#الحضن_الدافي
الحلقة :: 50 ::
الآخيــــــــــــرة :)
شديتها من ايدها ورفعتها ..
>>>>>>>>>>>>>>>>>>>>>>>
مرت الايام بسرعة البرق والحمد لله طلعت نتيجتي وكانت فرحة مانقدرش نوصفها .. تخرجت من الثانوية بامتياز ( 86.74 ) .. كبرت نوسة وبدت تناغي .. بابا وماما فرحانين بيها .. وحتى زين ماحسيتش بالغيرة منها ابدا .. غمضت عيوني وتنهدت براحة .. هادي الاسرة يللي كنت نحلم بيها وقت كان عمري زي زين توا .. هادي اللمة يللي تمنيت ماتغيب عليا وانا بعمر الورد 9 سنوات .. كيف فتحت عيوني ع الدنيا .. ماما <3 .. بابا <3 .. اختي <3 .. خوي <3 .. فتحت عيوني بهدوء خذلتني دمعة مسحتها ع طول مع ابتسامة ونتمنى ماتغيب علينا كلنا هالضحكة .. هاللمة .. هالفرحة .. هالجمعة .. شديت ايد نوسة الصغيرة وبوستها وهمستلها ( ان شا الله ربي يبعتلك ايام حلوة وماتفقدي غالي .. وتغمرك الدنيا بفرحة .. وماتشوفي شر .. وتكبري بينا ياوخيتي الغالية ) .. ردت عليا بضحكة كلها براءة ونعومة .. رديتها في كرسيها وبوستها ع جبينها .. تلفتت يميني لقيت ماما تحكي لبابا في موضوع مانعرفش شن هوا بس اول ماجت عيني في عينها ابتسمت .. تلفتت القدام لقيت زين مقرب ع الشاشة ويلعب في البلايستيشن ومرة مرة يشاركهم بكلمة .. نضت وقفت وخشيت للمطبخ .. فتحت الثلاجة وطلعت الكيكة يللي درتها الظهرية .. فتحت ع الكيكة .. وكانت كيكة الفراولة .. عرفتو مني يحبها ؟؟ .. اذكرتو ؟؟ .. ايه قصي <3 .. قصي كان يفرح ويضحك من عيونه لما انديرها .. غمضت عيوني واذكرت الموقف
**
خشيت لمطبخ حوش عمي لقيت قصي مطلع صونية الكيكة وياكل فيها بالكاشيك
ورد: لالالا قصي علاش هكي !!
قصي: تي خيرك ؟؟
ورد: فسدتها خسارها :(
قصي: خسارها فيا يعني ؟؟
ورد: لا .. بس مانقدرش نحطها لعمي ودادا توا !!
قصي: وعلااااش ؟
ورد: لانك خربتها كليتها بالكاشيك تقول صونية كسكسي قدامك -_-
قصي: ههههههه فكيني منك يامنكدية ديريلهم وحدة تانية وهادي خليها ليا
قام صونية الكيكة وطالع بيها من المطبخ
ورد: لالا قصي بالله عليك .. معاش عندنا فراولة ره :(
قصي: خلاص تو نشريلك قريب تبكي هههههههه
شد خدي بالخفيف وكمل ضحكته وطلع ......
**
ضحكت وفتحت عيوني وقلت ( ربي يهنيك ياقصي ويحفظك انت تستاهل كل خير :) ) .. رتبت الصفرة وحطيت فيها فناجين قهوة ليا ولماما وبابا أما زينو صبيتله عصير فراولة فريش .. ورفعت الكيكة
بابا: آووووووووووه وردتي رجعت بابداعاتها :)
ماما: ماشا الله .. من شكلها معاش قادرة نقاوم ره جيبي الكاشيك ههههه
بدت تبكي نوسة .. مشالها زين يجري وقامها في غمره : حتى نوسة تبي نسيتوها شكلكم ههههه
ضحكنا كلنا .. بابا قال: خليك ورد تو نمشي نجيب صفرة القهوة
بدينا ناكلو وندردشو مع بعض وضحكات تتعالى .. هادي الضحكة يللي ماتنشرا بفلوس الدنيا كلها .. ضحكة تجمعنا .. ضحكة بتفرحنا اكثر واكثر ..
