#الحضن_الدافي
الحلقة :: 10 ::
قصي: توا دوري انا هديتي .. آمممممم
ورد: لااااااااااااااااااااا :o
طلعلي دبدوب عرفتوه .. هدية من ماما وبابا .. تغمرته وقعدت نبكي
قصي: اييييح هداياهم فرحوك وانا هديتي بكاتك !!
ورد: مانحساباش بيوليلي :(
قصي: اهو ولالك واحمدي ربك :)
عمي: شن قصته !!
قصي: تو نقولك بعدين
سمعنا صوت الباب يطق .. طلع قصي بيفتح .
بعدين سمعت صوت نعرفه انا هلباااا بس لينا فترة معاش تلاقينا .. ايه ايه صوت خالتي ميس الله استاحشتها .. طلعت نجري والدب في غمري .. شفت من باب الحوش الدخلاني لقيتها واقفة تكلم في قصي وتسأل فيه
ميس: ورد وزين هنا !!
قصي: ايه من انتي !!
مشيتلها تجري وجيت في رقبتها <3
ورد: خالتو ميسو استاحشتك <3
ميس: حبيبتي حتى انا استاحشتك :(
قعدت تمسح ع شعراتي وتشبحلي .. عيونها دمعو
ورد: علاش تبكي ؟؟.. اليوم عيد ميلادي .. خشي شوفي عمي دارلي عيد ميلاد محلاه
ميس: هههههه ربي يخليهولك
ورد: هدا ولد عمي قصي الصغير
وأشرتلها بصبعي عليه
ميس: آها .. وين زين !!
قصي: ءءء تفضلي ليش قاعدة ع الباب
ميس: شكرا :)
>>>>>>>>>>>>>>
قصي يتحدث ::
الله الله شن هالمخلوقة تبارك الرحمان .. زين وأخلاق .. لبسها محتشم ومش حاطة شي ع وجهها .. وانا نقول الفرخة ورد طرف لمن طالعة .. غض البصر ياولد خيرك .. مالبست هاللبس الا باش الشباب يغضو نظرهم عليها .. طلعت وسكرت وراي الكنشيلو .. لقيت سيارة لونها بيضاء مدرسة قدام حوشنا .. ومن هكي فهمت انها تسوق .. طلعت دخاني وقعدت اندخن .. واتكيت ع الحيط يللي جنب الباب .. تلمحت شي في السيارة وجذب نظري .. بدلة تخرج .. ليا سنتين معاش شفته .. من لما تخرجت .. حطيت ايديا ع المرش وقدمت راسي .. وركزت عيوني ع البدلة
( عفوا )
ارتبكت وحولت من السيارة بسرعة .. لقيتها واقفة جنب الباب ..
قصي: ءءء آسف .. جذبتني بدلة التخرج بس
ميس: آها
فتحت الكوفينو .. وطلعت منه باكو كبير مغلف بالاحمر .. عيوني ماحولتهمش من عليها .. مش اعجاب .. خايف تفهم لقطتي غلط .. وتستحقرني طول عمرها
قصي: ءءء احني مش منقصين عليهم شي .. لاش متعبة روحك :)
ميس: زي ماتشوف هدية هادي مش حليب وزبادي هههههه
وووه ع الدم الخفيف .. احسن شي مصطفى جي في وقته .. رن تليفوني قمته ورديت طووول المهم يطلعني من هالورطة
مصطفى: آلو .. وين يامان !!
قصي: قدام الحوش اخطم عليا وارفعني فاد لين خلاص -_-
سكرت الكوفينو وانا هدا كله نراقب فيها .. وخشت الداخل .. مانعرفش شن كان يقول مصطفى والا شن يقول ..
مصطفي: الوووو
قصي: معاك معاك
مصطفى: انا في راس شارعكم من امبكري نغني فيها وانت تبكشت
قصي: باهي انا يابس جنب الباب تعالا هي
مصطفى: اوكي :\
اول ماوصل مصطفى ركبت وولعت دخاني
مصطفى: شن امالا عندكم ناس ولزوك ههههه
قصي: مادخلكش -_-
مصطفى: ههههههه اسمع الولاد متلقطين في الاستراحة شن رايك نلحقوهم !!
