#الحضن_الدافي
الحلقة :: 15 ::
فــاتت الايـــام كانها سنين .. خليت ورد وزين عند خوي .. مانبيش اندخلهم في حالة اكتئاب وخوف من تصرفاتي .. ومانبيهمش يشوفوني نبكي والا مضايق .. خايف تجيهم حالة نفسية من اللون الاسود يللي عايشه .. كنت مقعمز ع كرسي في داري .. اندخن .. اذكرت ايناس وين كانت مقعمزة ع السرير وتبكي .. ماتبيش تسافر .. وماتبيش حتى تتعالج .. ياريته مارفعتها .. ندمت ع السفرة .. ندمت ع كل شي درته غصبا عنها .. تنهدت .. وغمضت عيوني .. خاطري نرتاح .. معاش نبي طيفها يمر عليا .. ياسرني عذاب .. تعذبت وين مرضت .. ومتعذب توا لاني بروحي .. بدونها .. بدون صغاري وصغارها .. في التغميضة هديكا خداني النوم .. مافقتش الا ع صوت الباب .. فتحت عيوني تدريجيا .. لقيت الشمس مقتحمة داري .. بتعطيني شويا أمل للحياة .. أو ممكن ماتبيش آي دكتور يزورني وانا في حالتي هادي .. مش مهم .. نوضت حسيت ظهري متكسر .. من رقدتي ع الكرسي المتعب .. انهديت ع ايد الباب .. وفتحت من غير مانشوف مني .. ولا حتى نعرف صوته .. لقيته قصي .. خليتله الباب مفتوح وخشيت .. من اللقطة هادي فهمني .. ولحقني .. قعمزت ع الصالون .. قعمز مقابلني ..
قصي: عمي .. يللي ادير فيه غلط .. شن هدا الحوش مظلم والله يجيب الكآبة
جواد: انا مرتاح هكي
قصي: وصغارك ؟؟
جواد: خلوهم عندكم لين ترتاح نفسيتي
قصي: باهي نوض نتغدو برا
جواد: ماخاطريش .. مش راقد امبارح
قصي: آووووف .. الحوش مغموم ياعمي قصدي افتح رواشنه شويا
جواد: مش لازم
قصي: آآآه .. غير هيا نووووض
وقف وشدني من ايدي .. وبالقوة نهضني ..وغصبا عني .. دخلني لداري .. وين قرب من الدولاب .. وقفت قدامه وفتحت ايديا ع طولهم .. ومن عيوني طلع الشرار
جواد: ماتقرباااش الدولاب هدا .. ايناس ماتحبش حد يمس حاجتها
قصي تحشم وواطى عيونه .. وحس روحه قدم ع خطوة غلط ..
قصي: آوكي بدل حوايجك انا نراجي فيك في السيارة
جواد: اوكي اوكي
>>>>>>>>>>>>>>
قصي يتحدث ::
بعد قريب نص ساعة طلع عمي .. مانعرفش ليش عطل ؟؟.. ركب السيارة .. وتلفتلي
جواد: هي برا
قصي: تمام
بدت السيارة تمشي .. وانا مرة مرة نشوف لعمي كيف سارح .. طلعنا للجردينا .. نزلنا وقعمزنا ع أول كرسي .. ونحاول نجبدله لسانه ويدويلي آي شي .. مانبيشي يقعد ساكت .. مش باهي لقلبه .. وفات قدامنا راجل مع مرته .. عمي لاحظته يراقب فيها .. انا تحشمت وارتبكت معاش عرفت كيف نتصرف باش نصرفله نظره عليها .. وبالهمس يقول ( ايناس .. ايناس ) .. الراجل لاحظ نظراته .. وقف قدامنا
الراجل: شن ياخونا .. في حاجة !! .. بري انتي القدام
وصرف مرته بعيد .. انا قعدت نشوفله ونشوف لعمي .. نبيه هوا يبرر موقفه .. لكن سكت
قصي: ءءء عفوا خوي .. آسفين .. امسحها في وجهي
الراجل: وخيره هوا مايردش ؟؟.. ماعنداش لسان .. والا عنده غير عيون يتفتن بيهم !!؟؟؟
نضت وقفت .. وشديته من مرفقه .. لان عارف عمي مش ح يرد عليه .. لانه قاعدات عيوني سارحات في شي غير معروف ..
