#الحضن_الدافي
الحلقة :: 42 ::
لقيت ماما فاطمة .. شبحتلي واستغربت !!
ماما فاطمة: ورد !! .. وين كنتي ؟؟
ورد: ءءء كنت في الجنان
ماما فاطمة: شن اديري ؟
ارتبكت شويا .. وبديت نرعش مع بعضي ..
ماما فاطمة: خيرك في حاجة ؟؟
ورد: لالا .. انا تاعبة شويا نبي نرقد
ماما فاطمة: ماتبيش تتغدي ؟؟
ورد: لا صحتين عليكم
وخليتها تشبحلي مستغربة وركبت نجري .. فتحت باب الشقة وخشيت وسكرته بالمفتاح .. لوحت عبايتي ووشاحي .. آووووف .. شن درت بس !!
>>>>>>>>>>>>>>>>>>>>>>
قصي يتحدث ::
تغيرت معاملتي مع ورد ..وبديت نتجاهل فيها .. العشية طلعت وجابتلي قهوة .. صديتها بالقوة خدت الصفرة وخشت تجري تبكي .. لازم مانكون صارم معاها باش تفهم شويا الفرق الكبير يللي بيني وبينها .. ورد كانت ومازالت بنت عمي الصغيرة .. الثرثارة .. البكاية .. المشفشفة .. تبقى للأبد أختي الصغيرة .. اذكرت اني ماكلمتش ميس .. اتصلت بيها مرتين ماردتش عليا .. بعتلها مسج (( ميس خيرك ماترديش عليا ان شا الله خير )) .. مع الساعة 9:00 في الليل .. مقعمز قدام حوشنا مولع دخاني .. سمعت رنة ميس الخاصة .. رديت عليه طووول وكلي شوق ولهفة :)
قصي: اهلا ميس حبي وين كنتي ؟؟
ميس: ترا احلف !! .. قصي انت بجديات ؟؟ .. شن نفهم من تصرفك هذا ؟؟
قصي: تصرف شني ؟؟.. قداش مرة نتصل بيك ماترديش شن في!!
ميس: بعد يللي درته تبيني نرد عليك ؟؟.. اسمع قصي الحال هدا معاش يمشي معاي صلح من روحك تسمع فيا ولاه !! .. الاهمال يقتل الحب :(
قصي: تي اهمال شنو ؟؟ .. فهميني بالشويا
ميس: تبي تفهمني ان المسج متاعي ماوصلكش ؟؟ .. عزومة اهلي ليك اليوم ع العشي ماتندريش عليها !!
قصي: عزومة اهلك ليا ع العشي !! .. قصدك عازميني ع العشي ؟؟.. والله مانندري عليها الله
ميس: آوكي آوكي .. هي ماتبي شي !!
قصي: خلاص الا زعلك ميسو .. انا جايكم :)
ميس: لاماتجيش .. اصلا بوي طلع لما فقد الأمل فيك
قصي: آوكي .. بعد ماتهدي كلميني آوكي !!
ميس: بنرقد غدوا عندي محكمة وعندي مليووون حاجة في راسي .. تصبح ع خير
سكرت من ميس .. وفي راسي مليون سؤال ! .. فتحت تليفوني راجعت الرسائل مالقيت شي .. راجعت المكالمات الساعة 2:30 جاني اتصال منها ومسكر عليها !! .. لا انا ماسكرتش عليها لان وقتها كنت راقد وتليفوني ع الطاولة ؟؟ .. لحظة بس ياقصي .. في هداك الوقت نوضتني أمي للغدي زعما هيا يللي سكرت عليها ؟؟ .. بس ميس قالت بعتلك حتى مسج !! ..معقولة أمي تمسح المسج ؟؟ .. لا امي ماتعرفش الرمز ولا تفهم في التليفونات الحديثة .. اذكرت .. ورد .. ايه ايه ورد هيا يللي دارت الشي هدا .. لانها متوهمة بالحب معاي .. اكيد وصل الاتصال وهيا في داري .. واصلا هيا تعرف الرمز اكيد مسحت المسج .. قرنت حواجبي وتعصبت من فعلها لين خلاص .. سكرت قفل تليفوني وركبت طول لشقتها .. طقيت طقتين .. فتحلي زين
قصي: ورد وين !
