Beware of the Class President (To be published!)

CAPITULO 1 - Pervert

The original timeline was set in the past, before the K-12 education system existed, but I've updated it to match what's familiar today.

------------------------------

CAPITULO 1

"PAPASOK KA NA SA SCHOOL?"

Nilingon ko si Mama, Karen Buenaventura, 45, byuda. Nakatayo siya sa pintuan ng kuwarto nila ng bago niyang kinakasama na si Tito Randy. Ang itsura niya ay bagong gising, gusot ang buhok at namimikit pa ang mga mata.

Isang buwan na mula nang magpasukan pero ngayon lang naisip ni Mama na tanungin ako. Hindi ko siya sinagot, tinalikuran ko na siya at lumabas na ako ng bahay.

Hindi na ako sumakay ng pedicab, dahil walking distance lang naman ang papunta sa school na pinapasukan ko, ang Sto. Cristo Senior High School. Isang semi-private senior high school sa lugar namin.

Nang malapit na sa gate ng school ay parami na nang parami ang kasabay kong mga naglalakad na estudyante. Ang tagal ko na sa school na ito at maging sa lugar na ito, pero iilan pa rin ang kakilala ko.

May iilan din naman akong namumukhaan; mga estudyante na madalas kong makasabay sa labas bagamat kahit kailan ay hindi ko pa nakita sa loob ng eskwelahan. Kakatwa na sa tuwing naiisip ko ang tungkol doon ay bigla na lamang magtatayuan ang aking mga balahibo sa katawan.

Bago ako makarating sa gate ay isang kotse ang huminto sa gilid ng daan. Bumaba mula roon ang isang matangkad na lalaki, naka-uniforme siya ng katulad sa uniform ng mga boys dito sa Sto. Cristo. Ang una kong napansin ay ang makinis at pangahan niyang mukha, maging ang kanyang matangos na ilong. Guwapo.

Ang lalaki ay pinagtitinginan ng mga kasabayan naming estudyante rin. Kilala siya. Kilala ko rin. Pumasok na pala siya nang mga araw na wala ako. Siya si Gabriel Juan T. Salgado.

Si Gabriel Juan o kilala sa tawag na 'El' ay crush ko mula noong Grade 9. Guwapo, palangiti, matalino. Gayunman, ang kumuha sa atensyon ko ay hindi ang kanyang panlabas na anyo, kundi ang nakakahawa niyang mga ngiti. Punong-puno siya ng buhay until...

...Naaksidente si El. Nahulog siya mula sa third floor ng Grade 12 Building. Na-comatose siya ng kalahating taon dahilan para mahinto sa pag-aaral. Ang akala ng lahat ay hindi na siya mabubuhay, pero inilaban siya ng mga magulang. Himala na nagising siya na para bang nagdahilan lang. Mabilis siyang naka-recover matapos ang therapy nitong nakaraang bakasyon.

Maraming bali-balita tungkol sa kanya. Nagbago raw ang kanyang ugali mula nang magising siya. Hindi na siya palangiti. Hindi rin palasalita. Naging masyadong seryoso at parang tagus-tagusan kung tumingin.

Hindi pa nga raw dapat siya i-enroll ngayong pasukan, kaya lang naisip siguro ng mga magulang niya na kaysa hayaan siyang nagkukulong lang sa kuwarto maghapon, ay makabubuti kung meron siyang pinagkakaabalahan.

"Kena!!!" sigaw ng babae na palapit sa akin. Nakatirintas ang buhok, chubby, cute. Kumikinang ang mga mata. Kaibigan ko mula Grade 7 na si Benita Rose Magtibay o 'Bhing'.

"Bakit, Bhing?"

"Absent ka kahapon kaya di mo tuloy alam naililipat ngayon sa room natin si El!" masayang sabi niya. Alam niya kasina katulad ng ibang babae ay naging crush ko rin noon si Gabriel Juan T.Salgado. "Grabe, Kena! Kapapasok niya pa lang, siya na agad iyong naging classpresident natin! E kasi naman, kilala siyang matalino at galing sa highestsection, tapos sa lowest section siya natin napunta ngayon!"

"Ano ngayon kung siya ang naging class president sa room natin? Wag mong sabihing may crush ka na sa kanya ngayon?" sabi ko habang naglalakad kami.