زين: آه ورد شن قررتي تسجلي في الجامعة ؟؟!
ورد: آمممم مازال مافكرتش شن ممكن يناسبني في تخصصات الجامعة كلها ** قمت فنجاني وشربت شويا ورديته ** بابا احكيلي شويا ع التخصصات بالك نرسى ع بر :(
ماما: معليشي جواد اسمحلي نتكلم :)
بابا: اوكي تفضلي :)
ماما: يمشي معاك فنون والاعلام .. شن رايكم انتم !!
بابا حط فنجانه وابتسملي : انا نحس في كلية الآداب تمشي اكثر .. لانها شاطرة في الكتابة
زين: وانا نبيها تسجل في الطب لانها تحب القراية وتبكي لما تنقصها درجة ههههه
( طب .. فنون واعلام .. آدب ) .. شن ممكن يناسبني بينكم انتم الثلاثة .. سرحت في عالمي شويا بعد ماانهيت حيرتهم بكلمة ( خلوني نفكر ) .. بعد مانظفت المطبخ خشيت لداري وانا حايرة ونفكر .. ماكانش عندي حل الا اني نتصل بشخص غالي عليا هلبااا .. اتصلت للرنة الاولة بعدين سكرت ع طول .. رقدت ع سريري مادة ايديا فوووق .. ليش كل مانحير نتصل بيه ؟؟ .. ليش كل مانتضايق نتصل بيه ؟؟.. ليش كل مانحس بالوحدة نتصل بيه ؟؟.. هذا غلط يللي ندير فيه لازم نوقف مهزلة نفسي .. قطع تفكيري وسرحاني رنة تليفوني الخاصة بخوي الكبير .. ايه . ايه .. قصي الغالي عليا .. قصي خوي الكبير .. كنت نعاتب في نفسي كيف نتصل بيه ؟.. واول مارن عليا ع طووول قعمزت ورديت بلهفة وشوق .. صوته يرد الروح .. صوته حساس .. نطمن بس نسمع همساته ..
ورد: كيف حالك قصي؟؟
قصي: الحمد لله .. كيف حالك انتي ؟؟
حسيت بصوته متغير ومضايق شويا : قصي ! .. ءء شكلك مضايق ؟؟
قصي: شويا مش هلبا
ورد: علاش شن في !!
قصي: والله ياورد قصة طويلة وعريضة وتااااعب نفسيا لين خلااااص .. نتمنى يرجع بيا الزمان بس
ورد: لو رجع بيك الزمان شن كنت ح ادير مثلا ؟؟
قصي: متلخبط ياورد متلخبط .. خلاص انسي .. شن كنتي تبي تقوليلي؟؟
ورد: لا شي .. كنت بنسأل عليك بس :)
قصي: آوكي بارك الله فيك وردتي ربي يحفظك .. سلام
ورد: الله يسلمك سلامات :)
رغم ان تآلمت هلباا لسماع صوته بس ماحبيتش نكثرها عليه ونصّر نعرف شن صاير معاه ؟؟ .. وشن خلاااه يتمنى الزمان يرجع .. تنهدت .. ورجعت اتكيت ع سريري ورجعت لحيرتي وتفكيري ..
>>>>>>>>>>>>>>>
قصي يتحدث ::
طفلة شقية .. مراهقة طائشة .. شابة سطحية .. هادي مراحل البنت يللي تزوجتها بس ورد لا .. طفلة ناضجة .. مراهقة واعية .. شابة ذكية .. كل يوم يمر عليا نزيد نتعمق في تفاصيلها يللي فاتت عليا .. يوم عن يوم نكره اليوم يللي فكرت فيه في ميس .. كانت متاحة ليا حياة آحلا من هكي وانا رفستها برجلي .. ورضيت بتمرميد يللي توا عايشه .. كنت مقعمز في الصالون بروحي في الحوش .. ميس عند اماليها لانها تاعبة من الحمل شويا .. شويا وطق عليا الباب .. مسحت ع وجهي نبي نفيق لواقعي ياسرني احلام .. نضت بحركة بطيئة كلها تعب .. فتحت الباب ولقيته الياس رجعت للصالون وهوا سكر الباب ولحقني ..
