أحببـتہ فوق الحـب حبـاً 🦋 {مكتملة 🇩🇿}

Part 32 🦋

في نفس اليوم ، جازت ساعة و وزوج و ثلاثة في منطقة بعيدة فالجبل وين حطو طونوبيلاتهم بعيد عليهم ..
جاد من ورا الشجرة : راك تشوفو مول الجين ؟
ادهم & جمال & امين : وي
جاد : لي راه معاه باباه ، هوما الراسة الكبيرة
ادهم : هه هذاك الانوش هو لي كان يمشي فينا ؟
جمال : هبطلي مورال علابالك
جاد : انا و ادهم نروحو لضهرهم و نتوما اقعدو هنا لي يشوف حركة يعطيلنا اشارة و كي نعطي الاوك نهجمو ، متنساوش كاتم الصوت راح يتلفهالهم و ميعرفوش منين الجهة ، متنساوش
جمال : داكور ..
صرا كيما تفاهمو و كل واحد شد بلاصتو و بدات المهمة تاع الصح ، وصلت السلعة و نتم بداو يلتهاو حتى من الحراس كانو لاهيين معاهم يتقفدوا و اكيد فرصة ماتتعوضش هجموا رجال جاد و بعدهم القوات الخاصة و هنا صرا اشتباك و لي مكانوش دايرينلو حساب صرا ، قناصين عددهم كبير كانو متواجدين فمنطقة الحراسة ...
|في الفيلا ، مكسلة على الحشيش تمسح على خاتم يدها و قلبها مقبوض ، خايفة على خوها.. راجلها.. جمال لي كان بمثابة أخ.. خايفة على كل واحد راح للمهمة خايفة لا ماينجحوش و تكون صعيبة كيما كان يتمسخر معاهم جاد ماتقدر تعاونهم غير بالدعاء ، حست بالبنات جاو ليها عنقت سارة و طلقت الطريق لدموعها تبكي و تدعي لربي يحفضهم ..
سارة : جاد ، ادهم ، ، جمال ، امين ، كل واحد شارك فالمهمة هاذي بإذن الله يخرج منها سالم ماتبكيش ، على خاطر جاد ماتبكيش ..
منار : نشاله ، نشاله .. ماعندي حتى سند من غيرهم ، مانسواش بلا بيهم 😭
سارة : خناينك هاذو مراح يفيدو فوالو هيا نوضي عليا ..
قمرة : منار انا ناخذ القوة منك ، كي نشوفك ضعيفة نضعف هيا في خاطري ..
بعدت من سارة تمسح في دموعها تحاول تتبسم ..
ريم : جاد و ادهم كي كنت نخدم معاهم الفوق كنت دايمن نسمع بعملياتهم و كيفاه يخرجو كي الشعرة من العجين ، مانضنش مهمة بسيطة كيما هاذي تدمرهم ، كان لي يسمع اسمهم يشهد
منار : هي صح سهلة على قول جاد بصح بالنسبة ليا كأول عملية من نهار دخلت لحياتو حاجة واعرة ، حاجة داخلي راهي تقولي ياريتك ماطلبتيش منو يبعد.. ديتي راجلك بيدك للموت
ريم : لوكان ماطلبتيش منو يبعد كان قادر يموت على يد عملية خلاف ، اذا ماشي هاذي غيرها و تأكدي.. النهار و وقت و الخاتمة تاعهم راهم مكتوبين عند ربي اذا ماشي ليوم غدوة و حتى حاجة مراح تغير القدر ..
منار (تبسمت) : نشالله يرجعو و اذا تطلب مني نعطي روحي و كامل واش عندي في خاطرهم ..
قمرة & سارة & ريم : نشالله ..
قطع عليهم صوت التليفون يصوني قراو الاسم "ادهم" ، خطفت التلفون من قداهم رفداتو ترعش متمنية تسمع واش راهي حابة
ادهم : منار ؟
منار : ادهم !! وينكم ؟ راكم ملاح ؟ ي..ياك مصرالكم والو ؟! نجحت العملية ؟!!
ادهم : نجحت ، نجحت
منار (ضحكت) : هههه الحمدلله ، نجحت نجحت
ناضو البنات بالزربة يستناوها تكمل الهدرة ..
ادهم : نجحت ، بصح ...
التبسيمة لي كانت فيها راحت
منار : بصح واش ؟
ادهم (غمض عينيه) : جاد ، تصاوب
سكتت ... رجعت خطوة للور  ملامحها تنفي فواش سمعت
منار : لا ، لا مستحيل جاد مايدريهاش بيا
ادهم : رانا فالسبيطار بعثتلكم شوفور يجيبكم
كوبات عليه و دخلت تجري رفدت لافاست تاعها جات خارجة حبستها سارة تهدي فيها
سارة : منار شوفي فيا ، وش كاين علاه البكاء ياك نجحت
منار (ترعش و تبكي) : ج..جاد تصاوب قاستو رصاصة 😭
سارة : كيفاه ؟
حكمت كرشها و بدات تعيط ريم راحت تجري رفدت لي فاست تاعهم باش يخرجو ركبتهم فطونوبيلتها و عيطت لأدهم
ريم : الو ، اعطيني لادراس مايكفيناش الوقت للشوفور سارة حكمها مغص في كرشها
ادهم : واشنووو ؟ رانا في **** ماتبطايش
ريم : صحا صحا ..