قصي: الحقهم -_-
مصظفى: انت في وراك قصة ره
قصي: تي برا وفمك ساكت شن هدا -_-
كمل طريقه مصطفى عن سكات .. انا نشوف في ورد ومصطفى نفس الوظايف ع الحياة .. كملت دخاني وانا تفكيري في اللقطة العبيطة يللي درتها ..
>>>>>>>>>>>>>
ميس: خلاص حبيبتي معاش تبكي تو تروح ماما ونديرو لزين عيد ميلاد كبير
كنت مقعمزة انا وخالتو في دارنا .. وقعدت نوريلها في الهدايا .. بعدين وين قمت دبدوبي قعدت نبكي ..
ورد: كلمتيها انتي ماما !!
ميس: ايه حبيبتي كلمتها :)
ورد: عادي نكلمها
ميس: حااااضر .. شويا بس .. آهو ينادي
بعد ماسمعاته ينادي مدتلي التليفون
ماما: آلو
اول ماسمعت صوتها قعدت نبكي .. معاش قدرت نسكت
ورد: م .. م .. ما.. ما ... ماما نحبك انا
ماما: ورد حبيبتي ياماما .. حتي انا نحبك ياروحي معاش تبكي بالله عليك
ورد: امتى بتروحي ياماما انا استاحشتك نبيك معانا حتى زين كل يوم يبكي ياماما بالله عليك كانك تحبينا روحي لحوشنا وروحي بينا .. ياماما انا نخاف نرقد بروحي .. ماما بالله عليك
ماما: خلاص ياروحي خلاااااص .. ايه اصلا انا بنروح قريب .. حبيبتي خلاااص معاش تبكي .. خليك قوية نروح كان هدا بنقعد هنا ره
مسحت دموعي .. ومازالت شهقات في قلبي وتنهدت
ورد: هآآآ معاش نبكي سكتت .. امتى بتروحي باه !!
ماما: قريب ان شا الله .. كيف حال زين !!
ورد: الحمد لله حتى هوا مستاحشك ياماما
ماما: حبايبي ناقصتكم حاجة !! .. أي حاجة تنقصكم قولو لخالتو تجيبهالكم باهي !!
ورد: اصلا عمي وماما فاطمة مش منقصين علينا شي ... ماما نسيتي عيد ميلادي انتي !!
سكتت ماما .. ماردتش عليا .. مديت التليفون لخالتو .. وشبحتلها باستغراب
ورد: خيرها ماما سكتت معاش ردت عليا !!
ميس: مش عارفة ترا نشوف
خدت التليفون وحطاته في وذنها ..
ميس: آلوو ؟؟
حتي خالتو معاش تكلمت قعدت تسمع بس .. زعما الخط انقطع !!.. خسارة نبي مازال نكلمها :(
ميس: ءءء تم رصيدي دودي
ورد: خسااااارة .. باهي نقول لخوي الياس يعطيني تليفونه وعاودي اتصلي بيها
ميس: لا حبيبتي .. المهم انتي اطمنتي ع ماما .. وسمعتي صوتهاوسمعت صوتك ولاه !!.. ارتحتي توا !
ورد: ايه .. شكرا خالتو <3
تغمرتها وبوستها ع خدها .. وقعدت تهدرز عليا ..
ميس: حبيبتي قولي لعمك يجيبك يوم الخميس ان شا الله حفلة تخرجي :)
ورد: شن معناها !!
