🍃🌼علاش تحير فيا...🌼🍃

🌠الحلقة 20...🌠

🍃🌼🍃

#اركان_يحكي
وقت إلي سونا تلفوني كنت ديجا مزلت كي وصلت  للفيلا.. كان من هيبة هبطت تجري وتسنيم بقات شادتلي وجهي.. نحب نهز علي مريم وهي واقفة كي العسكر...
قربت مني وعدات يديها علي كتفي وانا شديتلها يدها قريب نقسمها..
تبسمت بتسوميم تتبهن ونطقت
تسنيم:  حاول ترقد ومتكثرش مالسهر عزيزي.. غدويكا مرتك بش تشد المشروع الجديد متع الشركة وقلت لبابا الي نسيبو بش يجي زادة.. اكيد مكش بش تقول لا مش هكا
قالتها بنبرة استفزاز.. عطاتني بضهرها ومشات وانا هزيت.. جاني صوت راجل  وخبّرني إنو مريم في السبيطار وهو إلي ضربها.. ما ستنيتش دقيقة وديماريت الكرهبة ومشيت لسبيطار.. بقيت ربع ساعا نستني فيهغ ونخمم كيفاش بش نشد اراجل ونغفصو تحت ساقيا.. تخيلت برشا سيناريوات الا السيناريو الي شفتو قدامي توة...  تضحك وتتبسم مع الراجل الي ضربها بكرهبتو.. ولا.. محملها بين يديه تقول زوز عشاق واحنا دخلنا عليهم لبيت النوم.. حسيت الدم حبس في راسي والعصب مكني.. بلعت ريقي وقدمت ناحيتها.. ويا ميمتي علي كا الڨحرة الي عطاتهالي مريم تقول  انا الي ضربتها مش هو.. ياخي هالطفلة مخها كيفاش مفصل.. ڨحرتلي وحشات راسها في صدرو وانا تمنيت الارض وتنشق وتبلعني.. دخل بيها لداخل ووالطبة والفراملة كي شافوه تقول شافو شخصية معروفة... كرسي متحرك تحط قدامها وحطوه فيها ودخلوها.. وقفت بحذاه نسمع في الطبيب فاش يقول... يحكي معاه ب سي  وحضرتك وسيادتك تقول ولد الباشا.. بقيت نغزرلو نهز فيه ونحط.. لبستو ياسر مضخمة والآيفون الي في يديه يسوي لملايين.. ريحة برفانتو تعطرق.. حمحمت وفقت علي روحي.. الي يراني نغزرلو يقلك هذا موشو موشو... اما انا نغزلو ونتخيل في مريم اذا غزرتلو والا لا... مروان.. هذا اسمو الي قالو طبيب...
مروان:  نحبك تتلاهي بيها bien  من غير منوصيك عاد
الطبيب:  تهني سي مروان المدام في عينينا
علي كلمة مدام عروق راسي طرشقت وتلفتلو نغزل
انا:  شكون مدام؟؟؟  مريم قصدك
تبسم وحط يدو علي كتفي وانا قريب نتنطر عليه
مروان: relaaax صاحبي.. جيست بش يتلاهاو بيها اكثر.. اي شي تابعني يتاخذ بعين الاعتبار..
ملا مغرور... ضاربو في روحو.. طمنت الي هو مش ذوق مريك.. مريم تكره الراجل الي يبهبر ويتلاهي بالمضاهر برشا... اشرلي بيدو بش نقعدو..
مروان:  نلقاك آخر رقم طالبتو مريم.. انت خوها.. خطيبها.. صاحبها شنوة؟؟  
برسمي هالسؤال حيرني انا شنوة! 
بلعت ريقي وغزرت للفراغ..:  صديقها وكنت جارها... قلي ياخي انت هكا ديما تضرق البنات بكرهبتك وبعد تتلاهي بيه وتزهالك دنيا
مروان:  امممم وصريح برشا زادة ههههه...( حط ساق علي ساق يحكي بثقة)  لحق لا... ساعات  نعمل اكسيدون وي اما بعمري ما شفت وحدة كيف مريم
عينيا وساعو من كلامو.. دخلت يدي في جيوبي بس ميلاحظش غشي..
انا:  كيفاش يعني؟ 
مروان:  فيها حاجة مميزة برشا..( سرح شوي وانا متت... سرح؟؟  سرح يتخيل فيها يعني؟؟؟  لا انا مستحيل نسكت سيااااا) 
وبعد كا سرحة طلق ضحكة متع فرحة يحكي
مروان:  عينيها.. عينيها قصة اخرا... 
جيت بش نتكلم ونعبر علي غشي وجا الطبيب يحكي
الطبيب:  سي مروان... تنجم تشوف المدام.. كل شي  تمام.. شوي جروح ضمدناهم وعطينها ادوية.. نصف ساعة وتنجم تروح بيها..