الياس: سألت امي عليك وقالت اليوم كله قاعد في الحوش بروحه ** جبد كرسي من طاولة الاكل وقعمز مقابلني ** خيرك قالب وجهك شن صاير معاك ؟؟
حطيت ايديا ع وجهي وتنهدت : مافي شي .. تاعب وقلت مش لازم ننزل اليوم
الياس: فيك حاجة مش طبيعية واااضح عليك .. احكيلي انا خوك
قصي: والله قصتي طووويلة ياالياس .. حاس اختياري ميس من الاول غلط في غلط وقاعد نتعاقب ع غلطي ..كااااره الدنيا .. عااايف روحي .. نجامل فيها ونساير فيها بس في داخلي مش طايقها .. فرحت لما قالتلي بنقعد عند امي .. قلت خللي نرتاح شويا
الياس: مش كنت تحبها ؟؟
قصي: انا قاعد نحبها ونموت فيها .. بس معاش ميس يللي متشوق نتعرف عليها اكثر ونتعمق في شخصيتها .. حاس بيها انسانة سطحية لابعد حد وماغير ان تفكيرها طايش هلبااا .. آآآآخ ياالياس شن بنحكي لنحكي خليها في السر تجرح ولا تطلع برا وتفضح :(
الياس: حاااس بيك .. كل انسان يمر بمطب في حياته صعب شويا يتعب ويكره الدنيا بس مع الايام يرتاح ويضحك ع روحه .. اصبر وتحمل بس
قصي: هي مش دوة صبر وتحمل .. هي القصة ومافيها تفاجأت بانسانة تاااانية مش ميس بكل .. يعني تبيني نآقلم حياتي مع الانسانة الغير مرغوبة !!!!!!
الياس: للدرجة هادي قصي ؟؟
قصي: واكثررر واكثر .. مانعرفش من وين نبدالكم ولوين ننهيها :(
الياس: ناوي تنهيها ؟؟
قصي: آوووووف متلخبط هلبااااا
الياس: مافكرتش في ولدك الجاي ؟؟.. مستقبل ابن بلا بوه كيف ح يكون ؟؟ .. يكبر ويعرف بوه سيب امه لان انصدم فيها لا اكثر ولا اقل ؟؟
قصي: انت مش حااااس بللي نحس بيه .. فلهذا خليني نضيفك قهوة
مسحت ع وجهي بالخفيف ونضت للمطبخ .. لحقني بنظرات متأثرة لحالي
الياس: باهي بعادها عليك وغيابها الطووويل ماحسيتش بيه ؟؟.. ماحسيتش بنار فراقها يعني !!
هزيت راسي بمعنى لا .. وحطيت سزوة القهوة ع النار .. وطلعت فنجانين .. وتلفتله
قصي: كيف حال لين ومحمد ؟؟
الياس: الحمد لله :\
قصي: تصدق انت احسن مني .. لانك مابالغتش في حب رزان .. لين ركزت ع كل جوانبها وحسيتها مناسبة تزوجتها طول .. انا غبي .. حركاتي الطفولية الطايشة هيا يللي ضيعتني مع ميس
الياس: آوكي خلينا نشوفو هالشي من الناحية الايجابية شن رايك ؟؟
قصي: موضوعي كله مافيش ذرة ايجابية .. ** فتحت الدولاب وقعدت نلف بعيوني فيه ** وين القهوة حاطتها ميس ؟؟ .. ** طلعت كل يللي في الدولاب ندور في البن ** المفروض تكون هنا زعما وين حطتها !!
