نصيبي

الفصل الثالث والعشرون

تيانا حاسة الصدق ف كلام مروان وكمان العيون دي ماتكدبش ابدا
_تيانا: يعني انت ماحبتهاش؟
_مروان بهدوء: عمري ما حبيت غيرك.
_تيانا: امال ليه كنت دايما اشوفها لازقة ف ديلك؟
_مروان فتح بقه: لازقة ف ديلي!!!
ومرة واحدة انفتح ف الضحك وهي على طول شاركته الضحك ده.
_مروان بيحاول يسيطر على ضحكه: انا مقلتلهاش والله تلزق ف ديلي انا حتى كنت بعاملها بجفاء جدا، بس زي مانتي قلتي هي اللي بتيجي تلزق.... انتي بتجيبي الكلام ده منين(وانفجر ف الضحك تاني)
_تيانا: بطل ضحك بقى ايه مالها الكلمة عمرك ماسمعتها.
_مروان لسه على حاله: والله ابدا .
فضلت تيانا بصاله وهو بيضحك، ضحكته اللي بتعشقها ودوبتها من اول مرة وهو لاحظ سرحانها فيه فبطل ضحك وابتسملها بحب بعدين مسك ايديها الاتنين وباسهم.
_مروان: انا اسف على كل الوجع اللي اتسببتلك فيه، بس وعد هعوضك واخليكي تنسي اي يوم وحش شفتيه ف حياتك سواء بسببي أو لأ، انا بحبك اوى ياتيانا فوق ماتتخيلي والله.(وفضل يبوس ف أيدها)
_تيانا : انا كمان بحبك اوى .
قالتها بخفوت لكن هو سمع واتصدم من اللي سمعه لأنها اول مرة تقلها لدرجة أنه فكر بيتهيأله.
_مروان:قلتي ايه ؟
_تيانا ابتسمت بخجل: قلت ... بحبك...اوى .... اوى.... يامروان.
مروان بصلها بعدم تصديق ومرة واحدة مسك وشها بإيديه الاتنين وباسها جامد لكن مكنش بعنف وهي تاهت ف دنيا تانية... وبعد فترة بعدوا عن بعض وبصلها ف عينها بحب شديد
_مروان: وانا بموت فيكي ياقلب مروان وعقل مروان.
كان عايز يقرب تاني بس قطع عليه دخول حسن والد تيانا
_حسن: يااهلا ياجوز بنتي.
_مروان: اهلا بحضرتك ياعمي.
وفضلت القعدة كدة وبعد شوية حنان جات وقعدت معاهم وفضلوا يتكلموا ويهزروا لحد مامروان مشي.

اول ماتيانا دخلت اوضتها اتصلت بصحباتها البنات اللي كانوا وحشينها جدا وواحشها قعدتهم
_ملك: لسه فاكرة أن ليكي صحاب ياست تيانا.
_نور: انا قلت عملتي صداقات جديدة عشان كدة مخطرناش على بالك.
_حور: يمكن شافت حد احسن مننا ولا حاجة .
تيانا ساكتة وبتسمعهم ومش عارفة تجيبلهم موضوع كتب كتابها ازاى .
_ملك: ايه أكلتي سد الحنك.
_تيانا: انا كتبت كتابي.
سكوت عم ف المكالمة ومستنية تسمع ردهم
_تيانا: ايه روحتوا فين؟
_نور: ده مقلب جديد ده ولا ايه؟
_حور: سيبك منها بتقول كدة عشان تغير الموضوع وخلاص انتوا يعني ماتعرفوهاش.
_تيانا: لا .. هو انا... فعلا كتبت كتابي... وعشان ماتبدأوش ومش هعرف اسكتكم انا هقلكم ع اللي حصل.
وحكتلهم على كل اللي حصل من ساعة مامتها اللي دخلت عليها الاوضة لحد المأذون اللي كتب الكتاب بس.
_ملك: المشكلة الأخيرة دي اللي هي بتاعة عليا صح.... امم احمد قالي عليها.
_نور: يعني خلاص كدة اتجوزتوا.
_تيانا: كدة بقى محدش هيقدر يفرق بينا تاني.
_حور: بس انا مكنتش اعرف ان مروان مجنون كدة .
_ملك: هيعمل ايه يعني الراجل الكيل طفح بيه من كتر المشاكل اللي بتحصل مابينهم خايف يحصل مشكلة تاني ، وتيانا ماشاء الله عليها ف ثانية ممكن تقله امشي مش عايزاك.
_تيانا: وهو يعني بيبقى بمزاجي؟! بس يلا خلينا ننسى كل ده ونركز ف اللي جاي، المهم عايزاكم تبقوا تيجوا معايا عشان ننقي الهدوم وكدة.
_ملك: من غير ماتقولي اصلا انتي هتلاقينا طابين عندك الصبح.
_تيانا: طيب مش تتأخروا بقى، هنام انا تصبحوا على خير.
وبعد ماقفلت مع صحباتها البنات كانت عايزة تنام بس قبل ما تروح ف النوم سمعت موبايلها بيرن مسكته لقت مروان.
_تيانا: الو.
_مروان: احلى الو سمعتها ف حياتي.
_تيانا: ههههه ده على اساس اول مرة تسمعها؟
_مروان:اول مرة اسمعها من مراتي.
_تيانا: انت ماتعرفش وقع الكلمة دي عليا عامل ازاى.
_مروان: عامل ازاى؟
_تيانا: بيخلي قلبي يدق جامد اوى.
_مروان: هبقى اهديهولك انا بس لما تبقي ف بيتي.
_تيانا: بطل قلة ادب .
_مروان: طب بذمتك في واحدة تقول لجوزها بطل قلة ادب، طب لو بطلنا قلة ادب امال متجوزين ليه؟
_تيانا بكسوف: مروااااااان.
_مروان: خلاص ياستي سكت ، بس انا بنفسي هوديلك كسوفك ده.
وفضلوا يتكلموا كتير كحبيب وحبيبته كزوج ومراته مش خايفين من حد ولا من حاجة وعارفين إن أي مشكلة هتظهر دلوقت هيعرفوا يحلوها مع بعض.