#الحضن_الدافي
الحلقة :: 19 ::
هما ياكلو وانا مش قادر نحط لقمة في فمي .. لان تفكيري في كلام ميس سكر نيتي .. لعند رن التليفون
وكان المتصل خوي ::
جواد: آلو كيف حالك ؟؟
خوي: الحمد لله كيف حالك انت ؟؟.. قوللي شن صار معاك في موضوع الزواج ؟؟
جواد: انا جايك الليلة وح نحكيلك كل شي
سكرت منه .. كان خاطري نتصل بميس ونقوللها عاودي كلامك .. قوليلي الصدق .. مانبيكش تكدبي وادسي عليا في موضوع زي هدا ؟؟.. بس بعدين ح تحسب آني متردد .. وح تفكر اني بنتزوج برانية تربي صغاري .. يارب صبرك :(
>>>>>>>>>>>>>>>>>
قصي يتحدث ::
كنت متكي ع سريري فاتح قدامي تليفوني ونتآمل في رقم ميس .. خاطري نعرف شن صار في موضوعهم بالتفصيل .. مش قادر نصبر دقيقة تانية لين يجي عمي ويقوللي .. كنت مسجله ( خالة ورد ) .. مانبيش نمسحه وبنفس الوقت خايف نتهور ونتصل بيها في يوم من الايام .. فتح باب الدار وكان خوي الياس ..
الياس: نخش عادي !!
سكرت تليفوني وحطيته ع جنب .. قعمز معتدل .. وهزيت راسي بالايجاب .. جاب كرسي متاع مكتبتي وقعمز مقابلني ..
الياس: في موضوع ونبي نحكيهولك
قصي: آها سمعني
الياس: نبي نتزوج <3
استغربت من كلمته .. وضحكت ضحكة ع جنب .. بعدين شبحتله بس حسيته يتكلم بجديات
الياس: والله الله خيرك تشبحلي !!
قصي: ومن هيا يللي بتتزوجها ؟؟
الياس: بنت عمتي لمية .. تي رزان خيرك ؟؟
قصي: رزان !!!!!!!!
الياس: ايه خيرك مستغرب ؟؟
قصي: انت يللي خيرك ؟؟.. معقولة انت ياالياس تفكر تناسب عمتي .. ومني !!.. رزاااان !!
الياس: خيرها رزان من شن تشكي ؟؟
قصي: تي امها .. تي عمتي انسانة ماتنقربش .. صعب صعب ياالياس .. من الاخير فوت الموضوع وماتعشمش روحك فيه
الياس: :(
قصي: هئ مش صغير ياراجل ع الجو اهوا .. لما تبي تتزوج وازيلك وحدة من مستوانا .. مش تناسب عمتي .. والله ماهي راحماتك من المشاكل والعار .. تي احني صغار خوها ومش سالكين منها .. بتزيد تناسبها !!!!!!!!!!!؟؟؟؟
الياس: شن يعني ؟؟
قصي: يعني كنسل ع الموضوع ياراجل .. هئ عقابها بتناسب عمتي !!.. بالله وين عقلك لما فكرت هكي ؟؟
الياس: اوكي خلاااص فهمت .. انا طالع مع الولاد
طلع الياس وقربع الباب وراه .. ممكن ردة فعلي للموضوع كانت واعرة عليه .. بس ح يجيه يوم ويقول خوي معاه حق .. رزان بنت كووويسة واصغر منه بسنة تقريبا .. مش زي امها ولا خواتها .. عاقلة ورزينة وانا متأكد لو عمتي تخليهم براحتهم ح يعيش معاها حياة عمرها ماصارت .. بس عمتي مش ح تخليه في حاله .. وح تعبي راس بنتها عليه وعلينا كدلك .. عمتي واعرة وماتنقربش .. رجعت اتكيت ع فراشي .. ورجع حبل الافكار يجذبني ليه .. بس في نقطة انتبهت ليها .. حلمي انا بميس .. ممكن يكون نفس حلم الياس برزان .. وانا صديته .. وماعطيتاش فرصة يحكيلي تفاصيل قصته .. علاش درت هكي ياقصي ؟؟.. لو الموقف نفسه تكرر ليك راك ماتحملته ؟؟.. ودرته توا في خوك .. كيف بنصلح غلطتي باه ؟؟.. الياس اكبر مني وتفكيره عميق مااعتقدش قدم ع هالخطوة الا وهوا دارسها مية مرة .. نطيت .. وقفت .. فتحت الباب وطلعت بنلحق الياس .. بس لقيت بوي يرحب بعمي .. جيته غمتلي قلبي .. معاش قدرت نتنفس .. شفت في عيونه ( ميس ) وابتسامتها .. وصوتها .. كلامها .. حشمتها .. واسلوبها .. وكدلك المواقف العبيطة يللي جمعتني بيها .. خديت نفس عميق .. وعفست ع قلبي وكملت طريقي .. سلمت ع عمي .. وقعمزت ع طرف الصالة ... نحس لو تعمقت الداخل ح يزيد قلبي يغم .. وح يبان كل شي كئيب في وجهي .. مصيري محسوم من توا !!
