بعد مرور يومين لي دوزاتهم غير فبيتها رافضة تخرج منه ولا تهضر مع شي حد، فتحات الباب وخرجات راسها كتطل ابتسمت بشر فاش مالقات حد، هادي الوقيتة لكيتجمعو كلهم لتحت، وقفات قدام المِرآة ودورات راسها كتتأمل الجناب لي نقصات منهم بشكل كبير مخلياهم فلونهم الطبيعي وصابغة باقي الشعر باللون الاحمر الفاتح، دوزات يديها بين خصلات شعرها عاجباها القَصَّة الجديدة وحتى اللون، قدات احمر شفافها بصباعها، خدات من جيبها حلق و دارتو فنيفها، ثم لقات نظرة اخيرة على شكلها وزادت نازلة وغير وصلات قدام الباب هبطات تيشرت مبينة كتافها اكتر عاد دخلات، كانت اول وحدة شافتها هاجر لي شهقات بصوت خافت وتسمرات فبلاصتها كتشوف فيها، تجهلاتها وكملات طريقها للصالة فين مجموعين وقفات مع الباب وما إن لمحوها الاعين سكتت الافواه، بقى شي كيشوف فشي والصدمة والذهول مغلفة ملامحهم، فالمقابل كانت هي واقفة مامسوقاش وكترمق عثمان بتشفي...
لالة مرجانة: الله يا بنتي اش هاد الحالة درتي فراسك ؟
سي عبد الرحمان: (ضرب كف بكف) لا حول ولا قوة الا بالله..
سهيلة : (وقفات وقربت منها ومن تحت سنانها نطقات) اش هاد الشوهة ؟ علاش حسنتي شعرك ؟ و اش هاد اللون المعربن؟
إسلام: (بنفس طبقة صوتها) جا زوين ياك (ابتسمت وتوجهت لعند جداتها باست يديها وجلسات بقربها)..
لالة مرجانة: (مدات يديها وقاست شعرها ) علاش ابنتي درتي فشعرك هكدا عوض ماتخليه يطوال فحال البنات نتي حسنتيه فمرة، الله يهديك، الله يهديك..
زهير: (موجه كلامه لعثمان) هدشي لي كتدير فيه بنتك راه حرام، وراه تشبه بالرجال والعياذ بالله..
عائشة : (مأكدة كلام راجلها) بصح اخويا هدشي راه عيب وعار وماشي من عوايدنا..
إسلام: (شافت فيهم وشارت بإصبعها لنفسها مطلعة حاجبها) واش كتهضرو عليا؟
عائشة: (طلعاتها من تحت لفوق) و شكون من غيرك بالسلامة..
زهير: (تقاد فجلسته ونزل راسه وحنحن لافت انتباه الكل ) دابا متلا ادا عطيتك زوج حلوات وحدة مغطية والتانية معرية (هز راسه ممرر عيونه على اجزاء جسمها المكشوفة بلع ريقه بتوتر واردف ) ا اكيد غادي تختاري المغطية (دوز يديه على جبهته المتعرقة وكمل ) حيت المعرية كيدور عليها الذبان وياكل منها ولكن المغطية حاميها الغلاف وحتى الى بغا الذبان يقرب ماغادي يلقى كيف يدير ياكل منها (ابتسم حتى برزو اسنانه الصفراء وهو كيقلب فخرزات المسبحة بين اصابعه ) نفس الشي بالنسبة للمتبرجة، هي حلوى معرية الذباب كيحوم حولها و المحجبة هي الحلوى المغطية لي حتى ذبابة ماتقدر تقرب ليها.. فهمتي ابنتي
إسلام: (كانت كترمقو باستهزاء متبعة كلامه حتى كمل وحركات ليه راسها) اممم دابا الحلوة هي المرأة ول.. ذ.. اا اه الذباب هو الرجل ياك ؟
أنت تقرأ
في النفس متسع
Randomعلى صواب، على حق.. كلا !! أنا تائهة مرمية في دهاليز الضياع، غارقة انا لا مَحال.. وفي خِضم الخِصام والصِّراع و قاب قوسين أو أدنى من حافة الضياع.. إمتد طوق النجاة وهمس لي المنادي بتمتمات لا تتردد إبحث في داخلك.. إبدأ هنا، الآن، إبدأ من حيث انت... لاز...
