم رفيقك يللي مايفارقك .. والا نقولك اعتبريني بنتك هي ههههههه
أمي: هههههه ... مانبي شي من الدنيا غير نشوفك انت وخوك مرتاحين وفرحانين
قصي: طووول عمرك حنينة يايمة
أمي: هذا قلب الام ياولدي .. مانقول غير ربي يكون مع ورد وزين يللي فقدوه وهما صغار
قصي: آآآآه حتى انا ديما نفكر فيهم .. اذا كان انا معاي أمي ونحس في روحي ضايع لما تزعل مني بس .. فما بالك هما .. وخاصة زين يللي مايعرف في امه حاجة :(
ع خشة الياس علينا ..
الياس: الله الله .. شنو الضحكة هادي لقصي بس امالا !!
ضحكت أمي .. قعمز يسارها .. وانا كنت مقعمز يمينها ..
أمي: انتم الزوز صغاري وكبادي .. ضحكتي وكلامي وقلبي وعيوني وكل شي عندي ليكم انتم وعايش بيكم <3
الياس: ربي يحفظك ياالغالية
قصي: يمة .. نطلب منك طلب
أمي: قول !!
قصي: عادي تتغمرينا زي ماكنا صغار !!
أمي: حتى لو كنتو كبار في عيون نفسكم بس في عيوني مازلتو صغار
فردت ايديها وتغمرتنا .. انا والياس .. رغم ان كنا طوال واجسامنا عريضة .. بس اول ماضمتنا لصدرها .. حسينا روحنا ضعاف وصغار .. هذا #الحضن_الدافي .. هدا حضن الأم <3
>>>>>>>>>>>>>>>>>>>
تاني بابا جيب يروح بيا .. وخش للمدرسة بيسأل ع مستواي الدراسي .. لقي المديرة وانا قعدت نراجي فيه برا الادارة .. قعدت نتمشى في الممر .. ونتفرج ع لوحات الطالبات .. ع طلعة ابلة مها من حجرة المدرسات شادة مق نسكافي ..
مها: ورد !!
ورد: نعم ابلتي ؟؟
مها: بابا ماجاكش !!
ورد: جي .. في الادارة :)
مها: بجد !!.. علاش ؟؟
ورد: بيسأل عليا ^_^
ساوت الابلة وشاحها وعطتني المق
مها: شديه شويا لين نجيك
ورد: حاضر :\
شديت المق وقعدت اندور فيه .. شافتني بنت فصلي واسمها رندا شريرة ..
رندا: حي ورد تشرب قهوة متاع الكبار :o
حطيتها ع الطاولة .. وشبحتلها .. بس هيا ضحكت ع الجنب ونادت صحباتها
رندا: تعالو شوفو ورد شن تشرب ههههآآآي
ورد: والله متاع ابلة مها :(
جو صحباتها كلهم وجت صاحبتي جنى
بنت: هيا مش متأدبة تشرب في متاع الكبار
ورد: والله مامتاعي :(
جنى وقفت جنبي .. كانت ماتكلمش فيا جنى من لما بعت العابي .. امها قالتلها معاش تكلميها
ورد: جنى قوليلهم مش هادي طاسة الابلة مها :(
بس جنى ماردتش ومشت خلتني معاهم
قعدو يضحكو عليا .. قعدت نبكي .. وحطيت ايديا ع عيوني وانا نحلف انها مش ليا
رندا: عادي عادي يابنات ماعندهاش ام تقوللها العيب هههههههههآآآآي
شبحتلها بصدمة وجيتها نجري دفيتها لين طاحت لوطة
ورد: ماما في الجنة .. ومعاش تضحكي ع الناس تو ربي غدوا يخلي الناش تضحك عليك >_<
رندا: والله لما نحرش المديرة ع اللي درتيه فيا .. شوفي قرمبيولي الماركة تلبز .. انتي والله ماتتحشمي .. ماعندكش ام تربيك
مشت تجري للادارة وفتحت الباب بقوة .. بان عليا بابا مقعمز ومقابلاته ابلة مها والمديرة في كرسيها .. شفتها كيف واقفة تبكي وتحكي للمديرة بالكدب .. نادتني المديرة .. خشيت وانا عيوني عليها .. مانحبهاش البنت هادي ديما هازية ع الناس
بابا: ورد علاش طيحتيها !!؟؟
بابا يشبحلي ومستغرب .. مش متعود عليا نضرب حد .. حتى زين مانضربش فيه .. المديرة وقفت مقابلة رندا ..
المديرة: متأكدة !!؟؟
رندا: ايه والله شوفي ياابلة قرمبيولي :(
المديرة: شوفة عينك يااستاذ جواد .. واكيد سمعت الكلام .. ورد شن بتقولي !!
ورد: مش ح نقول شي
وطلعت من الادارة نبكي .. بابا لحقني ..والابلة مها حتي هيا .. ورندا وصحباتها يضحكو عليا ..
بابا: ورد .. ورد .. وقفي نكلم فيك ولاه !!
ورد: نعم بابا
شدت ايدي الابلة مها .. وقعدت نمسح ع شعري ..وانا دموعي في عيوني ومانبيش نبكي
بابا: فهميني علاش درتي هكي !!
ورد: مانحبهاش
بابا: ومن امتى احني يللي مانحبوشي نضربوه !!
ورد: بابا .. علاش ماماتي انا بس يللي ماتت !!
>>>>>>>>>>>>>>
جواد يتحدث ::
انصعقت من كلمتها .. الموضوع يللي صار بين ورد ورندا ليه علاقة بوفاة امها .. ثنيت ركابي وحطيت ايديا ع خدودها
جواد: حبيبتي يابنتي .. هذا قضاء وقدر .. رندا هكي قالتلك !!
ورد: لا :(
جواد: علاش ادسي عليا ! .. مش اتفقنا ان ماندسو شي ع بعضنا !!
ورد: بابا :(
ارتمت في حضني ورد ع طول ..وقعدت نبكي بشكل هستيري .. ابلتها مها كانت واقفة وتشبحلها متأثرة بالموقف .. قمتها في غمري وطلعت بيها من المدرسة .. لحقتني الابلة مها
مها: استاذ جواد تفضل شنطتها
جواد: بارك الله فيك
حطيتها في السيارة ورد .. وشنطتها في الكوفينو .. وقفت جنبي الابلة مها ..
مها: تحتاج آي شي تفضل ولا يهمك .. ورد من احسن طالباتي ورندا راهو عندها سوابق عدوانية مع كل زميلاتها
جواد: عارف والله .. بنتي حساسة هلباااا .. وخاصة لو الموضوع وصل في أمها
مها: ايه صح متعلقة بأمها هلبا .. وصعب العيل يقعد من غير ونيسته يللي هيا أمه
جواد: الله غالب هذا قدرهم
مها: تقدر تغيره :)
جواد: كيف يعني !! :\
مها: تتزوج .. باش ترتاح من مسؤوليتهم الصغار
( بابا .. بابا .. هيا :( )
جواد: هي جايك ورد .. نستاذن ياابلة .. سلامات
مها: سلامات :)
روحت وانا مادرتش آي اعتبار لكلامها .. بصراحة .. مش اول مرة نسمعه .. قصي .. خوي .. فاطمة .. وصاحبي .. الكل يشجع ع الزواج .. الا قلبي رافض يدخل غير ايناس .. وعقلي رافض يفكر في غيرها .. حوشي !! .. مانقدرش اندخل غيرها .. مانقدرش حتى نتخايل هاللقطة تصير :(
#Dudu