كوبات و زادت فالسرعة ، منار شبه فاقدة الوعي و سارة تبكي و شادة في كرشها ..
حبست قدام السبيطار جاو الممرضات هبطو سارة داوها للاستعجالات و منار رفدها ادهم لغرفة العمليات وين كانو يستناو فجاد ..
ساعة ، زوج ، ثلاثة ، خمس ساعات ولا خبر ، سارة مكاش حاجة تقلق جيست مغص كيما قالت ريم ، اما جاد مكاين والو غير الممرضات يدخلو ويخرجو و واحدة مارضات تهدر ..
جمال معنق قمرة لي نشفو دموعها ريم قاعدة قدام امين تواسي فيه و ادهم محضن من جهة منار و من جهة سارة تريكوه ولا دموع وحدة ماحبت تسكت ..
و اخيرا خرج طبيب وجهو مايتفسرش جراو كامل ناحيتو واولهم منار ..
منار : عايش ياك ؟ عايش !!
الطبيب : الرصاصة كانت قريبة للقلب مع ذلك الحمدلله خرج بأقل ضرر العملية كانت صعيبة قلبو حبس للاسف دخل في غيبوبة راح ينقلوه لغرفتو بالشفاء عليه ..
فقدت الوعي بين يدين ادهم ، حالتم حالة كلهم مصدومين اكثر من بعض .. نقلوه للعناية المركزة تحت عينيهم ..
جازت أيام و أسابيع و شهور فهاذ المدة تغيرو بزاف صوالح ، بعد اسبوع كي استقرت حالتو نقلوه للدار و حطوه فالبيت و تاني سارة ولدت و جابت طفل سماتو جواد ، منار كرشها بدات تكبر و طول اليوم فالدار ماتخرجش قاعدة غير مع جاد تحكيلو واش يصرالها مع انو نادرا وين تخرج بعيد عليه ، امين اعترف لريم بحبوا و مام هي ، اليوم عيد زواج سارة و ادهم الاول.. منار أصرت عليهم يديروه عندهم فالدار اصلا ولا واحد نفسيتو تسمح للاحتفال لكن داروه باش يحسنو من جوها وهي حابة كل تفصيلة يكون معاها حتى لو ماتشوفش عينيه لي سحروها و ماتسمعش صوتو لي تعشقو يكفيها انو راهو يتنفس و كاين امل يرجع كيما قبل ..
خلاصت الحفلة و راحو كامل قعدت غير هيا راقدة في حضنو كي العادة ، دموعها ماحبوش يحبسو عينيها بداو يتغمضو حتى صرا الشي لي عندها مدة تستنى فيه ، عاودت فتحت عينيها بصدمة كي تأكدت من يدو المحطوطة على كتفها ، دارت ليه شافتو يضحك معاها تنهدت بأسف و عاودت رجعت كيما كانت ..
منار : كالعادة منار وصلت بيك للهبال رجعتي تتخايلي فيه ..
جاد (بنبرة هادئة) : مراكيش تتخايلي ..
تصمرت في بلاصتها تراجع في الصوت ، رفدت راسها ليه لقاتو نفسو ، نفس النضرة نفس الضحكة نفس الصوت !!
منار : جاااد ؟
جاد : ياروحو
منار : هه و أخيرا ، دقيقة ماتعبش كامل روحك (ناضت) كاشما راه يوجع فيك ؟
جاد : ماء
هزت برأسها و بلخف عمرتلو كاس ماء عاوناتو يشرب و عدلتلو المخدة
منار : ماتتحركش نعيط للطبيب و نجي ..
جات رايحة حكمها من يدها رجعها قدامو ..
جاد : شحال وانا هنا ؟
منار : 6 اشهر
جاد : توحشتك ، بزاف
منار (قربت منو) : حتى انا ياروحي
باستو من شفايفو و بعدت زاد جبدها ليه و غطس معاها في بوسة اكبر تعبر عن الشوق لي بيناتهم .. بعد منها و رجع باسلها كرشها ..
جاد : طفلة ولا طفل؟
منار : حلفت مانروح نشوف الا وانا معاك
جاد (تبسم) : ايه ، احكيلي واش صرا و واش تبدل
منار : حبيبي نعيط للطبيب يجي يشوفك و بعدها كل الوقت ليك
جاد : خلينا من الطبيب راني مليح ، احكيلي
منار : (حكاتلو)
جاد : هاذ الشي كامل ؟
منار : صرعتك بالهدرة سامحني
جاد : نسمع كلش من عندك ..
جبدها لحضنو و زير عليها ليه ، طاحو دموعها فالوقت عندها شحال و هي تدعي ربي يرجعهولها بخير ..
جاد : وعلاه الدموع دوكا
منار : توحشتك بزاف ، ماتتخيلش شحال
جاد : حتى انا ريحتك مافارقتنيش
منار : همم ، كاشما راه يوجع فيك ؟
جاد : لالا الحمدلله
ناضت من حضنو جابتلو بليغة دارتها فالقاعة و عاوناتو ينوض
جاد : وين ؟
منار : نخرجك لجنينة تشم هواء نقي
جاد : اييه
_____________
نهاية البارت 🦋
البداية تاعو حاجة و النهاية حاجة اخرى كامل 😂
غدوة ندير الحلقة الاخيرة راني نعسانة لوكان نكتب نولي غير نليكيدي سوو مكلاه نخسرها 🤍