زين: آهيا في المطبخ .. خيرك متعصب؟؟
قصي: لاشي .. بوك وين !!
زين: في الحمام حشاك
قصي: آوكي ناديلي ورد بسرعة نبيها ضروري
زين: آوكي .. ورد يبيك قصي
تلفتلها وكلمها بصوت عالي .. جتني متلهفة ..
ورد: نعم قصي !!
جبدتها من ذراعها ورديت الباب ..
قصي: انتي شن تبي مني ؟؟
ورد: آآآآي راني نتوجع .. خيرك قصي ؟؟
قصي: تليفوني أخر مرة تمسيه فاهمة ولاه !! .. أخرررر مرررررة .. اقسم بالله مازال تمسيه والله لما توصل لبوك الدوة يللي قلتهالي كلها امبكري فهمتي ولاه !!
ورد: مادرت شي انا :(
شديتها بالقوة لين طاح شويا وشاحها : ورد تعرفيني الكذب مانحبااااااااش .. والله ياورد اندير شي عمره مايعجبك .. خليك عاقلة وماتتدخليش في خصوصيات الناس سبق ودرتيها ونبهتك عليها .. وتوا عاودتيها .. ** قربت وجهها لوجهي ** انتي مازلتي صغيرة الحركات اهيا اضيعك فاهمة ! ** هديتها بالقوة لين قريب طاحت ** انا بنفوتهالك المرة التانية بس الثالثة تابتة .. ** قمت صبعي السبابة تهديد ليها ** كبري عقلك .. هادي خالتك وانا نبيها .. وتو تشوفي شن بندير !!
ومشيت خليتها حابسة دمعتها .. خشيت لداري وقربعت الباب ولوحت تليفوني ع الطاولة .. حطيت ايديا فوق راسي وبديت اندور في الدار .. تي خيرني شن درت !! .. البنت مازالت صغيرة علاش تعصبت عليها هكي .. لالا معاي حق لانها اصلا ماتفهمش الا بالطريقة هادي .. استغفر الله العظيم .. لازم ماندير حل لهالمشكلة .. آيواااا خطرتلي فكرة :)
>>>>>>>>>>>>>>
ايدي وجعتني .. بس مش أكثر من نظراته ليا .. حرقلي قلبي من الداخل .. ليش للدرجة هادي يكرهني قصي ؟؟ .. مش زمان وقف معاي وقاللي نحبك <3 .. كسرلي خاطري .. خشيت للشقة وايدي شادتها من الوجع .. جاني زين يجري
زين: خيرك تبكي ورد ؟؟
ورد: هئه .. مانبكيش .. انا بنرقد
زين: براحتك :\
خشيت لداري سكرت الباب وراي .. لوحت وشاحي وانحدفت ع سريري وبديت نبكي ونبكي .. حضنت دبدوبي وحطيت ايدي ع فمي باش مايطلعش صوت مني .. انا مادرتش غلط .. هيا ميس بتاخد شي مش ليها .. رقدت ودموعي في جفوني .. نضت الصبح .. خشيت دوشت وصليت الصبح ودعيت دعواتي المعتادة .. زين طقطق عليا .. سمحتله يخش .. قعمز ع كرسي مكتبي
زين: ماما فاطمة قالتلك انزلي افطري معانا :)
ورد: ماخاطريش نفطر .. انزل انت
زين: خيره وجهك هكي ؟؟
ورد: مافي شي زين .. بابا وين ؟؟
زين: بابا طلع مع قصي
ورد: آوكي .. برا افطر انت .. انا بنضم داري
