#معاناة_بريئه
#البارت_الثلاثون
في صباح يوم جديد في بيت مريم
مني: رودي يلا ياروحي اصحي عشان الحضانه
رودي: حاضر يامامي شوية شوية
مني: يلا بس ياحبيبتي عشان تفطري واوصلك هتتأخري
رودي: خلاص صحيت والله صباح الخير يامامي
مني: صباح السكر ياروحي يلا بقا
قامت رودي وساعدتها مني في اللبس وفطرتها وجهزتلها اللانش بوكس ووصلتها للحضانه
مني: خدي بالك من نفسك ياحبيبتي وكلي اكلك كله
رودي: حاضر يامامي باي
اما مني رجعت ركبت عربيتها وقررت تكلم حمزة تطمن عليه هوا ومريم
لكن لما رنت علي حمزة مردش عليها فرنت علي مريم
مني: صباح الخير
مريم: صباح النور
مني: عاملة ايه
مريم: بخير الحمدلله
مني بتوتر : الحمدلله فطرتي
مريم: امممم لا لسه صاحيه اهو
مني: طب قومي افطري يلا ياحبيبتي وذاكري
مريم بنفاذ صبر: هوا في ايه فهميني مهوا مش معقول الاهتمام المفاجئ دا انتي عايزة ايه
مني بدموع: انا بس كنت عايزة اتطمن عليكي اسفة لو ضايقتك
مريم بخنقه: متعتذريش انا اسفة اني زعقت انا بس مستغرباكي
مني: انا بس عايزة ابقي ام ليكم بجد عارفة اني متأخرة اوي بس ممكن تسامحيني علي كل اللي فات انا اسفة يابنتي علي كل حاجه
مريم بدموع: الكلام سهل انا مستحيل انسي كل اللي حصلي بسببكم ونفسيتي اللي باظت اوقات كتير دا كويس اني عايشه لحد دلوقتي ومعملتش في نفسي حاجه انا مش هقدر انسي بجد سلام
قفلت مريم معاها وعيطت جامد وحنان قامت حضنتها عشان تهديها
حنان: اهدي بلاش عياط
مريم: كدا كتير اوي عليا بجد هوا انا وحشه عشان كلمتها كدا بس مش معقول هتقول سامحيني هدوس علي الزرار وانسي انتي فهماني
حنان: فهماكي والله بس ياروما مهما عملو دول اهلك ولازم هترجعي تكلميهم انسي وحاولي تستغلي الوقت مع مامتك وتعوضي اللي فاتت بلاش تخلي الزعل من ناحيتهم يأثر عليكي
مريم: حاضر
حنان: حاسه انك كويسة
مريم: اه انا طالعه اكلم حمزه
خرجت مريم من الاوضة وطلعت البلكونه تكلم حمزة
حمزة: عاملة ايه ياحبيبتي
مريم ببكاء: حمزه انا محتجالك دلوقتي اووي
حمزه بخضه: مالك ياحبيبتي في ايه
مريم: مش عارفه بس مخنوقة اوي من ماما
حمزة: هيا كلمتك كانت بترن عليا من شوية بردو هيا قالتلك ايه زعلتك
مريم بنفي: لا بالعكس بتقلي انسي اللي فات ياحمزة وكسبت رودينا في صفها رودي لسه صغيرة وملهاش ذكريات وحشه معاها وحتي لو كدا فهيا هتتصالح بسهولة وتنسي لكن انا مش هقدر ياحمزة صعب عليا اووي انسي كل اللي فات واكلمها عادي بس انا مش وحشه والله انا طول حياتي بتمني يبقي عندي اب وام بجد مكنتش اعرف انه صعب اوي كدا صعب اتعامل بعد كل اللي حصل ياحمزه
حمزة بهدوء: اهدي كدا ياروما واسمعيني هما عمرهم معملولنا حاجه وحشه وقبل متتكلمي اسمعي للاخر هما بيجبولنا اي حاجه بنحتاجها وعلمونا احسن تعليم عارف ان عمرهم مقعدو معانا واحنا بنذاكر عمرنا مكانو معانا في اي نجاح لينا كانو واخدين كل حاجه ببرود وقلة اهتمام بس لو رجعنا نفكر لو حياتنا من غيرهم كانت هتبقي عاملة ازاي الاهل بردو مهما عملو هما اللي مخلينا عايشين لحد دلوقتي العيشه دي انا بقلك الكلام دا وانا عارف ان صعب ننسي كل اللي فات وتنسي الايام اللي عيطتي فيها بسبب اهمالهم
وبضحكه وجع: علي الاقل يامريم انا كنت معاكي ولو شوية عارف اني قصرت في الاخر بس انا عمر محد كان معايا وكنت لوحدي انا لولا اني بعدي وانسي كنت بقيت شخص غير سوي بس انا مش عايز اللي عشته حد يعيشه فكري في الموضوع يامريم انا هقفل دلوقتي عشان انا في الشغل ولما اخلص هرجع اكلمك خدي بالك من نفسك
