#الحضن_الدافي
الحلقة :: 33 ::
.. اذكرت كل شي حلو معاها .. عصرت عيوني أكثر أكثر .. وين اذكرت موقفها قبل اسبوع :(
كملت المقابلة وطلعت من الشركة وركبت سيارتي .. فتحت تليفوني لقيت ميس ع الفايبر متصل .. بعتلها مسج ( كيف حال الطليان معاك ؟ ) .. جاني مرئي بس ماردتش عليا .. سكرت قفل تليفوني ولعت سيارتي وروحت للحوش .. لقيت ورد في المطبخ
قصي: السلام عليكم
ورد: وعليكم السلام .. كيف حالك قصي؟؟
حطت بكرج الحليب ع الطاولة ومشت للدولاب طلعت حكة نسكويك
قصي: الحمد لله .. شن اديري !!
ورد: ندير في كاكاو لزين وديمة يلعبوا لبرا
قصي: آها .. أمي وين !!
ورد: طلعت بتعزي وحدة من الجيران وقالتلي انزلي اقعدي لوطة لين نروح
قصي: آها تمام ..
مشيت خطوات بسيطة وهيا كملت شغلها ع الكاكاو .. بعدين وليتلها ( ءء ورد تقدري اديريلي قهوة ! )
ورد شبحتلي وابتسمت وهزت راسها بمعنى ايه
قصي: اوكي نبدل حوايجي ونجي
ورد: ان شا الله
>>>>>>>>>>>>>>>
طلع قصي ونسي تليفونه ع الطاولة .. ناديته بس شكله ماسمعنيش .. رديته في مكانه ورفعت صفرة الكاكاو والبسكويت للصغار .. ووليت حطيت سزوة القهوة ع النار .. وطلعت صونية الكيكة يللي درتها امس وقصيت منها طرف .. بس نبهني صوت مسج ع تليفون قصي ع الفايبر .. جاني الفضول نقراه وبما أن مسجات الفايبر يطلعو ع الشاشة .. رفعت عيوني ليه وقريت الاسم ( Mais ( .. والمسج كان ( ههههه الجو هنا خيالي ياريت جيت وشفت الناس العايشة ) .. قرنت حواجبي باستغراب .. شن قصدها بالناس العايشة !!! .. بعده بدقيقة وصل مسج تاني منها ( انا كيف طلعت من الكورس وماشية رحلة انا والفريندز نروح ونكلمك ) .. هادي خالتو ميس نفسها !!! .. فريندز ؟؟ .. والناس العايشة ؟؟.. السفر يغير طباع الناس !! .. والا كلمة اميما زمان صح لما قالت ( الفلوس تغير النفوس ) .. واول ماخالتو سافرت انقلبت 180 درجة ؟؟؟؟؟؟
وانا قاعدة سارحة في التليفون خش عليا قصي .. ( ورد !! ) .. وعلامات التعجب كلها فوق راسه .. فقت من سرحاني وهزيت راسي شوي وتنبهت .. وشبحتله نحاول بنظرتي هادي نغير فكرته الغلط عليا يللي خداه قبل دقيقة .. بس قام تليفونه وفتح القفل وشكله قري مسجات ميس .. عيوني مفنصات وفي قلبي مليون رعشة ورعشة .. ضميت شواربي بين سنوني ونراجي فيه يقوللي كلمة يصعقني بيها .. بس ابتسم وقال ( قريتي المسجات !! )
قعدت ع نفس وضعيتي وبديت نقطع في الكلمات ( أ .. ن .. أنا .. مــ.. ا.. لا لا .. قصدي انا )
قصي ضحك بصوت عالي وقاللي : تي خيرك ؟؟.. لو قريتيهم قولي ايه ولو لا قولي لا وتمينا
غمضت عيوني وتنفست بعمق .. عمري ماكذبت ع حد فما بالك قصي #أغلى_انسان_عندي <3 .. بعدين فتحت عيوني وشبحتله وقلتله: لا ماقريتهمش
مانعرفش شن يللي خلاني نكذب وانا في داخلي نبي نقول الصدق .. ممكن الخوف سيطر عليا
قصي: باهي خيرك ترعشي ؟؟
شد ايديا بحنان وانا مازلت نرعش ونغمض في عيوني ونفتح وخاااايفة
قصي: شوفي ورد لو الكذب نجاك مني توا بس مش ح ينجيك يوم القيامة من ربي .. اوكي !! .. وانتي قاعدة صغيرة و......
قطعت عليه كلامه وجبدت ايديا وقلت ( انا معاش صغيرة .. انا كبرت وبديت نعرف كل شي ) .. وانسحبت من المطبخ .. لا مش من المطبخ من الحوش كله وركبت لشقتي .. سكرت الباب .. وقعد سيناريو يللي فات كله يتكرر قدامي واللي أترث فيا اكثر شدة ايدي .. قمت ايديا قدام عيوني .. آآآآآآه تنهدت بقوة .. ليش قصي ديما يشوف فيا صغيرة ؟؟.. وقاعد يكلم فيا باسلوب الاطفال .. ابتسمت ابتسامة صغيرة ومشيت لروشن الصالون وشفته واقف في الجنان يشرب في قهوته .. خبطت ايدي ع جبهتي بالشويا واذكرت انه طالب مني نديرله قهوة وانا نسيت :( .. وين خطرت في بالي القهوة خطر في بالي مسج خالتو ( في رحلة مع الفريندز ) .. وين الرحلة ؟؟.. ومني الفريندز تبعها ؟؟ .. آآآخ خالتو ميس بروحها لغززز .. يصعب حله .. نزلت ستار الروشن الشويا ونحيت وشاحي .. واتكيت ع الصالون .. ممكن بعدها غفيت ومعاش حسيت بالوقت ..