زين: آوكي .. تبيني نساعدك ؟؟
ورد: لالا صحيت :)
طلع زين من الشقة .. خديت صورة ماما وقعدت نبكي .. وبديت نتكلم بصوت عالي مبحوح
ورد: ياماما قصي ضربني .. وهزبني .. قاللي كلام مش حلو .. كله ع خاطر مسحت مسج ميس .. انا نحبه ياماما والله مانكذب عليه .. خالتو عذباته هلباااا خلاته يبكي ويتعب نفسيا انا ح نريحه .. آآآآخ ياماما مالقيتش لمن نحكي ونشكي .. نبيك تسامحيني انا ممكن درت شي غلط وتعديت حدودي بس والله من كثر حبي ليه .. انتي تقولي لما تغلطي تأسفي صح !! .. خلاص انا ح نتأسف منه ان شا الله .. معاش نبيه يضايق ع خاطري .. هوا يحبني لما نسمع كلامه خلاص والله لما نسمع كلامه ومعاش ندير شي يضايقه ولا يضايقكم انا بنقعد بنتكم الشطورة :)
رديت الصورة في مكانها وبديت انطلع في أثاث داري يللي نقدره .. كنستها ونشفتها .. وفتحت ع طيور الجنة ..
(( وكبـــرنا كبرنـــا ياأمي .. وعرفـــنا شو معنى الحشمـــة
عقل وعلـــم وديـــن وحيـــاء .. نوّر دربي بأحـــلا رســـمة
منـــك ياأمي تعلمنــا .. من دونـــك احنـــى شو كنــــا .. عن صبـــرك مهمـــا تعلمنـــا .. مانوفيكي ياأغلا نعمـــة ياأمي <3 <3 ))
>>>>>>>>>>>>>>
قصي يتحدث ::
كنت انا وعمي في السيارة .. كان حابب يدير دورة في طرابلس .. اشتاق لنسيم الصافي .. لهواء ربي .. المهم حطيت دسكة وطنية .. وبدت الكلمات تخترق القلب بدون استئذان .. شبحت لعمي لقيته يتفرج ع الروشن وسارح .. نبهته بصوتي
قصي: استاحشتها هلبا ههههه
جواد: ههههه هلباااا هلباااا .. ان شا الله ماذوق يللي انا ذوقته .. والله عذاااب مابعده عذااب يلا الحمد لله وخلاص
قصي: الحمد لله ع سلامتك ياسيدي :)
جواد: شن امورك مع ميس !! .. ان شا الله باهية ؟؟
قصي: الحمد لله .. ءءء عمي سمعت بيك بترجع لحوشك صح ولاه !!
جواد شبحلي بنظرة استغراب وقاللي : ان شا الله :\
قصي: خلاص امالا خللي نكلم صاحبي عنده سيارة كبيرة يجي يرفعلكم الاثاث :)
جواد: آها
سكر عمي الدسكة وفتح الراديو ..
>>>>>>>>>>>>>>
جواد يتحدث ::
كلام قصي خلاني نستغرب اكثر .. زعما اضايقو من وجودي بينهم ؟؟ .. او ممكن اضايقو من صغاري ومسؤوليتهم .. خلاص ح نرجع لحوشنا ونبدا حياتي معاهم من الصفر ونعوضهم ع كل مرّ ذاقوه .. يللي قطع سرحاني وين قالو في الراديو (( ورجعنالكم مستميعنا مع نتائج ابنائنا في الشهادة الاعدادية ))
جواد: شهادة الاعدادية .. نتيجة ورد يعني بتطلع اليوم !!
