أحببـتہ فوق الحـب حبـاً 🦋 {مكتملة 🇩🇿}

Part 31🦋

-فبيتهم راقدة على صدرو و يدو تلعب على شعرها ، نطقت بهمس و كسرت السكوت
منار : حبيبي ، نتا راك حاب طفلة ولا طفل ؟
جاد : مايهمش ، الا كانت طفلة حابها تكون نسخة منك و ترفد طباعي انا و الا طفل نفس الشي
منار : الله الله واشبيهم طبايعي انا ؟
جاد : هه والو بالعكس انا حبيتك على زينك الداخلي ولو كنتي جعفر مشاعري تجاهك نفسهم بصح الطيبة تاعك خايف لا يجي نهار و طيحك على راسك
منار : علاه تاني ؟
جاد : ريم ، نهار جيتي للمكتب تاعي ماحبتش تدخلك و استحقراتك و اليوم كي جات على خدمة دخلتيها و قعدتيها على طاولتنا 
منار : امم ماننكرش لي اول لقاء كان سيئ بصح دايمن نمشي بقاعدة قابل السيئة بالحسنة ، هكا وصى الدين تاعنا و مام ماما فوقتها وصلت للي ماوصلوش غيرها بهاذ الطريقة ... هكا قدرت تدخل قلي بابا و هكا حبها هه بصح هي حباتو علا خاطر كان قاسي بزاف كيما انا وياك بالضبط ، كمية تناقض كبيرة ..
جاد : حبيتيني علاخاطر قاسي ؟
منار : يعني ، اول مرة تأكدت لي انا نحبك نهار خطفوني ... في غيابك عرفت لي نتا هو الامان بالنسبة ليا ، و الشوق كي تكون بعيد عليا ، كان عندي شعور لي نتا تان تبادلني نفس الاحاسيس
جاد : و أحاسيسك طلعو صح ، انا عكسك نهار شفتك تضربت فيك مع الاول رفضت الفكرة لانو الوسط لي عايش فيه مايسمحلي لا نحب ولا ننحب مي الحب كان عندو رأي اخر خلاني نبدل الوسط تاعي باش نحب و ننحب و ماندمتش ..
تبسمت على كلامو باست صدرو و كبشت فيه اكثر ثنيناتهم مستسلمين للنوم ...
-عند ريم و امين لي غير وصلها دخل لدارو بحكم قدامو الباب بالباب رمى المفاتح و طاح على الفوتاي ينهج من التعب .. ليوم جاز نهار متعب عليه تبسم كي تفكر حركات ريم حسها عفوية و بلخف تدخل في الجو ..
_____
يوم جديد و احداث جديدة ...
مانبعدوش بزاف نقعدو عند امين ، ناض صباح دوش و لبس سروال جين نوار مع بيل بيض و باسكات شرب قهوتو رفد تيليفونو مفاتحو و خرج ..
عند الباب قابلاتو ريحتها طلع راسو لقاها ريم تبسم على جنب و هدر ..
امين : صباح الخير
ريم : صباح نور ، صافا؟
امين : حمدلله مام نتي راكي تباني مليحة ..
ريم : هه وي حمدلله
ايمن : رايحة للخدمة ؟
ريم : وي
ايمن : شي ... تحبي نوصلك معايا ؟
ريم : نن ماتشقيش روحك طلبت طاكسي يكون لحق
امين : براحتك ..
ستناو الاصونسار كيف كيف و كل واحد لخدمتو ، هكا جاز النهار عليهم كامل يجري منار خرجت مع سارة و قمرة يشرو حوايج للبيبي الرجال جاد و جمال و ادهم و امين عندهم خدمة فالليل يسما تلاقاو باش يدبرو الموعد و كامل ...
لحقت 17 تاع العشية رفدو رواحهم و خرجو ، عند ريم لي غير خرجت من بيروها تيليفونها طفا ، حاولت تتصل بطاكسي من تيليفون تاع البيرو مكاش ... لمحت من بعيد امين خارج مع جاد و ادهم خممت شوية وامبعد طردت الافكار من راسها اعتبرتهم شبه مستحيلين ، خممت بزاف ايا تشجعت و راحت ليه مابقالها حتى حل ..
ريم : شي ... سلام
امين يشعل فطوموبيلتو : اه ريم راكي هنا ؛ صافا ؟
ريم : حمدلله ، راك رايح للدار؟
أمين : لدار جاد علاه ؟
ريم : ديزولي مالا ، انا نروح بسلامة
امين : ااي وين بيها علاش سقسيتي
ريم : ماشي حاجة مهمة tkt ...