حسيت بايد انحطت ع خدي الوردي فتحت عيوني بالشويا ولقيتها ماما <3 .. فزعت من الصالون وتغمرتها بقوة .. حضن اشتياق .. حضن لهفة .. وحضن دااااافي .. وبكيت وفرغت طاقتي المكنونة بالبكاء .. وماما كانت اطبطب ع ظهري بالخفيف .. بعدت من عليها شويا ومسحت دموعي وقلتلها ( ماما حبيبتي انا ضايعة من غيرك .. بابا محبوووس .. وزين كل يوم يكبر قدامي ومش عارفة كيف ح نكون الاخت المثالية ليه ؟؟.. لا مش الاخت انا لازم نكون الام والاب والاخت والصديق في نفس الوقت .. لان حتى بابا معطل علينا .. ليش مشيتي وخليتينا ؟؟
ماما: آووووس ورد نعرفك حبيبتي انتي قوية وواعية وكبرتي ماشا الله لازم ماتكوني اقوا واقوا مش تضعفي
ورد: انا كنت قوية بس ضعفت هلبا وين خليتيني وضعفت اكتر واكتر وين بابا خلاني .. وزين !!
ماما: وزين خوك محتاجك هلباااا توا يابنتي .. قوي ايمانك .. واستعيني بالله .. حبيبتي كل يللي صار معاك امتحان من الله .. صلي .. وادعي .. وكل يللي يضايقك معاش تقولي وينك ياماما ووينك يابابا .. اسجدي لربي واحكيله يللي مضايقك .. وربي ح يعطيك كل ماتتمني .. ويودلك كل خير .. وراك تنسي زين .. زين .. زين .. ردي بالك عليه .. وصيتي ليك يابنتي .. زين خليه بين عيونك .. وبابا ح يرجع بس اصبري .. ح يرجع بعون الله .. تقدري ع المسؤولية .. انتي ورد يللي ربيتها ع الصح .. ووعدتني مش ح تزعلني .. ومش ح ادير الغلط حتى وانا تحت التراب <3
شبحتلها وفي عيوني مليون دمعة أسيرة الجفون .. كانت ملامحها هادية .. حطت ايديها ع خدودي ومسحت عليهم بالخفيف وابتسمت وقالتلي ( وردي بالك ع روحك ياأميرتي <3 )
** ماااااااامااااااااا وين بتمشي ؟؟؟؟ **
زين: خيرك ورد شن في؟؟
فزعت ولقيت روحي مقعمزة وشادة في ايد زين يللي مقعمز جنبي .. ومستغرب فيا !! .. دموعي نزلو بلا رادة وحضنته بقوة .. تمسك فيا وقعد يهون عليا بكلماته يللي تنقط كلها براءة وعفوية .. بعدت من عليه شويا وشبحتله بفرح ..وابتسمت .. وعرفت ان ماما زارتني في المنام بس نبهتني ع هلبا حاجات كنت غافلة عليها .. اولها انا قوية وأخرها مسؤولية زين نقدرها .. منام وياريتني مافقت منه ..
زين: بشن حلمتي أختي ؟؟
ورد: قالتلي ياأميرتي .. وقالتلي انتي عمرك مازعلتيني .. آآآه .. *قمت عيوني فوق ورديتهم ليه مرة تانية وكأني نحاول نذكر شي نسيته* .. تصدق يازين انا فرحانة هوا صح حلم وماما مارجعت ع الواقع بس والله فرحانة بشوفتها .. كانت حلوة يازين .. زي القمر <3
زين: انتي تشبهيلها هلباااااااا
ابتسمت واطيت عيوني .. وتنهدت : ايه هلبا .. *شديت ايده وعصرته بين ايديا بقوة* .. ماما راضية علينا يازينوو
زين: نتمنى نسمع صوتها .. تمنيت نشوفها قدامي ونركز في كل ملامحها مانبيش نشوفها مجرد صورة ميتة بلا روووح .. قوليلي شن درتي باش ماما جاتك في حلمك ؟؟
تلاشت الابتسامة .. غمضت عيوني وتلفتت لجيهة التانية .. فتحتهم .. مانبيش نشوف فيه آي نظرة حزن .. واعر غيابها عليك ماما .. لان ولا مرة حسيت بحضنها وحنانها وكلماتها الناعمة .. ولا مرة عصبت عليك وضرباتك ضربات توعيك .. ولا مرة نصحاتك .. ولا مرة هدرزت عليك وعلماتك كيف ح تجذب الناس بأخلاقك .. بشخصيتك .. برجوليتك .. بطيبة قلبك .. لانك كنت صغير .. هادي الحاجات كلها غابت عليك .. وغياب بابا كان اصعب واصعب عليك ياحبيبي .. تنهدت .. وفكيت ايديا منه وعدلت تقعميزتي .. ومسحت دموعي وابتسمت .. وبعدين شبحتله
ورد: شن رايك نديرو زيارة لحوشنا ؟؟؟
زين: أما حوش ؟؟
ورد: هههههه يللي فيه كل ذكرياتنا :)
زين: قصدك ذكرياتك .. انا ماعشتش فيه هلبااا
ورد: آوووف يامنكد .. مانبيش نذكر شي فيه انا .. نبي نلعبك لعبة غادي
زين: ومني بيرفعنا بالله ؟؟
ورد: وااااضحة قصي ولد عمي تو نقوله انا
زين: هوا قصي مولي تقول أمنا وبونا
عضيت شاربي بالخفيف .. وحاولت نخفي حزني من كلماته .. بعدين ضحكت بصوووت عالي .. ع اساس خديتها منه نكتة مش اكتر ولا أقل
زين: مهبوووولة انتي !!
