#الحضن_الدافي
الحلقة :: 40 ::
قعدت في شقتي ذهابا وإيابا ع الباب نراجي في جية بابا ع أحر من الجمر .. شويا وطق الباب فرحت مشيت نجري فتحته .. لقيته زين وع وجهه علامات الغضب ..
ورد: زين !! .. خيرك ؟؟
زين: كيف قدرتي تسامحيه ؟؟
خش الداخل وقعمز ع الصالون .. وشبحلي .. سكرت الباب ولحقته
ورد: قصدك ع بابا ؟؟
زين: ايه يللي كان بونا :(
ورد: وتوا شنو ؟؟
زين: آووووف مانعرفش مانعرفش
ورد: خيرك ؟؟
زين: كيف قدرتي تسامحيه بعد يللي داره فينا .. سافر وخلانا سنين وسنين ولا مش هكي جاي بكل بساطة سلم ويحضن فينا .. فهميني ورد وين كان لما احتجناه .. لما كل ليلة نبكو .. لما تنقصنا ستين حاجة كان قصي يللي يجيبلنا .. واااااك مش قادر نعفي عليه ولا قادر نشبحله .. وكان الليلة يبي يرقد هنا انا بننزل نرقد عند قصي.. سمعتيني ولاه !! .. انا ماشي للولاد .. سلام
ناض من ع الصالون وطلع من الشقة .. ماقدرتش نوقفه بآي كلمة .. صعبة عليه نقوله باابا كان مسجون .. تنهدت .. ع خشة خالتو لان لقت الباب مردود ..
ميس: الحمد لله ع سلامة بابا فرحتلكم والله
ورد: :)
ميس: احسن حاجة باش تروحو لحوشكم وترتاحو من العذاب هنا
ورد: ايه صح :)
قعمزت جنبي وشدت ايديا الزوز
ميس: هي حبيبتي نوضي نجهزك للخطابة
تلاشت الابتسامة .. وبانت ع وجهي علامات الحزن .. بس مارديتش عليها بكلمة .. لما سمعت صوت قدام الشقة ويللي هما قصي وبابا .. خشت لداري تجري .. شابكت ايديا الزوز في بعض ونراجي فيه يخش بفارغ الصبر .. ماهي إلا ثواني وخش بابا .. نقزت في حضنه .. من كثر شوقي ولهفتي عليه .. مع دمعات حب نزلت مني بلا رادة .. بعدت عن حضنه مسحهملي مع ابتسامة اشتياق
بابا: في حد معاك ؟؟
ورد: ايه خالتو ميس
بابا: آآمممم ** تلاشت ابتسامة بابا .. وبعدين خش وشاد ايديا الزوز قعمزني جنبه ع الصالون **
ورد: بابا عادي نكلمك في موضوع
بابا: عارفك بتكلميني ع موضوع غسان صح ولاه ؟؟
ورد: ايه ** رقدت ع صدره ** .. بعد ماروحت يابابا اكيدة ح نرجعو لحوشنا ونرتاحو من هالعذاب .. ارجوك انسى الموضوع وفوته
مسح ع شعري وانفاسه دفتني وأشعرتني بالأمان <3
بابا: يابنتي الموضوع هدا ح يكون لصالحك
ورد: حاجة وحدة لصالحي يللي هوا وجودك معاي انت وزينو بعد وفاة ماما الله يرحمها
بابا: عارف ياحبيبتي .. ورد .. لازم تعرفي انك اغلا حاجة عندي ومستحيل نفرط فيك .. ونتمنالك كل خير .. فلهذا انا مانقدرش نرد صاحبي بس لانك صغيرة .. هوا غسان مش ح يتزوجك بكرا .. بس اعطي لنفسك فرصة تشوفيه في حالة خش الموضوع في راسك وافقي .. وفي حالة العكس انسي ولا كأن الموضوع صار .. لازم نرد لصاحبي جميله هوا يللي ساعدني لكشف حقيقة السارق الحقيقي وطلعني من السجن .. مانقدرش نصده من الاول .. وبعدين انا ماكنتش نعرف أني ح نطلع اليوم .. كان مدايرهالي مفاجآة هههههه
سكتت وماقدرتش نخيب ظنه فيا .. ونواطي كلمته قدام صاحبه .. تنهدت وغمضت عيوني .. نتناسى الموضوع يللي بيصير بعد 5 ساعات تقريبا :(
بابا: ورد !!
