نصيبي

الفصل الخامس

لو عجبتكم الرواية مش تنسوا النجمة🥰

حور قاعدة مع صحباتها تحكيلهم اللي حصل
_تيانا: عشان لما نقول متتزفتيش تبقي تسمعي كلامنا.
_ملك: كان هيجرالك ايه دلوقت لو الشاب ده مجاش ها؟؟
_نور: انتي ازاى اساسا تبعدي كدة مفكرتيش انك متعرفيش حد هنا وممكن تتوهي؟؟
حور بتتكلم بتوهان لأنها مش معاهم اصلا هي بتفكر ف المنقذ بتاعها
_حور: انا حاسة أن ربنا عمل كدة مخصوص عشان اقابل محمد ونتعرف على بعض.
كلهم فتحوا بقهم !!
_تيانا: شوف احنا بنقول ايه وهي بتقول ايه ؟؟ محمد مين ده اللي بتفكري فيه؟!
_حور: صاحب مروان.
_تيانا: مروان مين؟
_حور: المز اللي مسحتي بكرامته الأرض .
_تيانا افتكرت: وملقتيش الا صاحب المختل ده وتعجبي بيه؟! بقلك ايه سيبك من الحوارات دي احنا جايين ندرس وبس ماشي .
_حور: على فكرة جدة مروان ساكنة معانا ف العمارة.
_تيانا: انتي مش معايا اصلا .. وبعدين مايولع سي زفت واللي يجي من وشه قال مروان قال.... كل واحدة تقوم تتخمد يلا.
وناموا وصحيوا تاني يوم وكان من الأيام القليلة اللي البنات والشباب بيبقى عندهم محاضرات ف نفس اليوم.
وراحوا الجامعة ورغم أن كان فيه اماكن كتير اوى تيانا تركن فيها عربيتها إلا أنها أصرت تروح تركنها في مكان مروان بس قبل ماتعمل كدة عربية مروان جات وركنت مكانها وهي محبتش تبين أن ده ضايقها فراحت بسرعة وركنت جمبه بالظبط ونزلوا الشباب والبنات من العربيتين وكل اتنين بيبصوا لبعض نظرات مختلفة تماما..
حور ومحمد بيبصوا لبعض بابتسامه وحور بتبصله بامتنان..
احمد بيبص للملاك اللي سحرته من أول نظرة وهي مش فاهمة هو بيبصلها كدة ليه..
حمزة ونور بيبصوا لبعض بنظرات هادية بس من جوه حاسين أنهم يعرفوا بعض من زمان .
أما مروان وتيانا فبيبصوا لبعض كأنهم في تحدي أو حرب وكل واحد بيقول للتاني انت مش قدي ومش هتكسبني بيبصوا لبعض بغضب وحيرة وشوية كره.
راحوا على المحاضرات بعدها طلعوا قعدوا ف الكافيتريا
قعدوا نفس قعدتهم اللي قعدوها اول يوم مروان وتيانا موازيين لبعض ووشهم ف نفس الاتجاه وقصادهم محمد وحور .. ملك وأحمد قاعدين ف وش بعض وأحمد تقريبا مبينزلش عينه من عليها.. وحمزة ونور قاعدين ف ضهر بعض ..وكالعادة قامت نور عشان تجبلهم الفطار وحمزة كذلك بس دي كانت حجة عشان يلاقي فرصة يتكلم مع نور واتقابلوا عند المكان المعهود يستنوا الاكل
_حمزة: ازيك.
_نور: الحمد لله.
_حمزة: احنا اتكلمنا قبل كدة ومعرفتش برده اسمك ايه؟ انا حمزة ف سنة رابعة .
_نور: وانا نور سنة أولى .
_حمزة: اتشرفنا يانور .
_نور: ميرسي الشرف ليا.(الاكل جه اخدته واستاذنت ومشيت)
ملك متضايقة من نظرات احمد ليها وعشان تخلص من التوتر ده قامت تروح الحمام وأحمد قرر أنه لازم يتعرف عليها ومش هيفضل ساكت كتير فقام وراها ووقفها ف نص الطريق
_احمد: لو سمحتي!
_ملك وقفت وبصتله وارتبكت جدا لما لقته هو: افندم!
_احمد : اهلا ازيك انا اسمي احمد انا بس كنت عايزك ف موضوع مهم.
_ملك: اه اتفضل .
