معاناة بريئه

البارت الثالث والثلاثون🐣

#معاناة_بريئه
#البارت_الثالث_والثلاثون

ندي: يابنااااااات اصحي ياماما انتي وهيا يلا
مريم بنوم: بس بقا سبينا نكمل نوم
ندي: لا ياماما خلاص احنا بقينا العصر انجزو عشان نلحق نروح اماكن كتيرة مفيش وقت
حنان: ماشي ماشي شوية وهنقوم
ندي: ناوووو حالااااا يلا علي ماارن علي مروة لو مقمتوش حالا هغرقكم مايه
مريم فاقت وقعدت علي السرير: انا قمت بطلي بقا جبتيلي صداع
ندي: نينيني اعيش واجبلكم صداع يلا صحي صاحبتك وانجزو
حنان: ولما اقوم اجيبك من شعرك دلوقتي صبرني يارب يلا يابت شوفي انتي رايحه تعملي ايه واحنا قمنا خلاص
خرجت ندي ورنت علي مروة اللي ردت عليها بعد سبع مرات
ندي: ايه ياما دا كله عشان تردي انا قلت انك متي
مروة: صاحبتي اووي وايه كمان ياتري دفنتيني ولا لسه
ندي: ظررريفه عسل قدامك نص ساعه بالضبط والاقيكي عند السكن
مروة: اشتا قايمه اهو
ندي: قومي دلوقتي عشان مترجعيش تنامي
مروة: خلاص يازفته صحيت الله
ندي: بيحترموني اووي يلا ياحب باي باي
قفات معاها ودخلت تلبس هيا كمان
في اوضة حنان ومريم
مريم: البس ايه
حنان: طب وانا البس ايه
مريم: اختاري واختارلك
حنان: بصي هوا انا ناوية علي اننا هنروح ملاهي فهلبس بنطلون وعليه سويت شيرت وخلاص البسي زيي
مريم: مفيش بناطيل هتتلبس هنلبس دريسات او سويت شيرت زي ما انتي عايزة وعليه جيبه
حنان: طب والملاهي ط
مريم: عادي هيا هتقول لا المهم البسي الدريس البيبي بلو دا وانا هلبس الهافان
حنان: اشتا يلا بسرعه بقا عشان امنا الغولة متجيش تزعق
مريم بضحك: رخمه بس عسل والله
حنان: نينيني متعاكسيش غيري البسي وانتي ساكته
مريم: حاضر ياجوزي
في خلال ساعه كان الكل جهز وخرجو من السكن
مريم: هوا احنا هنروح فين الاول
مروة: بصي ياستي اول حاجه احنا متغديناش صح هنروح نجيب غدا ونروح حديقة الفردوس وناكل هناك ونتصور شوية صور حلوين كدا وبصراحه المكان هناك تحفة هتحبوه اووي ونروح داون تاون نسمع فيلم وفي ملاهي هناك بس بتاعت اطفال ملناش دعوة بيها ونقعد علي الكورنيش نتكلم شوية ونرخم علي الناس وناكل دره وحمص الشام وبعدين بقا نروح الملاهي بصو خلو الكورنيش دا اخر حاجه بحيث نستريح ونقعد علي رواقه براحتنا ها قاتو ايه
حنان: حلو خااااالص انا موافقة طبعا كفاية انك قلتي ملاهي
اسماء باقتراح: ممكن ناخد مركب في النيل في اخر اليوم
وافق الكل علي اقتراحاتهم واول حاجه عملوها انهم راحو مطعم يطلبو اكل
مريم: هتطلبو ايه
حنان: عايزة دوبل تشيز برجر وبيتزا تشيكن باربكيو
مروة: هاخد زي حنان بس عايزة تشيز برجر عادي مش دوبل
ندي: وانا ونور هناخد بيتزا جمبري وبيج ماك
اسماء: هاخد زيهم
مريم: وانا هاخد زي حنان
