SHORT STORIES

4.) Billionaire's Substitute Bride

Napakaganda ng sikat ng araw pero hindi pabor para kay Aliya. Pawis na pawis na siya sa halos dalawang oras na paglalakad pero nakikisabay pa ang init ng panahon.

"Hay, naku! Malas naman oh!" Reklamo niya sabay upo sa gilid ng kalsada.

Hinubad niya ang suot na three inches heels na binili pa niya sa ukay. Ni-repair pa niya ang takong n'on para siguradong hindi mapuputol habang naglalakad siya.

"Ang sakit na ng paa ko, wala pa rin akong trabaho!" Naiiyak niyang sabi.

Pangatlong araw na niya sa Maynila pero wala pa ring tumatanggap sa kanyang pinag-aaplayan. Palaging walang bakante o kaya naman hindi siya qualified. Nakatapos naman siya ng high school. Bakit ang aarte ng mga napupuntahan niya? Waitress, janitress, sales lady, kahit dishwasher papasukin niya pero hindi raw siya qualified. Kailangan ba ngayon may degree kapag maghuhugas ng pinggan?

"Nakakainit ng ulo!" Reklamo niya.

"Mataas kasi ang sikat ng araw kaya naiinitan ang ulo mo. Mamalimos ka na lang, araw-araw ka pang may kita." Sagot naman ng batang pulubi sa katabi niya.

"Magkano naman ang kinikita mo araw-araw?" Interesado niyang tanong. Parang gusto na niyang mag-change of mind. Paubos na ang laman ng dala niyang alkansya mas mabuti ng kumita siya kahit papaano.

"Seryoso ka?"

"Mukha ba akong nagbibiro? Sige na, sabihin mo na sa'kin. Share your secrets." Pagpupumilit niya.

"Manigas ka! Aagawan mo pa ako ng hanapbuhay, ang dami na nga namin dito."

"Aba! Tingnan mo 'to. Magbibigay ng suhestiyon pero babawiin din agad. Hoy!" Sigaw niya ng nilayasan siya ng pulubi.

"Gutom na ako," muli niyang sabi habang hawak ang kumakalam na tiyan.

Natanaw naman niya ang nagtitinda ng kakanin sa gilid.

"Magtinda na lang kaya ako ng pagkain? Naku, hindi pala pwede. Wala akong gamit sa pagluluto."

Nakita naman niya ang lalaking naniningil ng pamasahe sa isang bus.

"Konduktor na lang kaya?" Nabuhay ang loob ni Aliya. Mabilis niyang isinuot ang sapatos at nagmamadaling lumapit sa isang bus, pero may bumanggang lalaki sa kanya.

"Aray ko po!" Daing niya ng matumba sa semento. Napangiwi siya ng maramdaman ang sakit sa paa.

Nanlaki naman ang kanyang mata ng makitang tuluyang naputol ang takong ng kanyang sapatos tapos 'yung lalaking bumangga sa kanya, hindi man lang siya pinansin at nagpatuloy sa paglalakad.

"Hoy! Napaka-ungentleness mo!" Sigaw niya.

"Ungentle 'yon."

Tumaas ang kilay ni Aliya ng sumagot na naman ang pulubi kanina.

"Bakit narito ka? Lumayas ka sa harapan ko!" Sigaw niya rito.

"Ilang taon na akong nakatira rito tapos palalayasin mo ako? Ikaw itong bagong salta kaya ikaw ang lumayas."

"Wala akong pakialam. Alis!"

"Ang sungit mo, hindi ka naman maganda."

"Aba't-" Pinilit tumayo ni Aliya. Kahit masakit ang paa, tiniis niya. "Para sabihin ko sa'yo, Muse ako noong grade 1 hanggang... hoy! Kinakausap pa kita, bumalik ka rito!" Muli niyang sigaw ng nilayasan na naman siya ng Pulubi.

Pinagtuunan na lang niya ng pansin ang nasirang sapatos.

"Nakakainis naman ang lalaking 'yon. Kahit sana pambili ng tsinelas binigyan niya ako, kainis talaga."