🍃🌼علاش تحير فيا...🌼🍃

🌠الحلقة 3...🌠

🍃🌼🍃

#رحيل_تحكي
مشيعة راسي لفوق ننفخ في دخان السيڨارو لفوق ونتخيل فيه كيفاش يتشكل ويترسم في لهواء.. كل ما نجبد نفس نحس قلبي يتسل معاه.. السيڨارو عقاب ليا.. كيني نقتل في إحساسي بيه كيني ندفن بدخانة قلبي ونغمو ونغطيه.. رمشت عينيا برشا مرات وباقي نفس لمشهد يتكرر قدامي.... بلي عملت وشوي فيه..وبلي بش نعمل باقي يتسمي نسايش فيييه.. تحلّ الباب وأنا بكل برود معملت ختي ردة فعل.. بقيت علي حالي رغم إنو عرفي هو الي دخل.. عرفي الي ينجم في اي لحظة يطردني مخفتش منو... اصلا أنا منخاااافش..
- رحييييل شنية الخبر الي هبطتو ياخي بعقلك انت؟؟؟؟ نورمال تعمل حاجة كيف هكا في سي خيّام ياخي متعرفوش ولد شكون وهو شكوووون
الكلمة ستفزتني " ولد شكون " كي هو ولد شكون عندو لحق يعمل الي يحب فلي يحب... خاطر هو ولد شكووون من حقو يعفس فينا احنا ولاد العامل اليومي.. ولاد الجزار.. ولاد الخضار.. ولاد السباك... ولاد عامل النظافة.. خاطر هو ولد فلان من حقو يركب علي ضهرنا احنا الي منكسابوا من الدنيا كان شرفنا وخدمتنا المتواضعة...
تنطرت من بقعتي طيشت السيڨارو وقمتلو متحزمة.. ضربت بيدي علي الطاولة.. عضيت علي شفتي بطريقة رعبتو.. قربت منو وتبسمت..
- سي منذر ياخي انت كنت تصيح عليا من شوية؟
( كبس روحو وغطس في لعرق)
- رحيل تعرفني منكلمش كي تهبط خبر الي تحب اما سي خيّام وسي ظافر وعايلة الريااااحي راو شطر الفلوس من عندهم.. هوما يمولوا فينا هووووما... وزيد نسيت بنت عمك تخدم غادي كان يطردوها
( طلعت فوق الطاولة ندلوح في راسي يمين ويسار متعجبة بيه)
- علي شوي فلوس بكشوووك مرخصو الحق عندكم والله... الناس اذوكم ينجموا يشريو كل كان الجنة وربي لا يشموا حتي ترابها... انا صحافية نهبط الي نحب مدامني نقول في لحق اصلا مزلت بش نقابل الطفلة ونثبت عليه تهمة الاعتداء علي قاصر
( ضرب يديه في بعضهم كي لعزوزة)- يا طفلة تحب توزرنا؟ ياخي تحب تخليها علي راسك وراسنا؟؟؟
قمت من بقعتي نلم في لوراق ونحكي
- خلي تخلي أنا معادش نسكت.. متعلمتش نخاف.. كي تجي تشوف انا منحسش أصلا.. وتوة تشاااو (خليتو مبهم وقبل نحل الباب درتلو بشوي) عرفي الغالي رد بالك طردني عاد لا نفضحك عند المدام والموجيرة لوخرااا الي تخون فيها معاها (غمزتو وهبط نتضيحك)
هي صحيح بش تخلي اما ميسااالش لمهم خيّاااام الرياحي يتحاسب.. نمشي ونفلفس في التلفون نحبو نحطو علي مود الطيارة ونڨلع لعالم اخر خاطر مريم نفختلي قلبي وهي تطلب فياااا
وأنا ككا تلطخت بجهامة قد السخطة وريحة برفان بنينة sauvage تعطرق وراقي تفرتو وحالتي تبعثرت.. نري فيه مطبس يلم في لوراق ومع هزة راسو شفتو.. تحكمت في صدمتي.. تحكمت في غشي.. والظاهر إنو معرفنيش... أي.. أااي معرفنيش... نترت الوراق من يدو وفحت فيه وهو باقي يبقق فيا وكلمة سامحني الي خرجت من فمووو شلتني... ياخي لمخلوق اذاكا يطلب سماح... اما زايد ميشفعلو شي... هو رزاني في العزاز اغالين وأنا بش نرجعهالو ثانية ومثلثة..
مريم الجمني