مين هيجي معايا نطلب
حنان: يلا يااوختشي
دخلت مريم وحنان وطلبو الاكل وبعد نص ساعه كان خلص اخدوه وركبو تاكسي لحديقة الفردوس اللي مروة قالت عليهم وقعدو وبدأو اكل
حنان بتلذذ: الاكل قمر والصوصات تحفة بجد اول مرة اجرب المطعم دا
بعد ماخلصو اكل بدأو يتصورو اسماء قعدت وهيا سرحانه افتكرت افنان
♕
افنان: مش حلوة غيرها بسرعه
اسماء: نعم ياعين امك دي الصورة ال 50 اللي تقولي مش عجباكي هوا انا كنت فوتجرافر ابوكي
افنان: مش المفروض انك صاحبتي وكدا صوري وانتي ساكته
اسماء: الصبر من عندك يارب هصور حاضر يكش نخلص بقا
افنان: يابت دا انا بتصور علي تليفونك عشان بعد كدا لما منكونش مع بعض تشوفيهم وتفتكريني
اسماء: اتكلي انتي بس واهو اوفر مساحه علي الفون اللي صورك عليه اكتر من صوري دا
افنان: انتي مش طيقاني ليه يابت هوا انا كنت مرات ابوكي خلاص مش هتصور
اسماء: بهزر ياروح امك اتنيلي اقفي
افنان بمشاغبه: اصلا كنت بهزر هتصور يعني هتصور مش بمزاجك هوا
♕
اسماء بدموع: انتي كنتي بتحبي التصوير اوي وانا كنت بتضايق وازعقلك ارجعي وهصورك زي ما انتي عايزة كنتي بتقوليلي عشان افتكرك لما متكونيش موجودة كنت بحسبك بتهزري مكنتش اعرف انك هتروحي بجد ربنا يرحمك ياصاحبتي
جات مروة وشدتها عشان تتصور معاهم
مروة: قومي نتصور يابت الاجازة جايه ومش هنشوف بعض
بدأو يهزرو ويلعبو ويجرو ورا بعض ولما تعبو قررو يمشو
مريم: انا بقول مفيش وقت نروح السينما نخليها مرة تانية ايه رأيكم نروح الملاهي
حنان بفرحه وضحك: يلااااا اكيد عندي شوية كبت هموت واطلعهم في الصويت
ندي: والله يااوختشي مش لوحدك انا نفسي اصوت بصوت عالي واهو فرصتي جاتلي
دخلو الملاهي وقطعو تذاكر وبدأو يلعبو وبعد ساعه ونص قضوها لعب وضحك والساعه بقت تسعه قررو يروحو علي الكورنيش ويقعدو هناك يستريحو شوية
ولما وصلو هناك وهما طالعين علي السلالم لقو عسكري ماشي بالراحه وحاطط ايده علي جنبه
مريم: هوا ماله
حنان: مش عارفه
مريم: تعالو نسأله يمكن محتاج مساعده
راحو البنات عنده وسألوه ماله فهوا طمنهم انه كويس وسابهم ومشي بس قابله شاب شال شنطته وسنده لحد مطلعه السلالم وسابه ومشي
مريم والبنات كانو واقفين يتكلمو وبعد شوية طلعو لقو العسكري لسه ماشي ومحدش معاه
مريم: اكيد في حاجه هوا عامل كدا ليه
ولما قربت منه شافت ان هدومه عليها دم فاتخضت وراحت ناحيته تاني
مريم: انت متعور نوديكي المستشفى
العسكري: لا شكرا الجرح اتفك بس
مروة: هوا انت مجروح من ايه
العسكري: رصاصه
البنات بصدمه: نعم
مريم: طب وانت الجرح اتفك ازاي طب مش بتروح مستشفي ليه
العسكري: مانا عندي ميعاد في المستشفى العسكري بس مش عارف اروح
مريم ببلاهه: طب متركب تاكسي