ورد: هيا يازين وتي روحك
زين: تي وين بنمشووو ؟؟
ورد: لحوووووشنا ماتسمعش فيا !!
زين: انتي مهبولة وتبيني نسايرك في هبالك ؟؟
ورد: انا بنخش بنغسل وجهي وتلقاني سابقاتك لوطة
زين: باهي باه
انتفضت نجري للحمام اكرمكم الله .. غسلت وجهي .. وغسلت كل همومي معاه .. وشبحت لروحي في المراية .. وقلت بصوت واضح ( الحزن مش لعيوني الحلوات ) .. بعدين ضحكت بالشويا ورديت شفت لروحي في المراية .. وحطيت ايديا ع خدودي وقعدت نتلمس في وجهي كله .. كلمة ( تشبهي لماما ) كانت تعطيني ثقة اكبر بنفسي .. الي الان ماشفتش احلا منها .. ممكن لانها ماما .. وكل بنت اكيد تشوف في امها أحلا من كل نساء الكون <3 .. درت لفتة لشعري لقيته نازل ع ظهري .. شعري كان لونه بني الفاتح .. ولان بابا يحب للبنت شعرها يكون طويل .. طولته ع خاطره .. كان واصل لنص ظهري .. فتحته وتلفتت يميني لقيت مشط محطوط فوق كامدينو الحمام .. خديته وقعدت نمشط في شعري والابتسامة مازالت ع وجهي .. وقمته فوق وطلعت من الحمام لقيت زين مربع ايديه ع صدره ..
ورد: ههههه خيرك ؟؟
زين: ساعتين في الحمام .. نبي نفهم بس هدا كله شن اديري ؟؟
ورد: وانت شن تبي فيه الحمام ؟؟
زين: بندير جل لشعري
ورد: ههههههه حلااااه يللي كبر وبيدير جل
وشديتله خدوده وانا نضحك ع منضره .. نحالي ايديا وضحك ضحكة خفيفة ..
زين: تي حولي يامهبولة تحسابيني قاعد صغير
ورد: ههههههه
طلعت للصالون ولقيت وشاحي طايح .. قمته ووقفت ع مراية المدخل ولبسته وعدلت لبستي وفتحت الباب وعليت صوتي ( زين وين تطلع سكر الباب المفتاح عندي ره ) .. وبما انه باب الحمام مفتوح .. سمعني ورد عليا ( اووووكي ) .. نزلت نغني وننقز ع الدروج .. لين وصلت لباب حوش عمي .. تنفست بعمق .. وطقيت الباب .. سمعت صوت قصي يقول ( آمممممممم ) .. ضحكت بالشويا عرفت انه كان ياكل .. فتحلي الباب وشاد في ايده تفاحة
قصي: ءءء ورد .. تي وين مشيتي امبكري ؟؟
ورد: امبكري !!
قصي: بدينا في الاستعباط -_-
يحسابني نستعبط بس بجد ماعرفتش ع شني يحكي .. حركت راسي وحولت من فوقه كل علامات التعجب وشبحتله
ورد: عادي ترفعني انا وزين لحوشنا ؟؟
قصي: والله شن بنقولك .. الحق انا اليوم عندي .......
شديت في سوريته وهزيتها بالخفيف ( والنبي والنبي ماتقولش لا بالله عليك وراس قصي .. كان تحب بوك وامك .. بالله عليك )
قصي: تي باهي خلاص ههههههه جبتي جميع كلمات الترجي .. خلاص انا موافق لكن بشرط
حولت ايديا من سوريته وربعت ايديا ع صدري ( تفضل !! )
قصي: كل يوم بنطلع من العمل الساعة 8 نبي قهوتي واتية فوق الطاولة يللي في الجنان .. شن قلتي ؟
ورد: تو بترفعني يوم واحد وتبيني كل يوم نديرلك قهوة!!
قصي: يس
ورد: والساعة 8 !!؟؟؟
قصي: طبعااااا
ورد: آووووووف
قصي قام حواجبه فوق وقال: خلاص امالا اركبي بدلي توتك وارقدي
ورد: خلاص خلاص انا موافقة
قصي: متاكدة !!؟
ورد: ايه متاكدة
قصي: ههههههههههه تمام ** قام راسه فوق للدروج وقال بصوت عالي ** زييييين هيا تأخرنا
بعدين شبحلي انا وقال: آنستي ورد تفضلي مفتاح السيارة وامشي ولعيها
ورد: مانعرفش نولعها :(
قصي: ياودي اركبي بس
ورد: هههه تمام
طلعت نجري للسيارة .. شديت في ايد الباب الامامي .. شفت صورة وجهي البسيطة ع المرش .. شفت وشاحي واذكرت كلام ماما ( مااديريش شي يزعلني ) .. ابتسمت بعفوية .. وفتحت قفل السيارة بالمفتاح وركبت في الكرسي الخلفي .. وحطيت المفتاح ع كرسي قصي .. راجيت دقيقتين وطلع زين وقصي مع بعض يضحكو ويطقو في ايدين بعض .. قداش تمنيت اللقطة هادي زين مع بابا .. بس اكيد ربي داسلنا كل خير القدام .. ركبو للسيارة وانطلقنا لحوشنا <3
بعد ساعة ونص وصلنا لحوشنا .. نزلت من السيارة قبل ماتوقف .. كانت خطواتي سريعة وخفيفة .. وقفت قدام الباب الخارجي .. ونزلت دمعة سبقت كل المشاعر المختلطة داخلي .. واستنتجت بعدها ابتسامة عفوية صادقة .. تلفتت لقصي ابتسملي وفتح الباب .. خشيت للجنان .. اول شي شفته كانت الحديقة الجانبية بابا غارس فيها ورد وعطر وشوية غرسات .. تنيت ركابي وقعدت مركزة في كل ورقة صفرا ذابلة .. بعد شوي وقفت ومسحت دمعاتي .. تلفتت لزاوية في الجنان كان فيها 4 كراسي وطاولة من خشب .. غمضت عيوني
ورد: ماما كلمي زين يخربلي في حوشي يللي بنيته
ماما ضحكت وتلفتت لزين يللي كان عمره حوالي سنتين والا أصغر : زينو حبيبي خلي وخيتك تلعب هونا خود سيارتك والعب بيها
زين شبحلي بنوع من الغيرة والغضب .. ونزل شاربه اللوطي لقطة حزن عفوية : بييييش
بابا كان يسقي في الوردات شبح لزين وقاله: عيييب شن قلنا احني !!!
