Oups ! Cette image n'est pas conforme à nos directives de contenu. Afin de continuer la publication, veuillez la retirer ou mettre en ligne une autre image.
هبطت للكوزينة باش دير فطور مالقات حتى حاجة تنتكل ... راحت ليه للصالون لقاتو نايض يشرب فقهوة و يخدم بالبيسي ..
منار : صباحو جاد : صباح الخير منار : شي ... حبيت ندير فطور بصح مالقيت والو ينتكل !! جاد : والو والو ؟ منار : وي جاد : روحي البسي نفطرو برا و كي نجو جايين نقضيو قيس اليامات .. منار : يااي صح حا نخرجو ؟ جاد : وي منار : ارفد راسك من البيسي الشوفة ماشفتش فيا .. طلع راسو يسقسي فيها بعينه .. منار : ايواه هكا ، البرد ولا السخانة راهي برا ؟ جاد : شوية برد علاه ؟ منار : أوكي مالا هيا نروحو راني لابسة .. جاد : ناوية تخرجي هكا واقيل ؟ منار : علاه وشبيني ؟ جاد. : روحي البسي حاجة مستورة لا نجي نقطعهم عليك منار : وشبكي جاد راني نورمال ... جاد (يهدر راص علا سنيه): كتافك علا برا و شطر من صدرك باين و واش بيها لبستك ؟ منار : راك مكبرها الحكاية خلاص دوك نبدل .. طلعت فالدروج و الدمعة في عنيها تهدر و تمتم بين شفايفها كلام غير مفهوم كليا .. نفخ بعصب و عدى يدو على شعرو من ردة فعلو المبالغ فيها و أصلا مستغرب كيفاه هدر على لبستها .. طلعت بدلت لبست سروال جين نوار مع بيل بيض ، هبطت ليه لقاتو فالطوموبيل يستنا فيها ... منار : عجبناك هكا ؟ جاد : الا ماشي المعري المزير .. منار : و بأي حق تحاسب فيا ، اففف دارت للكارو على أمل تنسى شوية .. جاد : تفاعلت بالزيادة و ماعنديش حق .. غلطت منار : .... جاد : هدرت معاك قيميني ... منار : لبستي و انا حرة فيها ، صدري و انا حبيت نبينو ، جسمي و انا حبيت نعريه ، لاطاي تاعي و حبيت نوريها نتا واش قلقك ، انا ختك ؟ لالا ، مرتك ؟ لالا ، يماك ؟ لالا ، حبيبتك ؟ لالا ... مالا علاه تحاسب فيا و بالتشناف حتى خفت على روحي .. جاد : مراكيش ختي و لا صحبتي بصح أخت صحبي شرفك شرفو و شرفو شرفي لهاذ السبب تطاولت معاك لا اكثر ولاأقل .. منار : هاذي جديدة تاع أخت صاحبي ، المهم مرانيش حابة نخسر النهار .. جاد : تعملي مليح ... شعل طونوبيل و قلع ... ماصدقت لحقو قلقها بسياقتو الثقيلة .. منار : ماشي كن عوايدك تمشي بالعقل ... جاد : روح راهي أمانة في رقبتي متنسايش .. منار : أمانة ؟ جاد : ادهم أمني عليك .. منار : امم صح .. و دوك وين حا ناكلو ؟ جاد : هه على كرشك ماتعقليش .. منار : خسارة عليك البحر ننشفو (نجففو) على كرشي .. جاد : ورث باباك واقيل ، امشي امشي .. دخلو لريسطو صغير على جنب البحر ، الديكور تاعو جاي على حساب المنطقة كي تكون فيه تحس روحك في سفينة ولا يخت .. منار : جاد !! راك تشوف واش راني نشوف؟؟ جاد : إلى معجباتكش نشوفو بلاصة اخرى .. منار : كيفاه ماتعجبنيش وانا ناوية نجوز ايامات هنا ! جاد مرسي بزااف دايمن راك تجيبني لمكان خير ماللي قبلو ، قد مانشكرك مانوفليكش حقك ... جاد : بلا مزية .. من عينياا منار : بصح ماكنتش متوقعة تعرف أماكن متواضعة كيما هاك ... جاد : ولو ، هذا الريسطو تاع صاحب عمي ، هو عرفنا عليه و من ويومها وانا نجي هنا ، طبعا كي نكون فالبلاد ، حتى مولاه عاد يعرفني هو و بنتو لي تخدم معاه هنا .. منار : بنتو ؟ شكون هاذي جاد : نتوقع إسمها إليف منار : من وين تعرف إسمها ؟ جاد : سمعتو خطرات يناديلها .. سارفور 🙋🏻 محمد : تفضل مسيو جاد نقدر نعاونك ؟ جاد : فطور على ذوقك و متنساش قهوة باردة ستاربكس .. محمد : أكيد شوية من وقتك و يكون كلش واجد .. منار : من وقتاه راك عارف بلي نشرب ستاربكس مع الصباح ؟ جاد : ننتبه للتفاصيل منار : مليح مالا ، لواش راك منتبه من غير قهوتي ؟ جاد : نخمم شوية .. كي تتقلقي تقلبي عينيك ، متحمليش أصوات الاحتكاك ، قبل ما ترقدي تسمعي قرآن ، و تتحركي بزاف في رقادك ، عادتك تنوضي على 4 تصلي الفجر وديري سبور خفيف .. تولي ترقدي على 6 متنوضيش حتى 9 و خطرات 8 .. نسيت ؛ 21 يحكمك النعاس ، تحبي الطبيعة و تكوني طبيعية ، متكثريش المكياج و لا مديريش ڨاع .. سرحت فيه كيفاه يهدر و عينيه يلعبو و كأنو يحاول يتفكر أكثر بتبسيمة احتلت ملامح وجهها ، افضل شيئ تحسو هو الاهتمام ، تركيز شخص ما على تفاصيل تديرهم حتى لو بالسر حاجة تخليك تطير لسابع سماء ، هكا كان شعورها ... جاد : كاشما راكي شادة عليا ؟ منار : منهتمش لصوالح هكا .. جاد : داكور .. جا الفطور .. جاتو في جنبو شوية هو منتبه للأدق التفاصيل تاعها و هي اصغر شي قادرة تعرفو عليه مكاش ... جاد : نروح نسلك و نجي ماتزغديش ترصالي نحوس عليك .. منار : هه مرانيش صغيرة جاد : صغيرة ... ماستناهاش تريبوندي راح ، تبسمت بجنب و هي تلاحظ الانقلاب تاعو كي قاتلو بلي مراهيش مهتمة لأمرو ... جاد : هيا نروحو .. تبعاتو و هوما خارجين من الباب قابلهم العم إلياس و بنتو .. الياس : جاد ولا راني غالط ؟ جاد : عم الياس هكا ؟ الياس : اهلا نورت المحل هاذي غيبة ياوليدي ماشي من عوايدك تغيب سنين .. جاد : راك تعرف الخدمة .. الياس : معذور ياوليدي ، ماعرفتناش بالزين لي راهو معاك ... جاد : ماتتبدلش ، منار **** الياس : متقوليليش نتي بنتو ؟ منار : بنت شكون ؟ الياس : عارف شكون من غيرو .. منار : ايه 😅 الياس : الشيبة هذاك قطع علينا ، مرحبا بيك بنتي فأي وقت .. منار : مرسي عمي ترحب بيك الجنة ... جاد : حنا نخليوكم .. ارياف : ماتعارفناش ! جات تسلم عليه باليد منار رمات يدها .. منار : انا منار و كيما سمعتي هو جاد ، نروحو خير .. جاد : ايه ايه .. حس بإحساس كأنو غارت ولا شيئ من هاذ القبيل مي نفض الافكار من راسو مالمنطق المنعدم ، من واش حا تغير مالتسلام باليد و أصلا علاه تغير بأي حق .. ركب فالطونوبيل سارح في تفكير ... هازو من نظرة عينو مستحيل تعرف فواش راهو