العسكري: مش هينفع اقعد حتي الجرح في جنبي وكدا السلك ممكن يدخل جوا
ندي: امال انت جاي ازاي ولا جاي منين
العسكري: من سينا وجاي في القطر بس الناس رقدوني علي بطني عشان اعرف اقعد
مريم: طب مترن علي حد من اهلك يجي يوصلك
العسكري: لا طبعا انا معنديش غير امي وهتقلق عليا بالطريقة دي وانا مش عايز اخوفها
اسماء: ممكن ترن علي حد من صحابك
العسكري: معنديش غير واحد ولما كلمته مش موجود في البيت
مريم: ما انت كدا مينفعش انت هتعمل ايه
العسكري: عادي همشي لحد هناك
مريم: هيا قريبة من هنا
العسكري: ساعتين كدا مشي
مريم: طب مهوا مينفعش انت كدا هتتعب(مريم اعتبرته زي اخوها حمزة لان هوا برضه في شرطه وممكن في اي وقت يتصاوب)
العسكري: عادي اتفضلو انتو بس عشان متتأخروش
مريم: لا والله مش هنمشي احنا واقفين معاك اهو لحد متشوف هتعمل ايه هات شنطتك دي بس نزلها
لما نزلها وحاولت مريم تشيلها معرفتش
مريم في نفسها: ياماما هوا كان شايلها ازاي دي دا حقه الجرح يتفك انا مش عارفة احركها حتي
العسكري طلع مناديل عشان يحطها علي الجرح لان هدومه كانت كلها دم
مريم: حنان هاتي العلبه اللي معاكي
اخدتها منها مريم وادتهاله
مريم: اتفضل
العسكري: شكرا
مريم شافته واقف بالعافيه ودايخ
مريم: خليكم واقفين شوية وجايه
راحت لمحل حنبها اشترت بسكوت وعصير
مريم: اتفضل
العسكري: لا والله شكرا
مريم: خد بس ياعم عشان انت نزفت دم كتير
مروة: متحاولش تعاند وخد
وبعد اصرار اخده منهم وشرب العصير
البنات فضلو واقفين معاه حوالي ساعه ونص يتكلمو معاه ومش عارفين يعملو ايه
مروة: هوا انا عندي فكرة
مريم: ايه
مروة: هوا اكيد محتاج حد يسنده مثلا اي نعم هيمشي كتير بس علي الاقل يبقي حد معاه احنا قاعدين متكتفين مش عارفين نعمل حاجه
حنان: وبعدين
مروة: اكلم مازن يجي معاه
مريم: مازن اخوكي
مروة: اه
مريم: طب كلميه والله فكرة كويسه
محمود(العسكري ياجماعه مهما مش هيقعدو ساعتين واقفين معاه ومش هيعرفو اسمه😂): ملوش داعي والله وانتو اتأخرتو جامد روحو بجد وانا هبقي كويس
مريم: اسكو انت رني يابت
رنت مروة علي مازن وفتحت الاسبيكر عشان الشبكه كانت وحشه
مازن: ها اجي اجيبك من انهو قسم ياست مروة وياتري اتخانقتي مع مين المرادي ولا ضربتي مين
مروة باحراج: احم اخويا حبيبي قسم ايه بس هوا انا بتاعت مشاكل بردو
مازن: طبعاا اومال دا انا اللي بتاع مشاكل انتي مش قلتي يابت مش هتعملي مشاكل النهارده انا اصلا مستني اتصال لا منك لا من سيف اصل ماشاء الله علطول بتروحيله
محمود والبنات ضحكو
مروة: اقول فيك ايه فضحتني منك لله ياعم والله متخانقت مع حد ولا في قسم انت ياعم تعلالي حالا عند الكورنيش
مازن: جاي بس في ايه
مروة: تعالي بس وهشرحلك لما تيجي