بوي: باه وشن صار ؟؟!!
جواد: آآآآآه والله شن بنقولك !!
هنا ارتفع بصري اتجاه عمي .. ومش ح نقدر نواطي عيوني .. ولا ح ندس تشويقي للجواب .. بس هنا كانت الصدمة لما نطق عمي هالكلمتين ( قالتلي موافقة ) .. ميس !! .. علاش درتي هكي ؟؟.. من غير مانحس بروحي انسحبت من الجلسة .. حاس النفس انقطع عليا .. وحوشنا بكبره مافيشي اكسجين .. طلعت برا وقفت قدام سيارتي .. وعيوني مفتوحات .. بس فينا ميزة نحنا الرجال .. نكابرو .. ونطغو ع دموعنا .. بنبكي !! .. لا .. عندي قوة .. وعزم .. وقسوة .. ع آي دمعة ممكن تخالف قوانيني.. طلعت قرطاس دخاني وبديت بالاول .. والتاني .. ماقدرتش نهدا .. حاس الدنيا كلها ضاغطة عليا وبتقتلني .. الروح بتطلع مني .. نفس عميق .. وبعده التاني ولحقت ع التالت .. هدا كله وعمي مازال يحكي التفاصيل لبوي .. غمضت عيوني .. حرام يللي ادير فيه ياقصي .. خلاص هادي ح تكون مرت عمك الاسبوع الجاي .. بلاش تهور .. بلاش حركات مراهقة .. خليك قوي .. ويللي خلقها خلق مليووون غيرها .. وكيف ماطلعت في حياتي فجآءة .. ربي يعوضني بخير منها .. اتكيت ع سيارتي ..
>>>>>>>>>>>>>>>>
جواد يتحدث ::
طلعت من حوش خوي .. ورجليا مش قادر نوقف عليهم .. حتى خوي شجعني عليها الفكرة .. رغم اني كنت متأمل فيه يرفض .. او حتى يلمحلي شويا انه معارض .. قمت عيني لقيت قصي متكي ع السيارة وقدامه بقايا القرطاس .. وشاد بين صوابعه سبسي .. وبايده التانية ضاغط ع الباكو .. بقبضة كل عروقه باينات .. منظره كان أشبه بمنظري يوم سمعت بايناس جاينها ناس بيخطبوها .. وكان العريس كامل بجميع المواصفات والكمال لله .. وشاد بين ايديه باقة ورد والفرحة من بعيد تبان ع وجهه .. كرهته هداك اليوم .. كنت ندخن بشكل هستيري مش طبيعي .. واحد ورى واحد ومش داري بحالي .. والحمد لله ماصارش نصيب بينهم .. حركت راسي شويا .. ووقفت جنبه
جواد: قصي .. خيرك ؟؟
حط الباكو ع السيارة .. وقعد يمروح بايديه قدام وجهه ع اساس يبعد في الدخان عليا .. وابتسمت ابتسامة صفرا ..
قصي: لا شي .. مبروك ياعمي
تغمرني ثواني .. وبعدين حط ايديه ع كتافي وابتسم من جديد نفس الابتسامة
جواد: ع شن ؟؟
قصي: سمعت انها وافقت عليك
جواد: أها .. ماعطيتنيش رايك ؟؟
قصي: ههههه مايهمش راي .. اهم شي راي العروسة ربي يباركلك فيها
جواد: :\
قصي: ههههه خيرك هكي تشبحلي ؟؟
جواد: قصي نسألك سؤال .. وانا صاحبك والقريب ليك اكتر من كونك ولد خوي صح ولاه !