يخمم ... فيقو من سرحتو صوتها لي يرتاح كي يسمعو ... منار : جاد .. جاد : وي منار : تحب اللون الاسود في كلش ، تنوض على 7 دير سبور حتى 9 ، تحب الاكل البارد ، متحبش لي يقلقك في رقادك ، تكره لي يقاطعك في هدرتك ، كي تتعصب ولا تقلقك شي حاجة تعدي يديك على شعرك و تعض شفتك اللوطانية ، تكره تحكي على روتينك ، كل خميس تخرج تسهر و متباتش فالدار ، في الفطور لازم يكون حاضر الفيتامين تاعك بصح استغنيت عليه هاذ الايامات ، و تبات بلا تيشرت ... تهدر و كل ما قالت حاجة توساع بسمتو ، فرح كي لقاها تركز معاه و تفاصيلو ، دار يشوف معاها و ناسي بلي راهو يسوق ... منار : جااااااد رد بالك ... على شعرة دور الفولون للطريق الصحيحة ، حبس الطونوبيل على حافة الطريق يستوعب فاللي صار من شوية يعني منعو على شعرة ... دار ليها لقاها تبكي بالساكت ... بشعور لا تلقائي جبدها ليه عنقها يهدر بهمس و يمسح على شعرها ... جاد : اشش خلاص ماصرا والو رانا بخير ... جبدت روحها منو شوية ... منار : كـنا حا نموتو أهئ أهئ ... جاد : مامتناش رانا حيين ماتستهلش الحكاية هاذ الدموع هايا امسحيهم .. مسحتهم بكف يديها حركة طفولية ديرها عادة ما ، الشي لي خلاه ينسى واش صرى و شكون هوما و وين راهم زاد قربها ليها و غطس يشم في شعرها ... هي تان ماكنتش بعيدة عليه ريحة رقبتو الخشينة نساتها في الدنيا و همومها ... قعدو هكاك حوالي 5 دقائق ماحسولهمش .. منار : نوض راك قريب ترقد ... جاد : ديزولي قربتك منك و خلفت بوعدي و من جهة اخرى مرسي حضنك ريحني .. منار : ولو وقت تحتاج راني هنا .. جاد : أول مرة نطلب السماح .. منار : اوو جاد : وي منار : امم لهاذ الدرجة متعالي ... جاد : تقدري تقولي منار : تقدر تحط رجليك فالماء كلنا ولاد آدم .. جاد : مع الوقت .. منار : داكور .. نروحو للدار ؟ جاد : نشريو واش خص قبل .. منار : امم هيا .. راحو لسوبر ماركت قريب على المطعم لي كانو فيه .. شراو واش خصهم و ورجعو للدار ، وجدت غداء خفيف مع صلاطة و عصير ... فطرو كيف كيف لمت الطابلة ، غسلو الماعن مع بعض هي تحك و هو يشلل ... منار : راني نشوف بلي تفهم في شغل الدار جاد : عشت شحال من سنة وحدي منار : ياك كنت مع ادهم ؟ جاد : كل واحد والفيلا تاعو مي قراب .. منار : كنت حاسبة عشتو كيف كيف جاد : هي وي عشنا كيف كيف باسكو معضم الوقت في الخدمة .. منار : مليح مالا ... انا نطلع نرقد شوية 4 نوضني نروحو كيما البارح اوك ؟ جاد : ماتنسايش ... منار : واجبي 😉 جاد : روحي لانجي نوريلك للواجبات كيفاه دايرين .. منار : هه باي .. هو تان طلع رقد و على الربعة نوضها راحو كي العادة .. فاتت اليام و خلاص الاسبوع و لحق النهار لي يرجعو فيه .. _______________ نهاية البارت 🦋 للتذكير : راني نعاود فلي بارت الاولين راجعتهم ماعجبونيش يسما الا لقيتو الاحداث ماشي متوافقة اعرفو بلي مزال مالحقتوش .. باي ❤️