امين : تهدري ولا نهدرك ؟
ريم : تيليفوني طفا و ماقدرتش نلحق لطاكسي قلت مدام نسكنو كيف كيف ورانا جيران ت..توصلني معاك بويسك مراكش رايح للدار نشوف حل اخر ..
امين : اركبي اركبي على هاذي صرعتيلي راسي مالصباح دوك انا نروح مع جاد و بعدها نوصلك
ريم : نن صايي مكلاه تشقي روحك
امين (بغضب) : اركبي ماعندك وين تروحي بنص ميترة لي راكي لابستها ، ريييييم
عيط عيطة خلاتها تسوطي من بلاصتها لقدامو فالكرسي ، دارت السبتة وهي ترجف و قلعو ..
من جهة لي مرهيك جاد و ادهم يشوفو فيهم و يضحكو ..
جاد : راني نشم فريحة الحب
ادهم : والله ياأخي قاع رانا نشمو فيها 😂
راحو كلهم للفيلا وين كانو البنات مجتمعين بعد ما عيطلهم جمال باش يروحو لمنار يقعدو معاها ..
سارة : بففف انا علاه جابوني نضت من النعاس باش نقابلكم ..
منار وهي تاكل فالعسل : اطلعي ترقدي الفوق كاين دنيا بيوت وحدة ماعجباتك ؟
سارة : هأ نحب نعنق مخدة ادهم
منار : قتلتيني برومنسيتك البايخة
قمرة : افففف منار طلعي راسك من هاذيك الباطة انڨهمت في بلاصتك (حاجة كي تكون حلوة بزاف تڨهم)
منار : فاش قلقتك ياك انا لي راني ناكل اوووف تعيي (تنهدت)
قمرة : طولو لالا ؟
غير كملت جملتها سمعو دقديق فالباب ناضت قمرة تحل لقاتهم جمال ، جاد ، ادهم ، امين ..
قمرة : مزية جيتو جوزو
جاد : عرضتيني لداري
ضحكتلو و راحت عنقت جمال سلمت على ادهم و امين و دخلت للصالة لقات جاد ديجا عنق منار و جبدها لحضنو مام سارة و ادهم كانو هكاك لحقتهم و حضنت جمال ..
نطق امين يشوف فيهم بإستفزاز : ماتحتارمونيش سيليباتار هنا ؟
جاد : سلعتك راهي فالطوموبيل شريك (غمزو)
امين : اما سلعة ؟ هاا غير مكلاه نقطعهالك من دوك
ادهم : ماتحشيناش
منار : وشمن سلعة راكم تهدرو عليها ؟ و اصلا علاش لميتونا ؟
تحولت نضرتهم لجدية و سقمو قعدتهم كل واحد يستنى فالاخر يبدا ..
سارة : ادهم واش كاين ؟
جاد : احم ، راح نبدا نهدر و ماتقاطعونيش و تعيشو البنات هدوا رواحكم ؛ كيما راكم عارفين رانا فدومان ماشي تاعنا و كل واحد فينا وعد لاخر بأنو يبعد ؛ وصل الوقت لي نوفيو فيه بوعدنا و الليلة قادرة تكون النهاية كيما قادرة تكون بداية جديدة خالية من الحرام و الكوابيس لي عشنا فيها و تأذينا بيها و اكثر واحد تضرر منها منار و قمرة لي وصلو بسبتها للموت و رجعو منو .. كاين مهمة راح تقضي على ماضينا و تدفنو كلنا معنيين بيها حنا نصوبو السلاح و نتوما تعطولنا الطاقة
-منار غير تسمع و تبكي ملامحها تتبدل مع كل كلمة يقولها تعرف جاد عمرو مادار حساب للموت مي دوك واش لي تغير !! الوضع خطير لهاذ الدرجة ممكن تخسرو ؟ مستحيل تروح معاه للموت و ماتعيشش بلا بيه
قمرة تبكي : ي...يعني خلاص ؟! واش راح يصرا دوك !
سارة تبكي بهستيريا : حبي تعيش ماتروحش مانقدرش بلا بيك مام نتا خويا تعيشو ابقااو معايا شوفو كاش واحد يروح في بلاصتكم خويا جمال اهدر معاهم أهئ أهئ ..
كي شموها قارصة نطق امين يهدي فالحالة ..