قصي: ههههه ايه صح
جواد: وحتى نذكر درنا هلبا مواقف شطانة مع بعض .. وكنت تناديني بجواد .. عمي هدا وين بديت تقول فيها بعد مادرت صغار ههههه
قصي: ايه .. وصف عمي نحس فيه كبير عليك .. انت خوي وحبيبي وصاحبي .. بيني وبينك 9 سنين ماينحسبووش .. كل مانضايق نجي نشكيلك .. هئ نتفكر حتى زمان وين يلزني المدير كنت انت ترد فيا
جواد: يعني مافيش رسميات بين بعض .. انا اول ماحبيت ايناس كنت اول العارفين .. ماتكدبش عليا قصي .. وجهك فاضحك .. انت تحب ميس ؟؟؟
قصي: لالالالا .. هههههههه شن معاش لقيت مانحب انا ؟؟
جواد: مافهمتش ؟؟.. خيرها ميس ؟؟.. فيها حاجة غلط ؟؟
قصي: لا حشاها .. بس من اول ماتوفت ايناس الله يرحمها .. حطيت في بالي ميس مجرد زوجة عم :)
جواد: آهااااا
قصي: ايه هكا هو .. ءءء عمي مصطفى يراجي فيا .. نتلاقو سلام
كذاب .. قصي كذب عليا ولأول مرة .. ضحكته فيها كذب واصطناااع .. مش هدا قصي يللي نعرفه .. حاس في شي مضايقه .. ومن طريقة كلامه واااضح يبيها البنت حلاله .. بس هيا موافقة عليا ؟؟.. هكي خلتني بين نارين .. نار قصي ونارها هيا ؟؟.. خللي نروح للصغار والصباح رباح :)
مع الشمس المشرقة يولد يوم ملئ بالسعادة الروحانية ::
وصلت ورد للمدرسة .. زين للروضة .. ووجهي ع الشركة .. حسيت اليوم ح يكون مميز .. في شي مريحني ..
>>>>>>>>>>>>>>>>
قصي يتحدث ::
الامور بالشوي بدت تتصلح لأني غضيت النظر ع موضوع ميس وبديت نجري ع خدمتي وبس .. واليوم طالع بكري مانبيش نتأخر ع دوامي من اول يوم .. حاط ايدي اليسار ع فمي ونفكر .. ومية سؤال يدور في راسي بشأن الخدمة مش لشي تاني .. ونفس الوقت نفكر في موضوع الياس .. رجع للصحراء وخلاني حاير كيف نقدر نراضيه ؟؟.. انتبهت لشي ع الطريق .. بنت تأشر بايدها للسيارات ع الرصيف .. وجنبها سيارتها الباين انها وقفت منها .. يامحاسن الصدف .. ميس !! .. درست السيارة ع اليمين ونزلتلها .. كانت مرتبكة .. وحايسة مع بعضها ..
قصي: ان شا الله خير
ميس: ءءء قصي كيف حالك ؟
من غير مانشوفلها ولا نركز في ملامحها المتوترة ..
قصي: الحمد لله .. ءءءء هادي العجلة ولاه !!
ميس: ايه .. وراي دوام والله تأخرت عليه بسببها .. :(
قصي: مش مشكلة .. محلولة ان شا الله
وليت لسيارتي طلعت اللوازم لتغيير عجلة السيارة .. اثنيت ركابي وقعدت هيا واقفة قريب مني ..
ميس: شكرا قصي بجد
قصي: مازلت ماكملتها انا
ميس: انت الوحيد يللي وقفتلي .. لو كانت بنت متبرجة راهو كلهم وقفولها .. مجتمع معاق
قصي: الله غالب .. وبعدين انا وقفتلك مش لانك بنت .. لانك ح تكوني مرت عمي مستقبليا
قمت راسي وحطيت عيني في عينها .. لاحظتها ارتبكت وواطت راسها .. وقعدت تحرك في ايديها بتوتر
ميس: ءءء
قصي: يلا الف مبروك
ميس: الله يبارك فيك .. ءءء كملت !!
قصي: لا شكلها بتعطلك اكتر
ميس: آووووف اليوم عندي جلسة راهو المرآ تراجي فيا :(
قصي: جلسة شنو ؟؟
لاحظت سؤالي غبي شوي .. اصلا شن ليا علاقة بمواضيعها وشغلها !!
ميس: قضية طلاق .. راجلها مداير فيها الويل يضرب ويهين وقاللها ماني مطلقك لين نبهدلك في المحاكم و.......
قصي: خودي مفتاح سيارتي وبري لحقي عليها وانا نكمل نروحلك بيها لحوش راجلك اوكي !!
ميس: راجلي !!
مديتلها المفتاح .. خدت مني المفتاح مستغربة .. ومشت لسيارتي .. وانا فتحت الكوفينو متاع سيارتي باش نرجع الحاجات مش مستحقها .. نسمع فيها تقول ( هكي الواحد يسوق سيارة زي هادي ولا بلاش . .. الله كيا ياااارب ارزقني بزيها .. وزيادة لونها اسود .. وعالية <3 ... اول معاش ليا لما نشري زيها ) وشادة ستيرسو وتهدرز وتشوف للمراية .. وتحرك يمين يسار .. حركات اطفال -_-
سكرت الكوفينو وضحكت بلا صوت .. وليت لسيارتها .. بهدلتني .. شكلها عنايدية وهبلة زي صاحبتها ..
وضاع شغلي .. ودوامي .. ومعاشي .. وكل شي من اول يوم -_-
#Dudu
