"نورس _ منتحلة شخصية نور "
إتلفت حواليني بحيرة ، لفيت في الغرفة و انا بحاول استوعب ..ان الغرفة السرية دي داخل الشقة بتاعتي ! وقفت بثبات بعاين لنور و الشيخ زايد اللي ما كان قاعد على كرسي وواقف على رجلينهُ الإتنين بثبات ..! الحيرة كست ملامحي و نور واقفة عادي كأنها ما اتفاجئت في بمشي زيي !.. كنت بحاول استوعب الاحداث السريعة الحصلت في الثانية ما بين رنت جرس بابنا لغاية اللحظة الانا واقفة فيها دي .. رجعت استذكر الاحداث من جديد عشان اربط الاحداث ..
بالاول رن جرس الباب مشيت فتحتهُ .. لقيت الشيخ زايد اللي نفسه قايم كأنه كان في سباق .. واقف على رجلينه الاتنين ووشه مخطوف .. يدوب الاستغراب بدا يملى ملامحي قبل يمسكني من يدي و يدخل بسرعة و يقفل الباب وراه وهو بقول " هِزبر عرف مكانك " . ما اداني مجال اسأل او استفسر عن اي شي و كمل وهو ماسك يدي و جارني وراهو في الشقة .. وماشي اتجاه مكان هو عارفهُ كويس كأنه خشى الشقة قبلة كدة ! وقف قدام باب واحدة من حيطان غرفة نومنا ..مرر يدهُ و اتحسسه كويسة كانه بفتش لشي معين .. ضغط على ذر في نص الحيطة ، لونه ما بيتفرز من لون الحيطة و لا بتلاحظ لوجوده اساسًا ولو لاحظت حاتفتكره مجرد بروز في الحيطة عادي .. اتفتحت الحيطة و دخلني جوة و بعدها نادا لنور و دخلنا التلاتة جوة الحيطة الطلعت باب ما عارفين وراهو شنو ؟
كانت غرفة مؤسسة كأنه بناها زول عن قصد ، تشبه المكتب و اضاءتها ضعيفة .. حتى التهوية كانت كويسة رغم انو مافي اي شباك .. او كدة كنت فاكرة قبل ما يمشي هو بخطواتهُ ..إتجاه مربع معدني مثبت في واحدة من الحيط ويرفعهُ لفوق عشان يدخل منو نور القمر الكان مضيء شديد يومها .. عاين للشارع و ما شال عينهُ ابدًا من برا .. انا و نور كنا ساكتين و ما فاهمين اي شي من البحصل ومكتفين يدينا و عيونا مفتحة .. كل ما احاول اسأل او افتح خشمي كان الشيخ زايد بأشر لي بيدهُ " اسكتي " .. في بالي الف سؤال و مليون حيرة و علامة تعجب .. فضلت ملتزمة الصمت وما إتكلمت ابدًا .. عيوني بتمشي لنور كل شوية مستنية منها تفسير او اي معلومة قد تكون هي عارفاها بس فضلت ساكته .!
بس سكوتها كان غير ، سكوت زول كان عارف بالبحصل و مستوعب الحواليه .. نور ما عندها قدرة تنبؤ ابدًا ، نور بتعرف بالشي وهو بحصل لمن تكون قريبة من موقع الحدث ..بس ابدًا ما عندها قدرة تتنبئ بيها ، وقتها كنت متأكدة انو نور عرفت شي بس مخبياهُ عني ! في بالي سؤال واحد ..
" ليه نور ما حكت لي !؟"
_________
" نور "
ما اتفاجئت ابدًا لمن شفت الشيخ زايد جاي عندنا و ولا استغربت من انو بمشي على رجلينوا .. الشيخ زايد ما جا بإرادته انا الجبتو لينا عن قصد و تعمد .. كلو كان ماشي حسب خطتي الخططتا ليها بعد عرفت انو الشيخ زايد بمشي .. كنت في زيارة ليهُ يومها كان براهو في البيت صبا كانت مافي .. خشيت في غفلة منو .. كان فاصل بيني وبينهُ ستارة ..كنت حاصدر صوت قبل اخش لو ما شوفتو بعيني .. قام على حيلو ومشي قدامي ! نططتَ عيوني مصدومة كيف هو بمشي و السؤال الاهم لي واهمنا بانو مقعد ؟ ليه حتى صِبا بتو ما عارفاهو بمشي و بمثل قدامها ؟ اكيد في سبب قوي و خطير مخليهُ يدعي انه مشلول ما بمشي ..!
