في النفس متسع

>>>>>12<<<<<

تجمعو كعادتهم بعد وجبة العشاء كيتناقشو فمختلف المواضيع، والبعض مكتفي بالصمت والمراقبة... نطق زهير موجه كلامه للحاج ولافت انتباه البقية بصوت عالي..

زهير: با الحاج غدا إن شاء الله جاي عندنا سي العلامي وعائلته

سي عبد الرحمان: (بتساؤول) شكون هاد العلامي؟

زهير: سي محمد العلامي مول المعمل ديال التوب لي فالمنطقة ماعرفتيهش ؟

سي عبد الرحمان: (مستدرك الأمر ) الله اودي عرفتو عرفتو.. واش جاي عندنا هنا لدار؟

زهير: (محرك راسه ) اه هنا لدار هو وعائلته

سي عبد الرحمان: (باستغراب) مرحبا بهم.. وخير؟ هادي اول مرة يزورنا !؟

زهير: (بفخر) خير ان شاء الله جايين يخطبو نسيبة..

سعد: (وقف بصدمة) الواليد اش هاد الكلام نسيبة مازال صغيرة..

زهير: (رمقه بغضب) جلس لرض وماتدخلش فلي ماكيعنيكش ..

سي عبد الرحمان: الولد ما قال غير الحق البنت مازال صغيرة

زهير : ماصغيرة والو هدا هو الوقت لي تدير فيه دارها ووليداتها..

عائشة: (مأكدة كلامه) بصح أبا البنت كبرات..

عثمان:  اش هاد التخربيق (شار جهة نسيبة) واش هادي قد الزواج والمسؤولية؟

عائشة: وشنو فيها ها انا تزوجت صغيرة ؟ هااني حداك صحة سلام ووالدة زوج رجال وبنت ..

سي عبد الرحمان: (شار بعكازه بعصبية) على انتي تزوجتي وفعمرك 16 !!

زهير: فحال فحال الرسول زوج بعائشة وهي عندها 7 سنين والمسلم الحقيقي خاص يقتدي بسنته..

علي: (متدخل) شكون لي عاود ليك هاد الخرافة !؟ عندك شي دليل على هاد الكلام ؟

زهير: ماجبتهاش من عندي السلف الصالح كله كيقول نفس الكلام ..

سي عبد الرحمان: حتى وادا كانت صح واش كتقارن خير خلق الله بباقي البشر اش جاب لجاب..

طه: (موضح) هاد القصة مامنها والو وليومنا هدا لم يثبت فأي رواية السِّن لحقيقي لأمِنا عائشة رضي الله عنها وكاين تضارب كبير بين العلماء منهم لي كيقول انه تزوجها فسن 6 سنوات ودخل بها ف 9 ومنهم كيقول 15 ودخل بها ف 18 .. (فرد كف يده) يعني ماكاينش دليل واضح على السن وحتى وادا رجحنا انها كانت عندها 9 سنوات فاش دخل بها فراه خاص ناخدو بعين الاعتبار البيئة لي نشئت فيها، وكيف معروف انه البنات فالمناطق الصحراوية كتبلغ بسرعة، زيادة على هدشي فداك الوقت كان الشخص بمجرد مايبلغ يعتبر انسان راشد ومسؤول والدليل على ذلك أسامة بن زيد لي الرسول صلى الله عليه وسلم عطاه منصب قائد جيش المسلمين وهو لم يتجاوز 18 سنة... (هز حاجبه بتساءل) تقد فهاد الوقت تدير ولد 18 عام قائد او تعطيه منصب كبير إقتداءا بالرسول صلي الله عليه وسلم؟