قصي: معليشي خوي .. هدا عمي وكيف توفت مرته وآي مرا يشوفها يبدا ينادي باسمها .. آسفين
الراجل: شن يعني مهبول ؟؟
قصي: تقدر تفهمها هكي
الراجل: لا حول ولا قوة الا بالله .. ان شا الله ربي يشفيه .. نستاذن انا
قصي: اوكي
مشي الراجل غمضت عيوني وتنهدت .. ورجعت لعمي ..
قصي: عمي انا ماشي بناخد قهوة تبي حاجة ؟؟
جواد: لا
قصي: عمي والله يللي ادير فيه لروحك حراااااام
جواد: اوكي نشرب نسكافي
حسيته بيوزعني بس .. هزيت راسي يمين ويسار .. ومشيت بطريقي للكافي القريب .. خديت قهوة ورجعت .. لقيت عمي مش ع الكرسي !!
حطيت الطاستين ع الكرسي ومشيت ندور عليه .. ( عمي .. جواااد .. عمي جواد وين مشيت )
بعدين لقيته واقف ويدخن .. استغربت .. آول مرة نشوفه يدخن بعد هالسنين كلها .. تنهدت
قصي: رجعت ادخن ؟؟
جواد: ايه
قصي: من آمتى ؟؟
جواد: من لما ماتت الغالية
قصي: الله يرحمها
فجآءة لقيت عمي قدامي .. ويصيح ويخض فيا
جواد: ماماتتش .. ماتقولش الله يرحمها .. ايناس في الحوش تراجي فيا اصلا بنروح انا .. حول من قدامي .. وأخرلك مرة تقول ماتت فاهم ولاه !!
من الموقف هدا دمعت عيوني .. حتى بعد اسبوعين مازالت الصدمة فيه .. سايرته وهزيت راسي بالايجاب .. ( ايه صح ياعمي آنا اسف ) .. سيب كتافي .. ولوح دخانه ومشي للسيارة .. وانا بهكي فشلت اني نغيرله جوه ونطلعه من جو الكآبة .. خليت القهوة في مكانها .. اصلا معاد تلزمنا .. لان القهوة تبي تهدريزة .. وتقعميزة باهية .. تعدل الدماغ .. ركبت للسيارة .. ومشيت بطريقي لحوشنا .. بس نطق عمي بعد سكوت طوويل
جواد: روح بيا لحوشي
قصي: آوكي
غيرت طريقي من غير مانقول كلمة .. روحت بيه لحوشه .. ورجعت لحوشنا باش نشوف الاكتر آلماً .. وجود زين وورد في حوشنا يزيد يوجعني ويقطعلي قلبي .. أول ماروحت لقيت ورد ترسم .. وزين شاد قفص العصافير ويدور بيه من مكان لمكان .. ممكن يظن انه هكي يسلي فيهم مش يعذب فيهم .. خشيت للكوجينا لقيت أمي تغسل في الفاكهة
قصي: السلام عليكم
أمي: وعليكم السلام .. هادي المرواحة من عمك ؟؟
قصي: ايه :(
أمي: كيف حاله عمك بالله ؟؟
قصي: ياودي قاعد حاله تقول أول يوم عزا
أمي: لا حول ولا قوة الا بالله ..ان شا الله ربي يكون في عونه
قصي: من جابها الفاكهة هادي كلها ؟؟
أمي: ميس خالة الصغار جابتهالهم
قصي: آمممم .. مش لازم آهو احني مش مقصرين معاهم
أمي: ع كيفها .. مانقدرش نقوللها هكي تو تقول بيحتلو الصغار بعد ماماتت اختها
قصي: ايه صح عندكم انتم النساوين ع الحرج .. يمة خاش بنرتاح شويا تبي حاجة ؟؟
أمي: تغديت ؟؟
قصي: لا ماعنديش نية .. هي نستاذن
أمي: باهي :(
>>>>>>>>>>>>>>>>>>