طلعتله لساني بنوع من الاستفزاز ومشيت نجري لالعابي في الحديقة .. أما ماما قعدت تضحك لما زين قعد يبكي .. بعدين تغمراته وقالت: جواد معاش تزعللي ولدي ايوااااا
بابا: لسانه بدي يطووول ويبي القص .. هادي اخته الكبيرة عييب صح ولاه يازين !!
بس زين كان مستمر في البكاء .. ماما قامت زين في غمرها وقعدت ادووور بيه .. حسيت بالغيرة كيف ماما تحبه وماتبيش حد يزعله .. مشيت وقفت قريبة منها وحطيت ايديا في النص
ورد: وانا !!!!!
بابا: انتي خودي هادي ورد ههههههه
بخني بالمية عيطت في البداية بس مية الطوبو وصلت حتي لماما .. قعد يبخ فينا وماما تترجى فيه خايفتنا نمرضو بس بابا مايسمعش فيها .. كانت اصواتنا تعلى اكتر واكتر .. وكنا نجرو انا وزين ونسينا الزعل يللي صار معانا .. لعبنا هلبا بالمية وضحكنا هلبا .. ع نفس الطاولة والكراسي .. بس وين ماما !! .. وين بابا !! .. وزعل زين !! .. وضحكتي !! .. وغيرتنا من بعض !! .. وين عفويتنا زمان !! .. كل غااااب من لما طلعنا من الحوش .. فتحت عيوني وضحكت .. تلفتت لباب الحوش لقيته مفتوح عرفت ان زين خش .. لحقته .. في كل زاوية كانت عندي ذكرى .. حلوة والشينة .. المطبخ .. وسط الحوش .. دار المعيشة .. طاولة الاكل .. وحتى الحمام كانت عندي فيه ذكريات أحلا دوش من ماما .. خشيت لداري لقيت حوش فلة يللي شراهولي قصي زمان .. قاعد ع نفس الحال .. لالا .. مش ع نفس الحال .. مولي كله غبرة وامسخ .. وبما ان اثاث داري كله في شقتنا ف الدار مدايرة صدى صوت حتى صوت نفسي تكرر فيه .. لقيت لوحات الرسم ملصقة ع حيط داري .. رسمات كلها طفولة وعفوية وبراءة .. فتحت روشن داري ع طول اقتحمتها الشمس .. اعطتني ايجابية .. تنفست بعمق .. وطلعت من داري لصالون دار المعيشة يللي لقيت فيه لاب توب بابا محطوط ع الطاولة .. مسحت بايدي الغبرة يللي فوقه .. وفتحت التلفزيون .. جت ع قناة سبيستون .. تقريبا اخر قناة تفرجنا عليها .. ليا 3 سنين عليه الحوش هذا .. كل حاجة فيه ردتني تلاتة سنين التالي .. ع طاولة صغيرة في زاوية الدار لقيت صورتي بالفيلو والتاج والطرحة .. وصورة زين بالزبون .. وصورة ماما وبابا .. ابتسمت ونفخت عليهم باش طارت الغبرة من فوقهم .. ورديتهم في مكانهم .. قمت راسي لقيت زين واقف قريب مني
ورد: زين !!
زين: قلتلك انا لما بتجي هنا بتذكري كل شي .. بس انا مش مذكر شي هنا
ورد: ههههه حتى صورنا ؟؟
زين: لا
بعد من عليا شويا ووقف ع الصالون وبدي ينقز عليه والغبرة تنقز معاه .. فتحت الروشن .. وطلعت لقيت قصي واقف البرا .. مشيتله .. وقفت جنبه ولقيته سارح
ورد: في حاجة مضايقاتك ؟؟
قصي: لا
ورد: مستعجل تبي تروح بينا ؟؟
قصي: لا
ورد: باهي خيرك ؟؟
قصي: شي
وقفت قدامه وحطيت عيني في عينه وقلتله: انت زعلان مني ؟؟
قصي: لا
ورد: والله زعلان مني :(
قصي: علاش كذبتي ؟؟
ورد: خفت
قصي: واللي يخاف يكذب ؟؟
واطيت عيوني لوطة ماقدرتش نجاوبه .. بس هوا طفى دخانه وشبحلي .. حط صبعه تحت ذقني ورفعلي راسي شوي .. وقام حواجبه ..
قصي: ممكن تشوفي في روحك كبرتي .. بس انا ديما ح نشوفك الصغيرة الثرثارة ههههه
ورد: نسألك سؤال !!
قصي: طبعا
بعد ايده من عليا واستمر في نظرات الاستغراب
ورد: علاش ديما تسامح فيا !!
