#ثار_شهم
#البارت_الحادي_عشر
وانه ماوافي لبشر...
كدما وفيت الج...
يلجنج امراية بيتنه...
اني احبج مارضو خل يدردمون
اني اريد بحبنه يطلع صيتنه...
... ام ضياء.....
أذاني ضياء بكلامه.. احسه مو ابني هذا عقله كله متغير... شاسوي وشنو الطريقه الارجع بيهه ابني ومرته سوه... ماكملت فرحتي بيهم وبابنهم.. جانو شحلاتهم متفاهمين ومتصافين شنو الدخل بينكم وگلب كل حياتكم...
اريد اجر النفس مااكدر ضغطي صعد كلش....
ضلت عيني عله الباب بلكت تجي وحده من البنات... شويه وسمعت صوت جهال بنتي رنا..
دخلو وكلهم ركضو الي يبوسون بيه.. دخلت امهم وراهم
_ هاا يمه شلونج.. اجينه احنه وهوستنه هههههه.......
مااكد احجي وياهه من شافتني هيج انخطف لونهه واجت كعدت يمي
_ يمه شبيج.. حبيبتي يمه تسمعيني..
ياسررر ياسررر روح شوف ابوك بعد بلشارع صيحه خل يجي بسرعه
شويه واجه يركض.. جابو جهاز الضغط قاسو ضغطي شافو صاعد.. انطوني علاجي ونمت ماادري بنفسي... كعدت لكيت بناتي كلهن يمي
وحده صافنه بوجه الثانيه... كلت خل اكعد خطيه يضلن خايفات عليه
_ هاا يمه شلونجن
_ هله يمه انتي شلون صرتي...
_ والله خوفتينه عليج... شجاج غير تاخذين علاجج.. وضياء وين عنج شعنده طالع من الصبح اليوم
باكوه احجي احس لساني ثكيل
_ كله من وره هذا النذل.. هو الصعد عليه ضغطي
_ يااا شبي هذا... هليام كلش صاير
_ يريد اخطبله...
_ هذا شبي تخبل مرته بعدهه عروس.. وحامل يفكر بزواج.. والله هاي الزلم ولا تتامن
_ عافهه كلهه ماراد غير مريم
_ اييي هاي ام السحوره.. والله هي مدري شنو مسويه الهم... اني اعرفهه من البدايه كتلج يمه لا تجي هواي الكم ذني خرابات بيوت بس انتي الله يسلمج لا ولا وصديقة نور فشله
هسه خل تفيدهه نور راح تاخذ رجلهه
_ شمدريهه البنيه يايمه غير صديقات... جانت شحلاتهه وتموت عله اخوج.. شغيرهه هسه ماادري.. كولن شسوي وشصرف اموت غير اذا يجيب هاي لبيتي
_ على كيفج وي نفسج يا يمه... وان شاء الله كلشي ينحل
... شهم...
دخلت للبيت واني شايل علاكه المسواك تلكتني امي اخذتهه مني..
_ هاا يمه جده نايمه كاعده كلما اجي مااشوفهه
أنت تقرأ
ثار شهم
Romanceقصة حقيقيه لشاب يفقد والده ليواجه مصاعب الحياة بمفرده.. ويتحمل مسؤوليه عائلته... ثم يسعى لاخذ ثاره من قاتل ابيه