آما عندي أنا .. كل يوم نصلي وندعي لماما تكون راضية عليا .. بس في المدرسة انا ماكنتش مرتاحة .. يللي يشوفني يبدو ينخصو بعض ويقولو ( أمها ماتت مسكينة ) .. كنت نبكي كل يوم لما نروح من المدرسة وقصي يسكت فيا .. بابا مش معدل علينا .. من لما مشت ماما معاش كلمنا .. ولا دورنا .. رقدنا كلينا تغطينا جعنا !! .. معاش يندري علينا .. ونحس في قصي يكدب عليا لما يقوللي بابا سأل عليك اليوم .. وفي مرة عطل عليا قصي ماجانيش وانا قدام المدرسة حاطة ايديا ع خدودي .. جتني ابلتي مها
مها: وردتي .. بابا عطل ؟؟
ورد: بابا مايجيش يروح بيا .. قصي ولد عمي عطل عليا
مها: آمممم .. باهي نهدرزو مابين ماجي
ورد: باه :)
مها: بابا قداش عمره ؟؟
ورد: مانعرفش :\
مها: آمممم وين قاعدين انتم توا ؟؟
ورد: في حوش عمي .. بابا معاش دورنا :(
مها: بالك تاعب والا عنده ظرف .. عيب احني مانقولوش كلام غلط ع بابا ولاه ؟؟
ورد: ايه صح .. آسفة
مها: حبيبتي الشاطرة .. حي هادي سيارتكم ؟؟
ورد: ايه .. بابا هدا :o
وقفت مستغربة .. بابا جيب يروح بيا .. نزل من السيارة وكان لابس سروال اسود وسورية بيضا .. كانت لحيته طويلة .. توا قصيرة ..
بابا: هي ورد نروحو
مها: ءءء انت بوها ؟؟
بابا: ههههه ايه حتي اساليها
مها: ههههه لا قالتلي .. بس ليك هلبا معاش روحت بيها
بابا: كنت مسافر .. ورد بنتي خيرك تشبحيلي ؟؟
نقزت ع بابا وتغمرته طوول .. وقعدت نبكي .. طبطب عليا وسكتني ..وبعدني شويا عليه ومسحلي دموعي
بابا: من اليوم يابنتي ح نعيش ليكم انتم وبس
الابلة مها مسحت ع شعري .. ومبتسمة وتشبح لبابا
ورد: انا نحبك يابابا :(
بابا: ههههه حتي انا
اثني ركابه ووضحكلي ... وقامني في غمره واستاذن من ابلتي وركبنا للسيارة
ورد: بابا وين قصي اليوم ؟؟
بابا: هههههه من اليوم انا بنروح بيكم بس
ورد: هييييي الحمد لله
بابا: وتوا بنجيبو زين وبنروحو لحوشنا تمام يادووودي الغالية !!
ورد: ايه ايه .. حتى زين بيفرح تو بنرجعو لدارنا .آآآه انا فرحااااانة يابابا
بابا: آمممم شن رايك ناخدو حلوة وشكلاطة لزينو ؟؟
ورد: ايه .. ايه
وقفت ع كرسيا وقدمت لخده وبوسته
ورد: استاحشتك بابا :)
وليت ع كرسيا .. وابتسمت .. واخيرا بابا رجعلنا وابتسمت الحياة لينا من جديد ..
وبدت حياتنا الجديدة ناقصتها ماما .. ناقصتها اغلا انسانة علينا كلنا ..
ورد: بابا أمتى بيطيب الغدي جعانة :(
بابا: حتى ان جعان اكتر منك .. وحتى انا زيك مروح من العمل وهدا وين بندير الغدي
ورد: آمممم باهي بندير سندويتش عادي ؟
بابا: لا سلم بابا تو معاش تاكلي الغدي بعدين .. امشي روحي بزين من حوش عمك محمد
لما بابا يمشي للعمل ويرفعني للمدرسة نحطو زين عند جارتنا مرت عمو محمد .. لين نروحو .. وهكي كان نظام حياتنا ..
