في النفس متسع

>>>>>10<<<<<

وصل موعد العملية ديال الجدة لي استقرت حالتها نوعا ما فاليومين لي دازو ، كان فجنبها سي عبد الرحمان لي أصر بعناد أنه يرافقها لقاعة العمليات برغم التعب لي بادي على ملامحه، وما كان من الطاقم الطبي غير ينصاع لرغبته، شاف فيها بنظرات كتحمل الكثير من المودة، مد يده مسح على كفها المجعد بحنان سيدة قلبه ، سنده، ورفيقة دربه، المرأة لي دوز معاها سنين عُمره بحلوها ومرها، بلع ريقه وجاهد باش يحافظ على تباته ويخفي الكسر لي باين فعيونه..

سي عبد الرحمان: ماقدرتش نرجع للدار ونتي مافيهاش (تنهد) بغيت نرجعو بزوج ( ابتسم وربت على كفها) غادي نستناك ماتعطليش عليا..

زاد خارج بمساعدة الممرضة مخلي الطاقم الطبي متأثر من كلامه غير وصل للباب لقى طه واقف فانتظاره، شكرو الممرضة وزادو لقاعة الإنتظار فين كانو باقي افراد العائلة..

الوقت كيدوز ببطئ مميت الكل كينتاظر وحتى لي ماقدرش يجي كيتاصل كل شوية يتطمن على الوضع..
على نفس جلسته حاط يديه على العكاز كيردد بخشوع وبدون كلل أو ملل وبصوت خافت..

سي عبد الرحمان: [[ ربي إني مسني الضر وأنت أرحم الراحمين ]]
[[ اللهم رب الناس اذهب البأس واشف انت الشافي لا شفاء إلا شفاؤك شفاء لايغادر سقما]]....

مرت ساعة زوج وتلاتة ولا خبر، شاف فعلي لي كان جالس فجنبه

سي عبد الرحمان: شحال فالساعة ؟

علي: (شاف فساعته) 12 هادي..

سي عبد الرحمان: تعطلو..

علي: راك سمعتي الطبيب قال بلي العملية غادي تاخد وقت..

سي عبد الرحمان: (حرك راسه بتفهم ورجع كيتمتم بالدعاء ) اللهم إني أسألك العفو والعافية.. (وماهي غير لحظات حتى لمح الطبيب المختص جاي فاتجاههم وقف والخوف ظاهر على وجهه ) خير اسي الطبيب العملية كملات؟ مرجان فاقت؟

الدكتور: (ابتسم) غير تهدن الحاج العملية رغم صعوبتها الحمد لله دازت مزيان وفأحسن حال
سي عبد الرحمان: (بفرحة) اللهم لك الحمد والشكر نقدر نشوفها..

الدكتور: لا مازال مافاقت غادي يخصها شوية ديال الوقت بما رجعات للوعي ديالها و حاليا غادي نخليوها فالعناية المشددة بما تخطات مرحلة الخطر..

عثمان : ياكما كاين شي مضاعفات؟

الدكتور: مبدئيا لا ولكن فهاد 24 ساعة لي جايا ومن بعد ماجسمها يتخلص من البنج ماعرفناش..

عبد الرحمان: ياك قولتي كولشي داز مزيان..

الدكتور: اييه اسي الحاج كولشي مزيان خاص غير نتطمنوا على صحتها وصافي..

عبد الرحمان: واخا ولدي لي بان ليكم انا المهم عندي تكون مزيانة..

الدكتور: كون هاني ان شاء الله خير (ربت على كتفه) وحتى انت رد البال لراسك خاصك تاكل مزيان وترتاح..