نصيبي

الفصل العاشر

عدت امتحانات نص السنة والشباب كل يوم بييجوا مع البنات وبيستنوهم على مايخلصوا ويروحوا معاهم تيانا كانت شوية متضايقة من وجود مروان بس عرفت تتجاهله كويس ومابيتكلموش الا ف أضيق الحدود ومروان حس أن طريقتها القديمة ومعاملتها الخشنة معاه اهون وأحب ليه من تجاهلها ده واتمنى لو ترجع زي زمان ..
البنات قرروا يرجعوا بلدهم عشان إجازة نص السنة ..راحوا ودعوا الحاجة ثناء اللي زعلت جدا أنهم هيغيبوا عنها.. ودعتهم ونزلوا لقوا الشباب تحت..

عند ملك وأحمد
_احمد: يعني انتي بتبقي معايا ووحشاني مابالك بقى هحس بإيه وانتي بعيدة عني .
_ملك: يعني مشفش اهلي .
_احمد: إن شاء الله اول ماتخلصي جامعة مش هخليكي تشوفي حد .
_ملك: هتحبسني يعني ولا ايه ؟
_احمد: اه هحبسك ومش هخلي حد يشوفك غيري .
_ملك: لا ياحبيبي مفيش الكلام ده .
_احمد: لا ياحبيبتي فيه وفيه كتير اوى كمان .
_ملك: انت بتتخانق معايا يااحمد وانا مسافرة؟!
_احمد: لا ميصحش خلاص احفظي احنا واقفين فين ولما ترجعي بالسلامة إن شاء الله نبقى نكمل.

عند محمد وحور
_محمد: هتوحشيني.
_حور:_______
_محمد: بقلك هتوحشيني!!
_حور: ماشي خلاص.
_محمد: خلاص؟! ايه خلاص دي مصطلح جديد في قاموس العشاق؟!
_حور: اقلك ايه يعني ؟
_محمد: هو انا كمان اللي هقلك تقولي ايه؟! ماتقوليش ياستي المهم بس تعرفي انك هتوحشيني واوي كمان ..مش متخيل اصلا تعدي الفترة دي كلها ومشفكيش.
_حور: معلش بقى هو شهر بالكتير ونرجع تاني إن شاءالله.
_محمد: إن شاءالله.

عند حمزة ونور
_حمزة: هتصل بيكي كل يوم اتطمن عليكي ولو جه ومردتيش هجيلك ومش هيهمني حد.
_نور: حمزة .. انا قاعدة ف وسط اهلي متخافش عليا.
_حمزة: طول مانتي مش قدام عيني هفضل خايف عليكي.
_نور: اتطمن مش هيحصل حاجة مش هيتاجروا ف اعضائي يعني.
_حمزة: اه دانتي بتهزري كمان.
_نور بضحك: طب اقلك ايه يعني بقلك وسط اهلي عارف يعني ايه وسط اهلي.
حمزة بصلها وسكت.
تيانا واقفة قدام عربيتها ومشلتش عينيها من الأرض ومروان ساند على عربيته ومشالش عينه من عليها ونفس الحرب جواه بس كالعادة انتصر القلب وراحلها.
_مروان: تروحوا وتيجوا بالسلامة.
_تيانا: شكرا.
مروان حس أن تيانا مش في جمودها المعتاد وفي عينيها حاجة غريبة بس مش وحشة فحب ينتهز الفرصة دي ويتكلم معاها اكتر .
_مروان: هو انتي منين بالظبط؟
_تيانا: كلنا مش الشرقية.
_مروان: ومدخلتوش كلية ف الشرقية ليه انا اسمع أن جامعة الزقازيق من احسن الجامعات في مصر .
_تيانا: مكنتش عايزنا نيجي ولا ايه ؟
_مروان: لا طبعا مش كدة بس اقصد بدل الغربة وكدة.
_تيانا: نصيب.
تيانا مأخدتش بالها من الكلمة اللي قالتها ومعناها ايه وهيترتب عليها ايه لان مروان حس انها بتقله نصيبي اجي هنا عشان نتقابل لأن نصيبنا مع بعض وده اداله امل كبير وقرر أنه يغير خططه .
البنات سافروا ووصلوا على الغدا بالظبط كل واحدة اتغدت ونامت شوية وصحيوا كلموا بعض ف التليفون وبعد كدة الشباب اتصلوا عليهم عشان يتطمنوا.