قصي: انا نسامح في كل الصغار .. مش انتي بس
ورد: كلهم غلطو فيك ؟؟
قصي: شوفي ورد .. نبي نقولك حاجة .. كل انسان فينا عنده خصوصيات ومايسمح لحد يعرفها .. فلهذا لازم تعرفي ان خصوصياتي ليا انا وبس .. هادي اخر مرة نلقاك تتجسسي عليا تمام !!
ورد: بس انا والله ماقصدي .. غرني الشيطان والله
قصي: غرك الشيطان وشفتي المسجات .. وغرك مرة تانية وكذبتي !!
ورد: سامحني بالله عليك والله ماعاد نعاودها الله
قصي: باه
ورد: قصي قول مسامحك بالله عليك
قصي: خلاص قلتلك باهي مش لازم نعيد ونكرر .. خشي نادي خوك خللي نروحو
ورد: قصي !!
نفخ شوي وبعدين شبحلي : طلباتك ماتمش .. نعم نعم نعم !!
ورد: شكرا بجد
قصي: العفو هي نادي خوك وفكيني
طلع ع طول .. مانعرفش سامحني والا لا .. بس كان سامحني راهو ماقاللي عفوا .. هوا ديما يقوللي معاش تشكريني اشمعنا توا قاللي عفو .. آوووووف اصلا معاه حق .. حاجة خاصة بيه شن دخلي انا !! .. ناديت بصوت عالي ( زييييين هيا بنروحو )
طلع يجري وقاللي ( الرواشن مفتوحات )
ورد: حي نسيتهم .. برا للسيارة مابين ماسكرت الرواشن
خشيت سكرت الرواشن كلهم .. ولفيت بعيوني ع الحوش كله .. وكأني نودع فيه بس مش لأخر مرة ح نشوفه .. اكيد ..واكيد .. ومليووون اكيد ح نرجعلك ياحضني الدافي .. طلعت نجري .. لمحت بعيني شجرة الليمون .. اذكرت لما انا وقصي كتبنا رسائل للمستقبل .. بس اذكرت لما قاللي ( يولي عمرك 16 السنة اقريهم ) .. مازال سنتين ع 16 .. باذن الله راجعة وح نقرا كل رسالة كتبتها .. ركبت السيارة .. وطلع بينا قصي للحوش .. حطنا وطلع ع طووول :\
>>>>>>>>>>>>>>>>>>>
قصي يتحدث ::
بعد المسج يللي بعتاته ميس ليا قبل ساعة ونص عكر الجو كله .. فتحتلها موضوع زواجنا يللي ح يتحدد اول ماتروح .. ردة فعلها كانت غريبة وقاسية نوعا ما عليا .. ( انت تخطط وانا انفذ والا كيف !! .. مش وعدتني ان آي موضوع بيني وبينك لازم يصير بالتفاهم .. انت خيرك جاي بتردنا لعصر الجاهلية الراجل هوا يللي يحدد والبنت فرض عليها تقول ايه وصح وحاضر وآمرك مطاع ! )
وكان حديثنا كله ع ( الفايبر ) كتابة فقط .....
قصي>> انتي خيرك ولعتي ؟؟ .. انا كنت نبي نفرحك بس
ميس>> تفرحني بالطريقة هادي !!
قصي>> آها يعني تبيني نراجيك 4 شهور تانيات باش تشرفي لليبيا ونجيبلك باقة ورد ودبلة متلا يعني !!
ميس>> تتسهوك !! .. اسمع قصي انا مش رايقة بكل خلينا نهدرزو وقت تاني
قصي>> انا نبي نفهم بس .. خيرك تغيرتي هكي !! .. اسلوبك .. معاملتك .. شن صاير معاك ؟؟.. احكيلي وح ترتاحي :)
ميس>> ماصاير شي .. بس الموضوع ضايقني هلباااا
قصي>> باهي انتي تبيني نأجل الموضوع بعد سنة متلا !!
ميس>> ماقلتش سنة بس ع الاقل خليني نروح ونتفاهمو بعدين
قصي>> انتي بديتي تتهربي هلبااا من موضوع زواجنا .. شن في !!
ميس>> قلتلك مافي شي .. انت غميتني بالموضووع غمااان
قصي>> بس المسج يللي بعتته مايستاهل هالتعصب هدا كله .. ولا ردة فعل زي ردة فعلك توا !!
ميس>> سبق وقلتلك انا مانحبش المفاجآت المصيرية صح ولاه !!
قصي>> يعني ارتباطك الرسمي بيا معاش يهمك ؟؟
ميس>> آووووف ياقصي .. قلتلك مانحبش حد يفرض عليا شي انا مافكرتش حتى فيه
قصي>> انتي مافكرتيش تتزوجي !!
ميس>> ايه طبعا .. لان نشوف في روحي مازلت مش قد المسؤولية
قصي>> تمام .. ليش وافقتي ع الخطبة من الاول ؟؟
ميس>> لاني نحبك اكيد
قصي>> كنتي قبلها بتتزوجي عمي وبتربي صغاره .. وتربية صغار مش مسؤولية برايك ؟؟
ميس>> كنت ح نطّر نتحمل المسؤولية وقتها
قصي>> الخطبة شن تعني ؟؟
ميس>> فرصة للتعارف
قصي>> وتعني كذلك الموافقة ع زواجك من الشخص المناسب صح ولاه !!
ميس>> انا بنسكر .. ماتبي شي !!
قصي>> تقريبا قاعد نتكلم ومانحبش حد يقطع عليا
ميس>> كلامك غير منطقي .. رجاءاً قصي الموضوع هدا يقعد بيني وبينك مانبيش اهلي يدرو بيه تمام !!