_احمد: انا يعني شايف أن الأجواء بنا مش لطيفة يعني صحابي وصحباتك فقلت نحاول نلطف الأجواء شوية يعني احنا ف الآخر مش أعداء .
_ملك: لا مفيش الكلام ده ولو قصدك ع الفصل اللي عمله صاحبك فاحنا خلاص نسينا..عن اذنك.
بعد ماسابته ومشيت قعد يكلم نفسه.
: ايه الدخلة اللي انا دخلتها دي اكيد قفلت مني .
البنات قرروا يمشوا وهما قايمين تيانا نضارتها الشمس وقعت وقبل ماتوطي تاخدها كان مروان سابقها وطى وجابهالها بصتله شوية وبعدين اخدتها.
_تيانا ببرود: شكرا.
مروان اتنرفز من برودها دي حتى مبتسمتش
_مروان: هه طب بالراحة على نفسك شوية.
_تيانا: افندم!!
_مروان: بقول يعني انتي مش لازم تعملي الشويتين دول لأن مهما عملتي فأنا اسف مليش ف البنات.
تيانا رفعت حاجبها وبصتله بصدمه بعصبيه وبكره وكان ردها أنها اخدت كوباية المايه اللي ع الترابيزة ودلقتها ف وشه... مروان الصدمة برجلته وعقدت لسانه.
_تيانا: ده عشان يفوقك ويعرفك تتكلم ازاى ومع مين انت لو مفكرني واحدة من الزبالة اللي تعرفهم تبقى غلطان فياريت تحفظ حدودك ولو هموت مش عايزاك تساعدني.
ومشيت تيانا وسط صدمة من الكل وصحباتها مشيوا وراها مروان بعد مافاق ومسح الماية من على وشه بص ناحيتها بغضب شديد.
_محمد: ايه اللي انت عملته ده يامروان انت عمرك مااتكلمت بالطريقة دي مع حد وانت عارف ان البنت دي محترمة ورغم كدة قلت الكلام ده !!
مروان سكت معرفش يقول ايه لان فعلا ده مش طبعه وعارف أنها كمان مبتعملش show عشان تلفت نظره بس هو اتعصب منها.
تيانا بعد ماخلصوا واول ماروحت مكنتش عايزة تتكلم مع حد ودخلت اوضتها وقفلت على نفسها والحاجة الوحيدة اللي كانت عايزاها انها تكلم مصدر امانها الشخص الوحيد اللي بيحسسها بالأمان والدفى اللي هي محتاجاه حاليا ... مسكت تليفونها وطلبت رقم
_حسن ابوها: وحشاني ياست البنات توك افتكرتي ترني.
تيانا عينيها رغرغت وحاولت تتماسك عشان ابوها ميحسش بحاجة
_تيانا: وحشني اكتر والله يابابا ... وبعدين لو انا مرنتش انت مترنش!
_حسن: منا قلت ترني انتي احسن بدل مااقاطعك عن المذاكرة ... المهم مالك حاسك مش مظبوطة؟
تيانا مستغربتش اوى لأن ابوها طول عمره بيحس بيها حتى لو مشفهاش.
_تيانا: مفيش بس اصلكم واحشني اوى مش متعودة اغيب عليكم لو يوم واحد.
_حسن: امال لما تتجوزي بقى إن شاء الله ويجي واحد ياخدك مننا هتعملي ايه.
_تيانا لحد هنا ومقدرتش تستحمل وفتحت ف العياط: انا مش عايزة اتجوز انا عايزة افضل معاكم على طول مش عايزة اسيبكم.
_حسن: طب بتعيطي ليه دلوقت خلاص محدش هياخدك بس متعيطيش.
وفضلت هي وأبوها يتكلموا فترة مش قليله لحد ماحست انها احسن وراحت تقعد مع الحاجة ثناء شوية.. خبطت وصابرين دخلتها وقالت لها أن الحاجة قاعدة ف البلكونة وراحت تعملهم كوبايتين الليمون تيانا دخلت عليها لقتها قاعدة بتسمع أم كلثوم قعدت معاها وبعدها بشوية صحباتها جم وراها وقعدوا كلهم مع الحاجة ثناء وقد ايه القاعدة دي كانت محببه لقلبها.
.
.
.
يتبع...
مش تنسوا التصويت وقولوا رأيكم ها👀