" نور"
فضلت اتردد كل يوم على المقبرة من غير ما يحسوا بي .. كنت مستنية ظهور النقوش الجديدة بس مافي اي نقش ظهر ..! طوال الايام المشيتها فيهم ما كان في اي حراس عليها و المكان شبه خالي! معقولة هزبر ما عارف بالمقبرة ؟ انا متأكدة لو كان بعرف بوجودها اكيد ما كان حايخليها بدون حراسة و كل الكنوز دي فيها! ما حايفرط في حديدة منهم .. فكرة توديني و فكرة تجيبني لو هزبر ما عارف بوجودها معناها ابوه كان مخونهُ .. ما ممكن اب يخبي ورث زي ده عن اولاده الا لو كان مخونهم و شاكي فيهم ! يا ترى شنو السبب الخلا الملك آزر يخبي موضوع زي ده عن هزبر ولده الوحيد ؟ ..
رجعت قبل الشمس ما تغرب ويقل بصري .. الوضع مكهرب بسبب رفض البلغار للامير حيدر ..! نورس كانت بتحاول معاهم طول الايام الفاتت ما كلت ولا ملت من الرفض البقابلوها به.. كانت واقفة جنب البحر مربعة يدينها و شاردة .. كنت بعرف كويس شنو البدور في بالها خصوصي بعد اعتراف عمر بحبه ليها .. سمعتهم و هم بتكلموا يومها .. كنت مستنياها تجي تحكي لي كعادة اي حدث جديد بحصل في حياتها .. بس المرة دي فضلت ساكتة ..
نورس وانا الحافظاها كويس ، مستحيل تقبل حاجة شافت عيني جات عليها .. من صغرنا ودة طبعها .. من شدة تعلقها بي كانت بتقسم معاي اي حاجة .. امي ولدتها بس انا الربيتها تربيتي وانا عارفه ربية كيف .. مع الاسف انا الحاجز الواقف بينهم .. مهما قولت و بررت القضية بنسبه ليها خسرانه .. ندمانة شديد اني في يوم عاينت لعمر .. لو كنت بعرف انو قلبها مايل لي ما كنت فكرت في حتى .. حفره عميقة واقعين فيها نحنا الاتنين مافي واحدة فينا حاترضى تطلع و تخلي التانية جواها ! وقفت وراها كان نفسي اضمها بس ما قدرت الله يلعن المسافة مليون مرة ..ياريت لو بقدر المسها او اربت على كتفها او اقدر اخت راسها في رجليني و العب بشعرها زي ما كنت بعمل زمان بس مابقدر .. شعور العجز خانق مافي اسوء من انك تحس بعجزك اتجاه اقرب الناس ليك .. و قفت جنبها من سكات عاينت ليها و هي شاردة في البحر ..ما حست حتى بوجودي !
= نورس !
جفلت قبل تتلفت علي : اممم!!
ابتسمت بهدوء : وين شاردة ؟
خبت يدينها ورا ظهرها زي ما هي عادتها لمن تكون عايزه تخبي عني شي : ولا مكان
= والله ؟ شرودك كتر الايام دي!
نورس : من كم المصايب البتحدف علينا
"شالت نفس و كملت وهي بتعاين ناحية البحر " مافي فايدة حاولت معاهم كتير كأني ما بتكلم .. و حيدر كل يوم ماشي و جاي من قصر الملك واخد معاهُ الشيخ زايد .. وكل ما اجي اساله حايحصل شنو و وصلتوا لشنو ؟ما برد علي غير ب"قلدته" بنحاول بنحاول يانورس مافي جديد
= كلو حا يبان مع الوقت انتِ ما تشغلي نفسك
نورس : انا ما عارفاكي بتجبي البرود ده من وين ؟ بس انا ما بقدر اصبر لازم نتحرك و نعمل شي .. لينا عشرة ايام من ما جينا هنا و مافي ولاشي بيتغير .. بقيت ما بعرف سبب وجودنا لو حزران ما ضايفة لينا خلينا نشوف غيرها !