قصي>> شن السبب ؟؟
ميس>> في حالة عرفت انك قلتلهم ياقصي ح تشوف شي عمرك ماشفته .. تمام !! .. هي سلامات
ولعت النار بداخلي ومعاش قدرت نتحكم في اعصابي .. والضحية كانت ورد .. فصلت عليها وروحت بيهم بسرعة جنونية .. مافكرتش انه ممكن يصيرللنا حادث والاطفال يللي معاي أمانة .. في الطريق كلها كان الصمت يعم السيارة .. زين رابط حزام الامان ومكبش بايديه أما ورد ترعش مع بعضها ومش متحملة سرعة اكثر من هكي .. ورغم هذا كله مادرتلهمش اعتبار ابدا.. شن السبب يللي خلا ميس هكي تتصرف وهكي تتكلم معاي !! .. وقفت ع الاشارة الحمرا واتكيت ع الدومان .. حسيت راسي بينفجر .. بداخلي النار مانطفت لتوا .. قمت راسي وشفت عداد اشارة المرور مازال 45 .. قمت تليفوني .. فتحت القفل .. تمنيت نلقى منها مسج مكالمة عابرة وانا ماريتهاش .. بس بلا فايدة .. رديت التليفون في مكانه وفتحت الراديو وكانت أغنية :::
عطيـــتك حيــــاتي وعليــــك أنـــا بغيــــت ... قلت هيـــا الدنيـــا وهيـــا اللي بغيـــت
فـــاتت أيــــام واكتــشفت العكــــس ... عرفـــت بللي كذبـــة كذبـــة وفيهــا تخدعـــت
عطيتـــك قلبـــي سمحـــت فيــــا .. كلامـــك نسيتــــي ورخيــتي بيـــــا
قلت بصوت عالي ( آوووووف شن ناقص نكد انا >_< )
سكرت الراديو مرة وحدة .. وجت الاشارة الخضرا ع طول كملت درب طريقي .. رن تليفوني درست ع طول توقعتها ميس .. بس طلع مصطفى ..
قصي: آهاااا
مصطفى: تي وين يابروووو ؟؟
قصي: مش فاضي شن في؟؟
مصطفى: هههه شن يللي شاغلك ؟؟.. صاحب شركات مولي هههههههه
قصي: تي آوووووف .. خلصني شن تبي مالاخير !!
مصطفى: شني شني !! .. خلصني وشن تبي !! .. مزعلاتك العصفورة امالا !!
قصي: مصطفى شن قلناااااااااااااا >_<
مصطفى: خلاص خلاص اعصابك ياسي .. كنت بنقولك راك معزوم بكرا ع فاتحة صاحبنا أسامة
قصي: هوا أسامة بيتزوج خلاااااص !!
مصطفى: ههههه شبع صياعة خلاااص قرر يتزوج
قصي: ومن هي تعيسة الحظ ؟؟
مصطفى: ههههههه والله الفاتحة غدوا وتو نعرفو اسمها هههههه
قصي: ههههههه من يومك وااااطي .. هي طير خللي نمشي
مصطفى: وين ماشي ؟؟
قصي: مانعرفش
مصطفى: ههههههه تي تعالالي انا في الاستراحة مكسد بروحي
قصي: حتى هادي فكرة آهو جااايك :)
الصاحب ديما يجيك في الوقت المناسب .. ويحس بيك من غير ماتتكلم .. بس نوعنا احني الشباب مانبوحوش بمشاعرنا لبعض .. بس وقت الشدة تلقانا ايد وحدة
طقيت ع باب الاستراحة .. شويا وفتحلي ( خش خش .. غير امتى بتنحي قناع النكد بس ؟؟ )
خشيت قعمزت ع صالون مقابل التلفزيون .. مديت ايديا واسترخيت مع تنهيدة نابعة من القلب
قصي: آآآآآآه .. حاس حياتي كلها ماشية بالمقلوب .. كل شي نبيه يجيني بالعكس
قعمز جنبي وشد الريموت سكر صوت التلفزيون وشبحلي : احكي نسمعلك
قصي: مضااايق ياصاحبي ضيقة مايعلم بيها الا ربي
مصطفى:نعرف .. الموضوع يخص مني باه !
قصي: يخصني طبعا
مصطفى: شن جد عليك ؟؟
قصي: ولا حاجة قاعد زي قبل .. خدمة للحوش ومن الحوش للخدمة وخلاص
مصطفى: باهي شن تبي تاني ؟؟
عدلت تقعميزتي وحطيت مرافقي ع ركابي وشبحتله : والله مانبي حاجة الا نفسيتي ترتاح
مصطفى: والله انا لتوا مافهمت عليك
قصي: ميس .. ميس يامصطفى متغيرة معااااي هلبااا .. تصرفاتها وكلامها .. تي تقول مش نفسها يللي انعجبت بيها وخطبتها .. تغيرت هلبا في ظرف 4 سنين
مصطفى: بالك دارت اب ديت هههههههه
قرنت حواجبي وشبحتله من جديد .. بعدين وقفت وقلتله: انا الغالط يللي نحكيلك
شد في ذراعي وحذفني ع الكرسي ..وهوا مازال يضحك بعدين شهقة ضحك اخيرة وسكت بيها ..
مصطفى: تي نبصر ونغيرلك في جوك مش اكتر من هكي
قصي: ماهو مش وقته توا اقسم بالله
مصطفى: ايه خيرها هالميس من لما خطبتها وانت حالك كل يوم التالي
ضربته كف قوي .. انصدم وشبحلي
قصي: فوت الموضوع مصطفى
مصطفى: تي باهي فهمني خيرك ؟؟.. انت قلت ميس ماميس .. قلتلك خيرها شن صار جديد بيناتكم ؟
قصي: .......