مازن: طب انتي كويسه
مروة: اه والله كويسة
قفل معاها ولبس ونزل علطول
مريم بضحك: اخوكي فظيع ماشاء الله حافظك
مروة: نينيني بس ياماما منه لله مبيعرفش يمسك لسانه
بعد فترة قليلة كان مازن وصل ونروة كانت فهمته وهوا في الطريق في ايه
مازن سلم علي محمود وطلب من مروة وصحابها يمشو
مازن: روحو انتو بقا وانا هوصله
بعد ما اتمنوله السلامه مشيو وسابوه مع مازن
مروة: هنروح ولا هنقعد هنا شوية
حنان: مش عارفه بس الوقت اتأخر الساعه بقت 12 خلينا نروح افضل
مريم: وانتي يامروة ابقي شوفي اخوكي عمل ايه وابقي طمنينا
مروة: ماشي يلا بينا
ركبو تاكسي يوصلهم للسكن اتطمنت مريم علي ليزا انها نايمه فطلعت علي السرير عشان تنام هيا كمان
حنان: انتي هتعملي ايه
مريم: ايه هنام
حنان: دا عند ام ترتر انا مش هشوفك اسبوعين
مريم: هنتكلم فيديو كول
حنان: مينفعنيش اقعدي ارغي معايا الساعه بقت واحدة واحنا ماشين خمسه فمفيش وقت تنامي ابقي نامي لما تروحي
مريم: اعمل فيكي ايه انتي مش عايزة تنامي
حنان: اعتبرينا مطبقين عندنا امتحان بكرة
مريم: بس احنا معندناش
حنان: قلت اعتبرينا
مريم: صحيت اهو ها عايزة تتكلمي في ايه
حنان: اممم قوليلي مثلا فكرتي في موضوع خالد
مريم: اكيد
حنان: وهتعملي ايه
مريم: شور هوافق انتي عارفة اني بحبه
حنان: سبحان الله احنا البنات باحوال من فترة مكنتش مستريحه
مريم: كنت مخنوقة وقتها لكن دلوقتي انا موافقة اكيد هروح عند تيته وجدو في الاجازة دي وهوا اكيد هيفتح معايا الموضوع تاني فهقله اني موافقة
حنان: ياروحي ربنا يتمملك علي خير يارب واشوفك احسن عروسة في الدنيا كلها
مريم: قلبااااي انتي عارفة يابت ياحنان عايزة نتخطب مع بعض في نفس الوقت
حنان: طبعا اومااال وياتري هنحضر خطوبة بعض ازاي
مريم: تصدقي صح معلش يابيبي تخلف
نسيبهم بقا يرغو مع بعض ونروح لمكان تاني
_________#_________
في بيت ملك كانو قاعدين مع بعض في الصالون بيسمعو فيلم
منال: لوكه حبيبتي
ملك: نعم يامامي
منال: عايزة اخد رأيك في حاجه
ملك: ايه هيا
منال: في عريس متقدملك
ملك بخوف: عريس ايه ياماما انا مش عايزة اتجوز دلوقتي
منال: طب اعرفي هوا مين الاول
ملك: لا ياماما انا مش موافقة علي المبدأ نفسه دلوقتي انا مش مستعده اتحمل مسؤولية
منال: هوا انا قلت هجوزك بكرة يابت انتي لسه هتتخطبي وبراحتك مع انك عارفة حمزة فمش محتاجه وقت يعني
ملك وقلبها بيدق جامد: اعرف مين
منال: حمزة مهوا العريس
ملك بعدم تصديق: حمزة مين ياماما
منال: ابن خالتك ياروح ماما هوا احنا نعرف حد تاني اسمه حمزه
ملك: ويت ويت بس ياماما حمزه ابن خالتي انا عايزة يتقدملي انا
منال: لا عايزة يتقدملي انا متتعدلي يابت انتي في ايه
