#الحضن_الدافي
الحلقة :: 12 ::
قرت عليا خالتي سورة الملك خداني النوم .. يارب يكون غدوا احلا من اليوم
رقدت وحسيت بالراحة الحمد لله .. الصبح بكري نوضتني خالتي ..
ميس: هي نوضي ياكسولة بدلي بنرفعك معاي
ورد: وين آآآآآه
ميس: للجامعة هي بالسرعة عاااد
وقفت ومشت تساوي في وشاحها .. أول ماقعمزت ع سرير ماما قبل ماتتزوج .. فتحت الكامدينو لقيت مذكرة لونها ابيض .. تلفتت لخالتي وانا شادتها
ورد: ميسووو
ميس: همممم
وكانت لاهية تساوي في لبسها
ورد: مذكرة مني هادي !!
ميس: ههههههه هادي مذكرة امك قبل ماتتزوج
ورد: عادي ناخدها !!
ميس: آمممم .. هيا اصلا ليك بس لما تكبري اكيد بتعطيهالك هيا بيديها
ورد: باه .. خالتو شن بنلبس !!
ميس: اول شي امشي اغسلي وجهك وتوضي وصلي الصبح ونفطرو بعدين نبدلك اوكي !!
ورد: اوكي :)
ركبت السيارة مع خالتو .. اميمة وجدو بعدين بيلحقونا .. فتحتلي اغنية ( خدني ع بلادي ) .. اتفكرت ماما قلت اكيدة مستاحشة بلادها وصغارها وكل شي يربطها بالوطن <3 .. وفجأة خالتي شدت فرين قوي لين قريب جيت القدام باهي يللي لابسة حزام الامان ..
ميس: عديم الذوق والاخلاق اهوا
ورد: حي
ميس: خيرك تحاحي -_-
ورد: هادي سيارة قصي ههههه
فكيت حزام الامان ونزلتله نجري .. سلمت عليه
قصي: هوا انتم !!
ميس: ماتقوليش علاش الطلعة يللي درتها اهيا !!
قصي: انتي ماتعرفيش تسوقي -_-
ميس: والله .. دكتوراة انت في السواقة الصراحة
قصي: والله انا حر نطلع نخش .. انتي المفروض تكون عيونك مفتوحات وكل شي متوقع والا ماخديتيشي هدا في تعليم القيادة هههههه
ميس: اول شي انا ماخديتش كورسات قيادة .. تاني شي مش ح نكتر معاك الدوة وراي مشروع أولى الصراحة
قصي: وانا نقول ورد لمن طالعة لسانها طويل
ورد: ههههههه
قعدت نشوفلهم وهما يتعاركو .. قصي كان واخدها ببرادة بس خالتو كانت متعصبة .. ركبت السيارة .. وفتحت الروشن
ميس: اركبي ورد تأخرنا
ورد: ءء قصي .. تعالا معانا نحضرو التخرج :)
قصي: صاحبة التخرج ماعزمتنيش تعزميني انتي هههههه
ميس: اوكي آسفة .. تفضل احضر الساعة 10:00 بيبدا لا قبلها ولا بعدها .. هيياا ورد .. سلام
ركبت وخالتو سكرت الروشن وكملت طريقها .. وصلنا للجامعة وكانت مخلطة جميع الاشكال والالوان فيها .. ناس تخوف وناس تهبل <3 .. خشت خالتو للقاعة وانا قعمزت ع أول كرسي .. شويا وخشت اميمة وجدو .. قعمزو جنبي .. مافهمتش ع شن تحكي الحفلة والا التخرج !!
خالتو كانت لابسة بدلة التخرج اسود وفيها خطين من الققدام أحمر واخضر .. ولابسة طاقية حلوة مربعة تربيع .. وشادة باقة ورد كبيرة .. قعدت تصور هيا وصحباتها .. وبعدين خديت معاها لقطتين .. لقيت عتبة عالية قعمزت عليها .. وحطيت ايديا ع خدودي .. جي قعمز جنبي قصي
قصي: سيباتك خالتك المهبولة هديكا هههههه
تلفتله ..( خالتي مش مهبولة )
قصي: ياودي مش مهبولة هههههههههه بس انتي ميس صغيرة هههه
ورد: قصي
قصي: همممم
ورد: كلمك بابا !!
قصي: آآآآآه
ماردش عليا عرفت انه كلمه وفي قصة وراها .. تنهدت ( آآآآه ) .. ورجعت شبحت للقدام وايديا ع خدودي
قصي: اسمعي تعالي نشريلك بريوش
ورد: نبيش :(
قصي: خيرك منكدة تقول مرا ميت راجلها
ورد: انا حلمت حلمة شينة .. نحكيهالك !!