نضت من ع صدره وشبحتله : نعم بابا !!
بابا: انا تاعب يابنتي طووول هالسنين مارقدتش جيبيلي ورغان ومخدة خلي نرتاح
ورد: بترقد هنا قصدك ؟؟
بابا: ايه :)
ورد: لالا خش لدار زين وارتاح فيها .. هوا نزل للولاد امبكري
بابا: آوكي :)
بوسته ع خده مع ابتسامة .. رد البوسة ع خدي ومعاها ابتسامة صدق وشوق <3
ناض من جنبي وخش لدار زين .. سكرها وراه .. وانا واقفة قدام باب الدار مبتسمة .. نخصتني خالتي من جنبي .. تلفتلها وابتسمت
ميس: هيا حبيبتي تأخرنا :)
ورد: آوكي :(
رجعنا لنفس الكابوس .. استشورت شعري .. نشوف لوجهي في المراية وسارحة .. مانعرفش ليش خطر في بالي قصي .. قصي قال أنه بيساعد بابا باش يتخلص من العقاب .. ليش بابا قاللي انه وليد طلعه ؟؟ .. باهي قصي نقض وعده ؟؟ .. ليش بس !! .. أكثر انسان نوثق فيه <3 .. أكثر شخص وقف معاي <3 .. أكثر شخص حبيته <3 .. آآآه ..انا قلت حبيته ؟؟؟ .. لالا .. اصلا شن معنى الحب لو ماكانش للأم والأب والأخوة :( .. لا قصي خوي الكبير .. وحبي ليه هوا حب الأخوة <3 .. لالا .. مانبيش نرسم هالفكرة في راسي :(
فجآة سمعت عيطة من خالتي نبهتني عن تخيلاتي :(
ميس: خيرك يابنت وين سرحتي !!
شبحتلها .. ورديت عيوني ع المرآية : نفكر
ميس: في شن تفكري !!
كنت مقعمزة ع كرسي مقابل لشكماجتي .. وقدامي البرفانات وتوكات ومشط واكسسوراتي .. قعمزت خالتي ع ركابها ع يميني وشدت ايدي بقوة
ميس: حبيبتي ماتتوتريش .. صح الموضوع كبير عليك .. بس أظن 16 السنة عمر حلو للخطوبة تكبري انتي وياه .. وماتزعليش من كلام بابا هوا يبي مصلحتك لا اكتر ولا اقل
كنت نشبحلها .. بس مش مركزة ع كلامها .. خالتي ابدا ماتبيش مصلحتي .. مادابيها نوافق ع غسان باش تتفكى مني وتختلي بقصي .. وانا !! .. مش ح نسمح لهالموضوع يتم ابداااا .. ابتسمت ابتسامة لا ارداية ..
>>>>>>>>>>>>>>>>>>>>
^^ ومن هنا إبتدأت قصة الحب <3 ^^
>>>>>>>>>>>>>>>>>>>>
جواد يتحدث ::
سمعت صوت باب الدار انفتح بالشويا .. كنت متوقعه زين .. وفعلا زي ماتوقعت .. غمضت عيوني قصدا باش يعتقد إني راقد .. قعمز ع طرف السرير وكان باين من وجهه ان كان يبكي .. نفتح عين ونراقبه ونغمض من جديد .. كان يشوف لايديا وسارح فيهم .. بعدين ناض وفتح دولابه .. مانعرفش شن قاعد يدوّر .. بعدين تلفتلي .. وسمعت صوته يبكي .. فتحت عيوني ونضت قعمزت ع سريري .. مسح دموعه بكمه .. ولفت وجهه للجيهة التانية
جواد: زينو .. علاش تبكي ؟؟
زين: مانبكيش :(
نضت من السرير .. وحطيت ايديا ع كتافه
جواد: ماتبيش تسلم ع بوك ؟؟ .. انا رجعت يازين ومش ح نخليكم بروحكم في الجديد
زين: انت اصلا علاش خليتنا ؟؟
صدمني سؤاله .. وعارف انه كاذبين عليه ومقايلين أني كنت مسافر لبلاد بعيدة .. نزلت لمستواه وشديت راسه برفق وحطيته ع كتفي
جواد: مانبيكش تعرف السبب .. بس نبيك توتق فيا وتعرف اني ماخليتكمش بارادتي :(
حضنه كان بارد .. وحسيت بيه مش مقتنع مازال .. لفيت ايديا الزوز عليه ..