مصطفى: تي احكي .. والله ماني مخليك طالع من عندي الا وجوك رايق وامورك تمام
قصي: بعتلها مسج وقلتلها فيه ( بنمشي لبوك بكرا العشية وبنحددو موعد العرس وانتي جهزي روحك من غادي وبعون الله كلها كلها 6 شهور او اقل تكوني حلالي <3 ) .. غلطت انا يامصطفى ؟؟
مصطفى: لا كلام قنين مافيشي عيب .. وبارك الله فيك حتي تناسيت موضوع عمك وبتتزوجها وترتاحو
قصي: نرتاحو !! .. هئه .. انفجرت فيا وحق ربي مافيش كلمة غلط نستها في حقي
مصطفى: ليش هيا مش فرحانة يعني ؟؟
قصي: لا .. قالت انت ادير في كل شي من راسك وانت عايش في عصر الجاهلية وبلا بلا بلا
مصطفى: يعني مش عاجبها انك تتزوجها بعد ماتروح ؟؟
قصي: لا طبعا .. تي ليها شهرين في ايطاليا واطبعت بطباعهم
مصطفى: كيف ؟؟
قصي: نتفاهمو ونتناقشو وابصر شنو .. ولا بوي ولا بوها ليهم دخل في موضوعنا
مصطفى: هبلت هادي والا شنو ؟؟؟
قصي: تصدق قبل ماتسافر كانت تقوللي الشور عند بوي .. وتوا انقلبت
مصطفى: تي وااااضح عليها جعانة واول مرة تسافر
قصي: بس مرت عمي يللي هيا اختها ماكانتش هكي
مصطفى: ايه يعني بتتبتلي ان الياس زيك انت ؟؟.. طبعا مستحيل
قصي: ومش هكي وبس .. قالتلي انا مازلت مانقدرها مسؤولية راجل وحوش وصغار ؟؟
مصطفى: تي فوتها ياااراجل شن هالكلام اهوا ؟؟.. تي قداش عمرها بالله عليك ؟؟
قصي: 25 سنة تقريبا
مصطفى: هههههه تي في بنت في وقتها هدا ماتقدرش مسؤولية الراجل والحوش ؟؟.. وخيي قصي راهي تلعب عليك مالاخير
قصي: كيف يعني ؟؟
مصطفى: يعني فووووتها .. تخلقلك في اعذار واعذار تبيها تجي منك .. تي مش كانت بتتزوج عمك ؟؟.. وين كان كلامها هدا !!
قصي: معناها تبي عمي !!؟؟
مصطفى: مااعتقدش .. هادي لعبت ع حبلين .. بس انت قاعد ع كرسي الاحتياط لين تنظم امورها مع غيرك .. وكان تنظمت بتشووطك تيرووو .. وانت الضحية ياقصي انت الضحية صدقني
سرحت بخيالي بعيد .. هل ممكن ميس تكون فعلا لعبت بيا ؟؟.. ومازالت اللعبة ماتمت لين توصل لمبتغاها ؟؟.. لا .. مرات ضغط العمل هوا يللي خلاها تقول هكي ؟؟ .. آوووووف سفرة أيطاليا قلبت كل الموازين .. بعدت كل وسواس من راسي .. وشربت مق قهوة يللي مدهولي مصطفى وبنظرات متأثرة بحالتي .. ماانتبهتش لحركاته او حروفه يللي ينطق فيهم حاليا .. غمضت عيوني وحطيت ايدي عليهم .. ( انت الضحية .. انت الضحية .. انت الضحية ) هالكلمتين ترددو هلبااا في بالي .. فعلا لو كنت انا الضحية ؟؟.. كيف ح تكون ردة فعلي ؟؟.. هل نلجأ للانتقام ؟؟ .. آووووووف ياقصي متأثر هلبا بالافلام .. بعد هالوسواس من راسك .. لا اكيد ميس مضغوطة نفسيا .. مافيش منها دوة الاعذار ..
قصي: آوووووووف
تلفتلي مصطفى : خير دعوتك ؟؟
قصي: مش عارف .. مش جايني نوم
مصطفى: لانك تفكر وشاغل بالك في حاجات مش مهمة
قصي: لو انا انضحك عليا تبدا حاجة مش مهمة ؟؟
مصطفى: مش هكي قصدي .. مازال ماصار شي ملمووس .. بس كان مجرد احساس مني
قصي: احساس منك !! .. ولاااااش تقوللي وتوهمني ؟؟.. آوووف منك يامصطفى
مصطفى: خود حذرك وبس .. مش قصدي شي تاني .. بس مش لدرجة تقعد تخمم وتقلق روحك وحتى النوم مش جايك ؟؟
قصي: حي نسيت ماقلتش لامي بنرقد عندك الليلة
مصطفى: اوكي هاك كلمها ** ومدلي تليفوني **
اتصلت بيها وعطيتها علم .. غطيت روحي باالورغان وحاولت نرقد .. حاولت .. وحاولت ومحاولاتي بائت بالفشل .. قعمزت وفتحت تليفوني لقيتها ( متصل بالانترنت ) .. لو كانت الامور بينا كويسة .. كنا توا نهدرزو ونخططو للحفلة .. بس هيهآآآت هيهآآآت .. سكرت التليفون بكل .. ورجعت اتكيت ع فراشي .. تلفتت لمصطفى لقيته في ساااابع نومة .. باهي ليش انا النوم مش مفكر فيا !!