قصي: ممكن -_-
كملت استماعي للاسماء بكل تركيز لين وصلو في حرف الواو .. وسمى اسم بنتي
(( ورد جواد الطرابلسي ناجحة بنسبة 89 % .. آلف مبروك لطالباتنا وطلابها المجتهدين ... ))
ماكملتش استماعي لاني كنت فرحااااان .. وفتحو اغنية ** والله فرحنا وغنينا بنجاحك ياغالي علينا .. نجحت وفرحولك الاحباب عطاك الله ماتمنينا .. والله فرحنا .. والله فرحنا .. والله فرحنا وغنينا وغنينا **
كنت منسجم مع الاغنية ونغني بكل سعادة .. بنتي ورد رغم الظروف يللي مرت بيها الا انها نجحت امتياز وبنسبة 89 .. الله اكبررر
جواد: الحمد لله الحمد لله :)
قصي: الف الف مبروووك ياعمي
حط ايده ع كتفي بس ماكانش فرحان باين من ملامحه مضايق .. ممكن صاير بينه وبين ميس شي .. فرحتي غطت ع كل شي حواليا ..
جواد: روح بيا بنبشر ورد ونبيها تختار هديتها بروحها :)
قصي: آوكي -_-
رجعنا للحوش بعد حوالي ساعة .. نزلت نجري وخليت الباب مفتوح .. وركبتلها من الدروج انادي بصوت عالي (( ورد .. ورد ))
>>>>>>>>>>>>>>>>
لما سمعت صوت بابا العالي .. خفت .. وزادت دقات قلبي .. وخصوصا لما عرفت انه طالع مع قصي .. اكيد قاله كل شي .. غميت روحي بالورغان .. وحاطة ايدي ع قلبي وندعي في سري .. بس بابا فتح الباب بقوة وكمل اسمي (( ورد .. وينك تعالي يابنتي عندي ليك بشارة ))
لما بشارة .. ارتحت .. حولت الورغان وطلعتله بخطوات بطيئة وكلها خوف .. وجسمي يرعش .. ع طول جاني يجري وقامني في غمره وبدي يلف بيا في مكان .. وانا مستغربة
شدلي راسي بالقوة حطه ع كتفه وقال :: نجحتي يابنتي نجحتي .. وتقديرك ممتاااااز
لما سمعت ممتاز .. عيطت بالقوة وزدت تمسكت فيه .. السنة يللي فاتت كانت اصعب سنة مرت عليا .. والحمد لله نجحت بامتياز .. بس صحباتي شن نجحو ؟؟ .. رؤى .. جوري .. ميسم .. حنين .. ندى
حطني بابا ع الارض وقاللي : خيرك يابنتي مافرحتيش ؟؟
ايه صح يابابا فرحتي مش كاملة .. الخوف في داخلي مسيطر عليا .. كل دقيقة حاسة قصي بينتقم مني وبيقول لبابا كل شي .. وماما قبل قالتلي راس مالها البنية سمعتها .. مانبيش سمعتي اضييع حتى لو كان مع ولد عمي <3
حط بابا ايديه ع خدودي : فيك حاجة يابنتي ؟؟
ورد: لالا بس نفكر في صحباتي :(
جواد: ماقالولكش ع النتيجة ؟؟
ورد: هئ كيف بيقولولي اذا كان ماعنديش ارقامهم ولا عندي كيف نتصل بيهم اصلا :(
جواد: آآه معاك حق .. خودي تليفوني واتصلي بيهم :)
كيف بيمدلي بابا التليفون .. رن في ايده .. شاف الرقم لقاه (( الابلة مها ))
جواد: هادي ابلتك القديمة تتصل
ورد: مني ؟؟
جواد: مها .. اكيد بتباركلك خودي كلميها
خديت التليفون من بابا واذكرت كلام قصي ليا قبل .. هزيت راسي وطردت الافكار الوهمية ورديت عليها .. بس قالت
مها: جواااااد .. وين كنت مختفي شغلتني عليك !!