ملك: قولي انك بتهزري بابا هوا انت مش بتتكلم ليه
محمد: مستني اعرف رأيك امك قالتلي وانا بصراحه معنديش مانع احنا عارفين حمزه كويس الرأي رأيك
ملك: لا لا انا مش قصدي انا قصدي ماما مش بتهزر حمزة متقدملي بجد
محمد برفع حاجب: اه متقدملك بجد لو مش عايزة عادي هنقدر نقله متتحرجيش
ملك بسرعه: مش عايزة ايهلا طبعا عايزة انتو بتهزرو حمزه متقدملي انا عااااا انا مش مصدقة بجد
منال: هيا مش المفروض تتكسف
محمد: قروني حلوة
منال: استني كدا اه حلوة خالص
محمد: طب كويس طمنتيني
خدي يابنت الكلب هنا
ملك: احم نعم يابابا
محمد: انا شايف ان مفيش حياء مفيش كسوف مفيش كلمه اللي تشوفه يابابا هوا انا كنت فين وانتي بتتربي
ملك: في ايه ياحاج مفيش بينا الكلام دا بردو وبعدين انتي مربينا علي الصراحه انافق يعني واقلك مش مبسوطه ومش موافقة
منال لمحمد: معرفهاش والله ياحاج مش بنتي لا اتصرف انت
محمد بحنيه: تعالي يالوكه
ملك راحت وقعدت جنبه: نعم يابابا
محمد: انتي بتحبيه
ملك: بصراحه يابابا اه وقلت انه اكيد معتبرني زي مريم هحاول اشيله من قلبي بس مش عارفه ومكنتش هوافق علي اي عريس دلوقتي لحد ما اقدر انسي احبه لاني مش عايزة اظلم حد
محمد: طب ياحبيبتي ادخلي اوضتك يلا
دخلت ملك اوضتها وقعدت تتنطط علي السرير وهيا فرحانه
ملك بفرحه: انا مش مصدقه بجد عاااا حمزة اتقدملي شكرا شكرا يارب بجد مش عارفة اقول ايه دعيتك كتير لو فيه خير ليا يبقي من نصيبي ولو في شر ابعده من تفكيري يارب انت كريم اووي انا بجد فرحانه
عند منال ومحمد
منال: فرحانه انها وافقت كدا هتفضل جنبي وهبقي متطمنه عليها حمزه ابن اختي وتربيتي وان شاء الله يبقي زوج صالح ليها
محمد: عندك حق انا عارف حمزه كويس لاما مكنتش سلمته بنتي
منال بفرحه: هروح بقي ابشره واقله
اتصلت منال علي حمزه اللي كان نايم
حمزه بنوم: الو
منال: ايوا ياحبيبي هوا انت نايم
حمزه: اه والله ياخالتو في حاجه
منال: طب كمل نوم انا بس كنت جايه اقلك ان ملك وافقت
حمزه: ماشي ياخالتو وقفل
حمزه فترة واستوعب الموضوع: ايه ايه هيا قالت ايه
رن حمزه تاني علي منال: خالتو انتي كنتي بتقولي ايه
منال: انت مسمعتش
حمزه: خالتو قولي بس تاني
منال: بقول ملك وافقت
حمزه: احلفي
منال: امشي من وشي يلا
حمزه بفرحه: خالتووو انا بحبك وبحب بنتك اه والله انتي مش متخيلة انا مبسوط ازاي
منال بابتسامه لفرحته: طب ياحبيبي روح كمل نوم
حمزه: نوم ايه بس انا النوم طار من عيني بسبب الخبر دا شكرا شكرا يااحلي خالتووو في الكون
منال بضحك: يلا يابكاش سلام
قفلت معاه
حمزه بفرحه: هكلم مريم اقلها

وبكدا بارت النهارده خلص اشوفكم البارت الجاي سمعليكوووو🚶‍♀️🚶‍♀️
ڤوت وتعليق لطيف ذيكم بقا🐣💜
#Hanan_Selim✍🏻