ثار شهم

البارت السادس عشر

#ثار_شهم

#البارت_السادس_عشر

اليشبه اسمك كمت احاجي......

حته الفظ اسمك واستلذ بي...

يمن كثر ما تطر عله بالي.....

سميت بسمك كل جهالي....

.... ضي....

ماكدر ابويه يتحمل خبر موت احمد.. بقينه كلنه نتوسل بي حتى بس يهدئ شويه بس هو فاقد اعصابه.. ويعيط على ولد عمي وساعه يكعد ويضل يبجي..
بعدين كال الهم اخذوني لكبره اريد اشوفه.. شغلو السياره واخذو..
بقينه احنه نكمل العزا وناس هواي تجي للفاتحه ضليت اشتغل وي البنات لمن تعبت..
لليل رجع ابويه من المقبره دخلو جوه كوه يمشي تعبان حيل وحالته كلش صعبه.. انقهرت عليه من شفته بهذا الحال.. شويه وصاح الي يريد يشوفني.. رحت يمه للغرفه جان متمدد ويمه خالتي ام احمد ولبنات ..
اول مادخلت رحت عليه وحضنته..

_ حبيبتي بنيتي.. شلونج بابا

_ حسيت بهاي الكلمه هييج كل المواجع عليه
باوعت اله وعيوني كلهه دموع.. وكتله زينه

ضل صافن. عليه ولازم وجهي بايده بس ميكدر يحجي...
رغم ماعشت ويا هواي بس هو يحبني وحنين عليه.. جان خالي يكول يشوف امج بيج.. لان جان حيل يحبهه..
بقيت كاعده يمه لمن نام...
باوعت شفت موبايله يمه. اجتني فكره اخذه واتصل على شهم..
سحبته بهدوء بدون محد يشوفني. لان البنات جانن كاعدات.
اخذته وطلعت بره بسرعه دخلت للحمام وسديت الباب واني كلبي يدك سريع من الخوف..
كتبت رقم محمد حافضته جنت من انطاني موبايله  و بكلبي اندعي كون ما مرجعه لمحمد  ..

شويه ودك.. بس محد يجاوب رجعت عدت الاتصال نفس الحاله بس ضليت احاول
بعدين انفتح الخط واجاني صوته بس حيل تعبان وكوه يحجي مبين عليه نايم جان.. اخر مره سمعت صوته قبل تسع اشهر بيوم زواجي ...

_ الووو... منووو

_ احجي بصوت كلش ناصي حتى محد يسمعني
هلوو شهم اني ضيي

_ بس سمع اسمي صوته صار عالي
ضيي؟ شعجب خابرتي؟ .. وليش هيج كطعتي

_ يحيى مايقبل اشتري موبايل... ولا ينطيني موبايله..
شلونك شهم...
حجيتهه واني اغص بعبرتي

_ جر نفس وكال شنو تتوقعين حالي بدونج
ولج من رحتي لليوم مشفت طعم الفرح.. اخذتي كلشي حلو وياج..

_ توقعتك نسيتني

_ ليش هو اني اكدر.. الله يشهد عليه لحضه وحده ماترحين من بالي..
انتي العلمتيني مايخلص يومي اله وياج... تتوقعين انسى بسهوله

_ ولا اني ناسيتك... شهم انت عايش وياي

_ سكت شويه بعدين كال.. شلونه رجلج. زين وياج

_ حرت شنو اجاوب.. بس طلعت مني كلمه زين
سمعته يجر حسره وضل ساكت...
شهم

_ عيونه..