الياس: اتصل اسألها
قصي: لا مش لازم
جابلي تليفوني ولفتلي وجهي : جرب اتصل وافتحلها قلبك وهدرز شويا عليها بسبلة القهوة .. وتمادى في الكلام بالك يحن قلبك ويرق وترجعو حبايب زي قبل .. وانا نازل نشرب قهوتي عند امي
ابتسمتله رغم اني مش مقتنع بكلامه .. طلع وسكر الباب وراه .. طفيت الغاز وجبدت كرسي من الطاولة قعمز .. كلامه الاخير تردد اكثر من مرة ع وذني .. خليني نجرب شن خاسر ؟ .. فتحت تليفوني بنتصل بيها بس طلعلي اسم ورد من ضمن المقترحات .. آووووف ياورد كل مانقرب ننساك تطلعيلي من جديد .. فتحت ع رقم ميس واتصلت .. طووووط .. طووووط .. طووووط .. ماردتش .. عاودت الاتصال مرتين ماردتش .. اتصلت بعمي سعيد رد عليا من اول رنة
قصي: السلام عليكم كيف حالك عمي !!
سعيد: وعليكم السلام ياولدي كيف حالك ؟؟
قصي: الحمد لله .. اتصلت بميس اكثر من مرة ماردتش ان شا الله خير !!
سعيد: ههههه لاخير خير .. مبرووووك عليك انزادت عليك بنية
قصي: كيف كيف !!!!
مانعرفش الخبر قداش فرحني ونساني مشاكل الدنيا كلها .. وليت أب وفي طفل بيناديني بابا <3 .. هذا الاسم قداش حلمت بيه <3 .. بعد نوبة الفرح والزغاريد في داخلي .. دخلت بين مشاعري المختلطة كلمات عتاب لعمي ع اساس كيف تولد وانا مش معاها .. بس كان رده صارم وعنده فيه حق
( وانت علاش مسيبها كان تبي تكون جنبها في هاللحظة .. سامحني ياولدي بس لو عاتباتك توا او بعدين معاها كل الحق .. لانك معاش دورتها ولا سالت عليها -_- )
سكرت الاتصال وع طول نزلت بشرت امي وخوي وبوي .. كلهم فرحولي بس نظرة الفرح عند الياس عمري ماننساها .. وغمزته دليل ع انه ارتاح من ناحيتي .. تغمرته بحب وصدق مشاعر ..
الاخ <3 .. سند في هالدنيا .. صعب ع آي شاب يعيش من غير اخ .. كلمة الاخ بروحها تغنيك ع الدنيا كلها .. لو طحت مايوقفني غيره .. لو بكيت مايراضيني غيره .. لو فرحت مايفرحلي غيره .. الاخ شي عظيم في هالحياة ونعمة كبيرة من ربي .. الحمد لله .. حضنه صلب يحميك من آي مشكلة ممكن اطيح فيها .. ايده الشديدة يشد بيها ايدك مايرخيها الا نهاية مطاف سعيدة .. بصارته ممكن صعبة وماتتحمل بس قلبه صافي ونيته بيضا اتجاهك .. الاخ لما يقول كلمات جارحة لخوه مش قصده يجرحه فعلا بس لازم يتعلم ويكون صلب وقوي في مشاكله .. لما يضربه باش يفيقه من اوهامه ويعيش الواقع .. هذا الشخص بذات حافظ عليه .. لان لو غاب عليك مافيش حد يعوضك .. ضحكته وبصارته .. صوته وكلامه .. حضنه وضرباته .. دمعته وابتسامته .. ماتتعوض ولو ذرة وحدة من صفاته .. وصفته بس ماقدرتش نوصف حبي ليه قداش كبير .. نوصفه بظهري !! .. والا بايدي اليمين !! .. الا بصحيبي وحبيبي !! .. والا نوصفه بالكون كله بالنسبة ليا !! .. كله شويا في حقه .. الاخ !! .. لما تقول آآخ تلقاه جنبك .. الاخ !! .. لما يشوفك اضييع بكف منه يردك عن الغلط .. ولما تكبر تقول ضربته ولا ضربت العالم كله ليا :( .. ربي يخليلنا اخوانا واخواتنا سند لينا وفرحتنا <3 <3