شبحت لبابا يللي كان مايسمعش في صوتها .. مازال فرحان لنجاحي
ورد: انا ورد
مها: ااه ورد .. اسفة .. كيف حالك ؟؟
ورد: الحمد لله :)
مها: مبروووك النجاح كيف سمعت اسمك
ورد: الله يبارك فيك .. تسلمي :)
مها: ءءء ورد مش معاك ؟؟
ورد: آهو جنبي .. تبي تكلميه ؟؟
مها: ياريت خللي انباركله :)
ورد: آوكي
حولت التليفون من وذني ومديته لبابا وخشيت لداري .. زعما قصي يجي يباركلي ؟؟.. لا مستحيل .. بعد يللي درتهوله مستحيل يجيني :(
>>>>>>>>>>>>>>
جواد يتحدث ::
جواد: بارك الله فيك يااختي
مها: جواد !! .. وين كنت مختفي ؟؟
جواد: قاعد في هالدنيا
مها: مالقيتش مسجاتي ولا مكالماتي ؟؟
جواد: مها .. انتي علاش هكي اديري مالاخير ؟؟ .. تو اتصالاتك كلها ع خاطر بنتي يعني ؟؟
مها: لا ع خاطرك انت اكيد
جواد: بكل صراحة !!
مها: ايه مانبيش ندس اكتر من هكي باش معاش تختفي ونقعد اندور فيك
جواد: لو سمحتي ماتخشيش في مواضيع جانبية .. زي اختفيت او لا .. مانضرك بشي
مها: لا يضرني .. نقعد نتصل ونتعذب باش انت ترد في الاخير تقول اختفائي مايضركش ؟؟
جواد: ع العموم .. مشكور لانك اتصلتي ببنتي واول من باركلها ... سلام
سكرت عليها وماسمحتلهاش تكمل كلامها الخالي من المنطقية .. قاعد تتوهم وع هدا الاساس بنت احلامها وعمرت .. وصاحب هالمبنى مش ح يعيش فيه اكيد .. خلونا من موضوعها ... اذكرت هدية ورد هيا تليفون اكثر شي مناسب ليها .. وبهكي تتواصل مع صحباتها <3
طلعت من الشقة .. وركبت سيارتي ومشيت بيها لمحلات التليفونات الحديثة .. سألت كم واحد ع أحسن تليفون وكلهم نصحوني بالآيفون .. بس غالي عليا في الوقت حالي نشريهولها ب 1800 ؟؟ .. وهدا اقل سعر للآيفون الجديد .. بس خديتلها الآيفون الخامس وساعدني فيه الشاب وشريتلها غلاف عليه ورد وردي وأحمر هادي الوان بنتي المعروفة .. وشاشة حماية كله ب 1000 دينار وبس .. حطيته في كيسة محترمة وطلعت بيها للشقة .. ولما وصلت لقيت سيارة كبيرة مدرسة قدام الحوش .. نزلت لقيت قصي واقف ع الولد ويضحك
جواد: السلام عليكم :\
قصي: وعليكم السلام .. نعرفكم ع بعض .. هذا صاحبي حاتم صاحب السيارة يللي قلتلك عليها امبكري .. وهدا عمي يللي بيرجع اثاثه لحوشهم
انصدمت .. ليش مستعجل قصي ع تطلعيتنا من الشقة ؟؟ .. هل بيتزوج فيها مثلا !! .. بس صغيرة عليه هلبا ؟؟ .. رحبت بالشاب وعطيته ربع ساعة ويكون الاثاث كله بعون الله في السيارة .. ركبت لبنتي لقيتها في دارها راقدة وزين يلعب بالبلايستيشن .. فتحت بابها بالشويا وخشيت .. زي الملاك كيف راقدة .. بس يللي نبهني دمعات واقفات ع خدها .. ليش تبكي بنتي!! .. زعما اشتاقت لامها ؟؟. .. والا فراق صاحبتها جنى رجعت اذكراته ؟؟ .. شن سر دمعاتك ياورد!! .. حطيت الكيسة ع الكامدينو وطلعت سكرت الباب نخليها تاخد راحتها في النوم .. وجيت لزين قلتله (( طلع معاي الاثاث بنرجعو لحوشنا :) ))
تغمرني ع طوول من فرحته لرجعتنا لحوشنا الغالي <3.. في ريحة الغالية ايناس <3
وكيف قمنا الطاولة طالعين بيها برا الشقة .. زين طيح مزهرية واقفة جنب الباب برجله
جواد: تي شن درت ؟؟ .. اختك راقدة خيرك ؟؟
زين: مش قصدي والله ماشفتها
انفتح باب ورد وطلعت تحك في عيونها
ورد: وين رافعينها الطاولة ؟؟ .. ووين الكراسي والصالون ؟؟
زين: بنرجعو لحوشنا ياورد :)
كان زين فرحان .. بس ارتسمت صدمة ع وجه ورد
ورد: بجديات بابا بنرجعو !!