قصي: احكي هي
ورد: حلمت بماما لابسة ابيض .. وبعيدة عليا كل مانقرب منها تمشي بعيد .. خفت عليها وقعدت نقوللها ماما نبيك معانا .. قالتلي ردي بالك ع زين .. قصي انا خايفة ماما تموت وتخلينا :(
قصي: ههههههههههههههه هدا كله من المسلسلات التركية يللي تتفرجي عليها
ورد: انا مانتفرجش عليهم اصلا
قصي: حتي سبي ستون تأتر كيف عاد -_-
ورد: ان شا الله يارب ماتموتش ماما ونعيشو كلنا مع بعض :(
قصي: آمين
( ورد حبيبتي تعالي هي )
تلفتنا احني الزوز لقيناها خالتو ميس واقفة
قصي: بري مع خالتك توا .. وانا بنروح اوكي !!
ورد: مع السلامة :)
>>>>>>>>>>>>>>>
قصي يتحدث ::
من أول ماقالتلي كلمك بابا عرفت البنت كانت حاسة بحاجة وماقدرتش ادسها .. كم انتي عظيمة ايتها الانثى احساسك يسبقك في كل آوان .. غمضت عيوني شويا وبعدين نضت بنروح .. وان شا الله يللي قالاته ورد يطلع مجرد كابوس ..
في الليل روحت بيها ورد من حوش جدها راقدة .. حطيتها في فراشها طوول .. قعمزت انا وأمي وحكيتلها ع حلمة ورد .. وقعدت تبكي أمي .. اتصلت بعمي اكتر من مرة ع الفايبر مايردش .. اتصلت حتي ع شفرته في الاردن ماردش عليا .. انشغلت الحق .. ان شا الله خير
الليل كله مارقدتاش انا نفكر في عمي .. وكل مرة ومرة تخطر عليا حلمة ورد .. حسيت روحي طفل وين جذبني حلم .. تنهدت واتكيت وكان اول امنياتي للآن النوم يجيني بس ..
يوم الجمعة .. وكالعادة وك آي يوم جمعة .. الروتين نفسه .. بس المرة هادي حبيت نكسره ونرفع ورد وزين وديمة بنت جيرانا للملاهي .. منه يلعبو ومنه ورد تنسى موضوع حلمتها من الاساس ..
العصر اذن .. طلعت من داري لقيت ورد مقعمزة قدامي داري وشادة الصندوق يللي لقطنا فيه فلوس ع بعض ..
قصي: ورد خيرك هنا مقعمزة !!
ورد: قصي توا كنت نتفرج ع برنامج مع ماما فاطمة .. قالو ( داوو مرضاكم بالصدقة ) .. وباش ماما تبرا بنرفع الصندوق هدا بنعطيه للفقراء والمساكين ولاه !!
انصدمت انا من كلامها .. ومعاش عرفت نرد عليها ولا حتي نقدم خطواتي .. آي طفلة هذه !!؟؟ ..
ورد: هييي قصي نكلم فيك !!
قصي: حاااضر .. نرفعوه معانا ونمشو نلعبو في الملاهي اوكي !!
ورد: هآآآآآآآآآآي .. نمشي نوتي روحي انا وزين :)
رفعتهم للملاهي .. وغيرتلهم جوهم وشرو يللي يبوه .. بس ورد في شي في عيونها يحكي غير الاستمتاع باللعب مع الصغار .. كانت وين ماتتلفت تلقى الصغار مع أمهم .. عيونها الزعلانات .. شاربها اللوطي النازل حركة عفوية طفولية .. بس مع هذا تكمل في اللعب .. كنت حاس بيها .. من تصرفاتها الغريبة .. كنت عارف من توا فقدت أمها .. واحساس الطفل عمره مايخيب .. وأول علاماته الاحلام ..
في نهاية المطاف .. طلعتلي ورد الصندوق .. لقيت صندوق التبرعات قدام الجامع نزلنا انا وياها وزين وديمة وحطينا فلوسنا .. وين قدمنا شويا للسيارة ولت ورد تجري .. وقفت قدام الجامع ورفعت يديها فوق .. وقالت كلماتها بس مانعرفش شن هما .. ركبت تجري للسيارة
روحت بيهم طايبين من اللعب .. رقدو ع طووول .. الساعة 2:00 الباب طق .. فزعت .. وجيت واقف .. ان شا الله امي وبوي ماناضوش بس .. مشيت نجري جيهة الباب كانت الحكاية مظلمة مابانش عليا من العين السحرية .. من الاول ترددت نفتح الباب .. وبعدين توكلت ع الله وفتحت :o
#Dudu