>>>>>>>>>>>>>>>>>>>>>
لما سمعت بخبر خالتو ميس واضافة بيبي جديد لعيلتنا فرحت لقصي واخيرا تحقق وبيولي ( بابا <3 ) .. طول الطريق كنت سارحة ونفكر في قصي ومعاملته ليا وين كنت صغيرة .. الله ع الايام !! .. تمشي بسرعة تقول ساعات لالا مش ساعات ثواني وممكن اقل .. حطيت السماعات في وذاني ع اغنية ::
(( أيام في العمر مابتعديش .. نفضل فاكرينها سنين .. وسنين .. مسافات وفراقنا مابعديش .. مهما تمر الايام فاكرين .... ))
كنت سارحة وكل لحظة من لحظات قصي وورد .. اكيد حتى انتم متفكرينهم .. ذاكرتكم مش ح تخيب ظنكم .. ماتتذكروش لحظاتي مع قصي .. اذكرو لحظاتكم مع أعز انسان عندكم .. مستحيل تنسو كل دقيقة معاه .. ابتسمت .. وفي ابتسامتي وقفت السيارة .. شفت يميني زين نزل يجري وماما نزلت نوسة .. شبحلي بابا في المرآية وقال ( تبي تقعدي في السيارة مثلا ههههه ) .. ضحكت وطفيت نقالي ونزلت .. درجة .. درجة .. يللي كنت نتمناه نصيبي اليوم بيآذن في وذن بنته .. يللي تمنيته نصيبي يضحك مع غيري .. يبتسم لغيري .. يحب غيري .. وعايش مع غيري .. حطيت يديا الزوز ع راسي وبديت نهز فيه ومغمضة عيوني ونطرد في اوهامي .. بابا وقف في نص الدروج وشبحلي
بابا: ورد في حاجة ؟؟
نظرة الحب في عيونه ماقدرتش نخونها .. ابتسمت : لا شي حسيت راسي دايخ
بابا: اوكي اركبي تو نجيبلك حاجة حلوة
ورد: آوكي .. شكرا بابا
ركبت لقيت زينو وماما ونوسة سابقيني ع الغرفة .. فتحت الباب بهدوء وع طول عيني جت في عين قصي .. ماقدرتش نخفي نظرة الحب فيه .. بس حاولت نبتسم رغم الآلم يللي داخلي .. سلمت ع خالتو وباركتلها .. وشفت البنوتة كانت تهبل .. وياريت تكون شبيهة خالتو في الشكل وطباعها تكون زي قصي .. وقفت ع طرف السرير نراقب في الحبايب .. وماما كانت تهدرز ع دادا .. قمت عيني لقيت قصي يشبحلي استغل الفرصة .. وتلاقت العيون وتحاكت القلوب
قصي (( الله ياورد .. قداش استاحشت شوفتك وطلتك في حوشنا .. ياريت ترجع هديك الايام ع خير ))
ورد (( تمنيت عمري يوقف عند التسعة وقعدت معاك العمر كله طفلتك المدللة ))
قصي (( كبرت حتى انا .. بس لما نشوف عيونك نصغر عشرين عام ))
ورد (( قصي .. ليش مضايق ؟؟ .. ليش وجهك شاحب ؟؟ .. ليش عيونك حازنات ؟؟ ))
قصي (( وردتي .. نبي نقولك في سري وبيني وبين نفسي حافظي ع نفسك وكوني زي ماعرفتك .. انا نحبك ياوردتي <3 ))
ورد (( ابتسامتك تقتلني .. ومازالت تفرحني حتى لو انت ماكنت نصيبي .. الله يحميك ويرزقك بالوقت الطيب <3 ))
ابتسمت لما شفت ابتسامته .. قطعت سرحانا خالتو ميس وين قالت : قصي .. شن رايك لو سميناها ورد !!
