#نور14
" حيدر "
حاولت اتواصل مع اسرة العم اشرف كتير بس مافي رد ..كلام زليخة طلع صاح هزبر ما وفر دقيقة ممكن يإذينا و يعطلنا بيها .. صباح اليوم التاني من اليوم الجات حذرتنا فيه زليخة.. عربات الشرطة حاوطت البيت من كل الجهات .. الشرطة هجمت على البيت ما سابت ركن ما فتشتهُ .. الشرطي بعد ما لقى شي اتوعدني بنظرات حادة كانه في زول مسلطه علي وما محتاج اسأل هو منه ! ..اكتر شي توقيتي كان فيه مناسب لحظة هربت نورس من البيت نص اليل مع الشيخ زايد .. بعد جاتني مكالمة من راجل من رجالي الزرعتهم عشان يراقبوا بيت العم اشرف من يوم ما مشينا لي ..حكى لي انو اتهجم عليهم في الساعات الاخيرة قبل يتصل لي .. العم اشرف حاليًا في غيوبة ما معروف يصحى منها او لا !.
مرت الساعات بطيئة قبل تصل نور و نتحرك لمكان الشيخ زايد و نورس .. نور جابت لي تقرير كافي عن تمارا و ظافر ...
نور : تمارا طبيبة اسنان هزبر مش شاريها هي بس لا دي شاريها هي و اهلها كلهم .. كل العز اللي هم فيه برجع لتعاملهم مع هزبر ..
= في قرابه بيناتهم ؟
_ كان متزوج بت خالتها " عاينت لي " قبل يطلقها و يتزوجها هي !
= يتزوج منه قصدك ؟ تمارا !!
_ ايوة ، اتزوجها في السر
= بس دي مخطوبة !!
_ ده الانا عرفته عنهم بس ، انا متاكدة من معلوماتي .. كانت متزوجه هزبر بالسر قبل تتخطب
= خطيبها عارف ؟
هزت راسها : ما اعتقد ، بس في الحالتين ما فرق !
عاينت ليها نظرات فهمتها و كملت : عشان هو زيها متزوج و ما مكلمها !
ابتسمت : كما تدين تدان
= بالضبط ، اما ظافر فده الفاجئني بجد !
عاينت ليها بانتباه ، بادلتني بابتسامه هادئة .
_____________
" نورس"
وصلنا طريق حِزران بعد يومين من هروبنا من العاصمة قبل تهجم الشرطة على البيت بثواني ..حيدر كان محضر كل شي! اتفاجئت بي الشيخ زايد بسوق بينا برا العاصمة و يتخطى المدن البعدها لغاية ما وصل طريق عرفته كويس ..من الواضح بالنسبة لي و حسب قرائاتي للمشهد .. فالشيخ زايد و حيدر كانوا متوقعين مخطط هزبر او هم غيروا الخطة لاسباب تانية! انا ما بقدر اواصل في حاجة انا ما عارفه اصلها عشان كدة سالت الشيخ زايد اللي فقدت الامل فإنه يحكي لي شي من تلقاء نفسه ..
=يعني هسا نحن ماشين وين ؟
الشيخ زايد : حزران
= دي ما كنت الخطة !