ميس: معناها كملت قرايتي بكل الحمد لله واخيراااااآآ ... ولازم ندير حفلة .. يقولولها حفل تخرج
ورد: مرات مايخلونيش نمشي قوليلها ماما فاطمة :)
ميس: حااااضر .. هي هاتي بوسة خللي نروح :)
بوستها ع خدها .. وباستني ع خدي .. بعدين تلفتنا التالي لقينا زين راقد ع العابه
ميس: ههههههه ياحلاه ياربي .. هي تصبحي ع خير :)
ورد: وانتي من اهل الخير خالتو <3
طلعت خالتو من الدار بتروح .. وانا طلعت صورة ماما وبابا وقعدت نبكي .. ليش تم الرصيد ياماما ؟؟.. انا مازال ماشبعتش منك .. نبي نحكيلك شن درت من اول يوم سافرتي فيه .. ماما نحبك :(
>>>>>>>>>>>>>>
جواد يتحدث ::
مع الساعة 9:00 في الليل خشيت لدارنا .. لقيت ايناس متكية وتبكي .. لين مولي وجهها احمر ممرووج .. قعمزت جنبها .. وشديت يديها
جواد: خيرك ايناس شن في؟؟
ايناس: جواد روحت !!
جواد: ايه تاعبة نرفع نعاينك !!
ناضت قعمزت مقابلتي وتغمرتني وقعدت تبكي .. من اللحظة هادي عرفت انها اذكرت ورد وزين .. ماتوقعتش انها كلمتها وسمعت صوتها اليوم
ايناس: قالتلي ماما فاطمة ياجواد .. تعرف قطعتلي قلبي .. قريب نسكرو شهر بعاد عليهم .. خلينا نروحو جواد بالله عليك مانبيش نعالج معاش نبي شي من الدنيا .. نبي نموت جنبهم ياجواد .. هكي انت تعذب فيا ره .. بالله عليك اتعب في روحك مافيش امل من شفائي :(
حطيت ايدي ع فمها ..
جواد: اسسسس معاش تقولي هكي .. الامل بالله كبير .. ومافيش حاجة مستحيلة .. ايناس لازم تكوني قوية باش تصحي وترجعي لصغارك .. نوستي بالله عليك ماتخلينيش نتعذب اكتر مانا متعذب :(
ايناس: باهي روح بيا :(
جواد: حااااضر نروح بيك .. بس ادعي لربك تشفي وترجعي احسن من الاول :)
ايناس: آمين يارب العالمين :(
جواد: ءء جعااان تعرفي :(
ايناس: تو انوض نديرلك حاجة .. انت بتطلع !!
جواد: لالا قاعد معاك الليلة .. ءء خديت دسكة افلام زمان خللي نتفرجو عليها شن رايك !!
ايناس: تمام .. خللي نخش للمطبخ نحطلك حاجة تاكلها
جواد: تمام نراجي فيك :)
مشت ايناس للكوجينا .. كان قلبي واجعني عليها .. وكل يوم نتآلم اكتر من يوم يللي قبله لما نشوفها تبكي .. من لما جينا دمعاتها مابطلوش نزول .. آآآآآآآه .. تنهدت والتنهيد قلبي ضره .. اتكيت ع سريري وقعدت نشوف للصقف .. يارب ماتحرمنيش منها ولا من طلتها عليا .. يارب اشفيها وعافيها وارقنا كل خير .. نضت توضيت وبنصلي ركعتين لله .. ديما تقوللي ( احلا شي لما تكون بين يداي الله .. تحس في همومك تنزاح .. ويفرجها عليك ربي .. ويفتحها عليك .. وتحس براحة سبحانية <3 )
منك تعلمت كل شي .. ومنك ح نتعلم يللي مازلت ماتعلمته
كملت الصلاة .. رفعت يديا فوق وبديت ندعي .. بصوت عالي شوي ومبحوح .. فيه مية غصة وغصة
جواد: ياااارب احفظلي مرتي وصغاري .. ياااارب نرجع لبلادي وايدي في ايدها .. ياااارب ارزقنا الفرحة القريبة بشفائها <3
تلفتت لقيت ايناس جنبي .. بس شكلها مش عاجبني بكل :o
#Dudu