جواد: ايه يابنتي .. خوك طيح المزهرية جيبي مكنسة وضميها
ورد: آوكي :(
>>>>>>>>>>>>>>>>>>
خشيت لداري وقعمزت ع الشكماجة وشفت لوجهي في المرآية كيف متورم من كثر البكي .. بس توا اكيد ح نبكي اكثر واكثر لاني ح نبعد عن قصي :( .. بس ياورد هكي أهلك يبو وعلاقتك بقصي غلط .. لان قصي يحب ميس وبيتزوجها .. وانتي ماليكش مكان في قلبه .. مسحت دموعي ونضت غسلت وجهي .. طلعت من الحمام لقيت بابا جايب صناديق كرتوني ..
بابا: جبلتك كرتونيات لمي فيها بضاعتك وبضاعة المطبخ وتو انا نلهى بدار زين
ورد: حاضر
كان ع وجهي نص ابتسامة .. وجودي هنا غلط .. وبعدي عنه اكبر غلط .. شن الحل !!
خديت زوز صناديق .. وبديت نرتب في اكسسورات داري .. من كتاباتي .. وتحف بسيطة .. وفتحت القجر لقيت مذكراتي .. من ضمنها مذكرتي البيضا المنقوش عليها اسمي <3 .. ابتسمت وحطيتها في الصندوق .. وقمت مذكرتي الحمرا يللي كاتبة فيها رسائل لقصي من كنت صغيرة لتوا .. تلاشت الابتسامة وين اذكرت رسائلي انا وقصي يللي ردمناهم تحت شجرة الليم في حوشنا .. آآآه ح نرجعله ونقراهم ان شا الله .. ابتسمت وحطيتها في الصندوق .. ومعاهم صورتي مع ماما <3 .. بوستها وحطيتها .. جبدت شنطة كبيرة لونها ازرق وفتحت دولابي بديت نحط في حوايجي .. وبدلة الصلاة رتبت كل شي .. وين وصلت للكامدينو لقيت كيسة بيضا وعليها ورد احمر .. خيرني مانتبهتلهاش الا توا !! .. وين كانت زعما ؟؟ .. ءء ممكن هدية بابا بمناسبة نجاحي .. ضحكت من وسط قلبي .. فتحت الكيسة ولقيته آيفون <3 .. حضنته ونقزت فرحة .. طلعت لبابا لقيته يلم في ماعيين المطبخ .. تغمرته ع طول .. ضحك
بابا: هدا وين ريتيها ؟؟
ورد: ايه شكرا بابا .. ربي يحفظك ليا يااحلا اب في العالم :)
بابا: ويحفظك ليا يااحلا بنية في العالم <3
ورد: بابا ليش متعب روحك ؟؟
بابا: انتي بنتي ولما نتعب ع خاطرك ونلقاك ناجحة ومتفوقة عمرك كله انا نرتاح :)
ورد: بارك الله فيك بابي <3
حضنته من جديد مع ابتسامة صدق وحب ووفاء <3
بابا: هي بري بسرعة لمي باقي حاجاتك معاش ع المغرب هلبا
ورد: حاضر :)