انا تفاجآت .. وتلفتت لقصي .. رد عليا بابتسامة وقال : لا مانبيش زوز وردات عندنا في العيلة .. تكفينا وردتنا الصغيرة ** شبحلي وضحك ** مانبوش مشفشة تانية ههههه
ركزت في لمعة عيونه الخجولة يللي كانت تحكي ع آلم متواصل .. بس سرعان ماانقذت نفسي وابتسمت .. هز تليفوني في ايدي فتحت القفل لقيت مسج من غسان ( نحبك ياوردتي ) .. ابتسمت ورديت تليفوني في شنطتي .. واستاذنت وطلعت من الغرفة .. لقيت بابا واقف قدام الغرفة
بابا: باهي يللي طلعتي كيف بنكلمك .. خودي الشكلاطة
ورد: شكرا بابا
مشيت خطوات صغيرة للقدام وفتحت الشكلاطة وحطيت طرف في فمي .. وطلعت تليفوني وكتبت مسج لغسان ( ربي يخليك ليا غسان )
مرت الايام بسرعة .. وقبلوني في الكلية .. وبديت نقرا .. في يوم من الايام اتصل بيا غسان
غسان: ورد انتي وين !!
ورد: في الكافيتريا كملت محاضرتي :)
غسان: انا جايك
ورد: وين بتجيني ؟؟ .. لالالالا
سكر عليا الخط .. وكانت هادي اول مقابلة نتقابلو فيها من ورا اهلنا .. 5 دقائق وكان غسان قدامي
غسان: ممكن نقعمز ؟؟
ورد: لالا خايفة الناس ياخدو عليا فكرة غلط
غسان: ههههه بس انا خطيبك ومش واحد جاي يلعب بيك
ورد: نخاف ** واطيت راسي بخجل ** اوكي قعمز شويا ** قمته بفخر لما عرفت هدا الولد قداش ضحى ع خاطري **
غسان: اوكي ** سحب كرسي وقعمز ** شن يللي في ايدك ؟؟
كانت في ايدي مذكرتي البيضا المنقوش عليها اسمي هدية من ماما كانكم اذكرتوها .. قمته ومديتهاله
غسان: آها مذكرة يوميات يعني !!
ورد: حاجة زي هكي
غسان: ممكن نقراها !!
ورد: آها
فتح ورقاتها وبدي يقلب .. وانا عيوني يلعبو فوق ولوطة نشوف للناس يللي تشبحلي .. حاسة روحي مدايرة شي غلط .. بس حسيت بدفء في ايدي .. حنان .. وامان .. نزلت عيوني لايدي لقيت ايد غسان فوقها .. سحبتها بالشويا وقلتله بعتاب : للدرجة هادي غسان !!
غسان: انتي هبلة صح ولاه !! .. انا خطيبك خيرك ؟؟
ورد: بس مش حلالي :(
غسان: اوكي حبيبتي قعمزي نبي نحكي معاك في موضوع ضروري
هديت وقعمزت .. وشبحتله مازال لمعة العتاب في عيوني : نعم !!
غسان: اسلوبك في الكتابة مش عادي بكل
ورد: آها
غسان: شن رايك لو درناها قصتك في كتاب ؟ .. واستفاد منها الشعب كله
ورد: بس كنت نبي نخليها لبنتي :)
غسان: اكيد انتي طيبة هلبااا ومش ح تستخسريها في بنات الناس كلهم !!
ورد: ايه اكيد :)
غسان: وانتي ماشاء الله من كنتي صغيرة تكتبي فيها شويا شويا لين كبرتي
ورد: من لما توفت ماما لتوا :(
غسان: الله يرحمها .. شن قلتي حبيبتي ؟؟
ورد: نشوف بابا قبل :)
غسان: اوكي براحتك :)
ورد: انت قريتها كلها !!
غسان: هههههه تبي الحق مانحبش القراية هلبا .. بس صفحتين وثلاثة جبذبني اسلوبك الحق
ورد: تسلم :)
غسان: خلاص اتفقنا ياوردتي
يدق قلبي بسرعة .. نبضي يوصل لعقلي ويفكرني بالايام الحلوة .. بيني وبين قصي .. وانتقل الاسم لغسان .. وانا أصبحت وردة غسان ..وردة قصي .. وردة جواد .. الله يحميهم ويخليهم لي <3
زين: ورررد .. تعالي تبيك الصحافية
عدلت وشاحي ع المرآية في حمام المعرض وكان زين واقف ورا الباب .. طلعت وقلتله: وينها !!