قفل حمزة وساب مريم تفكر في كلامه وافتكرت البنات اللي كانو في الميتم وحياتهم من غير اهلهم عامله ازاي وقد ايه هما بيتعذبو علي الاقل عندنا اب وام واخوات وعيله بتحبها وعمرها مطلبت حاجه الا وجاتلها اه في زعيق وصوت عالي وقلة اهتمام بس ليهم بيت عايشين فيه ومرتاحين غيرها مش لاقي البيت دا ولا الحياة دي
مريم بهدوء لنفسها: اهدي كدا وحاولي تنسي لازم تنسي انا محتاجه مواجهه لاخر مرة علي الاقل وبعدها لا لا لا مش عايزة اواجه حد انا هكلمها عادي لحد مرجع البيت بعد الامتحانات ووقتها لما اشوفها وش لوش ابقي اقول كل اللي نفسي فيه تمم يامريم تمم
دخلت مريم اوضتها وقعدت
حنان بسماجه: هنفطر ايه
مريم: خليه غدا احنا خلاص داخلين علي الظهر
حنان: ماذا بعد هنتغذي ايه بردو
مريم: اممم شفت امبارح فيديو لعمر عامل فيه اكله عجبتني وعايزة اجربها
حنان: مين عمر دا واكلة ايه
مريم: واحد بيعمل فيديوهات اكل واكلة ايه فهيا Croquette
حنان: اممم تطلع ايه دي معلش
مريم بضحك: بطاطس كروكيه عبارة عن بطاطس ولحمه مفرومه
حنان: والله ياعسل مفهماكي بس نجرب هنخسر حاجه يعني ولو معجبتنيش نطلب اكل وخلاص
مريم برفع حاجب: لو معجبتكيش هتاكليها بردو مهوا انا مش اعمل واتعب وفي الاخر نرمي يلا ياماما
حنان ببرطمه: اووف يلا يلا عيله شريرة مستقصداني كدا دايما
مريم: بتقولي حاجه ياحنون
حنان: انا اتزفت اتكلمت دلوقتي انا ساكته اهو
مريم: طب يلا قشري البصل علي ما اقشر البطاطس
حنان بدموع مزيفه: اهي اهي دايما كدا تخليني اقشر البصل لحد ما اعيط ايه الشر دا
مريم: ياحول الله يارب طب قشري البطاطس ياحنان وانا هعمل البصل
حنان: ها وبعدين
مريم: قطعيها قطع متساوية عشان تستوي مع بعض وحطي الماية تغلي علي ماتقشريها
حنان بعد ماعملت اللي قالته: وبعدين
مريم: بعد ماتقطعيها حطيها في الماية ومتحطيش عليها حاجه واه طلعي المفروم قبل متعملي
حنان: اشتا
بدأو يعملو كل واحدة المطلوب منها مريم قشرت البصل وقطعته قطع صغيرة وفي معلقتين زيت حطتهم لحد مالونهم بقا ذهبي شوية حطت اللحمه المفرومه وقعدت تقلب فيها لحد ما استوت وفي الناحيه التانيه كانت البطاطس اتسلقت طلعتها حنان وصفتها كويس وبعدين هرستها
مريم: خلصتي صح
حنان: اه هنعمل ايه تاني
مريم: هنحط اللحمه علي البطاطس المهروسه ونقلبهم كويس ودلوقتي نحط التوابل بقا عشان نعرف نظبطها ومتبقاش مملحه اوي
عملت مريم اللي قالت عليه وبعدين بدأت تعملهم علي شكل دوائر (زي البرجر كدا ياجماعه🌚) وغطتهم وحطتهم في التلاجه نص ساعه وبدأو يعملو مكرونه في النص ساعه دي
ولما طلعوها من التلاجه حطتها مريم في زيت علي نار متوسطه وقلبته علي الوش التاني بعد محست انه استوي من تحت وبعد مخلصت الكميه اللي عملتها غرفت هيا وحنان الاكل وطلعو ياكلو(قلتلكم طريقة اكله كامله اهو😂دي مبقتش رواية دي بقت قناة طبخ بس انا شفتها وعجبتني قلت اعرفهالكم😌)
حنان بتلذذ: قممممممر بالله الله نعملها علطول واهو اتعلمت طريقتها وهعملها لحوده لما اروح واهو يعرف ان قعدتي معاكي جات بفايده بدل مهوا ماسكني كل شوية اتعلمي من روما اتعلمي من روما
مريم بضحك: الحمدلله واخيرا سنيوره حنان اتكلمت وقالت انها هتطبخ دي معجزه
حنان: هييح لا داعي للتصفيق
مريم: ياشيخه اتنيلي
حنان: بس يابت خليني اكل بقا بنفس
مريم: اه اصل انا لو مهما عملت مش هتاكلي يعني دا انتي لو رحيم وخالد شافوكي هيبطلو يقولولي ياطفسه
حنان: انا مش طفسه ياماما انا بملي كروشي بس
ضحكت مريم وضحكت معاها حنان وبدأو ياكلو وهما بيتكلمو في مواضيع كتير ويهزرو
________#________
أنت تقرأ
معاناة بريئه
Romansaالاهمال اكتر حاجه مؤذيه في الدنيا كفايه بس انو بيخلي الانسان فاقد الشغف وبيهلك القلب والمشاعر خصوصا لو الاهمال دا كان من اقرب الناس لينا💔