حطيت تليفوني ع جنب وكملت ترتيب حاجاتي .. طلعت الشنطة وجي زين ساعدني في تطليعة الصناديق .. وجو زوز عمالة طلعو باقي الاثاث في الشقة .. وان اشادة في ايد بابا .. الايد الحنونة .. والايد التانية شاد زين .. طلع زين يجري فرحان من الشقة وبابا لحقه باش يخلص العمال .. وانا لفيت ع الشقة والابتسامة ع وجهي .. جزء مني فرحان والجزء التاني مضايق .. مشيت لروشن الصالون .. لقيت بابا وزين وقصي ومعاهم شاب مانعرفاش بس تقريبا شايفاته قبل ممكن من كنت صغيرة لعبني في الملاهي ومعاي قصي .. ابتسمت .. تلفتلي زين وقعد يأشر بايده ( تعالي تعالي ) وفرحان ينقز يمين يسار .. عدلت وشاحي ع مراية الحمام الباقية .. وطلعت سكرت الباب وراي ونتمنى اوجاعي كلها تنزاااح .. ونعيش حياتي زي باقي البنات .. كل درجة ننزلها وانا خيالي يسرح مع كل ذكرى عشتها في هالحوش .. لقيت ماما فاطمة حضنتي وقالتلي (( خسارة خديت ع طلتك ووجودك مرة مرة تونسيني .. ربي يوفقك يابنيتي <3 )) .. ابتسمت وسلمت ع رزان .. وبوست حمودي في غمرها .. وطلعت لقيت بابا وعمي وزين وقصي .. كنت متآلمة لطلعتي من شقة الذكريات تغمرني عمي بكل ودّ ومحبة .. وقفت جنب بابا وزين وعيوني ماقدرتش نعلقهم في قصي .. لان اصلا متجاهل وجودي .. يتكلم بعفوية مع بابا وزين وانا ولا كأن موجودة بينهم .. ولا مش هكي بس حتى ماباركليش ع نجاحي .. لما لقيت هاملني .. شديت شنطتي الكتف الصغيرة لونها بيج وطلعت نجري للسيارة .. ركبت للكرسي الخلفي وحطيت ايديا ع وجهي .. نحاول نخفي بكوتي .. مانبيش حد يسمع صوت أنيني .. تنهدت وعدلت تقعميزتي .. جي بابا ووراه زين .. والضحكة من الشق للشق .. ركبو ولا واحد فيهم انتبه لملامحي الحزينة .. خفيت كل مشاعري داخلي مانبيش نعكر مزاجهم .. مشت بينا السيارة لدرب حوشنا الوحيد .. الحزين .. وممكن يكون باب فرح علينا وعيشة عسل <3
طول الطريق كنت ساكتة بابا وزين من موضوع لموضوع .. نتأمل في كل حاجة تمر قدامي .. بس سارحة ونفكر في قصي .. تجاهله ليا واهماله اوضحلي اني غلطت معاه ولازم مانصلح غلطتي .. ح نتفاذاه .. ونتجاهل كل شي ممكن يجمعني بيه .. اذكرت تليفوني يللي شراهولي بابا .. فتحت شنطتي الصغيرة وطلعت الآيفون فتحته ولقيته مبرمج وفيه شويا برامج .. ابتسمت وخطرتلي نصور انا وزين وبابا نقعد ذكرى .. فتحت الكاميرا وقدمت روحي شويا للكراسي الاماميات وقلتلهم
(( هيا نصورو مع بعض :) ))
زين: هي .. اضحك يابابا <3
ابتسمنا مع بعض وصورنا سيلفي .. وكملنا دربنا للحوش :)
#Dudu