زين: هونا واقف عليها غسان قالك استعجلي
حسيت بنوع من الغيرة .. لالا مش نوع .. حسيت بالغيرة بحد ذاتها لما شفت غسان يبتسم لغيري .. حرقتلي قلبي .. قرنت حواجبي .. مشيت نجري ووقفت ع الصحافية يللي كانت تسأل فيه اسئلة سطحية عليا .. وكان يرد باسلوب راقي لانه هوا راقي مش يجذب فيها .. بس نحنا البنات نعرفو نحبو شخص ونملكو كل شي حلو فيه <3 .. كملت من اسئلتها شبحتله بغضب
غسان: حرقتيلي شعري شن في!!
ورد: علاش واقف معاها وتضحك زيادة !!
غسان: ورد بلا هبال .. كان ضحكت معناها خلاص وصلت لذروة الحب يعني !!
ورد: آوووف
شديت شنطتي بغل ومشيت شدني من ذراعي : ورد الناس كلها تشبحلك وعيب لكونك كاتبة صغيرة
ورد: ارخيني غسان عيب
بدت عيني تدمع .. استغرب فيا وانصدم في نفس اللحظة
غسان: نبي نفهم شن يللي يبكي في الموضوع !!
ورد: نبيك ملكي وبس .. مانبي حد يشاركني فيك .. حتى ابتسامتك مانبي حد يشوفها .. معاش نبيها الشهرة غسان .. خليني وردتك مانبيش حد يعرفني غيرك :(
غسان: ورد ** ابتسم وشد ايدي ** هذا الشي يخليني رافع راسي بيك فووق .. مرتي وحلالي احلا كاتبة ووصلت لحلمها .. انا فرحان بيك حياتي ماتزعليش
ورد: وانت !!
غسان: وانا ليك ياروحي .. مهما صااار .. ورد انا فرحت يللي وصلتك معقولة تبيني نضيعك بسهولة لا والله ماصارت ههههههه
ضحكت .. وتلفتت يميني لقيت بابا وزين وايناس يللي وصل عمرها ل 4 سنوات ..
ورد: تعالا نمشولهم
غسان: والناس يللي تراجي فيك !!
ورد: كلهم مايسوو شي قدام اهلي وعيلتي وناسي <3
غسان: ياحليلي ع ام القلب الحنون <3
مشينا انا وغسان لاهلي .. وقفنا قعدنا نهدرزو .. كان المعرض للكتاب وكنت عارضة روايتي وسميتها ( #الحضن_الدافي ) .. اقترحوه اهلي عليا لما قررت نعرضها في المكتبات ولقيت اقبال كبير عليها .. والحمد لله وصلت لحلمي الغير مخطط .. بابا وغسان مشو بيجيبولنا شي ناكلو من التعب جعنا .. وماما مها مشت مع ايناس يللي تجري يمين يسار تلعب .. اما زين شد ايدي وقاللي ( نبي نهدرز شويا عليك )
ابتسمت ومشيت قعمزت معاه .. ع طاولة في الجردينة .. كبر وعمره في 20 ماشا الله .. وانا 24 سنة .. قعمزنا نضحكو في البداية بعدين غيّر مجرى الحديث لــ
زين: احكيلي ع أمي ؟؟
استغربت في سؤاله : كيف يعني !!
زين: أمي ايناس كيف كانت ؟؟.. شكلها ؟؟ .. اسلوبها ؟؟ .. حركاتها ؟؟ .. صوتها ؟؟ .. نبي نعرف كل شي منك ورد ؟؟.. خاطري نعرف أمي كيف كانت :(
ورد: الله يرحمها :( .. ماما هي الحب والحنان والقلب الصافي والصادق .. الام اغلا شي في هالدنيا زينو .. شن ذكرك بيها !!
