جماره الجزء الثانى مكتمله

٢٨

جماره
الجزء الثاني بارت 28

حكيم خد نفس وطلعه براحه وهو عيبتسم بفرحه ورد علي بكر بكل هدوء :
حمداله ع السلاااااااامه يابكر،، واخيرا رديت!!!!!
بكر : رديت وطالب العون وقلبي قاصدك ففزعه ياشيخ حكيم..

حكيم : والشيخ حكيم معيردش طالب عون ولا عيتأخر ففزعة يابكر.. قول ياداكتور ايه اللي تاعب قلبك وخلاه استجار وخفض جناح الزل!

بكر : العشق يابوي.. العشق اللي زلزل القلب وذله.
حكيم : العشق عمره ماكان مذله يابكر،، العشق عزه وفخر،، العشق دليل علي ان القلب عايش وعينبض وفيه الروح،، والقلب اللي يسكنه العشق صاحبه لازمن يجاهر بيه عشان العشق معيسكنش غير القلوب النضيفه،، وعمر العشق والقلوب السوده مايكونوا ساكن ومسكون ابدا..

بكر : جاهرت ياشيخ وقولت، وعريت ستر قلبي قدام بت عواد ومقدرتش ولا صانت

حكيم : طول ماعتتكلم عن التقدير ونادم عالبوح تبقي مش عاشق ياواد حكيم،، عشان اللي يبوح بالحب ويستنظر من حبيبه الشكر والعرفان عيكون قدم محبته وتبعها بالمن والاذى..
العشق مش سلعه ولا ينفع نقايضوا عليها ولا اقول لحد اديتك كيل محبه ردهولي..

العشق بذره ياولدي ترميها فقلب حبيبك وترويها بالصبر وبالموده واللين، وتراعيها وتشوفها وهي عتنبت وعتكبر قدامك يوم عن يوم، لغاية ماتطرح سبع سنابل محبه ويوم ماتيجي تحصد زرعك تفرح باللي تعبت عليه وضاعفهولك رب العباد اضعاف.

بكر : بس اني محداييش صبر ولا ليا فطولة البال وانت خابر ديه يابوي.

حكيم : الا خابر،، بس لازمن تتعلم وتحاول لغاية مالصبر يتغزل فأطباعك وإن كان على طولة البال فهي كيف التقل عتكون صنعه والشاطر بس هو اللي يتعلمها..

بكر : طيب دبرني اتصرف كيف مع بت عواد اللي عامله كيف القبر وافعاله مش عارف ايه اللي جواها ولا عقلها عيفكر كيف وكل مااقول وصلتلها تفر منى وتبعد.

حكيم : والله يابكر بأعمالك الزينه هتأمن القبر وافعاله،، والحريم ياولدي مهما زعلت وغضبت ابوهم كلمتين حلوين عشان قلبهم فودانهم..

بكر : اهو هما دول الكلمتين اللي اني قولتهم وسمعتهم وزعلت.
حكيم باستغراب : قولتهم كيف ياحزين، قولتهم ليها يابو نص عقل؟

بكر : له قولتهم لسخاوي وهي سمعتني وعملت حكايه،، وبدال ماكانت المفروض النهارده صباحيتنا خلتها اربعين عزا على راسى..

حكيم خد نفس وطلعه بقلة حيله لما استشف اللي حصل وخمنه وبهدوء قال لبكر.. احكيلي اللي حصل بالظبط يابكر..

بكر ابتدا يحكي لابوه وحكيم كان مغمض عنيه بغلب وهو عيسمع وبعد مابكر خلص كلامه سكت وحكيم فتح عنيه ورد عليه :

بَو يابكو والابَو منك سخاوي.. ماله هو يتدخل فخصوصيات اتنين متجوزين ويسأل كيف ومش كيف؟ افرض انت واحد غشيم وحكيتله تفاصيل تشيلك وتشيله ذنب وكشفت قباله ستر مرتك يبقي ايه العمل وكتها،،، وانت يابكر مش كنت تقوله كله بتوفيق من الله وخلاص،، طب اهو ربنا عاقبك لحالك علي غلطتك وغلطته،،