امين : اي اي صايي نص الهدرة هاذي مكانش منها المهمة ماشي بهاذ الخطورة
منار : صح ؟
جاد : هه امنتو ؟ انا جاد لي مايخافش من رصاصة ولا زوج أصلا عندي وعود نوفيها ، مناري خلاص حبسي بكا ماشي مليح للجنين
منار (تبكي) : هاذا وين نفحتلك تخمم فالبيبي اصلا علاه دير فالخلايع ، ديجا خليك مني المهمة هاذي كيفاه ؟
جاد : ماتبان والو قدام واش جوزت وعد نرجعلك مام نتوما سارة و قمرة ندير واش نقدر باش نرجعلكم رجالكم
ادهم : اااي واقيل راني نبانلك مدامة باش ترجعني
جمال : حافظ على روحك بزاف ، قمرة ارواحي شوية نسحقك
راحو للكوزينة و جاد طلع منار للبيت سارة و ادهم راحو لبيت اخرى و امين قعد وحدو يخرب فالتيليفون ..
عند قمرة و جمال غلق الباب موراه و تقدم ليها كانت عاطياتو بالظهر تبكي .. ضمها ليه بكامل واش عطاه ربي ..
جمال : وعد ياروحي نرجعلك
قمرة : جمال
جمال : عيونو
قمرة : حابة نكون ام
جمال : حتى انا ، كي نرجع نفتحو équipe تاع ذراري
قمرة : هه نشاله ارجعلي برك
جمال : بإذن الله
طلعها فوق الطابلة و قرب شفافو من شفافها و غرقو فبوسة كلها حب ، شوق ، خوف من المجهول ، وداع ...
نروحو عند سارة و ادهم مانبعدوش بزاف ، قاعدة فوق البونك تبكي و تمسح على كرشها و ادهم يسكت فيها بكامل واش يقدر ..
ادهم : دوك علاه البكاء ياك سمعتي جاد بوذنيك قال من اسهل المهمات ..
سارة : سمعتو بصح قلبي راه مقبوض أهئ أهئ
ادهم : بسس شوفي فيا ، نوعدك وعد شرف نولي .. راح نرجع باش نكبرو ولدنا مع بعض صحا قملة تاعي؟
سارة : وعد ؟
ادهم : نشالله
مسحت دموعها و هدرت : ماتزيدش تقولي قملة
ادهم : هههه و احلى قملة
سارة : اوووف
ادهم : خلاص ارواحي عندي ..
عنقها و رجع للور سند روحو على مخدة و غمض عينيه يستمتع بخصلات شعرها و هي بعضلات صدرو ..
فبيت جاد و منار كانو ديجا دخلو فعالمهم الخاص من جهة كانت مستمتعة و من جهة اخرى كليا كانت تبكي ، ماشي من السطر لي راهي تحس فيه من شعورها لي راه يقوللها عيشي اللحضة ماتدري لايعلم الغيب الا الله ! فيقهم من الدوامة لي كانو فيها صوت الباب ..
منار : حبيبي دقيقة نفتح و نرجعلك
جاد : خلي ايمن يفتح
منار : باينة مجاوش يدو الخبز اليابس خلينا نشوفو شكون و نوللي
جاد : افف هيا ازربي
لبست بيجامتها و هبطت مخلياتو يتبسم رغم اللي راه عارف انو فكرة المهمة سهلة مجرد كذبة الا انو مستعد يقدم روحو باش منار تحس بالامان ..
لقات امين ديجا سبقها و حل
منار : امين شكون ؟
بعدلها مالباب باش تشوف لمحت ريم رفعت حاجبها باستغراب
منار : ريم ؟ خير
امين : كانت عندي فالطونوبيل نسيتها كامل
منار : اوو ؟
ريم : احم ديزولي ، جيت غير باش نقولو يغلقها باش نروح
منار : لا استناي ، شي ... دوك هوما عندهم خدمة يروحو قلت لوكان تقعدي معانا و زيد الليل موش متعودين ؟
امين : ايه والله تساعدني
ريم : ماجاياش نردكم بصح نفضل مانقلقكمش
منار : بووه وشمن قلق جوزي جوزي
شافت فامين تاع ندخل ؟ هزلها براسو قدمت تنحي فسباطها (حشاكم)
منار : تدي فموافقتو تحسب راجلك ، جوزي معاه انا دوك نجي ..
طلعت للبيت لراجلها مخليتهم راس راس ...
_________
نهاية البارت 🦋
اذا كانت كاينة اخطاء املائية سامحوني ..