زين: حب مها لايناس .. حسيت انا الوحيد يللي ماحظيتش بحنان الام ولا حضنها .. محظوظة انتي وايناس
ورد: وقتها كانت عمرك زي ايناس توا لما ماما توفت .. يعني مانتذكر شي منها .. بس راقب ماما مها ونوسة هكي ماما كانت تعامل فيك .. وهكي كانت معاك
زين: نتذكر لما قعدنا في حوش عمي فترة طووويلة لان بابا تعب نفسيا .. نتذكر لما كنتي انتي امي واختي في نفس الوقت .. نتذكر لما قعدنا في شقة بروحنا وبابا حبسووه .. نتذكر كل شي صار غلط في حياتي .. بس ماما مانتذكرمنها شي .. الا انها مدلعتني بالبطل المغوار انا يللي نجري ورا القطوسة باش تمشي بعيد وامي ماتقربهاش .. انا يللي نفتح الباب لبابا وقت يروح من العمل لاني انا راجل الحوش .. ماكنتش نحسابها تربي فيا لهالوقت ياورد .. تصدقي توا عرفت علاش امي مسميتني البطل
ورد: ايه كانت ديما تقولك انت راجل الحوش واختك البنوتة خاف عليها
زين: كيف ماتت ؟؟ .. كيف خلتنا ؟؟ .. هذا كله ممسوووح من ذاكرتي
ورد: المهم ادعيلها الله يرحمها .. هيا لما مااتت راضية علينا <3
زين: بس ماجتنيش في الحلم .. ولا عمري قدرت نتخيلها تكلم فيا زي ماانتي يصير معاك
ورد: انت محظوظ .. لانك لو تخيلتها والا حلمت بيها ح تتضايق اكثر ..وتبكي اكثر واكثر
زين: ورد !!
ورد: نعم :)
زين: انتي #الحضن_الدافي
,,,,,,,,,,,,,,,,,,,,,,,,,,,,,,,,,,,,,,,
وانتم من #حضنكم_الدافي ؟؟؟
لهنا وصلنا لختام روايتي #الحضن_الدافي .. ممكن تكون نهاية غير مرغوب فيها من قبَلِكُم .. بس اكيد وورد وزين مازال ح يواجهو مطبات في حياتهم .. ومازال جواد وغسان وقصي مواصلين حياتهم بموجاتها العالية والواطية .. اكيد استفدتو من هالرواية وطبعت ع قلوبكم هلبا كلمات ومواقف .. ورد ماكانتش البطلة المعتادة في كل الروايات .. ورد كانت روح عايشة فينا .. بطيبتها .. وكلامها .. حنيتها .. قلبها .. روحها المرحة .. دمعاتها .. ضحكتها .. ابتسامتها .. ماكانتش مجرد بطلة .. لا انا حكيتكم من قلبي لقلبكم بس عن طريق ورد .. هالمواقف العديدة في الرواية ممكن مريتو بيها وممكن مامريتو بيها .. ح تمرو بيها .. بس كونو واعيين .. عارفين كيف تتصرفو في كل مشاكلكم .. ورد نفسها غلطت .. وندمت .. وبكت .. وضحكت .. وتشجعت .. ونجحت .. وحبت .. وتزوجت .. عاشت حياتها زي آي بنت في عمرها .. بس في كل كلمة نطقتها قبل شوية كان تصرفها شبه سليم .. وعرفت لما تغلط تتأسف .. لما تندم تصلح .. لما تبكي ترضا .. ولما تضحك تستمر .. ولما تتشجع تزيد تقوا .. ولما نجحت أصرت ع احلام غيرها .. ولما حبت وفت .. ولما تزوجت فرحت <3
لما اطيحي ماتراجعي حد يمدلك ايده .. سندي روحك واوقفي .. لما تبكي ماتراجي حد يعطيك كتفه تبكي عليه .. اوقفي بكاك وامسحي دموعك واستمري .. لما تغلطي ماتراجي حد يوقفك ع غلطتك .. صلحي من غلطتك واحذفي وراك .. الماضي فات لو فكرتي فيه بتتعبي .. امسحي دموع الماضي وبدليه بابتسامة لاستقبال فرح المستقبل .. انتي #وردة لعيلتك واهلك .. وناسك واحبابك .. #وردة لحياتك .. ماتكونيش مجرد وردة نشمها ونلوحها .. لا كوني وردة المكان يللي توقفي فيه ترمي عطرك الحلو فيه وتستمري :)
كوني #ورد <3
من ادمونتكم دودو السلام عليكم .. انتظروني في رواية القادمة #بين_النخيل
#Dudu
