ثار شهم

البارت السابع

#ثار_شهم

#البارت_السابع

وجلمة الخوف الذليله تضل غريبه
تضل مثل بوسه حلم من غير خذ
وهمي الدنيا انبعت بيهه بغير انت
وشنهي معناة الجرح من غير دم؟

(الشاعر عريان السيد خلف)
نور

مرت اربع ايام وشهم يسال عن ضياء.. اني كل هاي الفتره عايشه عله اعصابي واندعي بلكت تصير القسمه بيناتنه..
لان صدك احبه وروحي متعلقه بي...

كاعدين اني وزينب واحجيلهه عنه وشلون جان يحبني وصادق وياي واجه وخطبني..

_  نورر كافي والله دخت حجه ضياء وكال ضياء.. زين اني شكووو

_ عابت غير احجيلج... بس انتي من تسولفين بمحمد..

_ صدك ولج على طاري محمد.. اريد اشوفه شلون راح اموت

_ مو يكولون راح يطلع من المستشفى... عود روحي انتي وامي لبيتهم

_ اي ان شاء الله..

جاي نحجي واجتي زهراء تركض وتعيط من الدرج

_ نوووررر ولج نورررر

_ شكوو شبيج

_ شهم يريدج يكول خل تنزل بسرعه

_ عزااا ماعرفتي شيريد

_ لا والله

_ ولج زينب خاف عرف شي عن علاقتنه

_ دروحي هسه نزلي شوفي شنو يريد

نزلت واني اقره ايات وخايفه

_ هاا شهم تريدني

_ تعالي كعدي

_ شكوو صاير شي

اباوع عله شهم وساعه اباوع لماما

_ لا خويه ماكو شي بس اريد احجي وياج

_ ايي كول

_ بخصوص هذا الولد الخطبج.. اني سألت عنه وسألت هواي وبشكل عام الولد زين واهلهه خوش ناس وكلهه تمدح بيهم وبشرفهم..

واني الله شاهد وهاي كدام امي ماجنت مخلي ابالي تتزوجن هسه.. وجنت رافض الفكره من الاساس بس امي كالت اسئل وشوف الولد ولحت عليه حته جده كالت البنت اولهه وتاليهه تتزوج..
واني اهم شي عندي رغبتج انتي ولجواب الاول ولاخير الج..
انني شتكولين

_ بكيفكم......

_ ماكو بكيفنه اريد اسمع منج... ولا تستحين مني هاي مابيهه عيب

_ رفعت راسي باوعت لامي اريدهه تساعدني بكلمه بلكوه حجت

_ موافقه يمه مايحتاج تحرجهه

_ هاي هي على بركت الله.. رجعو الجواب للناس ولبي خير الله يقدمه النه..

_ من رخصتكم

كمت بس احس رجليه ماتشيلني من الفرحه صعت للبنات وكلت لهن فرحن وياي وضلينه نهوس ونركص حيل فرحانه واني اتخيل شكل ضياء من يسمع الموافقه....