( قصي نووووووض ياراجل الساعة 11 وتليفونك قربعلي راسي بالتشريين .. واااااك تي نوووووووض )
فتحت عيوني بالسيف .. وقمت تليفوني ورديت من غير مانقرا الاسم ..
قصي: آلووو
الياس: هآآ قصي شن الجو !!
قصي: آه الياس شن جوك ؟؟
الياس: الحمد لله .. آهو حمودي يسلم عليك
قصي: ههه .. كيف حالكم غادي ؟؟
الياس: والله الحمد لله بالله عليك اعطيني أمي اتصلت بيها ع تليفونها مقفل
قصي: مقفل !! .. علاش !!
الياس: تسأل فيا انا !!.. علاش انت وين بايت ؟؟
قصي: مع مصطفى .. خيرها أمي !!
الياس: تي خيرك انت ؟؟.. قلتلك كان أمي جنبك اعطيهالي وبس
قصي: مش جنبي
الياس: اوكي سلملي عليها .. هدا وين حصلت الشفرة قلت خللي نتطمن عليهم
قصي: ايه كثر خيرك بعد قريب شهر
الياس: هههههه تي هدا وين حصلت حقها .. هي سكر خللي رزان تكلم عمتي
قصي: اوكي سلام
سكرت تليفوني وحذفته بعيد .. وليت رقدت .. بس كف مصطفى سبق نومتي ..
قصي: تي خيرك ياراجل ؟؟
مصطفى: نقولك الساعة 11 وليت رقدت ؟؟.. نوض وتيلنا الفطور
قصي: انا بنوتيلك انت فطورك ؟؟.. شن تشوف فيا مرام ؟؟
فزع من فراشه .. وفنص فيا
مصطفى: تصدق ماكلمتنيش !!
قصي: وعلاش بتكلمك متلا ؟؟
مصطفى: بايتة عند جدها
قصي: وكان هدا ؟؟!!!
مصطفى: مصح وجهك .. راهي لاهية مع بنات عمها الشطانات
قصي: هههههه معاش تعقدها
مصطفى: بالك تبيني نحل فمي زي حضرتك ونخليها ع حل شعرها .. تلهد في ايطاليا مع العزارة ؟؟
قرنت حواجبي .. بعد ماشبه نسيت الموضوع رجع ذكرني بيه .. قعمزت ومسحت ع وجهي بايدي .. هوا حس بالاحراج .. سكت وحط ايده ع كتفي طبطب عليا وقال ( معليشي ياصاحبي مش قصدي .. بس انا هكي عقليتي :( )
ابتسمت .. ونزلتله ايده بالشويا وقلت: ولا يهمك .. خللي انوض نغسل وجهي وكلم مرام ع راحتك
مصطفى: تمام :)
نضت وخشيت للحمام .. غسلت وجهي .. شبحت لروحي في المراية .. عيوني حمر من الارهاق .. طلعت من الحمام نسمع فيه يقول ( تي ماشي ماشي اصلا انتي مدايرتيني رجل كرسي .. تشاوري في راسك وخلاص وانا ولا كأن خطيبك ومسؤول عليك .. نقولك شي مرام .. تي اسمعيني قبل .. خودي راحتك في الجديد معاش تشاوريني في شي يخصك انتي وبنات عمك الفالحات يللي توا طلعولك كويسات .. تي باهي باه .. باي باي )
وسكر الخط .. خشيت وفي ايدي فوطة نمسح في وجهي .. لوحت الفوطة ع الكرسي وشبحتله
قصي: خيره صوتك عالي !!
مصطفى: انا شن يللي خلاني نخطب ؟؟.. هوا في حدا تزوج وارتاح ؟؟
قصي: ههههههه شن صاير ؟؟
مصطفى: انا مانحبش الدلع الزايد .. صطوفة عندي بنت عمي تسوق حبيبي طلعت انا والبنات كلنا للبحر .. وشن درتو ؟؟ .. شي حبيبي مقعمزات والجو بجد هادي وحلو .. آآآآآخ بس ياقصي كان من يهد عليهم ويكرها هيا وبنات عمها كلهم >_<
قصي: ههههههههههه .. انا مروح ماتبي شي ؟؟
مصطفى: سلامتك .. سكر الباب وراك بنولي نرقد
قصي: والله مصح وجهك تو نوضتني وانت بتولي ترقد ؟؟
مصطفى: قلتلك وتيلنا الفطور ماتبيش
حذفت عليه الفوطة وقلتلك : والله ماتتحشم الله .. تشاويتووو
وطلعت من الاستراحة .. وبما ان اليوم جمعة روحت للحوش دوشت واطمنت ع أمي وبوي ... ومشيت للصلاة .. روحت وليت رقدت حاس بنفسي مرهق ونبي نضيع نص اليوم في النوم بالك ننسى الوسواس يللي مسايرني :(
>>>>>>>>>>>>>>>
آوووووف .. اليوم جمعة وعمي وماما فاطمة طلعو لزيارة وحدة من الاقارب .. وانا وزين في شقتنا مكسدين .. حتى غدانا طيبناه بروحنا ودرت مكرونة صالصة .. الوحيدة يللي نعرف انديرها .. وزين بعد الصلاة رجع رقد وانا ندور وندووور في الحوش .. خطرتلي فكرة نطلع للجنان ونطلع مذكرتي ونكتب قصة .. خشيت لداري وخديت قلم حبر ومذكرتي وطلعت .. وقعمزت تحت شجرة الزيتون ع جلسة الجنان .. وطلعت مذكرتي وبديت نكتب .. وفجآءة !!!!
#Dudu
