" نور"
نزلوا من العربات العددها احصيته بنظرة سريعه من عيني عدد خمسة مدرعات كبيرة و عربية عادية .. مجموعة من الناس جو ناحيتنا .. وقفنا مستعدين لاي هجوم طارىء ممكن يحصل ويدنا على قلوبنا .. نحن لسه ما مستعدين لقتال ، يدوب منحمس في روحنا معقولة هزبر قد يصل لينا بالسرعة دي و جاينا في مكانا!
الشاب الكان محتل المقدمة و على ما يبدو انه القائد .. رفع يدينه فوق كحركة سلام يهدينا بيها .. حيدر وقف في المقدمة نزل سلاحه بينما الباقين لسه شايلين اسلحتهم .. مرة اللحظات تقيلة لغاية وصل عندنا .. اول ما قرب مننا حيدر قال : كنت متاكد انك حاتجي !
دخل يدينه في جيب بنطلونه الجيشي و رد : ما جاي عشانكم ، جاي عشان حق اخوي !
حيدر سلم علي بالكتف و ضغطت على يده .. من خلال كلامهم عرفت انه ظافر ..نظرة الشيخ زايد فيه ما خيبت ابدًا .. اشر للبقية الجات معاهُ بيده ، وكان عددهم ما بقل عن 2000 .. لمن قربوا اتضحت الصورة لمن عبيدة نط في رقبة واحد فيهم ورحب بي ترحيب حار .. كانوا البلغار زي ما اتوقعتهم بالضبط .. قلوبهم لسه حارة اتجاه المملكة الدم ما ببقى موية مهما حصل .. زدنا عدد الخيام و جهزنا اكل جديد للدفعة الجات .. ما نمنا لغاية الصباح اللي شمس سطعت بحرارة شديدة .
حيدر اقترح نتوجه لجبال عيسى كونها أمن حته في بلغاريا لينا و انسب مكان نهاجم منه هزبر بسبب موقعها الطرفي و المهمش ..رسلت اتنين من الشباب البلغار العارفين بالمكان يتفقدوا لينا الجو قبل نصل .. كملنا المسير و حددنا نقطة التلاقي التانية جنب وادي الهزار الببعد كيلو متر واحد من جبال عيسى .. وصلنا الوادي قبل المغرب بشوية ، برغم ان الوادي فاضي من اي انسان الا انه ارضه مخضرة كانه في اكتر من شخص برعيها .. المنظر يفتح النفس ضلفتين و يسمو بالروح من جماله .. بعد غروب الشمس بشوية جو الشابين الرسلتهم يتفقدوا جبال عيسى .. و الاخبار ما كانت سارة ابدًا و لقينا هزبر ختى عليها حراس و عددهم اتنين حسب كلام الشباب .. اتشاورت مع حيدر و قررنا اننا نعسكر في الوادي .. اتناقشنا مع الشباب في قرارنا يعض منهم وافق و منهم اقترح اننا نكمل في مخططنا الاول و نعكسر في جبال عيسى .. دار نقاش بين الطرفين حسمته بقرار نهائي باننا نعسكر في الوادي عشان الموية متوفرة و الجو معتدل ما زي جبال عيسى اللي مناخها غمام و ضباب طول الوقت .. وادي هزار كان وادي مكون من هضبتين بيفصل بيناتهم مجرى مائي .. اتقسمنا فريقين على منطقتين .. المنطقة المنخفضة و القريبة من المجرى المائي خصصناها للنسوان و الاطفال .. المنطقة المرتفعة و البعيدة حبتين من المجرى المائي خصصناها لمعسكر التدريبات الخاص بالمحاربين .. حماس الشباب خلاهم يبدو تدريب طول اليل .. استمرت التدريبات تلاتة اسابيع بلياليها .. اتكفل قائد الكتيبة الحزرانية بالتدريب ووزع اتنين من مساعدينه الاكفاء يعلموا المبتدئين امثال نورس اللي اندست غصب في نصهم و رفضت الا و تدرب معاهم و انضمت ليها زليخة .. اما انا فكنت بعرف كل تكتنيكات القتال من ابوي الله يرحمه فما حبيت ادخل تكنيك جديد و اكتفيت بتعلم اطلاق الرصاص .. ما كان صعب علي اتعلمه خصوصي اني مهارة مسبقًا في الرماية .