حمزة ونور
_حمزة: بقلك ايه يانور انتي لما بتصحي وتلاقي الكهربا قاطعة واحنا ف الصيف بتحسي بإيه ؟
_نور: يااااه ده بيبقى يوم بكون محتاسة ومببقاش طايقة نفسي الدنيا بتبقى حر والمايه بتقطع وبيجيلي اكتآب طول اليوم ... بس ليه السؤال؟
_حمزة: لأن ده بيبقى احساسي بالظبط لما بفتكر اني هصحى الصبح مش هشوفك.
_نور: بجد ياحمزة !!
_حمزة: بجد ياقلب حمزة...بقلك ايه ماجيلك بكرة ونقضي اليوم مع بعض وافسحك.
_نور: ياسلام واقول لاهلي ايه إن شاءالله راحة اتفسح مع واحد اتعرفت عليه ف الجامعة .
_حمزة: ماشي إن شاء الله بعد مااخلص دراسة واستقر ف شغلي كدة هاجي اخطبك وافسحك براحتي ومحدش هيبقى له حاجة عندي .
_نور: أنت مش ملاحظ انك بتخطط كدة من غير حتى ماتاخد موافقتي؟!
_حمزة: مش لازم لأن برضاكي أو غصب عنك انتي ليا.
_نور: اممم دي ثقة بقى.
_حمزة: طبعا.

احمد وملك
_احمد: وحشاني اوى ياملوكتي.
_ملك: داحنا لسه مكملناش يوم امال لما يعدي اسبوع بقى هتعمل ايه.
_احمد: وهو انتي متخيلة اني ممكن اعدي اسبوع من غير مااشوفك؟!
_ملك: هتعمل ايه يعني.
_احمد: هجيلك
_ملك: ياشيخ اتنيل انت اساسا بق ع الفاضي ومتقدرش تعمل حاجة.
_احمد: يابت يخربيتك لمي لسانك اعمليلي شوية احترام دنا هبقى جوزك .
_ملك: لما تبقى ياحبيبي نبقى نعمل.
_احمد: ماشي وحيات امك لاطلع عليكي القديم والجديد.
_ملك: اتكلم على قدك يابا.
_احمد: انا حاسس اقسم بالله اني بحب عربجية.
_ملك: إذا كان عاجبك.
_احمد:_______
_ملك: احمد احمد انت يله... يانهار ابوك اسود ده فصل السكة ف وشي ماشي يابن الفالحة.

محمد وحور
_محمد:  عاملة ايه ياحبيبتي.
_حور: الحمد لله.
_محمد: اكلتي؟
_حور: أيوة, انت اكلت؟
_محمد: الحمد لله ، بقلك ايه ياحور طبعا مش محتاج اقلك انك ماتنزليش الشارع بالليل لوحدك تاني وياريت ماتنزليش اصلا.
_حور: انت عايز تحبسني ف البيت بقى؟
_محمد: لما نتجوز إن شاء الله هبقى احبسك إنما دلوقت لأ طبعا امال هشوفك ازاى؟!
_حور: امم انت عايزني أسيرة .
_محمد: انتي اساسا أسيرة قلبي ومش هتقدري تخرجي ابدا ، ويلا روحي نامي اكيد تعبانة من السفر وهبقى اتصل بيكي .
_حور: ماشي سلام.
_محمد: حور.
_حور: نعم.
_محمد: بحبك
_حور:______
_محمد: ماشي مترديش براحتك بس هيجيلك يوم وتتكلمي .. سلام ياحبيبتي.

عدى اسبوع على الحال ده والشباب كل يوم يكلموا البنات وملك زعلت من احمد بس عرف يراضيها .

وف يوم تيانا كلمتهم وقالتلهم يروحوا يقضوا معاها يوم ف المزرعة بتاعتهم وهم وافقوا ، وصلوا المزرعة وأدت كل واحدة ورقة ف ظرف.
_نور: انتي طلقتينا بالتلاتة ولا ايه!
_تيانا: هههه ظريفة.. كل واحدة تفتح الظرف اللي معاها ده وهي تعرف .
جات تمشي بس هم وقفوها
_ملك: انتي رايحة فين ؟
_حور: فيه ايه يابت انتي مالك مريبة النهاردة كدة ليه؟
تيانا بصتلهم بنفاذ صبر ومشيت.وهم فتحوا الاظرف وكل ظرف مكتوب فيه" قابليني عند ...." وكل واحدة راحت للمكان المكتوب وبعدوا عن بعض...
.
.
.
يتبع...