مشيت روحت بزين .. كبر شويا وبدي يتكلم صح
زين: بابا روح ؟؟
ورد: ايه يديرلنا في غدي هههههه
زين: انا كليت
ورد: حي شن كليت سعدودك
زين: رز ابيض
ورد: بس !!
زين: مانعرفش حاجات تانية
ورد: ههههه بابا افتح انا ورد ومعاي زين
بابا فتحلنا ويديه ملبزات مانعرفش بشنو .. قعدت نضحك عليه
بابا: ههههه تضحكي .. اصلا لما بتكبري انتي بطيبيلي انا وزين .. نتفرجو ع التلفزيون وانتي حاصلة بروحك هههههه .. صح ولاه زين ؟؟
زين: بابا .. قصي جي
تلفتنا كلنا لقيناه قصي درس سيارته .. ونزل شاي لمعاه صونية كبيرة .. قدم جيهتنا
بابا: خش خش
قصي: هههههههه جبتلكم غداكم
بابا: لاش متعب روحك !!
ورد: هييييييي جعااااااااانة انا
بابا: ههههههه
قصي: حسيت بيك ياورد .. هي خشي فرشي وجيبي كواشيك وكولو
خش قصي قعمز مع بابا في الكوجينا يهدرزو .. وانا وزين ناكلو
>>>>>>>>>>>>
جواد يتحدث ::
قعمزت انا وقصي في الكوجينا .. منه اندير بالي ع الطنجرة يللي فوق النار .. ومنه قاللي في موضوع مهم .. الله اعلم شن هوا !!
جواد: آهو ماشية الحمد لله
قصي: يعني منسجم انت هكي؟
جواد: ايه الحمد لله
قصي: بس نحس فيك تاعب هلبا .. يعني تروح من العمل وادير في الغدي وفي الليل اضم في الحوش قصدي والله حياة متعبة :(
جواد: عادي عادي .. شويا ويكبرو الصغار وكل واحد يمشي في طريقه
قصي: وانت !!
جواد: هههههه خيرني !!
نضت وقفت .. شفت الطنجرة شن صاير فيها .. طفيت عليها النار .. وحطيت طاستين .. فتحت التلاجة بنصبله عصير
قصي: قصدي بتقعد بروحك عمرك كله !!
جواد: وشن فيها يعني !! .. والاعمار بيدي الله مرات مانطولش
قصي: بطول عمرك ان شا الله .. بس قصدي مش ناوي تتزوج !!
جواد: آممم .. ليها 3 شهور مرتي متوفية وتفتحلي في موضوع الزواج انت !!
قصي: انا نفكر فيك وفي حياتك المبهدلة ؟؟
جواد: ماتشغلش بالك قصي انا مرتاح هكي
مديتله طاسته .. وشربت طاستي كلها
قصي: معاش كلموك عماتي ؟؟
جواد: هههههههههههه ضحكتني .. لمية وسلوى سلبيااااات ماهمهم حد غير بنت خالهم يللي تراجي فيا .. يعني كانت متوقعة ان ايناس تموت متلا ؟؟.. والا كانت عاطية فيا الامل نتزوج ع مرتي ؟؟
قصي: فوتها بنت خالك .. تزوج غيرها !!
جواد: انتم ادورو ادورو وتولو لقصة تزوج .. سكره الموضوع مستحيل نتزوج .. ونقدر نربيهم صغاري بروحي .. مضايقك انت الموضوع !!
قصي: لا ياعمي مش هكي .. بس الحياة مستمرة وايناس ماتت الله يرحمها .. يعني تقدر تجيب بديل باش تكبر صغارك معاك
جواد: وكان طلعت وحدة ماتنفعش وتبهدلني وتبهدل صغاري ؟؟.. انا مانبيش نخاطر بيهم فهمتي !!
قصي: وكان طلعت بنت حلال وقاماتك وقامت صغارك ؟؟
جواد: آآآآه
قصي: هآآ ريت !! .. يعني خود الجانب الايجابي ياعمي
جواد: تو يجي اليوم هدا .. وقتها انت بصغارك ههههه
قصي: ههههههه ربي يهنيك ان شا الله
جواد: هههههه انت قبل ههههههه
#Dudu