زين: كيف بنوتق فيك وانت خليتنا انا وورد بروحنا ؟؟ .. قلت بنجي نروح بيكم في الليل بس بعدها معاش روحت .. مانقدرش نسامحك انا مش زي ورد الغبية
بعدته عن حضني .. وعقدت حواجبي بس بعدين تفكرت انه مش فاهم شي زي ورد .. انا لازم نوضحله كل شي .. ونفهمه
جواد: ورد مش غبية .. شوف زين .. غيابي طوول هالسنين لاني كنت نخدم عليكم
زين: مانبوش فلوس .. نبوك انت معانا وبس
قعمزت ع الارض .. وربعت رجليا .. وتنهدت .. مسحت ع عيوني بايديا .. سرحت في مكان مجهول .. بس زين قعد واقف وماباش يتنازل
جواد: زين شوف انت كبرت ووليت راجل .. لازم تعرف انا وين كنت !!
زين: وين كنت ؟؟ .. كبرت وانت مش معاي !! .. قصي هوا بابا وماما وكل شي عندي
كلامه جرحني وجعني .. وختمه بضحكة هزوة قتلني بيها
جواد: محبوووووس ** بصوت عالي قلتها .. هوا تفاجئ وجي بيطلع من الدار بسرعة وقفته بكلماتي ** لما عرفت اني كنت محبوس بتطلع ؟؟ .. زين انت ولدي وانا بوك .. لازم تسامحني وتوقف معاي مش تطلع وتخليني ؟؟ .. انا قلتلك باش ماتشكش فيا .. باش ماتستحقرنيش اكتر .. وباش ماتظلمنيش .. انا بوك مستحيل نرضالك المذلة والاهانة .. مستحيل نبني سعادتي ع تعاستكم .. طوول هالسنين كنت في السجن ماسافرتش وخليتكم .. انت تتوقع انديرها !!؟؟
وقمت عيوني فيه .. كان عاطيني بالظهر ماسمعتش صوته .. لالا .. سمعت بكياته ..أنين دموعه .. رعشة جسمه من شدة كمدة بكاه .. لاحظت صدمته ع هيئة ردود فعل مجهولة .. لاحظت تأثيره بكلامي .. لما ماردش عليا .. حطيت ايديا ع وجهي وبديت نبكي .. ايه نبكي .. وبصوت واضح زيادة .. واجعني غيابي ع صغاري .. واجعني ولدي يللي كان متأمل فيا خير .. واجعني بنتي غبت عليها سنين وتوا بنزفها بعد رجوعي .. واجعني زين كبر ومن غيري .. واجعتني بنتي رجعت لقيتها صبية .. واجعني كل شي فيا .. قلبي .. روحي .. نفسي .. بنتي .. ولدي .. وحتى وجع ايناس مازال ماطاب ..
حسيت بايد حنونة ع كتفي .. زين <3 .. ولدي حبيبي سامحني <3 .. اتكى ع ظهري .. مع عبرة بكاي ماحاولتش نلفه لحضني .. قعدت حاط ايديا ع وجهي .. بس ماهي إلا ثواني جي قدامي وحضني .. وقعد يبكي معاي .. حضنته بقوة .. عصرته .. غرسته في ضلوعي .. دخلته لقلبي اكثر وأكثر .. هذا الراجل يللي بنعبى عليه .. راجل وقلبه حنون <3
>>>>>>>>>>>>>>>>>>>
أما انا كنت في عالم تاني .. وتت خالتو مع رزان وماما فاطمة الضيافة .. وانا مقعمزة في داري ونقرا في مذكراتي .. وبين الورقة الورقة تعيش قصتي مع قصي .. بديت نسرح بخيالي لبعيد .. مكان تقول جنة <3 .. عشب أخضر .. ورد أحمر وكل الالوان ع الاطراف .. وانا فرحانة ونجري من مكان لمكان .. بس مش بروحي .. كان قصي معاي .. يلعب فيا .. ويجري وراي .. ومدلي باكو هدية لونه أحمر .. وكان في ,,,,,
ماكملتش خيالي الباب انفتح وخشت خالتو .. (( هيا حبيبتي الناس جو ))
كنت لابسة قونة خلفيتها بيضا وعليها وردات فوشيا .. ومعاها بلوزة بيضا ربع كم .. وشعري مفتوح وشديت خصلاتي بفيوكة لون الفوشيا .. لابسة شخشير طويل ابيض .. تلفتت للمرآية النظرة الأخيرة قبل الدخول .. ونزلت من الدروج .. كل درجة ننزلها نتمنى نلاقي قصي قبل لنخش .. بس خطرت في بالي فكرة ..
ميس: ورد هيااا خيرك وقفتي ؟؟
ورد: ءءء لحظة بس نسيت نحط بارفان .. مش ح نعطل آوكي !!
ميس: هههههه ماتعطليش
خليتها لين خشت لحوش عمي .. تلفتت يمين يسار مالقيت حد .. مشيت بخطوات خفيفة وبلا صوت .. نحيت كندرتي البيضا .. حطيتها ع جنب وكملت طريقي .. لين وصلت للجنان الخلفي .. لفيت بعيوني يمين ويسار مالقيت حد .. وكملت طريقي .. وصلت لباب حوش عمي الخلفي فتحته بالشويا .. بمشية قطة .. فتحت باب دار قصي وخشيت بسرعة .. تلفتت لقيته واقف يشبحلي
لقيته لابس تيشرت داخلي ابيض مع شورت جينز للركبة .. كان متكي ع سريره وشاد تليفونه .. ولما خشيت لوحه ع السرير
قصي: ورد !!!!
>>>>>>>>>>>>>>>>>>>>>>>>
قصي يتحدث ::
صدمتني ورد بموقفها الغريب عن العادة ؟؟ .. غضيت بصري وقلت (( وين حجابك ؟؟ ))
بس قعمزت مقابلتني وقالت : قصي نبي نقولك شي قبل مانخش
قصي: قولي شني بسرعة واطلعي
ورد: انا مانبيش نتزوجه هالغسان .. اصلا مانحباااش انا
قصي: قولي لبوك هونا رجع انا مهمتي تمت خلاص
هدا كله مواطي عيوني عليها مانبيش نركز في آي حاجة حلوة فيها .. اصلا ورد كلها تجذب العيون ..
ورد: قصي مش قلت بنوقف معاك ؟؟
قصي: ايه بس لما كان بوك مهناش مش توا
ورد: قصي !!
شدت ايديا .. وانا فكيتهم بسرعة
قصي: انتي خيرك ؟؟
نضت وقفت وبعدت عليها ..
ورد: اقنع بابا ان مايخلينيش نتزوجه غسان
قصي: هوا ماجبركش ره
ورد: لا جبرني وقاللي ضروري تتزوجيه مايبيش يحرج صاحبه .. قصي !!
قصي: آوووووف
كان العرق ينزل من جبهتي .. لاني متوقع آي حد ممكن يخش وتصير كارثة .. عليت صوتي شوي
قصي: انتي اصلا كيف وصلتي هنا ؟؟
ورد: قلبي هوا يللي وصلني
ضحكتني جملتها .. فتحت الباب وقلتلها : اطلعي بسرعة قبل مايشوفنا حد
وقفت وفكت مني الباب وسكراته
ورد: انت خايف ميس تشوفنا مش حد
قصي: ميس ؟؟ .. هادي خالتك كيف تقوليلها هكي !
ورد: آسفة :(
واطت عيونها .. وانا حطيت عيوني عليها .. سرحت فيها شويا .. شعرها طويل ومغطي ظهرها .. نقشها الطفولي .. ملامحها البريئة .. عيوني جمدو في مكانهم .. بس بسرعة استوعبت لحركاتي .. هزيت راسي شوي فيقني من نظراتي المعجبة فيها ..
ورد: قصي !!
قصي: نعم ياورد
ورد: انا .. انا ...
قصي: آووووف شني انتي ؟؟
ورد: انا نبيك انت
قصي: قلتلك انا الموضوع مش في ايدي بري قولي لبابا يرفضه انا مادخليش في شي .. قصدي زمان كنتي تشاوري فيا ونعطيك في رايي لان بوك مهناش اما توا ,,,,,,,
قطعت عليا وقالت : نحبك <3
جمدت في مكاني .. لساني عجز عن الكلام .. فتحت الباب وقلت : اطلعي برا
طلعت من غير ولا حرف .. قربعت الباب بكل مافيا من جهد .. وانهديت ع سريري .. كلمتها تردد عدة مرات ع مسامعي (( نحبك )) .. شن تعرفي من حب انتي بس ؟؟ .. آووووف .. زعما فسرت مواقفي معاها لحب ؟؟
#Dudu
